Go Back

Atũmwo Chapter 15

• 1. NA rĩrĩ, andũ amwe nĩmokire moimĩte Judea makarutaga ariũ a Ithe witũ atĩrĩ, Mũngĩaga kũrua kũringana na mũtugo ũrĩa Musa aatũtigĩire, mũtingĩhota kũhonokio.
• 2. Nao Paulo na Baranaba maarĩkia gũkararania nao makĩũranganagia ũndũ ũcio nao mũno, gũgĩtuwo atĩ Paulo na Baranaba, marĩ na amwe angĩ a thiritũ yao, maambate mathiĩ Jerusalemu kũrĩ atũmwo o na athuri nĩ ũndũ wa ũhoro ũcio moranganagia.
• 3. Tondũ ũcio-rĩ, andũ a kanitha maarĩkia kũmohera indo cia rũgendo, makĩmatũma, nao magĩtuĩkanĩria mabũrũri ma Foinike na Samaria, makĩheanaga ũhoro wa ũrĩa andũ a Ndũrĩrĩ maagarũrũkĩire Ngai: nao ariũ a Ithe witũ othe magĩgĩkenio mũno nĩo.
• 4. Nao maakinya Jerusalemu, magĩkũngũĩrũo nĩ kanitha, na atũmwo, o na athuri, magĩcoka makĩheana ũhoro wa maũndũ marĩa mothe Ngai ekĩte hamwe nao.
• 5. No rĩrĩ, hagĩũkĩra andũ amwe a thiritũ ya Afarisai arĩa metĩkĩtie, makiuga atĩrĩ, No mũhaka maambe maruithio, na maathwo atĩ marũmagie watho ũrĩa Musa aathanire.
• 6. Nao atũmwo na athuri magĩkĩũngana macirĩre ũndũ ũcio kĩũmbe.
• 7. Na maarĩkia kũũrania ũhoro mũno, Petero akĩrũgama akĩmera atĩrĩ, Ariũ a Ithe witũ, nĩmũũĩ atĩ o matukũ ma mbere Ngai nĩaa’thurire niĩ thiritũ-inĩ yanyu, nĩguo andũ arĩa a Ndũrĩrĩ maigue Ũhoro-ũrĩa-Mwega na kanua gakwa, mawĩtĩkie.
• 8. Nake Ngai, we ũmenyaga ũhoro wa ngoro, akĩheana ũira ũhoro-inĩ wao nĩ kũmahe Roho Mũtheru o ta ũrĩa aatũheire ithuĩ;
• 9. na ndaigana gũtũkũũrana ithuĩ nao, no nĩaamatheririe ngoro ciao nĩ ũndũ wa gwĩtĩkia.
• 10. Hakĩrĩ ũguo-rĩ, nĩ kĩ kĩratũma mũgerie Ngai na ũndũ wa kũigĩrĩra arutwo icoki ngingo o rĩrĩa maithe maitũ o na ithuĩ twanaremwo nĩ kũrĩkuua?
• 11. Ĩndĩ nĩ gwĩtĩkia twĩtĩkĩtie atĩ nĩtũkahonokio nĩ ũndũ wa Wega wa Mwathani Jesu, o ta ũrĩa o nao makahonokio.
• 12. Nao andũ arĩa othe monganĩte magĩkira ki, magĩthikĩrĩria Baranaba na Paulo makĩheanaga ũhoro wa ũrĩa Ngai aaringire ciama na agĩĩka morirũ kũrĩ andũ arĩa a Ndũrĩrĩ na moko mao.
• 13. Na maakira, Jakubu agĩcokia ũhoro akiuga atĩrĩ, Ariũ a Ithe witũ, ta ’thikĩrĩriai:
• 14. Sumeoni nĩaatũhe ũhoro wa ũrĩa Ngai aambĩrĩirie gũceerera andũ arĩa a Ndũrĩrĩ, nĩ getha athure amwe thĩinĩ wao matuĩke a gwĩtanio na rĩĩtwa rĩake.
• 15. Nacio ciugo cia anabii nĩiringaine na ũhoro ũcio, iria ciandĩkĩtwo atĩrĩ:
• 16. Maũndũ macio maathira nĩngacoka, Na nĩngatiira gĩikaro kĩa Daudi kĩrĩa kĩgũĩte, Na njake rĩngĩ iganjo rĩakĩo, Ndĩkĩhande kĩrũgame;
• 17. Nĩ getha andũ arĩa magakorũo matigaire makarongorie Mwathani, Gwata andũ othe a Ndũrĩrĩ arĩa metanagio na rĩĩtwa rĩakwa,
• 18. Ũguo nĩguo Mwathani oiga, o we ũtũire uumbũraga maũndũ macio gwata rĩrĩa thĩ yombirũo.
• 19. Tondũ wa ũguo niĩ ngũtua ũũ, atĩ tũtige gũtanga andũ a Ndũrĩrĩ arĩa mekũgarũrũkĩra Ngai:
• 20. nĩ kaba tũmaandĩkĩre marũa tũmere atĩ mathemage indo cia mĩhianano iria irĩ thahu, na ũmaraya, na nyama cia nyamũ iria ciitĩtwo, o na thakame.
