Go Back

Johana Chapter 10

• 1. NDAMWĨRA atĩrĩrĩ, o ma, ma, Ũrĩa ũtatonyaga kiugũ kĩa ng’ondu na kĩhingo, no kũhaica akahaicĩra hangĩ, ũcio nĩ mũici na nĩ mũtunyani.
• 2. No rĩrĩ, ũrĩa ũtonyaga na kĩhingo nĩwe mũrĩithi wa ng’ondu.
• 3. We nĩahingũragĩrũo nĩ mũhingũri wa kĩhingo; nacio ng’ondu ikaigua mũgambo wake; nake ageta ng’ondu ciake mwene marĩĩtwa ma cio, agaciumagaria.
• 4. Aarĩkia kuumia ciake mwene ciothe, nĩacitongoragia, nacio ng’ondu ikamũrũmĩrĩra, nĩ gũkorũo nĩciũĩ mũgambo wake.
• 5. Na itingĩĩtĩkĩra kũrũmĩrĩra mũgeni, no imũũrĩre, nĩ gũkorũo itiũĩ mĩgambo ya andũ ageni.
• 6. Jesu akĩmaarĩria na ngerekano ĩo, na matiigana kũigua ũrĩa ũhoro ũtariĩ, ũcio aamaheaga.
• 7. Tondũ ũcio, Jesu agĩcoka akĩmera atĩrĩrĩ, Ndamwĩra o ma, ma, Nĩ niĩ kĩhingo kĩa ng’ondu.
• 8. Arĩa othe mokire mbere yakwa nĩ aici na nĩ atunyani; nacio ng’ondu itiigana kũmaigua.
• 9. Nĩ niĩ kĩhingo; mũndũ aatonyera harĩ niĩ, nĩ kũhonoka akahonoka, na atonyage akiumaga, na onage gĩa kũrĩa.
• 10. Mũici ndokaga nĩ gĩtũmi kĩngĩ tiga aiye na athĩnje na onũhe; niĩ ndokire nĩ getha andũ magĩe muoyo, na magĩe naguo mũno.
• 11. Nĩ niĩ mũrĩithi ũrĩa mwega. Mũrĩithi ũrĩa mwega nĩarutaga muoyo wake nĩ ũndũ wa ng’ondu.
• 12. Mũndũ ũheagwo mũcara, na atarĩ mũrĩithi, na atarĩ we mwene ng’ondu, ũcio onaga hiti ĩgĩũka, agatiga ng’ondu, akora, nayo hiti ĩgacihuria na ĩgacihurunja;
• 13. oraga nĩ ũndũ no wa mũcara, na ndatindagĩrĩra ũhoro wa ng’ondu.
• 14. Niĩ nĩ niĩ mũrĩithi ũrĩa mwega, na nĩnjũĩ ng’ondu ciakwa mwene, o nacio ng’ondu ciakwa nĩinjũĩ,
• 15. o ta ũrĩa Ithe witũ anjũĩ, na niĩ ngamenya Ithe witũ; na nĩ kũruta ngũruta muoyo wakwa nĩ ũndũ wa ng’ondu.
• 16. Na ndĩ na ng’ondu ingĩ, itarĩ cia kiugũ gĩkĩ; icio nacio no ndĩcirehe, nacio nĩikaiguaga mũgambo wakwa; igagĩtuĩka rũũru rũmwe rũa mũrĩithi ũmwe.
• 17. Nĩkĩo Ithe witũ anyendete, nĩ ũndũ ngũruta muoyo wakwa, nĩ getha njoke ndĩũiyũkie rĩngĩ.
• 18. Gũtirĩ mũndũ ũkũndunya; nĩ niĩ ngũũruta, niĩ mwene. Ndĩ na rũtha ndĩũrute, na ningĩ ndĩ na rũtha njoke ndĩũiyũkie rĩngĩ. Nĩndaathirũo ũguo nĩ Awa.
• 19. Ayahudi makĩya kwamũkana o rĩngĩ nĩ ũndũ wa ndeto icio.
• 20. Nao aingĩ makiuga atĩrĩ, E na ndaimono, akagũrũka; mũgũkĩmũigua nĩkĩ?
• 21. Angĩ nao makiuga atĩrĩ, Ciugo icio ti cia mũndũ wĩ na ndaimono. Ndaimono yakĩhota kũhingũra mũtumumu maitho?
