Go Back

1 Akorintho Chapter 6

• 1. RĨU-RĨ, mũndũ wanyu aagĩa na ũndũ na mũndũ ũngĩ wanyu, githĩ nĩ gweta etaga na gũthiĩ gũcira nake mbere ya andũ arĩa matarĩ athingu, na ti mbere ya andũ arĩa aamũre?
• 2. Kana hihi mũtiũĩ atĩ andũ arĩa aamũre nĩo magatuĩra kĩrĩndĩ gĩothe gĩa thĩ? Na rĩrĩ, ongorũo nĩ inyuĩ mũgatuĩra kĩrĩndĩ gĩothe gĩa thĩ-rĩ, kaĩ mũtaiganĩte a gũtuaga macira o marĩa manyinyi mũno?
• 3. Kaĩ mũtakĩũĩ atĩ ithuĩ tũgatuĩra araika? Ĩ maũndũ marĩa makoniĩ muoyo ũyũ wa ndũire-rĩ, githĩ tũtingĩkĩhota kũmacira makĩria?
• 4. Na mwagĩkorũo nĩmũgĩaga na macira makoniĩ maũndũ ma muoyo ũyũ wa ndũire-rĩ, kaĩ mũkĩarahagia andũ matarĩ kĩene kanitha-inĩ makamũtuagĩre macira macio?
• 5. Ndoiga ũguo nĩguo ndĩmũconore. Githĩ gũtingĩoneka mũndũ o na ũmwe mũũgĩ thĩinĩ wanyu ũngĩhota gũtuithania ariũ a Ithe,
• 6. no kinya mũndũ ũmwe wa Ithe witũ athiage gũcira na ũrĩa ũngĩ o wa Ithe witũ, na matwaranage harĩ andũ matetĩkĩtie?
• 7. Ũndũ kũrĩ, nĩ atĩ ũndũ ũcio wa gũthitakana inyuene nĩ ihĩtia rĩmũthũkĩire mũno. Githĩ ti kaba mwĩtĩkagĩre gwĩkwo ũũru? Githĩ ti kaba mwĩtĩkagĩre gũtunyũo?
• 8. Ũrĩa kũrĩ, nĩ atĩ nĩmwĩkanaga ũũru inyuene, na mũgatunyana, na acio mwĩkaga ũguo nĩ ariũ a Ithe wanyu.
• 9. Kana hihi mũtiũĩ atĩ andũ arĩa mekaga ũũru gũtirĩ ũngĩgaya ũthamaki wa Ngai? Menyai mũkanaheneka: ahũrimaraya-rĩ, kana ahoi-mĩhianano, kana itharia, kana arĩa metuaga ta aka, kana arũme arĩa magwataga arũme arĩa angĩ-rĩ,
• 10. kana aici, kana andũ a riitho iraya, kana arĩa arĩu, kana arumani, o na kana ahahanyi-rĩ, acio othe gũtirĩ ũkagaya ũthamaki wa Ngai.
• 11. Na inyuĩ amwe-rĩ, nĩ ũguo mwatariĩ: no nĩ gũthambio mwathambirio, kwamũrũo nĩmwaamũrirũo mũtuĩke atheru, nĩ gũtuwo mwatuirũo athingu thĩinĩ wa rĩĩtwa rĩa Mwathani Jesu Kristo, o na nĩ ũndũ wa Roho wa Ngai witũ.
• 12. Niĩ-rĩ, kũhingwo ndirĩ ũndũ ’hingĩirũo; no rĩrĩ, ti maũndũ mothe marĩ ũguno. Kũhingwo ndirĩ ũndũ ’hingĩirũo; no ndingĩĩtĩkĩra nduĩke wa gwathagwo nĩ ũndũ o na ũrĩkũ.
• 13. Irio nĩ cia nda, o na nda nayo nĩ ya irio; no Ngai nĩ kũnina agacinina cio cierĩ. Ĩndĩ mwĩrĩ-rĩ, ti wa gũtuwo wa ũmaraya, tiga ũtuĩke wa Mwathani, nake Mwathani aathage mwĩrĩ ũcio.
• 14. Na Ngai nĩaariũkirie Mwathani, na ithuĩ o na ithuĩ nĩ gũtũriũkia agatũriũkia na ũhoti wake.
• 15. Kaĩ mũtoĩ atĩ mĩĩrĩ yanyu nĩ ciĩga cia Kristo? Na kuona atĩ itariĩ ũguo-rĩ, mũgũkĩenda njoe ciĩga cia Kristo ndĩcitue ciĩga cia mũka wa maraya? Kũroaga gũtuĩka ũguo!
• 16. Kana mũtiũĩ atĩ mũndũ ũgwatana na mũka wa maraya maatuĩka mwĩrĩ ũmwe nake? Nĩ gũkorũo nĩkwerirũo atĩrĩ, Acio erĩ no matuĩke mwĩrĩ ũmwe.
• 17. No rĩrĩ, mũndũ ũrĩa ũgwataine na Mwathani-rĩ, ũcio nĩmaatuĩka roho ũmwe nake.
• 18. Ũragĩrai ũmaraya. Rĩĩhia rĩngĩ o rĩothe rĩrĩa mũndũ ehagia, kĩhumo kĩarĩo kĩĩ na nja ya mwĩrĩ; no rĩrĩ, mũndũ wa kũhũra maraya, nĩ mwĩrĩ wake mwene ekwĩhia.
• 19. Kana hihi mũtikũmenya atĩ mĩĩrĩ yanyu nĩ hekarũ ya Roho Mũtheru ũrĩa ũikaraga thĩinĩ wanyu, ũrĩa mwaheirũo nĩ Ngai? Inyuĩ-rĩ, mwene inyuĩ ti inyuĩ,
• 20. nĩ ũndũ nĩ kũgũrũo mwagũrirũo, mũgĩkĩrutĩrũo kĩndũ kĩĩ goro; tondũ ũcio-rĩ, maũndũ ma mĩĩrĩ yanyu, goocithagiai Ngai namo.

Home