• 21. Nĩ ũndũ kuuma o njiarũa cia tene matũũra-inĩ mothe nĩkũrĩ andũ mahunjagia maũndũ marĩa maathanirũo nĩ Musa, tondũ matũire mathomagwo thunagogi-inĩ mĩthenya yothe ya thabatũ.
• 22. Na hĩndĩ ĩo-rĩ, atũmwo na athuri o na andũ othe a kanitha makĩona arĩ wega mathure andũ amwe a thiritũ yao, mamarekie Antiokia hamwe na Paulo na Baranaba. Nao nĩ aya, Judasi ũrĩa wetagwo Barasaba, o na Sila, arĩa maarĩ atongoria thiritũ-inĩ ya ariũ a Ithe witũ.
• 23. Magĩkĩandĩka marũa ma gũtwarũo nĩo, makiuga ũũ, Ithuĩ atũmwo na athuri a thiritũ ya ariũ a Ithe witũ, nĩtwamũgeithia inyuĩ ariũ a Ithe witũ mũtarĩ Ayahudi, mũtũire Antiokia, na Suriata, na Kilikia.
• 24. Atĩrĩrĩ, nĩtũkĩiguĩte atĩ andũ amwe arĩa moimire kũrĩ ithuĩ nĩmamũrigithĩtie ũhoro na ndeto ciao, makahotomia meciria ma ngoro cianyu, o na gũtarĩ ũndũ twamaathire naguo.
• 25. Na twakĩrĩkia kũiguanĩra ũhoro, nĩtwonire arĩ wega tũthure andũ amwe, tũmarekie kũrĩ inyuĩ hamwe na Baranaba na Paulo arĩa twendete mũno;
• 26. nao nĩo andũ metwarĩrĩire ũgwati-inĩ wa kũũragwo nĩ ũndũ wa rĩĩtwa rĩa Mwathani witũ Jesu Kristo.
• 27. Tondũ ũcio nĩtwarekia Judasi na Sila, nao nĩmekũmwĩra na kanua o ene maũndũ o ro maya tũraandĩka.
• 28. Tondũ atĩrĩ, Roho Mũtheru, o na ithuĩ, nĩtuonete arĩ wega tũtikamũigĩrĩre mũrigo ũkĩrĩte maũndũ maya matangĩtigĩka;
• 29. namo nĩ maya, atĩ mũthemage kĩndũ kĩrĩa gĩothe kĩhakĩirũo mĩhianano, na thakame, na nyama cia nyamũ iria ciitĩtwo, o na ũmaraya. Na rĩrĩ, mũngĩĩamũra mũthemage maũndũ macio, mweka wega. Tigwoi na ũhoro.
• 30. Gwagĩtuĩka ũguo, andũ acio maarĩkia kuugĩrũo ũhoro, magĩtherera magĩkinya Antiokia, na rĩrĩa monganirie andũ a kanitha, makĩmanengera marũa macio.
• 31. Nao maarĩkia kũmathoma, magĩkena nĩ ũndũ wa ũtaaro ũrĩa maataarirũo naguo.
• 32. Nao Judasi na Sila, kuona atĩ maarĩ anabii o nao, magĩtaara ariũ a Ithe witũ na ndeto nyingĩ, makĩmongerera hinya.
• 33. Na maarĩkia gũikaranga kũu matukũ matarĩ maingĩ, makĩĩrũo nĩ ariũ a Ithe witũ mathiĩ na ũhoro macoke kũrĩ arĩa maamatũmĩte.
• 34. [Nowe Sila akĩona arĩ wega gũikara kuo.]
• 35. No Paulo na Baranaba magĩikara kũu Antiokia, makĩrutanaga na makĩheanaga Ũhoro wa Mwathani, marĩ na andũ angĩ aingĩ.
• 36. Na matukũ maigana ũna maathira, Paulo akĩĩra Baranaba atĩrĩ, Rĩu nĩtũcoke tũgaceerere ariũ a Ithe witũ matũũra-inĩ mothe kũrĩa twaheanire Ũhoro wa Mwathani, tũkamenye ũrĩa ũhoro wao ũtariĩ.
• 37. Nake Baranaba akĩenda atĩ mathiĩ na Johana ũrĩa wetagwo Mariko.
• 38. Ĩndĩ Paulo akĩona atĩ ti wega mathiĩ na mũndũ ũrĩa watiganire nao kũrĩa Pamfulia, akĩaga gũthiĩ kũruta wĩra nao.
• 39. Na maakararanĩria ũndũ ũcio mũno magĩkĩamũkana, nake Baranaba magĩtwarana na Mariko, magĩthiĩ Kuporo mahaicĩte marikabu.
• 40. Nowe Paulo agĩthura Sila, na aarĩkia kũhoerũo nĩ ariũ a ithe witũ atĩ aheo Wega wa Mwathani, akĩgwata njĩra, agĩthiĩ.
• 41. Agĩgĩtuĩkanĩria mabũrũri ma Suriata na Kilikia agĩĩkagĩra makanitha hinya.

Home