Go Back

Johana Chapter 1

• 1. O KĨAMBĨRĨRIA-RĨ, Ũhoro warĩ o kuo, naguo Ũhoro watũire o harĩ Ngai, o naguo Ũhoro warĩ o Ngai.
• 2. Ũcio, Ũhoro-rĩ, nĩaagĩtũire harĩ Ngai o kĩambĩrĩria.
• 3. Indo ciothe ikĩgĩa ciagĩire na ũndũ wake, na kĩndũ o gĩothe kĩrĩa kĩgĩĩte, gũtirĩ kĩagĩire we atarĩ ho, o na kĩmwe.
• 4. Thĩinĩ wake nĩkuo kwarĩ muoyo, naguo muoyo ũcio nĩguo warĩ ũtheri wa andũ.
• 5. Naguo ũtheri nĩũtũire o ũtherete nduma-inĩ, nayo nduma ndĩaũhootire.
• 6. Nĩgwokire mũndũ wareketio nĩ Ngai, wetagwo Johana.
• 7. Mũndũ ũcio okire nĩ ũndũ wa ũira, oimbũre ũhoro wa ũtheri ũcio, nĩ getha andũ othe metĩkie nĩ ũndũ wake.
• 8. Na tiwe ũtheri ũcio; okire no getha oimbũre ũhoro waguo, ũtheri ũcio.
• 9. Ũtheri kũna, ũrĩa ũmũrĩkagĩra mũndũ o wothe, nĩwarĩ kuo ũgĩũkaga thĩ.
• 10. We, Ũtheri ũcio, aarĩ gũkũ thĩ, o nayo thĩ ĩkĩgĩa yagĩire na ũndũ wake, nakĩo kĩrĩndĩ gĩa gũkũ thĩ gĩkĩaga kũmũmenya.
• 11. Okire gwake mwene, nao andũ ake mwene matiigana kũmwĩtĩkĩra.
• 12. No arĩa othe maamwĩtĩkĩrire, nĩo arĩa mehokete rĩĩtwa rĩake, acio akĩmahotithia gũtuĩka ciana cia Ngai,
• 13. itaaciarirũo nĩ thakame, kana igĩciarũo nĩ kwenda kwa mwĩrĩ kana kwenda kwa mũndũ, no Ngai.
• 14. We, Ũhoro-rĩ, agĩgĩtuĩka mũndũ, agĩtũũrania na ithuĩ aiyũirũo nĩ ũtugi na ũhoro-ũrĩa-wa-ma, na ithuĩ tũkĩĩonera riri wake, riri o ta wa mwana wa mũmwe oimĩte kũrĩ Ithe.
• 15. Johana nĩoimbũrĩte ũhoro wake, akaanĩrĩra akoiga atĩrĩ, Ũcio nowe ndoigire, atĩ, Ũrĩa ũgũũka thutha wakwa nĩagĩĩte mbere yakwa, nĩ gũkorũo aarĩ kuo mbere yakwa.
• 16. Amu-rĩ, thĩinĩ wa kũiyũrũo kũu gwake twanaheo ithuothe, tũgĩtugagwo rĩngĩ na rĩngĩ.
• 17. Tondũ watho watũmirũo na Musa; ũtugi na ũhoro-ũrĩa-wa-ma mokire na Jesu Kristo.
• 18. Gũtirĩ mũndũ ũrĩ ona Ngai; Mũriũ wa mũmwe, ũrĩa wĩ gĩthũri-inĩ gĩa Ithe, nĩwe uumburĩte ũhoro wake.
• 19. Ũira wa Johana naguo nĩ ũyũ, rĩrĩa Ayahudi maamũrekeirie athĩnjĩri-Ngai na Alawii, me Jerusalemu, makamũũrie, Wee nĩwe ũ?
• 20. Akiumbũra na ndahithe; agĩkiumbũra akiuga, Niĩ ti niĩ Kristo.
• 21. Nao makĩmũũria, Ningĩ nĩ atĩa? Nĩwe Elija? Nake akiuga, Ti niĩ. Ũkĩrĩ mũnabii ũrĩa? Nake agĩcokia, Aca.
• 22. Tondũ ũcio makĩmũũria atĩrĩ, Ningĩ nĩwe ũ? nĩguo tũhũndũrĩre arĩa maatũrekirie ũhoro. Ũkuuga atĩa ũhoro waku?
• 23. Nake akiuga atĩrĩ, Nĩ niĩ mũgambo wa mũndũ ũkwanĩrĩra werũ-inĩ akoiga, Rũngariani njĩra ya Mwathani, o ta ũrĩa Isaia ũrĩa mũnabii oigire.
• 24. Na andũ acio maareketio nĩ Afarisai.
• 25. Magĩcoka ningĩ kũmũũria, makĩmwĩra atĩrĩ, Rĩu-rĩ, ongorũo tiwe Kristo, na tiwe Elija, na tiwe mũnabii ũrĩa-rĩ, ũkĩbatithagia andũ nĩ ũndũ kĩ?
• 26. Nake Johana akĩmacokeria, akiuga, Niĩ mbatithanagia na maĩ: o gũkũ kwanyu nĩkũrũngiĩ mũndũ mũtoĩ,
• 27. ũrĩa ũgũũka thutha wakwa, itaigaine niĩ njohore mũkwa wa kĩratũ gĩake.
• 28. Maũndũ macio mekĩirũo Bethania mũrĩmo ũrĩa wa Jorodani, o kũu Johana aarĩ kũbatithania.
