Go Back

Luka Chapter 4

• 1. NAKE Jesu akiuma kũu Jorodani aiyũrĩtwo nĩ Roho Mũtheru, agĩtwarũo nĩ Roho werũ-inĩ,
• 2. aikare kũu matukũ mĩrongo ĩna, akĩgeragio nĩ mũcukani. Na matukũ macio ndaarĩaga kĩndũ o na kĩ: namo maathira, akĩhũta.
• 3. Nake mũcukani akĩmwĩra atĩrĩ, Ongorũo wee nĩwe Mũrũ wa Ngai, ĩra ihiga rĩrĩ rĩtuĩke mũgate.
• 4. Nake Jesu akĩmũcokeria akĩmwĩra atĩrĩ, Ũhoro nĩwandĩkĩtwo atĩrĩ, Ti mũgate wiki ũtũũragia mũndũ muoyo.
• 5. Ningĩ agĩcoka akĩmũtwara kĩrĩma igũrũ, akĩmuonia mothamaki mothe ma thĩ o kahinda kanini ma,
• 6. Nake mũcukani agĩcoka akĩmwĩra atĩrĩ, Wathani wa gwathaga kũu guothe nĩngũkũhe, o na mwago wakuo: nĩ ũndũ kũheo nĩ’heetwo niĩ; na mũndũ o ũrĩa ingĩenda kũhe, ndamũhe.
• 7. Nĩ ũndũ ũcio-rĩ, ũngĩĩtĩkĩra kũndurĩria ndu o haha ndĩ, ũ’hoe, ũcio wothe nĩũgũtuĩka waku.
• 8. Nake Jesu akĩmũcokeria akĩmwĩra atĩrĩ, Ũhoro nĩwandĩkĩtwo atĩrĩ, Turagĩria Mwathani Ngai waku ndu ũmũhoyage, na ũmũtungatagĩre o we wiki.
• 9. Agĩcoka akĩmũtwara Jerusalemu, akĩmũrũgamia o igũrũ gathũrũmũndũ-inĩ ka hekarũ, akĩmwĩra atĩrĩ, Ongorũo wee nĩwe Mũrũ wa Ngai, wĩtungumanie thĩ, uumĩte haha:
• 10. nĩ gũkorũo ũhoro nĩwandĩkĩtwo atĩrĩ, Nĩagaatha araika ake nĩ ũndũ waku, nĩ getha magũikaragie:
• 11. na ningĩ atĩrĩ, Nĩmagakwanĩrĩria na moko mao Ndũkae kũgũthwo kũgũrũ nĩ ihiga.
• 12. Nake Jesu akĩmũcokeria akĩmwĩra atĩrĩ, Ningĩ nĩkwĩranĩtwo atĩrĩ, Ndũkanagerie Mwathani Ngai waku.
• 13. Nake mũcukani aarĩkia kũmũgeria magerio macio mothe, agĩtigana nake ihinda.
• 14. Nake Jesu agĩcoka arĩ na hinya wa Roho, agĩthiĩ Galili: nayo ngumo yake ĩgĩtambũka ng’ongo ciothe cia kũu.
• 15. Nake akarutanaga thunagogi-inĩ ciao, akĩgoocagwo nĩ andũ othe.
• 16. Nake agĩkinya Nazarethi, o kũrĩa aarereirũo: agĩtonya thunagogi mũthenya wa thabathũ, o ta ũrĩa aamenyerete gwĩkaga, akĩrũgama athome.
• 17. Nake akĩheo ibuku rĩa Isaia ũrĩa mũnabii. Akĩrĩkũnjũra, agĩcaria harĩa ũhoro wandĩkĩtwo ũũ:
• 18. Roho wa Mwathani arĩ igũrũ rĩakwa, Nĩ ũndũ nĩaanjitĩrĩirie maguta ’hunjagĩrie arĩa athĩni Ũhoro-ũrĩa-Mwega: Nĩandũmĩte ’menyithanie atĩ arĩa mohetwo nĩmohorũo, O na atĩ arĩa atumumu nĩmegũcoka kuona; Na njohorithie arĩa mahinyĩrĩirio,
• 19. Ningĩ ’hunjanagĩrie ũhoro wa mwaka wa Mwathani, o ũrĩa wĩtĩkĩrĩtwo.
• 20. Agĩcoka agĩkũnja ibuku, akĩrĩcokeria ndungata, agĩikara thĩ; nao andũ othe arĩa maarĩ thunagogi makĩmũkũũrĩra maitho.
• 21. Nake akĩrika kũmera atĩrĩ, Ũhoro ũcio wandĩkĩtwo nĩwahingio o umũthĩ mweiguĩra na matũ manyu.
• 22. Nao othe makĩmũgatha, na makĩgega nĩ ũndũ wa ciugo iria horo cioimaga kanua gake: magĩkiuga atĩrĩ, Githĩ ũyũ tiwe mũrũ wa Jusufu?
• 23. Nake akĩmera atĩrĩ, No gũkorũo mwanjĩra thimo ĩno atĩrĩ, Mũthondekani ũyũ, wĩhonie wee mwene: o ũndũ o wothe twanaigua atĩ wanekwo nĩwe o kũrĩa Kaperinaumu, wĩke o na gũkũ bũrũri waku kĩũmbe.
