Go Back

1 Akorintho Chapter 12

• 1. NA rĩu, ariũ a Ithe witũ-rĩ, ha ũhoro wa maũndũ marĩa magĩagwo namo ma kĩĩroho-rĩ, ndikwenda mũrigwo nĩ ũrĩa ũtariĩ.
• 2. Mũtiũĩ atĩ rĩrĩa mwatũire mũrĩ o andũ a Ndũrĩrĩ nĩmwatwaragĩrĩrio ũhoro-inĩ wa mĩhianano ĩrĩa ĩtaaragia, o na harĩa hothe mũngĩrorio naho?
• 3. Tondũ ũcio nĩngwenda kũmũmenyithia atĩrĩ, atĩ mũndũ ũkwaria arĩ na Roho wa Ngai-rĩ, gũtirĩ ũngiuga, Jesu arogwatwo nĩ kĩrumi! O na gũtirĩ mũndũ ũngĩhota kuuga atĩ Jesu nĩwe Mwathani atarĩ na Roho Mũtheru.
• 4. Na rĩrĩ, iheo iria iheanagwo ciumanĩte na Wega wa Ngai nĩ mĩthemba mĩthemba, no rĩrĩ, Roho mwene cio no ũmwe.
• 5. Mĩtungatĩre o nayo nĩ mĩthemba mĩthemba, na Mwathani mwene yo no ũmwe.
• 6. O nayo mĩĩkĩre ya maũndũ nĩĩtiganĩte mĩthemba, ĩndĩ Ngai no ũmwe, ũcio wĩkithagia maũndũ macio mothe thĩinĩ wa andũ othe.
• 7. No rĩrĩ, mũndũ o mũndũ aheagwo ũndũ wake ũrĩa wonanagia atĩ arĩ na Roho nĩ getha ũndũ ũcio ũgune andũ othe.
• 8. Tondũ wa kũheo nĩ Roho-rĩ, mũndũ ũmwe agĩaga na ũhoro wa kwaria ũrĩ ũũgĩ; ũngĩ akagĩa na ũhoro ũrĩ ũmenyi mũkinyanĩru werekanĩrĩire na wa Roho o ro ũcio;
• 9. nake ũngĩ akaheo wĩtĩkio, nĩ ũndũ wa Roho o ro ũcio; ũngĩ akaheo ũhoti wa kũhonania mĩrimũ, no ũndũ wa Roho o ũcio ũmwe;
• 10. ũngĩ nake akaheo ũhoti wa kũringa ciama, ũngĩ ũrathi, ũngĩ ũhoti wa gũkũũrana maroho; ũngĩ gũthioma thiomi, na ũngĩ ũtaũri ahote gũtaũra thiomi icio.
• 11. No rĩrĩ, maũndũ macio mothe no wĩra wa Roho o ro ũcio ũmwe, akigayagĩra andũ o ta ũrĩa ekwenda, o mũndũ mwanya, o mũndũ mwanya.
• 12. Amu-rĩ, o ta ũrĩa mwĩrĩ wa mũndũ ũrĩ na ciĩga nyingĩ, na mwĩrĩ ũcio no ũmwe, nacio ciĩga ciothe ciaguo, o na ciatuĩka nĩ nyingĩ, no mwĩrĩ o ũmwe-rĩ, ũguo no taguo ũhoro wa Kristo ũtariĩ.
• 13. Nĩ gũkorũo ithuĩ twabatithirio ithuothe nĩ ũndũ wa Roho o ũmwe tũtuĩke mwĩrĩ o ũmwe, tũrĩ Ayahudi, kana tũrĩ Ayunani, o na kana twĩ ngombo kana tũtarĩ ngombo; na ithuothe tũgĩkĩnyuithio Roho o ũmwe.
• 14. Amu mwĩrĩ-rĩ, ti wa kĩĩga kĩmwe, nĩ wa ciĩga nyingĩ.
• 15. Kũgũrũ kũngiuga, Tondũ ti niĩ guoko-rĩ, niĩ ndikĩrĩ wa mwĩrĩ ũyũ-rĩ, ũguo ndũngĩtũma kwage gũtuĩka kwaguo.
