Go Back

Luka Chapter 7

• 1. NAKE aarĩkia kwaria mohoro make mothe akĩiguagwo nĩ kĩrĩndĩ, agĩtonya Kaperinaumu.
• 2. Na rĩrĩ, mũndũ mũna warĩ mũnene wa athigari igana aarĩ na ngombo ĩrĩa endete, nayo nĩyarũarire na yarĩ hakuhĩ gũkua.
• 3. Nake aaigua ũhoro wa Jesu, akĩmũrekeria athuri amwe a Ayahudi makamũthaithe oke ahonie ngombo ĩo yake.
• 4. Nao maakinya harĩ Jesu, makĩmũringĩrĩria ma, makiuga atĩrĩ, Mũndũ ũcio nĩaagĩrĩirũo nĩ gwĩkwo ũguo nĩwe:
• 5. nĩ gũkorũo nĩendaga rũrĩrĩ ruitũ, nake we mwene nĩaatwakithĩirie thunagogi iitũ.
• 6. Nake Jesu agĩthiĩ nao. Na hĩndĩ ĩrĩa aakinyire hakuhĩ na nyũmba, mũnene ũcio wa athigari igana akĩmũtũmĩra arata ake makamwĩre atĩrĩ, Mwathani, tiga kwĩnogia ũgĩũka: nĩ gũkorũo ndiagĩrĩire atĩ ũtonye nyũmba yakwa thĩinĩ:
• 7. o na nĩkĩo nyonire atĩ ndiagĩrĩirũo nĩ gũũka harĩ we niĩ mwene; no kiuge kiugo, nayo ndungata yakwa nĩĩkũhona.
• 8. Nĩ gũkorũo o na niĩ ndĩ mũndũ wathagwo, na ndĩ na athigari njathaga; na ndera ũmwe, Thiĩ, nĩathiaga; na ndera ũngĩ, Ũka, nĩokaga; na ndera ngombo yakwa, Ĩka ũũ, noguo ĩĩkaga.
• 9. Nake Jesu aaigua mohoro macio, akĩgega nĩ ũndũ wa mũndũ ũcio, akĩĩhũgũrĩra kĩrĩndĩ kĩrĩa kĩamũrũmĩrĩire agĩkĩĩra, Ngũmwĩra atĩrĩ, ndirĩ ndona gwĩtĩkia kũnene ũũ Isiraeli guothe.
• 10. Nao andũ acio maatũmĩtwo magĩcoka mũciĩ, magĩkora ngombo ĩo ĩrĩ honu biũ.
• 11. Na gũgĩkinya atĩrĩ, ihinda inyinyi rĩathira, agĩthiĩ itũũra rĩetagwo Naini; nao arutwo ake magĩthiĩ nake, o na andũ kĩrĩndĩ kĩingĩ.
• 12. Nake aakinya hakuhĩ na kĩhingo gĩa itũũra rĩu, nĩhaarĩ mũndũ mũkuũ wakuuagwo arutwo itũũra, na aarĩ wa mũmwe, nake nyina aarĩ wa ndigwa: na andũ aingĩ a itũũra rĩu maarĩ hamwe nake.
• 13. Na rĩrĩ, Mwathani aamuona, akĩmũiguĩra tha akĩmwĩra atĩrĩ, Tiga kũrĩra.
• 14. Agĩthengerera hakuhĩ akĩhutia gĩtanda: nao akuui akĩo makĩrũgama. Agĩcoka akiuga atĩrĩ, Kamwana gaka, nĩndakwĩra atĩrĩ, Ũkĩra.
• 15. Na rĩrĩ, mũndũ ũcio warĩ mũkuũ agĩũkĩra agĩitĩka kwaria. Nake Jesu akĩmũnengera nyina.
• 16. Nao othe makĩgwatwo nĩ guoya: magĩkumia Ngai, makiuga atĩrĩ, Kaĩ gwitũ nĩgũũkĩrĩte mũnabii mũnene-ĩ: o na makiuga atĩrĩ, Ngai nĩaceereire andũ ake.
• 17. Nayo ngumo ĩo yake ĩgĩtambũka Judea guothe, o na ng’ongo-inĩ ciothe iria ciarĩ gũkuhĩ na kũu.
• 18. Nao arutwo a Johana makĩmũhe ũhoro wa maũndũ macio mothe.