• 29. Mũthenya ũyũ ũngĩ akĩona Jesu agĩũka arorete kũrĩ we, akiuga atĩrĩ, Onei Gatũrũme ka Ngai, karĩa ga gũtwara mehia ma kĩrĩndĩ!
• 30. Ũyũ nowe ndoigire, atĩ, Thutha wakwa nĩgũgũũka mũndũ ũgĩĩte mbere yakwa, nĩ gũkorũo aarĩ kuo mbere yakwa.
• 31. Na ndiamũũĩ o na niĩ; ĩndĩ nĩguo aguũkĩre Isiraeli, nĩkĩo ndokire ngĩbatithagia andũ na maĩ.
• 32. O nake Johana akĩheana ũira, akiuga, Nĩnyonete Roho agĩikũrũka akiuma Igũrũ ahaana ta ndutura, agĩikara igũrũ rĩake.
• 33. Na ndiakĩmũũĩ o na niĩ; ĩndĩ ũrĩa wandekirie ngabatithanie na maĩ, we nĩaanjĩrire atĩrĩ, Ũrĩa ũkona Roho agĩikũrũkĩrĩra agaikara igũrũ rĩake, ũcio nĩwe ũbatithanagia na Roho Mũtheru.
• 34. Na nĩnyonete na ngoimbũra atĩ ũyũ nowe Mũrũ wa Ngai.
• 35. Ningĩ mũthenya ũyũ ũngĩ Johana agĩkorũo arũngiĩ, me na arutwo ake erĩ;
• 36. agĩcũthĩrĩria Jesu agĩceera, akiuga, Onei Gatũrũme ka Ngai!
• 37. Na arutwo acio erĩ nĩmaaiguire ũguo aaria, magĩkĩrũmĩrĩra Jesu.
• 38. Nake Jesu akĩhũgũka, akĩmona mamuumĩte thutha, akĩmoria, Nĩ atĩa mũkwenda? Nao makĩmwĩra atĩrĩ, Rabii (ũguo naguo wataũrũo nĩ ta kuuga, Mũrutani) ũraaraga kũ?
• 39. Akĩmera, Ũkai; nĩmũkuona. Magĩgĩthiĩ makĩona kũrĩa aaraaraga; na magĩikara nake mũthenya ũcio: kwarĩ ta thaa ikũmi.
• 40. Andũ acio erĩ maaiguire Johana aaria na makĩmũrũmĩrĩra, ũmwe nĩ Andarea, mũrũ wa nyina na Simoni Petero.
• 41. We akĩamba gũkora mũrũ wa nyina Simoni, akĩmwĩra atĩrĩ, Tũrĩ kuona Mesia (narĩo rĩĩtwa rĩu rĩataũrũo, nĩ atĩrĩ, Kristo).
• 42. Akĩmũtwara kwĩ Jesu. Nake Jesu akĩmũroora, akiuga atĩrĩrĩ, Wee tiwe Simoni, mũrũ wa Jona? ũgũtuwo Kefa (rĩu narĩo rĩataũrũo, nĩ Petero; na noguo Ihiga).
• 43. Mũthenya ũyũ ũngĩ Jesu agĩtuĩka nĩekuuma kũu athiĩ Galili, agĩkora Filipu: nake Jesu akĩmwĩra atĩrĩ, Nũmĩrĩra.
• 44. Na rĩrĩ, Filipu aarĩ wa kũndũ gwetagwo Bethisaida, agagĩtuĩka nĩ wa itũũra rĩa Andarea na Petero.
• 45. Filipu nake agĩkora Nathanaeli, akĩmwĩra atĩrĩ, Nĩtuonete ũrĩa waandĩkirũo ũhoro wake nĩ Musa watho-inĩ, o nao anabii makĩandĩka ũhoro wake, na nĩwe Jesu, mũrũ wa Jusufu, wa kũrĩa Nazarethi.
• 46. Nake Nathanaeli akĩmũũria atĩrĩ, Gwĩ kĩndũ kĩega kĩngiuma Nazarethi? Nake Filipu akĩmwĩra, Ũka ũkone.
• 47. Nake Jesu akĩona Nathanaeli agĩũka na kũrĩ we, akiuga atĩrĩrĩ nĩ ũndũ wake, Onei Mũisiraeli kũna, ũtarĩ na ũhinga!
• 48. Nake Nathanaeli akĩmũũria, Ũnjũĩ atĩa? Nake Jesu agĩcokia, akĩmwĩra atĩrĩrĩ, Rĩrĩa uuma mũkũyũ-inĩ, Filipu ataanagwĩta-rĩ, nĩngũkwine.
• 49. Nake Nathanaeli akĩmũcokeria atĩrĩ, Rabii, wee nĩwe Mũrũ wa Ngai! nĩwe Mũthamaki wa Isiraeli!
• 50. Nake Jesu agĩcokia, akĩmwĩra atĩrĩ, Githĩ nĩwetĩkia no ũndũ ndakwĩra, atĩ, Nĩngũkwine rĩrĩa uuma mũkũyũ-inĩ? Nĩũkona maũndũ manene kũrĩ maya.
• 51. Agĩcoka akĩmwĩra atĩrĩrĩ, Ndamwĩra atĩrĩ, o ma, ma, Mũkona Igũrũ gwĩ kũhingũre, na muone araika a Ngai makĩambatagĩrĩra Mũrũ wa Mũndũ makĩmũikũrũkagĩrĩra.

Home