Go Back

Luka Chapter 13

• 1. RĨU-RĨ, hĩndĩ o ĩo nĩhaarĩ andũ amwe ho maamwĩrire ũhoro wa Agalili arĩa Pilato aatukanirie thakame yao na ĩrĩa ya nyamũ ciao cia magongona.
• 2. Nake akĩmacokeria akĩmoria atĩrĩ, Githĩ mũgwĩciria atĩ Agalili acio maarĩ ehia gũkĩra Agalili othe, kuona atĩ nĩmaanyaririrũo ũguo?
• 3. Ngũmwĩra atĩrĩ, Tiguo: no rĩrĩ, mũngĩaga kwĩrira, inyuothe mũkaninwo o tao.
• 4. Kana andũ acio ikũmi na anana-rĩ, o arĩa maagũĩrĩirũo nĩ nyũmba ĩrĩa ndaya na igũrũ kũu Siloamu, ĩkĩmoraga, githĩ mũkĩũĩ atĩ nĩmaahĩtĩtie gũkĩra andũ othe arĩa maatũire Jerusalemu?
• 5. Ngũmwĩra atĩrĩ, Tiguo: no rĩrĩ, mũngĩaga kwĩrira, inyuothe mũkaninwo o tao.
• 6. Nake akĩaria na ngerekano ĩno, akiuga atĩrĩ, Mũndũ ũmwe aarĩ na mũkũyũ wahandĩtwo mũgũnda wake wa mĩthabibu; nake agĩũka gũcaria maciaro mũtĩ-inĩ ũcio, akĩmaaga.
• 7. Agĩcoka akĩĩra mũcehi wa mĩthabibu, Atĩrĩ, rĩu nĩ mĩaka ĩtatũ njũkaga gũcaria maciaro mũkũyũ-inĩ ũyũ, o ngĩmaagaga: ũũteme, wĩkagĩra mũgũnda kiura nĩkĩ?
• 8. Nake mũcehi agĩcokia akĩmwĩra atĩrĩ, Mwathani, reka ũikare mwaka ũyũ o naguo, o kinya ndĩũrĩmĩre, na ndĩũitĩrĩrie thumu:
• 9. na thutha wa ũguo, ũngĩciara, nĩ wega; na ũngĩaga gũciara, no ũtemwo.
• 10. Nake agĩkorũo akĩrutana thunagogi-inĩ ĩmwe mũthenya wa thabatũ.
• 11. Na rĩrĩ, gũgĩkorũo kũrĩ mũtumia watũire arĩ mũrũaru mĩaka ikũmi na ĩnana, nĩ ũrĩa aagwatĩtwo nĩ ngoma, nake nĩaahocereire, akaremwo nĩ gwĩtiira o na atĩa.
• 12. Nake Jesu aamuona, akĩmwĩta akĩmwĩra atĩrĩ, Mũtumia ũyũ, nĩwehererio mũrimũ waku.
• 13. Akĩmũigĩrĩra moko: na kahinda o kau mũtumia ũcio akĩrũngario mwĩrĩ, agĩkĩgooca Ngai.
• 14. Nake mũnene wa thunagogi akĩrakara nĩ ũndũ Jesu nĩaamũhonirie mũthenya wa thabatũ, agĩcokia akĩĩra kĩrĩndĩ atĩrĩ, Nĩkũrĩ mĩthenya ĩtandatũ ĩrĩa andũ maagĩrĩirũo nĩ kũrutaga wĩra: nĩ ũndũ ũcio, ũkagai mũhonio mĩthenya ĩo, na ti mũthenya wa thabatũ.
• 15. Nowe Mwathani akĩmũcokeria akiuga atĩrĩ, Inyuĩ hinga ici! Githĩ o mũndũ wanyu ndakĩohoraga ndegwa yake, kana ndigiri yake, yume nyũmba yayo mũthenya wa thabatũ, amĩtware ĩkanyue maĩ?
• 16. Nake mũtumia ũyũ wĩ mwarĩ wa Iburahimu, ũrĩa ũtũire ohetwo nĩ Shaitani mĩaka o ĩo ikũmi na ĩnana-rĩ, githĩ ndaagĩrĩirũo nĩ kuohorũo kĩoho kĩu mũthenya wa thabatũ?
• 17. Na rĩrĩa oigire maũndũ macio thũ ciake ciothe igĩconorũo; nakĩo kĩrĩndĩ kĩu gĩothe gĩgĩkena nĩ ũndũ wa maũndũ marĩa mothe magathe mekagwo nĩwe.
• 18. Nĩ ũndũ ũcio akiuga atĩrĩ, Ũthamaki wa Ngai ũhaanaine na kĩ? Na ngũũhaanania na ndũ-ĩ?
