Go Back

Luka Chapter 18

• 1. NAKE akĩmahe ũhoro na ngerekano, akamarute atĩ nĩmaagĩrĩirũo nĩ kũhoyaga Ngai hingo ciothe mategũtirika;
• 2. akiuga atĩrĩ, Itũũra rĩmwe nĩkwarĩ mũtuanĩri cira ũrĩa ũtetigagĩra Ngai, kana agaconokera mũndũ:
• 3. na rĩrĩ, itũũra-inĩ rĩu kwarĩ mũtumia wa ndigwa; nake nĩaathiaga harĩ we kaingĩ akamwĩra atĩrĩ, Ndĩhĩria kũrĩ mũndũ ũrĩa tũrĩ ũthũ nake.
• 4. Nake akĩrega ihinda: no thutha agĩcoka akĩĩĩra na ngoro atĩrĩ, O na itetigagĩra Ngai, na ndiconokagĩra mũndũ,
• 5. ĩndĩ tondũ mũtumia ũyũ wa ndigwa nĩandangaga-rĩ, nĩngũmũrĩhĩria, nĩ getha atige kũ’nogagia nĩ gũũkaga haha hingo ciothe.
• 6. Nake Mwathani akiuga atĩrĩ, Iguai ũrĩa mũtuanĩri cira ũcio mũũru oiga.
• 7. Githĩ nake Ngai ndangĩrĩhĩria andũ ake arĩa ethurĩire, o arĩa mamũkayagĩra mũthenya o na ũtukũ, o na angĩmaikaria ihinda?
• 8. Ngũmwĩra atĩrĩ, nĩarĩmarĩhĩria narua. No rĩrĩ, rĩrĩa Mũrũ wa Mũndũ agoka, anga nĩagakora andũ metĩkĩtie gũkũ thĩ?
• 9. Na ningĩ akĩarĩria andũ amwe arĩa meĩhokaga o ene, magĩĩtuaga athingu, na makararagia arĩa angĩ othe; akĩmahe ũhoro ũyũ na ngerekano, atĩrĩ:
• 10. Andũ erĩ nĩmaambatire magĩthiĩ hekarũ makahoe Ngai; ũmwe aarĩ Mũfarisai, nake ũrĩa ũngĩ aarĩ mwĩtia mbia cia igoti.
• 11. Nake Mũfarisai ũcio akĩrũgama, akĩhoya ũũ na mwĩĩro wa ngoro, Ngai, nĩndakũgatha nĩ ũndũ ndihaanaine na andũ arĩa angĩ; tondũ o nĩ arĩa ma, na ti athingu na nĩ itharia, o na tondũ ndihaana ta mũndũ ũyũ mwĩtia mbia cia igoti.
• 12. Niĩ-rĩ, ndĩĩhingaga kũrĩa irio kerĩ o kiumia; na nĩndutaga gĩcunjĩ gĩa ikũmi kĩa indo ciothe iria nyonaga.
• 13. No mũndũ ũcio mwĩtia mbia cia igoti, arũgamĩte o haraya, ndaigana o na gũtiira maitho make na Igũrũ, no kwĩhũra ehũrahũrire gĩthũri, akiuga atĩrĩ, Ngai, njiguĩra tha, niĩ mũndũ mwĩhia.
• 14. Ngũmwĩra atĩrĩ, Mũndũ ũcio nĩaaikũrũkire akĩinũka gwake mũciĩ atuĩtwo mũthingu gũkĩra ũcio ũngĩ; nĩ gũkorũo o mũndũ ũrĩa wĩtũũgagĩria nĩakanyihio; no ũrĩa wĩnyihagia nĩagatũũgĩrio.
• 15. Nao andũ nĩmaamũtwaragĩra o na tũkenge natuo, nĩguo atũhutie; nao arutwo mona ũguo makĩmakaania.
• 16. Nowe Jesu agĩtwĩta tũkinyio harĩ we, akiuga atĩrĩ, Rekei twana tũũke kũrĩ niĩ, na tigai gũtũgiria: nĩ gũkorũo ũthamaki wa Ngai nĩ wa arĩa matariĩ tatuo.
• 17. Ngũmwĩra atĩrĩ na ma, Mũndũ ũrĩa wothe ũtakaamũkĩra ũthamaki wa Ngai ta kaana, ndagatonya guo o na atĩa.
• 18. Na mũnene ũmwe akĩmũũria atĩrĩ, Mũrutani mwega, ingĩĩka atĩa nĩ getha ngagae muoyo ũrĩa ũtagathira?
• 19. Nake Jesu akĩmũũria atĩrĩ Ũkũnjĩta mwega nĩkĩ? Gũtirĩ mwega tiga o ũmwe, nĩwe Ngai.