• 24. Agĩcoka akĩmera, Ngũmwĩra atĩrĩ na ma, Gũtirĩ mũnabii ũngĩĩtĩkĩrũo bũrũri wake kĩũmbe.
• 25. Ĩndĩ ngũmwĩra atĩrĩ na ma, Nĩkwarĩ atumia aingĩ a ndigwa bũrũri wa Aisiraeli, matukũ ma Elija, rĩrĩa matu maahingirũo mĩaka ĩtatũ na mĩeri ĩtandatũ, hĩndĩ ĩrĩa kwagĩire ng’aragu nene bũrũri ũcio wothe:
• 26. no rĩrĩ, Elija ndaatũmirũo kũrĩ ũrĩkũ wao, tiga o kũrĩ mũtumia ũmwe wa ndigwa ũrĩa watũire itũũra rĩetagwo Zarefatha, o bũrũri wa Sidoni.
• 27. Ningĩ nĩkwarĩ andũ aingĩ maarũarĩte mangũ bũrũri wa Aisiraeli hĩndĩ ya Elisha ũrĩa mũnabii; na gũtirĩ mũndũ wao wahonirio, tiga o Naamani, ũrĩa Mũsuriata.
• 28. Nao arĩa othe maarĩ thunagogi thĩinĩ, maaigua mohoro macio, makĩrakara mũno;
• 29. magĩgĩũkĩra, makĩmũthinĩkania oime itũũra rĩao, makĩmũtwara hururu-inĩ ya kĩrĩma kĩrĩa itũũra rĩao rĩaakĩtwo, nĩ getha mamũkurumanie agũe thĩ ho.
• 30. Nowe akĩhungũrĩra gatagati kao, agĩĩthiĩra.
• 31. Agĩtherera agĩkinya Kaperinaumu, itũũra rĩa Galili. Na nĩaarutaga andũ ũhoro mũthenya wa thabatũ:
• 32. nao makĩgega mũno nĩ ũndũ wa ũrutani wake; nĩ gũkorũo ũhoro ũrĩa aaheanaga warĩ wa mũndũ wathanaga.
• 33. Na kũu thunagogi-inĩ nĩkwarĩ mũndũ warĩ na roho wa ndaimono thũku, nayo ikĩanĩrĩra na mũgambo mũnene, ĩkiuga atĩrĩ,
• 34. Tũtige; ũhoro witũ nawe ũkĩrĩ ũrĩkũ, wee Jesu wa Nazarethi? Anga nĩũũkĩte gũtũnina? Nĩngũũĩ, wee nĩwe ũrĩa Mũtheru wa Ngai.
• 35. Nake Jesu akĩmĩkaania, akĩmĩĩra atĩrĩ, Kira na uume thĩinĩ wake. Nayo ndaimono ĩo yamũtungumania gatagatĩ-inĩ kao, ĩkiuma thĩinĩ wake, na ndĩmwĩke ũũru o na ũrĩkũ.
• 36. Nao othe makĩgwatwo nĩ kĩgeganio makĩũrania atĩrĩ, Kaĩ ũhoro ũyũ ũtariĩ atĩa? Tondũ nĩaathaga ngoma iria thũku na wathani o na hinya, nacio ikoima andũ.
• 37. Na ngumo yake ĩkĩhunja kũndũ guothe kwa ng’ongo cia kũu.
• 38. Nake agĩũkĩra akiuma thunagogi, agĩtonya nyũmba ya Simoni. Nake nyina wa mũtumia wa Simoni aarĩ mwĩhĩre, akahiũha mwĩrĩ mũno; nao makĩmũthaitha nĩ ũndũ wake.
• 39. Nake akĩrũgama hakuhĩ nake, agĩkaania mũrimũ ũcio, naguo ũkĩmũtiga; na kahinda o kau mũtumia ũcio agĩũkĩra akĩmatungatĩra.
• 40. Na riũa rĩgĩthũa, arĩa othe maarĩ na andũ marũarĩte mĩrimũ mĩthemba mĩthemba makĩmatwara kũrĩ we; nake akĩmaigĩrĩra moko o mũndũ o mũndũ, akĩmahonia.
• 41. Nacio ndaimono ikiuma andũ aingĩ, ikĩanagĩrĩra ikiugaga atĩrĩ, Wee nĩwe Mũrũ wa Ngai. Nake agĩcikaania, na ndaigana gũciĩtĩkĩria ciarie, nĩ gũkorũo nĩcioĩ atĩ nĩwe Kristo.
• 42. Na gwakĩa-rĩ, akiuma ho, agĩthiĩ kũndũ gũtaatũire andũ: nao andũ a kĩrĩndĩ makĩmũcaria, magĩthiĩ o harĩ we, makĩenda kũgiria athiĩ atigane nao.
• 43. Nowe akĩmera atĩrĩ, Nĩnjagĩrĩirũo nĩ kũhunjanagĩria Ũhoro-ũrĩa-Mwega wa ũthamaki wa Ngai matũũra-inĩ marĩa mangĩ o namo; nĩ gũkorũo nĩkĩo ndatũmirũo.
• 44. Nake agĩkorũo akĩheanaga ũhoro thunagogi iria cia Galili.

Home