Go Back

1 Akorintho Chapter 14

• 1. RŨMAGĨRĨRAI o kwendana; ningĩ mwĩriragĩrie mũno kũgĩa na maũndũ ma kĩĩroho, no makĩria mwĩriragĩrie kũheo ũheani wa ũhoro.
• 2. Nĩ gũkorũo mũndũ ũrĩa ũthiomaga, ti andũ aaragĩria, nĩ Ngai; nĩ ũndũ gũtirĩ mũndũ ũngĩigua ũrĩa ekuuga, no nĩ maũndũ ma hitho aaragia na roho wake.
• 3. No rĩrĩ, ũrĩa ũheanaga ũhoro, nĩ ũhoro aheaga andũ wa kũmongerera hinya, na wa kũmomĩrĩria, o na kũmahoreria.
• 4. Ũcio ũthiomaga-rĩ, nĩ ngoro yake mwene atũmaga yongerereke hinya; no ũrĩa ũheanaga ũhoro, nĩ kanitha atũmaga wongerereke hinya.
• 5. Na nĩngwenda mũgĩe na ũhoro ũcio wa gũthioma inyuothe, no makĩria ndenda mũheanage ũhoro; o na mũndũ ũheanaga ũhoro-rĩ, nĩ mũnene kũrĩ ũrĩa ũthiomaga, tiga o akorirũo agĩtaũranĩra thiomi icio, nĩ getha kanitha ũgwate kuongererũo hinya.
• 6. No rĩu-rĩ, ariũ a Ithe witũ, ingĩgĩũka kũrĩ inyuĩ ngĩthiomaga-rĩ, ndakĩmũguna na kĩ, tiga o ngorirũo ngĩaria ndĩ na ũndũ ngũmũguũrĩria, kana ũrĩa ngũmuongerera ũmenyo naguo, kana ũrĩa ngũmũrathĩra, kana ũrĩa ngũmũruta?
• 7. O nacio indo iria itarĩ muoyo, iria igambaga-rĩ, ta mũtũrirũ kana kĩnanda kĩa mũgeto-rĩ, ingĩkorũo mĩgambo yacio ndĩgũkũũrĩkana wega-rĩ, rũĩmbo rũakĩiguĩka atĩa rũrĩa rũrenda kũinio nĩ mũtũrirũ ũcio kana kĩnanda kĩu?
• 8. Ningĩ karumbeta kangĩkĩgamba mũgambĩre ũtangĩhota gũkũũranwo ũrĩa ũkuuga-rĩ, nũ ũngĩgwata gwĩthagathagĩra ita?
• 9. Na noguo na inyuĩ, nĩmĩ cianyu ingĩkĩaga kwaria ũhoro ũngĩhũthĩra kũiguĩka rĩ, kaĩ ũhoro ũrĩa uugĩtwo ũrĩkĩmenyekaga atĩa? Amu mwaya gũtuĩka ta andũ megũikia mũgambo o ũguo rĩera-inĩ.
• 10. No gũkorũo mĩthemba ya mĩario ĩrĩa ĩrĩ gũkũ thĩ nĩ mĩingĩ ma, na gũtirĩ o na ũmwe ũtarĩ ũrĩa uugaga.
• 11. No ndakorũo niĩ ndikũmenya ũrĩa mwario mũna ũkuuga-rĩ, no nduĩke ta mũrũrĩrĩ harĩ ũcio ũranjarĩria, o nake mũnjarĩria atuĩke ta mũrũrĩrĩ harĩ niĩ.
• 12. Na noguo na inyuĩ, kuona mũrĩ na kĩyo ũhoro-inĩ ũcio wa maũndũ ma kĩĩroho-rĩ, kĩrongoriei kũingĩhĩrũo nĩmo, nĩ getha mũtũmage kanitha wongerereke hinya.
• 13. Na tondũ ũcio-rĩ, mũndũ ũrĩa waragia rũthiomi nĩahoe atĩ amenyage kũrũtaũra.
• 14. Nĩ gũkorũo rĩrĩa ngũhoya Ngai, ingĩaria ngĩthiomaga-rĩ, roho wakwa nĩũrahoya, no meciria makwa mo matirĩ ũndũ mekũruta.
• 15. Nĩ atĩa kũngĩgĩĩkwo? Nĩ rĩrĩ, ndĩĩhoyaga Ngai na roho, na ’hoyage na meciria o namo; o na kũina ndĩrĩinaga na roho, na nyinage na meciria o namo.
• 16. Kwaaga ũguo-rĩ, wee ũngĩkorũo ũkĩgatha Ngai na roho, mũndũ wa arĩa matarĩ ahe ũũgĩ ũcio angĩkĩamũkĩria oige “Amen” atĩa, hĩndĩ ĩo ũgũcokeria Ngai ngatho, kuona ndoĩ ũrĩa ũkuuga?
• 17. Amu-rĩ, wee ti-itherũ nĩũracokia ngatho wega, ĩndĩ mũndũ ũcio ũngĩ ndekuongererũo hinya nĩ ũhoro ũcio.
• 18. Nĩndacokeria Ngai ngatho tondũ atĩ niĩ nĩnjaragia thiomi icio kũmũkĩra inyuothe;
• 19. no ningĩ, ndĩ harĩa kanitha ũũnganĩte-rĩ, ndenda kaba njarie o ciugo ithano iria ndĩĩcirĩtie, ngĩrute andũ angĩ ũhoro nacio, kũrĩ kwaria ciugo ngiri ikũmi cia gũthioma.
• 20. Ariũ a Ithe witũ, tigagai gũikara na meciria ta ma ciana. No ha ũhoro wa waganu-rĩ, tuĩkagai o ta tũkenge, na ha ũhoro wa meciria manyu mũgĩtuĩkage ta andũ agima.