• 22. Nakuo kũu Jerusalemu nĩgwakinyĩte gĩathĩ kĩrĩa kĩa rĩamũrĩro rĩa hekarũ; kwarĩ kĩmera kĩrĩa kĩa heho;
• 23. nake Jesu aarĩ gũcangacanga hekarũ-inĩ, gĩthaku-inĩ kĩrĩa gĩetagwo gĩa Solomoni.
• 24. Nao Ayahudi magĩgĩũka makĩmũrigicĩria, makĩmwĩra atĩrĩ, Nĩ nginya hĩndĩ ĩ ũgũtũũra ũtũrigithĩtie? Ongorũo wee nĩwe Kristo, ndũtwĩre wega.
• 25. Nake Jesu akĩmacokeria atĩrĩrĩ, Nĩndamwĩrire, na mũtiĩtĩkĩtie; mawĩko marĩa njĩkaga na rĩĩtwa rĩa Awa, nĩmo mamenyithanagia ũhoro wakwa.
• 26. No inyuĩ mũtiĩtĩkĩtie, nĩ ũndũ mũtirĩ a rũũru rũa ng’ondu ciakwa.
• 27. Ng’ondu ciakwa-rĩ, nĩciiguaga mũgambo wakwa, na niĩ nĩndĩciũĩ, nacio ikanũmĩrĩra;
• 28. na niĩ ngacihe muoyo wa tene na tene, na itirĩ hingo ikora, o rĩ, o rĩ, na gũtirĩ ũngĩgacihuria ciume moko-inĩ makwa.
• 29. Awa, ũrĩa ũ’heete cio, nĩ mũnene kũrĩ othe; na gũtirĩ ũngĩhota gũcihuria ciume moko-inĩ ma Ithe witũ.
• 30. Niĩ na Ithe witũ tũrĩ ũmwe.
• 31. Nao Ayahudi makĩoya mahiga rĩngĩ mamũhũre namo nyuguto.
• 32. Nake Jesu akĩmacokeria atĩrĩ, Ndanamuonia mawĩko maingĩ mega moimĩte gwĩ Ithe witũ; mawĩko macio-rĩ, nĩ ũrĩkũ mũkũ’hũrĩra na mahiga?
• 33. Ayahudi makĩmũcokeria atĩrĩ, Tũtigũkũhũra na mahiga nĩ ũndũ wa wĩko mwega; tũgũkũhũra nĩ ũndũ nĩũrumĩte Ngai, nĩ tondũ nĩwĩtuĩte Ngai, na ũrĩ o mũndũ.
• 34. Nake Jesu akĩmacokeria atĩrĩrĩ, Watho-inĩ-rĩ, githĩ hatiandĩkĩtwo ũũ, Nĩndoigire, Inyuĩ mwĩ ngai?
• 35. Rĩu-rĩ, akorũo nĩaamatuire ngai, acio maakorirũo nĩ kiugo kĩu kĩa Ngai (na ũhoro ũrĩa mwandĩke Maandĩko-inĩ ndũngĩhota kwagithio bata-rĩ),
• 36. githĩ ũrĩa Ithe witũ aamũrire, akĩmũrekia oke gũkũ thĩ, inyuĩ mwamwĩra, Ũkũruma Ngai, nĩ ũndũ nĩndoiga, Nĩ niĩ Mũrũ wa Ngai?
• 37. Ongorũo ndiĩkaga maũndũ ma Awa, mũtikanjĩtĩkie.
• 38. No rĩrĩ, ongorũo nĩmo njĩkaga-rĩ, o na mwarega kũnjĩtĩkia niĩ, ĩtĩkiai maũndũ macio arĩ mo, nĩguo mũmenye, na mũigue wega, atĩ Ithe witũ e thĩinĩ wakwa, na niĩ ndĩ thĩinĩ wa Ithe witũ.
• 39. Nao magĩgĩcaria rĩngĩ ũrĩa mangĩmũnyita; nake akiuma kuo akĩhonoka moko-inĩ mao.
• 40. Agĩthiĩ agĩcoka mũrĩmo ũrĩa wa Jorodani, o kũrĩa Johana aabatithanagia hingo ĩrĩa ya mbere, agĩikara kuo.
• 41. Na andũ magathiaga kũrĩ we aingĩ, na makoigaga atĩrĩ, Johana ndakĩrĩ kĩama ekire; no rĩrĩ, ũhoro wothe ũrĩa Johana aaririe wa mũndũ ũyũ, kaĩ noguo-ĩ!
• 42. Na andũ aingĩ makĩya kũmwĩhoka kũndũ kũu.

Home