• 19. Ũhaanaine na kahĩndĩ ga karatarĩ karĩa mũndũ oire, agĩgaikia mũgũnda wake mwene; nako gagĩkũra gagĩtuĩka mũtĩ; nacio nyoni cia rĩera-inĩ ikaraaraga honge-inĩ ciaguo.
• 20. Ningĩ akiuga atĩrĩ, Ngũhaanania ũthamaki wa Ngai na ndũ ĩ?
• 21. Ũhaanaine na ndawa ya kũimbia mũgate ĩrĩa mũtumia oire akĩmĩĩkĩra thĩinĩ wa ibaba ithatũ nene cia mũtu, kinya mũtu ũcio wothe ũkĩimbio nĩyo.
• 22. Nake agĩthianga, akĩhunguraga matũũra na mĩciĩ, akĩrutanaga ũhoro, erekeire Jerusalemu.
• 23. Na mũndũ ũmwe akĩmũũria atĩrĩ, Mwathani, andũ arĩa mekũhonokio-rĩ, anga nĩ anyinyi? Nake akĩmera atĩrĩ,
• 24. Geragiai na hinya mũtonyere mũromo ũrĩa mũceke; nĩ gũkorũo ngwĩra atĩrĩ, Nĩ andũ aingĩ magacaria ũrĩa mangĩtonya, na matihote.
• 25. Hĩndĩ ĩrĩa mwene nyũmba agakorũo okĩrĩte, na arĩkĩtie kũhinga mũrango-rĩ, mũgaitĩka kũrũgama o nja mũkĩringaringaga mũrango, mũkiugaga atĩrĩ, Mwathani, tũhingũrĩre; nake nĩakamũcokeria amwĩre atĩrĩ, Ndimũũĩ kũrĩa muumĩte.
• 26. Hĩndĩ ĩo nĩmũgaitĩka kuuga atĩrĩ, Nĩtwarĩaga na tũkanyua wee ũrĩ o ho, o nawe nĩwarutanaga ing’aratua-inĩ ciitũ;
• 27. nake nĩakoiga atĩrĩ, Ngũmwĩra atĩrĩ, ndikĩũĩ kũrĩa muumĩte; umai kũrĩ niĩ inyuĩ othe mwĩkaga waganu.
• 28. Na kũu nĩkuo gũkagĩa kĩrĩro na kũhagarania magego, rĩrĩa mũkona Iburahimu na Isaaka na Jakubu, na anabii othe, marĩ ũthamaki-inĩ wa Ngai, na inyuĩ ene mũgakorũo mũikanĩtio na nja.
• 29. Nao andũ nĩmagoka moimĩte kũrĩa irathĩro na kũrĩa ithũĩro, na gathigathini na gũthini, na maikare thĩ ũthamaki-inĩ wa Ngai.
• 30. Na rĩrĩ, nĩkũrĩ andũ a thutha magatuĩka a mbere, na nĩkũrĩ andũ a mbere magatuĩka a thutha.
• 31. Na thaa o ĩo, gũgĩũka Afarisai amwe makĩmwĩra atĩrĩ, Uma gũkũ, ũthiĩ kũngĩ; nĩ gũkorũo Herode nĩekwenda gũkũũragithia.
• 32. Nake akĩmera atĩrĩ, Thiĩi, mũkere mbwe ĩo ũũ: Atĩrĩrĩ, ũmũthĩ o na rũciũ nĩngũikara ngĩrutaga ndaimono, na ngĩhonanagia, naguo mũthenya wa gatatũ nĩngahingia wĩra wakwa.
• 33. No ũmũthĩ na rũciũ o na oke, ndirĩ hingo itarĩthiaga mbere: nĩ gũkorũo gũtingĩhoteka atĩ mũnabii oragĩrũo kũndũ kũngĩ tiga o Jerusalemu.
• 34. Atĩrĩrĩ, Jerusalemu! Jerusalemu! Wee ũũragaga anabii, na ũkahũra na mahiga arĩa marekagio kũrĩ wee, nĩ mahinda maigana atĩa ndanenda gũcokanĩrĩria ciana ciaku hamwe, o ta ũrĩa ngũkũ ĩcokanagĩrĩria tũcui twayo nguruĩ ya mathagu mayo; na mwanarega!
• 35. Atĩrĩrĩ, nyũmba yanyu nĩ ndige ĩĩ thuthĩku; na ngũmwĩra atĩrĩ, Mũtigacoka kũnyona o nginya rĩrĩa mũkoiga atĩrĩ, Kũrathimwo-rĩ, nĩ ũrĩa ũgũũka na rĩĩtwa rĩa Mwathani.

Home