Go Back

1 Akorintho Chapter 4

• 1. Ithuĩ-rĩ, mũndũ nĩakĩonage ta tũrĩ o njaguti cia Kristo, na ta tũrĩ aramati a maũndũ marĩa ma hitho ma Ngai.
• 2. Naho ha ũhoro wa aramati-rĩ, no mũhaka mũndũ ta ũcio akoragwo arĩ wa kwĩhokeka.
• 3. No niĩ-rĩ, nguona ta arĩ ũndũ mũnyinyi mũno ũhoro wakwa ũtuĩrio nĩ inyuĩ, o na kana ũtuĩrio cira-inĩ o ũrĩkũ mũraarĩrie nĩ andũ; o na niĩ mwene ndingĩĩtuĩria.
• 4. Amu ndiũĩ ũndũ ingĩĩcuka naguo; no rĩrĩ, ũguo ndũngĩtũma nduwo mwega, ĩndĩ, ũrĩa ũnduĩragia nĩ Mwathani.
• 5. Tondũ ũcio-rĩ, gĩtigei gũtua ũndũ hĩndĩ ĩtanakinya, rĩrĩa Mwathani agoka, nake oimĩrie maũndũ marĩa maikarĩte me mahithe nduma-inĩ, na atũme meciria ma ngoro cia andũ monekane. Hĩndĩ ĩo-rĩ, nĩrĩo mũndũ o mũndũ akaheo ngatho yake nĩ Ngai.
• 6. Rĩu-rĩ, ariũ a Ithe witũ, maũndũ macio ndĩmaringanĩtie na ũhoro wakwa mwene na wa Apolo nĩ ũndũ wanyu, nĩ getha ũhoro ũcio witũ mũhote kwĩruta naguo atĩ gũtige kwagararũo maũndũ marĩa maandĩke, mũndũ o na ũrĩkũ wanyu ndakanagĩtuĩke wa gwĩtũũgĩria na ũhoro wa mũndũ ũmwe, akĩmenereria ũrĩa ũngĩ.
• 7. Tondũ-rĩ, wee, nũ wakwamũranirie na andũ arĩa angĩ? Na nĩ kĩ ũrĩ nakĩo gĩtarĩ gĩa kũheo? Na rĩrĩ, ongorũo nĩ gĩa kũheo-rĩ, ũgũkĩĩraha nĩkĩ, ta atarĩ kũheo waheirũo?
• 8. Inyuĩ-rĩ, nĩmũrĩkĩtie kũhũna, gũtonga nĩmũrĩkĩtie gũtonga, mũtuĩkĩte a gũthamaka o ithuĩ tũtarĩ ho; ĩ naarĩ korũo nĩmũtuĩkĩte a gũthamaka kũna, nĩ getha ithuĩ na ithuĩ tũkorũo tũgĩthamakanĩra o hamwe na inyuĩ!
• 9. Amu niĩ nyonaga atĩ ithuĩ atũmwo nĩ ta Ngai ũtuumĩrĩtie kĩhaaro tuonanio thutha wa andũ arĩa angĩ othe, ta arĩ ithuĩ tũtuĩrĩirũo kũũragwo: nĩ gũkorũo nĩtũtuĩtwo ta mwago wa kwĩrorerũo thĩ yothe nĩ araika o na andũ.
• 10. Ithuĩ tũtũire tũrĩ irimũ nĩ ũndũ wa Kristo, no inyuĩ mũrĩ ogĩ thĩinĩ wa Kristo; ithuĩ-rĩ, nĩ kwaga twagĩte hinya, no inyuĩ mũrĩ na hinya; inyuĩ-rĩ, mũrĩ ekĩrĩre, no ithuĩ nĩtũmenekete.
• 11. O gwata thaa ĩno tũrĩ, ithuĩ tũtũire o tũhũtaga na tũkanyota, na tũkaaga nguo, na tũkahũragwo na ngundi, na tũtirĩ na mĩciĩ iitũ;
• 12. ningĩ nĩtwĩnogagia tũkĩrutaga wĩra na moko maitũ ithuene. Na hĩndĩ ĩrĩa tũkũrumwo, no kũrathimana tũrathimanaga, na hĩndĩ ĩrĩa tũkũnyarirũo, no gũkirĩrĩria tũkiragĩrĩria;
• 13. na rĩrĩa tũgũcambio no gũthaithana tũthaithanaga; nginya o ũmũthĩ tũtuagwo ta arĩ ithuĩ gĩko gũkũ thĩ, na ta arĩ ithuĩ makũro marĩa makũrũragwo ma indo o na arĩ irĩkũ.
• 14. Ndikwandĩka maũndũ macio ngĩenda kũmũconora, tiga ndĩmũtaare o ta mũrĩ ciana ciakwa iria nyenda mũno.
• 15. Nĩ ũndũ atĩrĩ, o na mũngĩkorũo mũrĩ na andũ aingĩ ta ngiri ikũmi a kũmũtwara mũkinye harĩ Kristo, maithe-rĩ, mũtirĩ namo maingĩ, amu niĩ nĩ niĩ ndatuĩkire ithe wanyu ndĩ thĩinĩ wa Kristo Jesu, nĩ ũrĩa ndamũhunjĩirie Ũhoro-ũrĩa-Mwega.
• 16. Tondũ ũcio-rĩ, ndamũthaitha mwĩtĩkĩre kwĩgerekania na niĩ.
• 17. Na nĩ ũndũ wa ũhoro ũcio nĩndeketie Timotheo kwanyu, nĩwe mwana wakwa thĩinĩ wa Mwathani ũrĩa nyenda mũno na ũrĩa mwĩhokeku, nake nĩwe ũkamũririkania ũhoro wa mĩthiĩre ĩrĩa ’thiaga nayo ndĩ thĩinĩ wa Kristo, o ta ũrĩa ndutanaga makanitha-inĩ mothe o kũndũ guothe.
• 18. Andũ amwe-rĩ, nĩ gwĩtũũgĩria metũũgĩrĩtie, moĩ atĩ ndigũũka kũu kwanyu.
• 19. No rĩrĩ, nĩndĩũka kwanyu ica ikuhĩ, Mwathani enda; na hĩndĩ ĩo nĩndĩĩmenya ũrĩa ũhoti wa andũ acio metũũgĩrĩtie ũigana, thengia ũhoro wao wa kanua.
• 20. Amu-rĩ, ũthamaki wa Ngai ti ũhoro wa kanua, no nĩ wa kũgĩa na ũhoti.
• 21. Mũgũkĩenda atĩa? Njũke kũrĩ inyuĩ ndĩ na rũthanju, kana njũke ndĩ na wendani, na ngoro ĩhoreire?

Home