• 19. Nake Johana agĩĩta arutwo ake erĩ moke harĩ we, akĩmatũma kũrĩ Mwathani makamũũrie atĩrĩ, Wee nĩwe ũrĩa ũgũũka, kana tweterere ũngĩ?
• 20. Nao andũ acio maakinya harĩ we makiuga atĩrĩ, Johana Mũbatithania nĩaatũtũma harĩ wee tukũũrie atĩrĩ, Wee nĩwe ũrĩa ũgũũka, kana tweterere ũngĩ?
• 21. Na thaa o ĩo, akĩhonia andũ aingĩ mĩrimũ yao, na ndũari iria ciamatuuragia mwĩrĩ, akĩingata ngoma njũru ciume andũ; o na agĩtũma andũ aingĩ atumumu macoke kuona.
• 22. Nake akĩmacokeria akĩmera atĩrĩ, Thiĩi mũkere Johana maũndũ macio muonete, na marĩa mũiguĩte: atĩ arĩa atumumu nĩmacokete kuona; nao arĩa mathuaga magacoka gwĩtwara; nao arĩa marĩ na mangũ makahonio magathera; nao arĩa mataiguaga magacoka kũigua, nao arĩa makuĩte makariũkio; o nao andũ athĩni makahunjagĩrio Ũhoro-ũrĩa-Mwega.
• 23. Na gũkena-rĩ, nĩ ũrĩa ũtonaga ũndũ wa kũmũhĩngithia nĩ ũndũ wakwa.
• 24. Nao andũ acio maareketio nĩ Johana maarĩkia gũthiĩ, Jesu agĩitĩka kwarĩria kĩrĩndĩ ũhoro wa Johana, akĩmoria atĩrĩ, Mwoimagarire mũgĩthiĩ werũ-inĩ mũkerorere kĩ? Anga nĩ kamũrangi kainainagio nĩ rũhuho?
• 25. No rĩrĩ, mwoimagarire mũgĩthiĩ kuona kĩ? Hihi nĩ mũndũ wĩhumbĩte nguo horo? Atĩrĩrĩ, arĩa megemetie na nguo thaka na magaikaraga megangarĩte makoragwo matũire gwa athamaki.
• 26. No rĩrĩ, mwoimagarire mũgĩthiĩ kuona kĩ? Nĩ kuona mũnabii? Ĩĩ-ni, na ngũmwĩra atĩrĩ, o na nĩ ũrĩa ũkĩrĩte mũno mũnabii.
• 27. Ũcio nĩwe ũhoro ũyũ wandĩkĩtwo nĩ ũndũ wake, Atĩrĩrĩ, nĩngũtũma mũrekio wakwa athiĩ mbere yaku, Ũrĩa ũgũgũthondekera njĩra mbere yaku.
• 28. Ngũmwĩra atĩrĩ, Kũrĩ arĩa maanaciarũo nĩ andũ a nja, gũtirĩ mũnene gũkĩra Johana: no rĩrĩ, ũrĩa wĩ mũnyinyi ũthamaki-inĩ wa Ngai nĩ mũnene kũrĩ we.
• 29. Na andũ othe, o na etia mbia cia igoti, maaigua ũguo, magĩtua Ngai mwega, o arĩa maarĩkĩtie kũbatithio na ũbatithio wa Johana.
• 30. No Afarisai na arutani a watho makĩregana na ũrĩa Ngai endete ameke, nao matiabatithirio nĩwe.
• 31. Nake Jesu akiuga atĩrĩ, Nĩ ũndũ ũcio ngũgerekania andũ a rũciaro rũrũ na kĩ? Nao matariĩ ta kĩ?
• 32. Matariĩ ta twana tũikaire kĩng’ang’a-inĩ tũgĩĩtanaga, tũkoiga atĩrĩ, Tũmũhuhĩire mĩtũrirũ, na mũtinaina rũĩmbo; twamũcakaithia, na mũtinarĩra maithori.
• 33. Nĩ gũkorũo Johana Mũbatithania okire atekũrĩa mũgate kana akanyua ndibei, na mũkoiga atĩrĩ, Arĩ na ndaimono.
• 34. Nake Mũrũ wa Mũndũ okire akĩrĩaga na akĩnyuaga; na mũkoiga atĩrĩ, Onei mũndũ mũrĩi na mũnyui wa ndibei, na mũrata wa etia mbia cia igoti na wa ehia!
