Go Back

Atũmwo Chapter 2

• 1. NA mũthenya wa Bendegothito wakinya-rĩ, acio othe magĩkorũo marĩ o handũ hamwe.
• 2. Na hĩndĩ o ĩo hagĩũka mũgambo uumĩte Igũrũ, ta wa rũhuho rũnene rũkĩhuhũkania, ũkĩiyũra nyũmba yothe ĩrĩa maaikaire thĩ;
• 3. nao makiumĩrĩrũo nĩ nĩmĩ ciatariĩ ta nĩnĩmbĩ cia mwaki igayũkanĩte, nacio igĩikara igũrũ rĩa mũndũ o mũndũ.
• 4. Nao othe makĩiyũrũo nĩ Roho Mũtheru, magĩitĩka gũthioma thiomi ingĩ o ta ũrĩa Roho aamahotithirie kwaria.
• 5. Na hĩndĩ ĩo kũu Jerusalemu nĩgwaikarĩte Ayahudi aigua-Ngai moimĩte ndũrĩrĩ-inĩ ciothe cia thĩ.
• 6. Na rĩrĩa mũgambo ũcio waiguirũo-rĩ, andũ a kĩrĩndĩ magĩcokanĩrĩra, makĩhagaiga tondũ o mũndũ o mũndũ nĩaamaiguaga makĩaria na mwarĩrie wa kwao kĩũmbe.
• 7. Nao othe makĩmaka makĩgegeara, makĩĩrana atĩrĩ, Githĩ aya othe maraaria ti a Galili?
• 8. Nao makĩaria-rĩ, nĩ kĩ gĩgũtũma tũmaigue makĩaria na mĩarĩrie iitũ, o mũndũ na mwarĩrie wake wa kũrĩa aaciarĩirũo?
• 9. Aparithi na Amedi na Aelamiti, o na arĩa matũũraga Mesopotamia, na Judea na Kapadokia, na Ponto na Asia,
• 10. na Ferugia na Pamfulia, na Misiri na ndwere cia Lubia iria irĩ gũkuhĩ na Kurene, na ageni moimĩte Roma, arĩa Ayahudi, o na arĩa megarũrĩte magatuĩka Ayahudi,
• 11. o na Akirete na Aarabu, ithuothe-rĩ, tũkũigua andũ aya makĩaria na mĩarĩrie iitũ maũndũ marĩa manene mekĩtwo nĩ Ngai.
• 12. Nao othe makĩmaka makĩrigwo nĩ ũhoro ũcio, magĩkĩũrania, Ũũ nĩ atĩa?
• 13. No rĩrĩ, andũ amwe angĩ makĩmathekerera makiuga, Hĩ! Aya nĩ kũrĩwo marĩĩtwo nĩ ndibei ya mũhihano.
• 14. Nowe Petero-rĩ, arũgamĩte hamwe na arĩa ikũmi na ũmwe, akĩanĩrĩra, akĩmera atĩrĩ, Andũ aya a Judea, o na inyuĩ othe mũtũũraga Jerusalemu, ũhoro ũyũ nĩũmenyũo nĩ inyuĩ, na mũthikĩrĩrie ciugo ici ciakwa.
• 15. Nĩ ũndũ-rĩ, andũ aya ti kũrĩwo marĩĩtwo ta ũguo mũkwĩgereria; amu rĩu no thaa ithatũ cia mũthenya;
• 16. no rĩrĩ, ũhoro ũyũ nĩguo ũrĩa waaririo nĩ mũnabii Joeli, ũũ:--
• 17. Ngai ekuuga atĩrĩ, Rĩrĩa matukũ ma marigĩrĩrio magakinya, Nĩngaitĩrĩria andũ othe Roho wakwa: Nao ariũ anyu na aarĩ anyu nĩmakarathaga mohoro, Nao aanake anyu monage cioneki, Nao athuri anyu marotage iroto:
• 18. Na ti-itherũ matukũ-inĩ macio nĩngaitĩrĩria ndungata ciakwa cia arũme o na cia airĩtu Roho wakwa; Nao marathage mohoro.
• 19. Na nĩngonania morirũ igũrũ matu-inĩ, O na ciama gũkũ thĩ, Namo nĩ ma gũitithia thakame, na ma mwaki, o na ma thatũ wa ndogo.
• 20. Riũa nĩrĩkagarũrũo rĩgĩe nduma, Naguo mweri ũtuĩke ta thakame, Mbere ya Mũthenya ũrĩa ũtuanĩirũo nĩ Mwathani ũtanakinya, O mũthenya ũrĩa mũnene na ũrĩ ngumo:
• 21. Na nĩgũgakinya atĩrĩ, atĩ o mũndũ ũrĩa ũgakaĩra rĩĩtwa rĩa Mwathani nĩakahonokio.
• 22. Andũ aya Aisiraeli, iguani ndeto ici, atĩrĩ: Jesu wa Nazarethi, mũndũ ũrĩa wonanirio nĩ Ngai kũrĩ inyuĩ na ciĩko cia hinya, na morirũ, o na ciama iria Ngai aaringire na ũndũ wake gatagatĩ-inĩ kanyu, o ta ũrĩa inyuĩ inyuene mũũĩ,
• 23. Ũcio-rĩ, aarĩkia kũneanwo o ta ũrĩa Ngai aatuĩte, na ũrĩa aamenyete o mbere, nĩwe mwamwambithirie mũtĩ igũrũ, mũkĩmũũragithia na moko ma andũ atũrĩku.
• 24. Nake nĩwe Ngai aariũkirie akĩmuohora atigane na ruo rũa gĩkuũ, nĩ gũkorũo gũtingĩahotekire atĩ atũũre anyitĩtwo nĩkĩo.