• 21. Marũa-inĩ ma watho nĩ haandĩke atĩrĩ, Kĩrĩndĩ gĩkĩ nĩngakĩarĩria na tũnua twa andũ mathiomaga, ndĩkĩarĩrie na mĩromo ya andũ ageni; ningĩ o na ndeka ũguo-rĩ, ti atĩ nĩgĩkanjigua: nĩguo Mwathani ekuuga.
• 22. Hakĩrĩ ũguo-rĩ, ũhoro ũcio wa kwaria na thiomi nĩ kĩonereria gĩa kuonereria andũ arĩa matetĩkĩtie, na ti arĩa metĩkĩtie; no ũheani wa ũhoro-rĩ, nĩ wa arĩa metĩkĩtie, ti wa arĩa matetĩkĩtie.
• 23. Tondũ ũcio-rĩ, andũ othe a kanitha mangĩkorũo monganĩte, nao othe makorũo makĩaria thiomi, na hacoke hatonye andũ amwe arĩa matarĩ ahe ũũgĩ ũcio, kana andũ matetĩkĩtie-rĩ, githĩ matingĩkiuga atĩ mũrĩ agũrũki?
• 24. No rĩrĩ, othe mangĩkorũo makĩheana mohoro-rĩ, na hĩndĩ ĩo hacoke hatonye mũndũ ũtetĩkĩtie kana ũtarĩ mũũgĩ na ũhoro ũcio, mũndũ ũcio nĩekũhootwo nĩo othe, agagĩcirithio nĩo othe;
• 25. maũndũ marĩa atũire ahithĩte ngoro-inĩ yake magakiumbũrio; akaya kwĩgũithia agaturumithia ũthiũ thĩ ahoe Ngai, akoiga mũno atĩ ti-itherũ Ngai e gatagatĩ-inĩ kanyu.
• 26. Hakĩrĩ ũguo, ariũ a Ithe witũ, nĩ atĩa ũkĩrĩ wega? Rĩrĩa mwongana-rĩ, o mũndũ anga akoragwo arĩ na thaburi ekũina, kana arĩ na ũndũ ekwenda kũrutana, kana arĩ na ũndũ aguũrĩirio, kana akaaria na rũthiomi, kana akenda kũrũtaũranĩra. Ta kĩrekagei maũndũ mothe mekwo na njĩra ĩrĩa ĩngĩtũma andũ mongerereke hinya.
• 27. Kũngĩgĩkorũo nĩgũkwario rũthiomi-rĩ, nĩrũkĩario nĩ andũ ta erĩ, na matigakĩre atatũ, o mũndũ ihinda rĩake; na kũgĩe na mũndũ wa gũtaũranĩra.
• 28. Na kwaaga mũtaũranĩri, mũndũ nĩekirĩre ki e hau kĩũngano-inĩ gĩa kanitha, akĩĩarĩrie we mwene, o akĩaragĩria Ngai.
• 29. Nao aheani-ũhoro nĩmaaragie o erĩ kana atatũ, na andũ arĩa angĩ makũũranage ũrĩa gũkuugwo.
• 30. No rĩrĩ, mũndũ ũngĩ ũikaire ho angĩkorũo arĩ na ũndũ aaguũrĩrio, ũrĩa wa mbere nĩakire.
• 31. Nĩ gũkorũo gũtirĩ kĩgiria mũheane ũhoro inyuothe, mũndũ hake, mũndũ hake, nĩ getha andũ othe marutwo maũndũ, na othe momĩrĩrio;
• 32. namo maroho ma anabii nĩmaathĩkaga nĩ anabii o ene.
• 33. Nĩ gũkorũo Ngai ti Ngai wa ngũĩ, no nĩ wa thayũ; ũguo noguo kuonekaga makanitha-inĩ ma andũ arĩa aamũre mothe.
• 34. Atumia-rĩ, marĩ ciũngano-inĩ cia kanitha, no mekiragĩre: amu gũtingĩheanwo rũtha maaragie; wega no maikarage marĩ a gwathwo, o ta ũrĩa watho o naguo ũtuĩte.
• 35. Na menda kũrutwo ũndũ, nĩmoragĩrie athuri ao ene kwao mũciĩ; amu mũtumia angĩaria kĩũngano-inĩ gĩa kanitha, ũguo watuĩka ũndũ ũngĩconora andũ.
• 36. Hĩ, nĩ atĩa? Ũhoro wa Ngai wakĩambire kũhunjanĩrio nĩ inyuĩ? Kana wagĩũkire o kũrĩ inyuĩ inyuiki?
• 37. Ongorũo kũrĩ mũndũ wonaga ta arĩ mũnabii, kana ta arĩ na maũndũ ma kĩĩroho-rĩ, mũndũ ũcio nĩakĩmenye wega atĩ maũndũ macio ndĩramwandĩkĩra nĩ marĩa maathanĩtwo nĩ Mwathani.
• 38. No rĩrĩ, akorũo kũrĩ mũndũ ũkũrigwo nĩ ũguo, ũcio nĩagĩikare arĩ o mũrige.
• 39. Ũhoro wagĩkinya hau, ariũ a Baba-rĩ, kĩĩriragĩriei mũno kũheanaga ũhoro, naguo ũhoro wa kwaria thiomi-rĩ, mũtikaũkaananie.
• 40. No rĩrĩ, maũndũ mothe ta nĩmekagwo na mwĩkĩre ũrĩa wagĩrĩire na mekagwo na kĩhaarĩro kĩega.

Home