• 16. Nakuo gũtũ kũngiuga, Na niĩ, tondũ ti niĩ riitho-rĩ, niĩ ndikĩrĩ wa mwĩrĩ ũyũ-rĩ, ũguo ndũngĩtũma kwage gũtuĩka kwaguo.
• 17. Mwĩrĩ wothe ũngĩtuĩka no riitho itheri-rĩ, kũigua twakĩiguaga na kĩ? Ningĩ mwĩrĩ wothe ũngĩtuĩka no gũtũ gũtheri gwa kũigua nakuo-rĩ, ĩ kũnungĩra twakĩnungagĩra na kĩ?
• 18. No rĩrĩ, ũrĩa kũrĩ nĩ atĩ Ngai nĩekĩrire o kĩĩga thĩinĩ wa mwĩrĩ o harĩa endete gĩikare.
• 19. Na rĩrĩ, ciothe ingĩtuĩka no kĩĩga kĩmwe-rĩ, mwĩrĩ naguo wakĩgĩa ha?
• 20. No ũrĩa kũrĩ, nĩ atĩ ciĩga nĩ nyingĩ, no mwĩrĩ nĩ ũmwe.
• 21. Narĩo riitho rĩtingĩhota kwĩra guoko atĩrĩ, Niĩ ndirĩ na bata nawe; kana mũtwe naguo wĩre magũrũ, Niĩ ndirĩ na bata na inyuĩ.
• 22. No makĩria mũno, ciĩga cia mwĩrĩ iria cionagwo ii njacu kũrĩ iria ingĩ-rĩ, nĩcio itangĩtigĩka;
• 23. na mĩĩrĩ iitũ kũrĩa tuonaga ta gũtarĩ gwa gũtĩwo mũno, kũu nĩkuo tũheaga gĩtĩo kĩnene makĩria, harĩa honagwo ta harĩ thoni hagagĩtuwo haagĩrĩru gũkĩra kũrĩa kũngĩ;
• 24. ĩndĩ harĩa hathaka hatirĩ ũndũ habataire gwĩkwo. Mwĩrĩ-rĩ, Ngai nĩ kũũiguithania aũiguithanĩtie, harĩa hatingiarĩtie agakĩhahe gĩtĩo makĩria ma harĩa hangĩ,
• 25. nĩ getha mwĩrĩ: ndũkagĩe na ũndũ ũngĩwamũkania, no atĩ ciĩga ciaguo imenyanagĩrĩre, o kĩĩga na kĩrĩa kĩngĩ.
• 26. Na kĩĩga kĩmwe kĩngĩkorũo gĩkĩnyarirĩka, ciĩga iria ingĩ ciothe nĩinyarirĩkaga hamwe nakĩo. Na kĩĩga kĩmwe kĩngĩkorũo kĩheetwo gĩtĩo-rĩ, ciĩga iria ingĩ ciothe igagĩkenanĩra hamwe nakĩo.
• 27. Rĩu-rĩ, inyuĩ nĩ inyuĩ mwĩrĩ wa Kristo, nake mũndũ o mũndũ wanyu: nĩ kĩĩga kĩaguo.
• 28. O na thĩinĩ wa kanitha, Ngai nĩekĩrĩte andũ amwe matuĩke o mbere atũmwo, a kerĩ anabii, a gatatũ arutani; na thutha wa ũguo kũgĩe na ũringi wa ciama, ningĩ iheo cia ũhonania wa mĩrimũ, na maũndũ ma ũteithania, na ma ũtabarĩri, o na ũhoro wa gũthioma thiomi.
• 29. No anga andũ othe marĩ atũmwo? No anga othe marĩ anabii? No anga othe marĩ arutani? Othe nĩ aringi a ciama?
• 30. Othe nĩ ahe iheo cia ũhonania? Othe nĩmagĩthiomaga thiomi? Othe nĩmakĩhotaga gũtaũranĩra thiomi icio?
• 31. No rĩrĩ, wĩriragĩriei kũheo iheo ciumanĩte na wega wa Ngai iria ikĩrĩte iria ingĩ. Na hamwe na ũguo-rĩ, nĩngũcoka kũmuonia njĩra ĩngĩ, ĩrĩa njega makĩria.

Home