Go Back

Atũmwo Chapter 1

• 1. ATĨRĨRĨ, Theofilo, nĩndaandĩkire ũhoro ũrĩa wa mbere ngwĩre maũndũ mothe marĩa Jesu aambĩrĩirie gwĩka na kũrutana
• 2. kinya mũthenya ũrĩa aatwarirũo Igũrũ, arĩkĩtie gwatha na Roho Mũtheru atũmwo ake arĩa ethurĩire.
• 3. Ningĩ nĩeonanirie kũrĩ o arĩ muoyo, thutha wa kũnyamarĩka gwake, na imenyithia nyingĩ itangĩkararĩka, akamonekagĩra ihinda rĩa matukũ mĩrongo ĩna, akaaragia mohoro ma ũthamaki wa Ngai.
• 4. Na arĩ hamwe nao monganĩte-rĩ, akĩmaatha atĩ matikoime Jerusalemu, no meterere kĩĩranĩro kĩrĩa gĩa Ithe witũ, akiuga atĩrĩ, Kĩĩranĩro kĩu nĩ kĩrĩa ndamwĩrire ũhoro wakĩo:
• 5. amu ti-itherũ Johana aabatithanagia na maĩ; no inyuĩ nĩmũrĩbatithio na Roho Mũtheru matukũ maingĩ matanathira.
• 6. Nĩ ũndũ ũcio-rĩ, maakorũo monganĩte hamwe, makĩmũũria atĩrĩ, Mwathani, ihinda rĩrĩ nĩrĩo ũgũcokeria Aisiraeli ũthamaki wao?
• 7. Nake akĩmera, Ti ũhoro wanyu kũmenya ciathĩ o na kana mahinda marĩa Ithe witũ atuĩte na wathani wake mwene.
• 8. No nĩmũrĩheo hinya, Roho Mũtheru aarĩkia gũkinya igũrũ rĩanyu: na mũtuĩke aira akwa o Jerusalemu na Judea guothe, na Samaria, o na kinya ituri ciothe cia thĩ.
• 9. Na aarĩkia kuuga maũndũ macio, o mamũcũthĩrĩirie-rĩ, akĩambatio Igũrũ, na itu rĩkĩmũiyũkia, matige kũmuona rĩngĩ.
• 10. Na rĩrĩa maaikaire marorete mũno Igũrũ agĩthiĩ-rĩ, arũme erĩ makĩrũgama harĩ o, mehumbĩte nguo njerũ;
• 11. makĩmoria atĩrĩ, Inyuĩ andũ a Galili, nĩ kĩ gĩtũmĩte mũrũgame mũcũthĩrĩirie Igũrũ? Jesu, o ro ũcio watwarũo Igũrũ oime harĩ inyuĩ, nĩagacoka rĩngĩ o ro ũguo mwamuona agĩthiĩ Igũrũ.
• 12. Hĩndĩ ĩo magĩcoka Jerusalemu moimĩte kĩrĩma-inĩ kĩrĩa kĩa Mĩtamaiyũ, nakĩo kĩĩ hakuhĩ na Jerusalemu ta harĩa hangĩthio rũgendo rũa mũthenya wa thabatũ.
• 13. Na maatonya itũũra, makĩhaica nyũmba yarĩ igũrũ rĩa iria ingĩ, o ĩrĩa maaikaraga; nao nĩo Petero na Johana na Jakubu na Andarea, na Filipu na Toma, na Baritholomayo na Mathayo, na Jakubu wa Alufayo na Simoni Zelote, na Judasi wa Jakubu.
• 14. Acio othe nĩmaarũmanagĩria kũhoya marĩ na ngoro ĩmwe marĩ hamwe na atumia amwe, o na Mariamu nyina wa Jesu, o na ariũ a nyina.
• 15. Na matukũ macio-rĩ, Petero akĩrũgama gatagatĩ-inĩ ka ariũ a Ithe witũ, (na nĩhaarĩ andũ gĩkundi monganĩte hamwe, ta andũ igana rĩa mĩrongo ĩĩrĩ) akiuga atĩrĩ,
• 16. Ariũ a Awa, kwarĩ na bata Maandĩko mahingio, o harĩa Roho Mũtheru aaheanĩire ũhoro tene na kanua ka Daudi nĩ ũndũ wa Judasi, ũrĩa warĩ mũtongoria wa arĩa maanyitire Jesu.
• 17. Amu nĩaataranĩirio hamwe na ithuĩ, akĩgaĩrũo rũgai rũake rũa ũtungati ũyũ.
• 18. (Na rĩrĩ, mũndũ ũcio nĩaagũrire gĩthaka na mũcara wa waganu wake; akĩgũa na mũnduru, agĩtũrĩka nda, ĩkiuma yothe.
• 19. Naguo ũhoro ũcio ũkĩmenyeka nĩ andũ othe arĩa maatũire Jerusalemu; na nĩ ũndũ ũcio gĩthaka kĩu gĩgĩĩtwo Akelidama na rũthiomi rũao; ũguo nĩ ta kuuga, Gĩthaka gĩa thakame.)
• 20. Nĩ gũkorũo ũhoro nĩ mwandĩke ibuku-inĩ rĩa Thaburi atĩrĩ, Harĩa aakĩte harokira ihooru, Haroaga wa kũhatũũra. Ningĩ, Ũramati wake ũrooyũo nĩ mũndũ ũngĩ.
• 21. Hakĩrĩ ũguo-rĩ, andũ arĩa maatũire thiritũ na ithuĩ mahinda mothe marĩa Mwathani Jesu aaceeraga na ithuĩ, tũgathiaga na tũkainũkaga nake,
• 22. gwata rĩrĩa aabatithirio nĩ Johana o nginya mũthenya ũrĩa aatwarirũo Igũrũ akiuma harĩ ithuĩ, acio-rĩ, nĩkwagĩrĩire ũmwe wao athurũo nĩ getha atuĩke mũira wa kũriũka gwake hamwe na ithuĩ.
• 23. Magĩgĩthura andũ erĩ, ũmwe nĩ Jusufu ũrĩa wetagwo Barasaba, nake aarĩ na rĩĩtwa rĩngĩ Jusito, na ũrĩa ũngĩ nĩ Mathia.
• 24. Makĩhoya makiuga atĩrĩ, Mwathani, wee ũũĩ ngoro cia andũ othe, aya erĩ-rĩ, tuonie wega ũrĩa ũthurĩte,
• 25. nĩ getha acoke handũ-inĩ ha Judasi, agwate wĩra ũyũ wa ndungata na wa mũtũmwo watigirũo nĩwe nĩguo athiĩ handũ hake mwene.
• 26. Magĩkĩmacukĩra mĩtĩ, na mũtĩ wa Mathia ũgĩthurũo; nake agĩtaranĩrio na atũmwo acio ikũmi na ũmwe.

Home