• 20. Nĩũũĩ maathani, atĩ, Ndũkanatharanie, Ndũkanoragane, Ndũkanaiye, Ndũkanaigĩrĩre mũndũ kĩgenyo, Tĩa thoguo na nyũkwa.
• 21. Nake akiuga atĩrĩ, Maũndũ macio mothe ndũire ndĩmarũmĩtie kuuma ndĩ o mũnyinyi.
• 22. Nake Jesu aaigua ũguo, akĩmwĩra atĩrĩ, Nĩharĩ ũndũ ũmwe ũtigarĩtie: endia indo ciothe iria wĩ nacio, ũgayanie athĩni, na nĩũkagĩa na ũtonga Igũrũ: ningĩ ũũke ũnũmĩrĩre.
• 23. Nake aaigua maũndũ macio, akĩigua kĩeha mũno; nĩ ũndũ aarĩ gĩtonga kĩnene.
• 24. Nake Jesu, akĩmũrora, akiuga atĩrĩ, Andũ arĩa atongu, kaĩ nĩmakona hinya magĩgatonya ũthamaki wa Ngai-ĩ!
• 25. Tondũ nĩ ũhũthũ ngamĩra ĩhungure kahoro ga cingano kũrĩ gĩtonga gĩtonye ũthamaki-inĩ wa Ngai.
• 26. Nao andũ arĩa maaiguire ũguo magĩkiuga atĩrĩ, Ningĩ nũ ũngĩkĩhota kũhonoka?
• 27. Nowe akiuga atĩrĩ, Maũndũ marĩa matangĩhoteka nĩ andũ nĩmahotekaga nĩ Ngai.
• 28. Nake Petero akiuga, Atĩrĩrĩ, ithuĩ-rĩ, nĩtũtigĩte indo ciitũ tũgakũrũmĩrĩra.
• 29. Nake Jesu akĩmera atĩrĩ, Ngũmwĩra atĩrĩ na ma, Gũtirĩ mũndũ ũtigĩte nyũmba, kana mũtumia, kana ariũ a nyina, kana aciari ake, kana ciana, nĩ ũndũ wa ũthamaki wa Ngai,
• 30. ũtakaheo, matukũ maya tũrĩ, indo nyingĩ gũkĩra icio, o na aheo muoyo ũtagathira hingo ĩrĩa ĩgoka thutha.
• 31. Agĩcoka agĩĩta arĩa ikũmi na erĩ moke harĩ we, akĩmera, Atĩrĩrĩ, tũkwambata Jerusalemu, na maũndũ marĩa mothe maandĩkĩtwo nĩ anabii nĩmakahingĩrio Mũrũ wa Mũndũ.
• 32. Nĩ gũkorũo nĩakaneanwo kũrĩ andũ arĩa a Ndũrĩrĩ, na anyũrũrio, na anyarirũo ũũru, o na atuĩrũo mata:
• 33. nao nĩmakamũhũra na kĩboko kĩĩ njaaga, na mamũũrage: naguo mũthenya wa gatatũ nĩakariũka.
• 34. Nao makĩaga kũigua ũndũ o na ũmwe wa maũndũ macio; ũhoro ũcio aamerire ũkĩmariga, o na matiamenyire ũrĩa merirũo.
• 35. Na gũgĩkinya atĩrĩ, aakuhĩhĩria Jeriko, mũndũ ũmwe mũtumumu agĩkorũo aikaire thĩ mũkĩra-inĩ wa njĩra, akĩhoya thendi:
• 36. nake akĩigua andũ gĩkundi makĩhĩtũka, akĩũria kĩrĩa kĩo.
• 37. Nao makĩmwĩra atĩrĩ Nĩ Jesu ũrĩa wa Nazarethi ũrahĩtũka.
• 38. Nake akĩanĩrĩra akiuga atĩrĩ, Jesu, Mũrũ wa Daudi, njiguĩra tha.
• 39. Nao arĩa maatongoretie makĩmũkaania, makĩmwĩra akire: nowe agĩcoka kwanĩrĩra mũno makĩria, akiugaga atĩrĩ, Mũrũ wa Daudi, njiguĩra tha.
• 40. Nake Jesu akĩrũgama, agĩathana atĩ arehwo harĩ we: nake aakinya hakuhĩ, akĩmũũria atĩrĩ,
• 41. Ũkwenda ngwĩke atĩa? Nake akiuga atĩrĩ, Mwathani ũyũ, ngwenda o njoke kuona.
• 42. Nake Jesu akĩmwĩra atĩrĩ, Coka kuona: gwĩtĩkia gwaku nĩkuo gwatũma ũhone.
• 43. Na kahinda o kau agĩcoka kuona, akĩmũrũmĩrĩra akĩgoocaga Ngai: nao andũ othe, mona ũguo, magĩkumia Ngai.

Home