Go Back

Luka Chapter 16

• 1. NAKE agĩcoka akĩĩra arutwo atĩrĩ, Nĩkwarĩ mũndũ warĩ gĩtonga, nake nĩaarĩ na mũrori wa indo ciake; ũcio nake agĩthitakwo kũrĩ we, atĩ nĩaaitangaga indo ciake.
• 2. Akĩmwĩta akĩmũũria atĩrĩ, Ũhoro ũcio waku njiguĩte nĩ atĩa? Ta ’he ũhoro wa wĩra ũcio ndakũheire; nĩ gũkorũo ndũngĩhota gũikara ũkĩroraga indo ciakwa.
• 3. Nake mũrori ũcio wa indo akĩĩũria atĩrĩ, Ngũgĩĩka atĩa, kuona atĩ mwathani wakwa nĩekũndũta wĩra-inĩ wa kũrora indo? Ndirĩ na hinya wa kũrĩma; na ingĩhoya mbia kũrĩ andũ, ndaconoka.
• 4. Ĩndĩ nĩndamenya ũrĩa ngwĩka, nĩ getha, rĩrĩa ngarutwo wĩra-inĩ wa kũrora indo, andũ makanyamũkĩra njikarage kwao.
• 5. Agĩgĩĩta andũ arĩa maarĩ na thirĩ na mwathani wake moke o mũndũ, o mũndũ; akĩũria ũrĩa wa mbere atĩrĩ, Wee-rĩ, wĩ na thirĩ ũigana atĩa wa mwathani wakwa?
• 6. Nake akĩmwĩra atĩrĩ, Nĩ wa marebe magana merĩ ma maguta. Nake akĩmwĩra atĩrĩ, Oya marũa maku ma thirĩ, ũikare thĩ narua, wandĩke atĩ nĩ igana rĩmwe.
• 7. Agĩcoka akĩũria mũndũ ũngĩ atĩrĩ, Nawe-rĩ, thirĩ waku ũigana atĩa? Nake akiuga atĩrĩ, Nĩ wa makũnia igana rĩmwe ma ngano. Nake akĩmwĩra atĩrĩ, Oya marũa maku ma thirĩ, wandĩke atĩ nĩ makũnia mĩrongo ĩnana.
• 8. Nake mwathani wake akĩgatha mũrori indo ũcio mũũru nĩ ũndũ wa ũguo ekire na ũũgĩ; nĩ gũkorũo andũ arĩa a mahinda maya me na ũũgĩ, o rũciaro-inĩ rũao, gũkĩra andũ arĩa a ũtheri.
• 9. Na niĩ ngũmwĩra atĩrĩ, Tumagai ndũgũ na andũ na ũtonga ũrĩa ũtarĩ wa ũthingu; nĩ getha wathira rĩ, makamwamũkĩra mũikarage ciikaro-inĩ iria igatũũra tene na tene.
• 10. Mũndũ wa kwĩhokeka na indo nyinyi mũno, ũcio ehokeka na iria nyingĩ o nacio; nake ũrĩa ũtarĩ wa kwĩhokeka na indo nyinyi mũno, ũcio ndangĩĩhokeka o na iria nyingĩ nacio.
• 11. Nĩ ũndũ ũcio rĩ, mũngĩkorũo mũtehokekete na ũtonga ũrĩa ũtarĩ wa ũthingu, nũ ũngĩmwĩhoka na ũtonga ũrĩa wa ma?
• 12. Na ningĩ mũngĩkorũo mũtehokekete na indo cia mũndũ ũngĩ, nũ ũngĩmũne iria cianyu inyuene?
• 13. Gũtirĩ ndungata ĩngĩhota gũtungatĩra aathani erĩ; nĩ ũndũ no kinya ĩthũũre ũmwe, yende ũrĩa ũngĩ; kana ĩĩiguithanie na ũmwe, ĩnyarare ũrĩa ũngĩ. Mũtingĩhota gũtungatĩra Ngai o na ũtonga.
• 14. Nao Afarisai, arĩa mendaga mbia mũno, nĩmaaiguire maũndũ macio mothe, makĩmũthekerera.
• 15. Nake akĩmera atĩrĩ, Inyuĩ nĩ inyuĩ mwĩtuaga athingu mbere ya andũ; no Ngai nĩamenyaga ngoro cianyu: nĩ gũkorũo ũndũ ũrĩa ũtũũgagĩrio kũrĩ andũ, nĩguo ũrĩ magigi mbere ya Ngai.