• 35. Ĩndĩ ũũgĩ nĩũmenyekaga kĩhooto kĩaguo nĩ ũndũ wa ciana ciothe ciaguo.
• 36. Na Mũfarisai ũmwe akĩmwĩta makarĩe nake. Nake agĩtonya nyũmba ya Mũfarisai ũcio, agĩikara thĩ arĩe.
• 37. Na rĩrĩ, mũndũ wa-nja warĩ mwĩhia aarĩ itũũra-inĩ rĩu, nake aamenya atĩ nĩaikarĩte akĩrĩa irio kwa Mũfarisai ũcio, agĩthiĩ na cuba warĩ na maguta manungi wega,
• 38. akĩrũgama na thutha wake, o nyarĩrĩ-inĩ ciake, akĩrĩraga-rĩ, agĩitĩka kũmũihũgia nyarĩrĩ na maithori make, agĩcoka agĩcirihũra na njuĩrĩ yake, akĩimumunya mũno, ningĩ akĩihaka maguta macio manungi wega.
• 39. Na rĩrĩa Mũfarisai ũcio wamwĩtĩte onire ũhoro ũcio akĩĩĩra na ngoro atĩrĩ, Mũndũ ũyũ angĩrĩ mũnabii-rĩ, nĩangĩamenya ũhoro wa mũndũ-wa-nja ũyũ ũkũmũhutia, o na ũrĩa atariĩ, atĩ nĩ mwĩhia.
• 40. Nake Jesu akĩmũcokeria akĩmwĩra atĩrĩ, Simoni, ndĩ na ũhoro wa gũkwĩra. Nake akiuga, Mũrutani, ta njĩra.
• 41. Nake Jesu akiuga atĩrĩ, Nĩkwarĩ muohoranĩri mũna warĩ na andũ erĩ maarĩ na thirĩ nake: ũmwe wao aarĩ na thirĩ wa ciringi magana matano, nake ũrĩa ũngĩ aarĩ na thirĩ wa ciringi mĩrongo ĩtano.
• 42. Na rĩrĩ, maaga indo cia kũmũrĩha, akĩmarekera o erĩ. Nĩ ũndũ ũcio-rĩ, ũrĩa ũngĩmwenda gũkĩra ũrĩa ũngĩ nĩ ũrĩkũ?
• 43. Nake Simoni akĩmũcokeria akiuga atĩrĩ, Nguuga nĩ ũrĩa warekeirũo nyingĩ. Nake Jesu akĩmwĩra atĩrĩ, Nĩwatua wega.
• 44. Nake akĩĩhũgũrĩra mũndũ-wa-nja ũcio, akĩĩra Simoni atĩrĩ, Nĩũkuona mũndũ ũyũ? Ndonyire nyũmba yaku, nawe ndũna’he maĩ ndĩĩthambe nyarĩrĩ: no ũyũ-rĩ, nĩanjihũgĩtie nyarĩrĩ na maithori make, agacirihũra na njuĩrĩ yake.
• 45. Wee-rĩ, ndũna’mumunya: no ũyũ-rĩ, nginya hĩndĩ ĩrĩa ndonyire nyũmba yaku ndarĩ aratigithĩria kũ’mumunya nyarĩrĩ.
• 46. Wee-rĩ, ndũna’haka mũtwe maguta: no ũyũ-rĩ, nĩa’hakĩte nyarĩrĩ maguta manungi wega.
• 47. Nĩ ũndũ ũcio ngũkwĩra atĩrĩ, Ũyũ-rĩ, nĩoherũo mehia make, namo nĩ maingĩ; tondũ nĩendanĩte mũno: no ũrĩa woheirũo manyinyi, nĩwe wendanaga o hanini.
• 48. Agĩcoka akĩĩra mũndũ wa-nja ũcio atĩrĩ, Nĩwoherũo mehia maku.
• 49. Nao arĩa maaikarĩte makĩrĩa hamwe nake magĩitĩka kwĩĩra na ngoro atĩrĩ, Kaĩ ũyũ akĩrĩ ũ, ũkĩohanagĩra mehia?
• 50. Nake agĩcoka akĩĩra mũndũ-wa-nja ũcio atĩrĩ, Nĩ gwĩtĩkia gwaku gwatũma ũhonoke; thiĩ na ũhoro.

Home