• 25. Nĩ gũkorũo Daudi ekuuga atĩrĩ ũhoro wake: Nĩndonaga Mwathani e mbere yakwa hingo ciothe, Nĩ ũndũ arĩ guoko-inĩ gwakwa kwa ũrĩo, nĩ getha ndikae kwenyenyeka:
• 26. Nĩkĩo ngoro yakwa yacanjamũkire, naruo rũrĩmĩ rũakwa rũgĩkena; Ningĩ mwĩrĩ wakwa naguo no ũtũũre ũmwĩrĩgĩrĩire.
• 27. Tondũ ndũkarekereria roho wakwa ũũrĩre kwa-ngoma, O na ndũgetĩkĩra ũrĩa waku mũtheru akĩonane na kuora.
• 28. Nĩũ’menyithĩtie njĩra o iria cia muoyo; Nĩũka’hũnia hũni ya gĩkeno nĩ kuona ũthiũ waku.
• 29. Ariũ a Awa, ndahota kũmwĩra ũhoro wa mũtigairĩ Daudi o nyũmĩrĩirie, atĩ nĩ gũkua aakuire na agĩthikwo, nayo mbĩrĩra yake ĩrĩ o gũkũ gwitũ o na ũmũthĩ.
• 30. Ũcio-rĩ, tondũ aakĩrĩ mũnabii, agakĩmenya atĩ Ngai nĩaamũrĩkĩirie na mwĩhĩtwa atĩ nĩagatua ũmwe uumĩte mũthimo-inĩ wake wa gũikarĩra gĩtĩ gĩake gĩa ũthamaki-rĩ;
• 31. tondũ wa ũguo aamenyete ũhoro ũcio o mbere-rĩ, akĩaria ũhoro wa kũriũka gwa Kristo, atĩ ndaigana kũrekererio orĩre kwa-ngoma, o na mwĩrĩ wake ndũigana kuora.
• 32. Jesu o ro ũcio-rĩ, Ngai nĩaamũriũkirie, na ithuĩ ithuothe tũrĩ aira a ũhoro ũcio.
• 33. Tondũ wa ũguo, kuona atĩ nĩatũũgĩrĩtio aikare guoko-inĩ kwa ũrĩo kwa Ngai, akahingĩrio nĩ Ithe witũ kĩĩranĩro kĩa Roho Mũtheru, nĩkĩo aaitũrũra ũhoro ũyũ mũkuona na mũkaũigua.
• 34. Amu Daudi ndaigana kwambata Igũrũ, no we mwene ekuuga ũũ: Mwathani nĩerire Mwathani wakwa atĩrĩ, Ikara thĩ guoko-inĩ gwakwa kwa ũrĩo,
• 35. Mũira wa ngatũma thũ ciaku ituĩke gaturũa ka makinya maku.
• 36. Tondũ wa ũguo andũ othe a Isiraeli nĩmakĩmenye o ki, atĩ Jesu o ro ũcio inyuĩ mwaambithirie mũtĩ igũrũ, nĩwe Ngai atuĩte Mwathani o na Kristo.
• 37. Na rĩrĩa maaiguire ũhoro ũcio-rĩ, magĩtheewo ngoro-inĩ, magĩkĩũria Petero na atũmwo arĩa angĩ atĩrĩ, Ariũ a Awa, tũgũgĩĩka atĩa?
• 38. Nake Petero akĩmera atĩrĩ, Mwĩrirei, mũcoke mũbatithio o mũndũ o mũndũ thĩinĩ wa rĩĩtwa rĩa Jesu Kristo, nĩguo muoherũo mehia manyu; na nĩmũkũheo kĩheo kĩa Roho Mũtheru.
• 39. Nĩ gũkorũo nĩ inyuĩ na ciana cianyu mwĩrĩirũo kĩĩranĩro kĩu, o na arĩa othe marĩ kũraya, gwata arĩa othe Mwathani Ngai witũ ageta moke harĩ we.
• 40. Agĩkĩheana ũira na ciugo ingĩ nyingĩ, akĩmahatagĩrĩria na akĩmeraga atĩrĩ, Wĩhonokiei kũrĩ rũciaro rũrũ ruogomu.
• 41. Hĩndĩ ĩo arĩa metĩkĩrire ũhoro wake makĩbatithio: na mũthenya ũcio hakĩongerereka andũ ta ngiri ithatũ.
• 42. Nao magĩikara magwatĩirie ũrutani ũrĩa wa atũmwo, me ngwatanĩro nao ũhoro-inĩ wa kwenyũra mũgate o na wa kũhoya.
• 43. Andũ othe magĩkĩnyitwo nĩ guoya; na morirũ maingĩ magĩĩkwo nĩ atũmwo, o na ciama nyingĩ ikĩringwo nĩo.
• 44. Nao arĩa othe metĩkĩtie nĩmaaikaranagia hamwe, na makagwatanĩra indo ciao ciothe,
• 45. magakĩendia ithaka ciao na indo ciao, makagayanagĩria o mũndũ; o mũndũ o ta ũrĩa mabata make maatariĩ.
• 46. Na mũthenya o mũthenya maatindaga hekarũ-inĩ marĩ na ngoro o ro ĩmwe, makenyũraga mũgate marĩ kwao mũciĩ, na makarĩaga irio ciao makenete na me na ngoro theru,
• 47. makĩgathaga Ngai, na marĩ na ngumo njega kũrĩ andũ othe. Nake Mwathani nĩaamongagĩrĩra thiritũ-inĩ yao mũthenya o mũthenya arĩa maahonokagio.

Home