• 16. Watho o na anabii maatũire o nginya matukũ ma Johana: no kuuma hĩndĩ ĩo Ũhoro-ũrĩa-Mwega wa ũthamaki wa Ngai nĩũhunjanagĩrio, na mũndũ o wothe nĩaũtonyaga na ũgiginyani.
• 17. No rĩrĩ, nĩ ũhũthũ Igũrũ na thĩ gũthire, kũrĩ gakururo kamwe ga t karĩ watho-inĩ wa Ngai kore.
• 18. O mũndũ ũrĩa ũngĩte mũtumia na ahikie ũngĩ, nĩatharanĩtie: nake mũndũ ũrĩa ũkahikia ũrĩa ũteetwo nĩ mũthuriwe, nĩatharanĩtie.
• 19. Rĩu-rĩ, nĩkwarĩ mũndũ warĩ gĩtonga weguĩkaga nguo ndune na gatani mũthemba mwega mũno; nake aatũire arĩaga irio njega mĩthenya yothe.
• 20. Na rĩrĩ, mũndũ wahoyaga thendi, wetagwo Lazaro, nĩaaigagwo kĩhingo-inĩ kĩa mũciĩ wake, na aarĩ na ironda nyingĩ.
• 21. Na nĩeriragĩria kũrĩa rũitĩki rũrĩa ruoimaga metha-inĩ ya gĩtonga kĩu; na ningĩ ngui nĩciokaga kũrĩ we igacũnaga ironda ciake.
• 22. Na gũgĩkinya atĩrĩ, atĩ ũcio mũhoi thendi nĩaakuire, agĩkuuwo nĩ araika, akĩigwo gĩthũri-inĩ kĩa Iburahimu; gĩtonga nakĩo gĩgĩkua gĩgĩthikwo.
• 23. Nakĩo gĩĩ kũu kwa-ngoma gĩkĩiguaga ruo rũnene-rĩ, gĩgĩtiira maitho, gĩkĩona Iburahimu arĩ kũraya, o na Lazaro arĩ gĩthũri-inĩ gĩake.
• 24. Akĩanĩrĩra akiuga atĩrĩ, Iburahimu, Awa, njiguĩra tha, na ũtũme Lazaro atobokie mũthia wa kĩara gĩake maĩ-inĩ, oke a’hehie rũrĩmĩ, nĩ gũkorũo ninduuragwo mũno ndĩ rũrĩrĩmbĩ-inĩ rũrũ rũa mwaki.
• 25. Nowe Iburahimu akiuga atĩrĩ, Mũrũ wakwa, ta ririkana atĩ ihinda rĩrĩa watũire muoyo kũrĩa thĩ, nĩwonaga indo ciaku njega, nake Lazaro akona iria njũru; no rĩu, gũkũ-rĩ, ũcio nĩanyamarũragwo, nawe ũgatuurũo mũno.
• 26. Ningĩ, hamwe na ũguo-rĩ, nĩkũrĩ mũkuru mũriku mũno wĩkĩrĩtwo gatagatĩ gaitũ nawe, nĩ getha arĩa mangĩenda kuuma gũkũ mathiĩ kũrĩ wee matikahote; o na mũndũ ndakanahote kũringa oime kũu, oke gũkũ tũrĩ.
• 27. Nakĩo gĩtonga gĩkiuga atĩrĩ, Hakĩrĩ ũguo, Awa, ndagũthaitha ũmũtũme kũrĩ andũ a nyũmba ya awa;
• 28. nĩ gũkorũo ndĩ na ariũ a maitũ atano; athiĩ akamoimbũrĩre ũhoro, nĩ getha matikanae gũkinya o nao gũkũ kwĩ na ruo rũnene ũũ.
• 29. Nowe Iburahimu akiuga atĩrĩ, Andũ acio marĩ na Musa o na anabii; nĩmamaigue o.
• 30. Nakĩo gĩtonga gĩgĩcoka gĩkiuga atĩrĩ, Tiguo, Iburahimu, Awa; no rĩrĩ, mũndũ angĩthiĩ kũrĩ o, oimĩte kũrĩ arĩa akuũ, no merire.
• 31. Nake akĩmwĩra atĩrĩ, Akorũo matingĩigua Musa na anabii, matingĩringĩrĩrĩka nĩ mũndũ, o na angĩkorũo nĩ kũriũka ariũkĩte akoima kũrĩ arĩa akuũ.

Home