Go Back

Luka Chapter 11

• 1. NA gũgĩkinya atĩrĩ, hĩndĩ ĩrĩa aarĩ handũ hana akĩhoya Ngai-rĩ, aarĩkia, mũrutwo ũmwe wake akĩmwĩra atĩrĩ, Mwathani, tũrute o na ithuĩ kũhoya Ngai, o ta ũrĩa Johana nake aarutire arutwo ake.
• 2. Nake akĩmera atĩrĩ, Rĩrĩa mũkũhoya Ngai, ugagai atĩrĩ, Ithe witũ [wĩ Igũrũ], Rĩĩtwa rĩaku nĩrĩamũrũo. Ũthamaki waku ũũke. [O ũrĩa wendete wee nĩwĩkagwo gũkũ thĩ, o ta ũrĩa wĩkagwo kũu Igũrũ.]
• 3. Tũheage-o mũthenya irio ciitũ cia gũtũigana.
• 4. Na ũtuohere mehia maitũ; nĩ gũkorũo o na ithuĩ nĩtuohagĩra o mũndũ ũrĩa wĩ na thirĩ na ithuĩ. Na ndũgatũtware magerio-inĩ, [no kũhonokia ũtũhonokagie ũũru-inĩ.]
• 5. Nake akĩmera atĩrĩ, Nĩ mũndũ ũrĩkũ wanyu ũngĩkorũo arĩ na mũratawe, nake aathiĩ gwake o ũtukũ gatagatĩ, amwĩre atĩrĩ, Mũrata wakwa, njohorera mĩgate ĩtatũ;
• 6. nĩ gũkorũo ndĩ na mũrata wakwa ũũkĩte ũgeni, na ndirĩ na irio cia kũmũhe;
• 7. nake ũcio arĩ nyũmba thĩinĩ amũcokerie amwĩre atĩrĩ, Tiga kũndanga: riigĩ nĩ itiirie, na tũrĩ ũrĩrĩ hamwe na twana twakwa; ndihota gũũkĩra ngũnengere?
• 8. Ngũmwĩra atĩrĩ, o na atangĩũkĩra amũnengere nĩ ũndũ nĩ mũratawe, ĩndĩ nĩ ũndũ wa ũrĩa aramũringĩrĩria mũno, nĩegũũkĩra amũhe o iria imũbatairie.
• 9. Na niĩ ngũmwĩra atĩrĩ, Hoyai, na nĩmũkũheo; mathai, na nĩmũkuona; ringaringai mũrango, na nĩmũkũhingũrĩrũo.
• 10. Nĩ ũndũ o mũndũ ũrĩa ũhoyaga, nĩaheagwo; na ũrĩa ũmathaga, nĩonaga; na ũrĩa ũringaringaga, nĩahingũragĩrũo.
• 11. Na rĩrĩ, nĩ ũrĩkũ wanyu wĩ ithe wa mũndũ, na mũrũ wake angĩmwĩtia mũgate, aamũne ihiga? Kana angĩmwĩtia kĩũngũyũ, aamũne nyamũ-ya-thĩ handũ ha kĩũngũyũ?
• 12. Ningĩ angĩmwĩtia itumbĩ, aamũne kang’aurũ?
• 13. Nĩguo-rĩ, mwagĩkorũo inyuĩ, na mũrĩ oru, nĩmũũĩ kũheaga ciana cianyu iheo njega, ĩ Ithe wanyu wĩ Igũrũ angĩkĩria atĩa kũhe Roho Mũtheru arĩa mamũhoyaga?
• 14. Na nĩaakorirũo akĩruta ndaimono yume mũndũ ũtaahotaga kwaria. Na gũgĩkinya atĩrĩ, ndaimono ĩo yoima, mũndũ ũcio ũtaahotaga kwaria agĩitĩka kwaria; nao andũ a kĩrĩndĩ magĩkĩgega.
• 15. No amwe ao makiuga atĩrĩ, Arutaga ndaimono na hinya wa Beelizebuli, ũrĩa mũnene wa ndaimono.
• 16. Na andũ angĩ makĩmũgeria, makĩmwĩra atĩ amonie kĩama kiumĩte Igũrũ.
• 17. Nowe akĩmenya meciria ma ngoro ciao, akĩmera atĩrĩ, Bũrũri wa mũthamaki o wothe ũngĩamũkana, andũ aguo mahũrane o ene, bũrũri ũcio wacoka gĩthaka, na o nyũmba ĩgũĩre nyũmba ĩna ĩngĩ.
• 18. Ningĩ angĩkorũo Shaitani nĩatuĩkanĩte ehũre we mwene, ũthamaki wake wagĩtũũra atĩa? Nĩ ũndũ mũkuuga atĩ ndutaga ndaimono na hinya wa Beelizebuli.
• 19. Na niĩ-rĩ, ingĩkorũo ndutaga ndaimono na hinya wa Beelizebuli, kaĩ ariũ anyu macirutaga na hinya Wa ũ? Nĩ ũndũ ũcio, o nĩo magatuĩka amũtuĩri cira.
• 20. No rĩrĩ, ingĩkorũo niĩ ndutaga ndaimono na hinya wa kĩara kĩa Ngai, no gũtuĩke atĩ nĩ ũthamaki wa Ngai ũmũkorereire.
• 21. Rĩrĩa mũndũ karau, eohete indo ciake ciothe cia ita, aikarĩtie mũciĩ wake mwene, indo ciake ciikaraga itarĩ buruga:
• 22. no rĩrĩa mũndũ ũngĩ wĩ na hinya kũrĩ we ekũmũkora akamũhoota-rĩ, nĩekũmũtunya indo ciake ciothe cia ita, o iria ehokaga, na akagayanĩra mataha marĩa atahĩte.
• 23. Mũndũ ũrĩa ũtarĩ thiritũ na niĩ nĩ thũ yakwa; na ũrĩa ũtacokagĩrĩria hamwe na niĩ, ũcio nĩaharaganagia.
• 24. Na rĩrĩ, roho ũrĩa mũthũku warĩkia kuuma mũndũ, nĩũgeraga kũndũ gũtarĩ maĩ, ũgĩcaragia kũndũ gwa kũhurũka; na waaga, ũkoiga atĩrĩ, Nĩngũcoka nyũmba yakwa ĩrĩa ndoimire.
• 25. Na wakinya ho, ũkamĩkora ĩĩ haate, na ĩĩ ng’emie.
• 26. Hĩndĩ ĩo ũgagĩthiĩ, ũkegĩrĩra maroho mangĩ mũgwanja moru kũrĩ guo mwene, namo magatonya magatũũra kuo: na rĩrĩ, mĩtũũrĩre ya kũrigĩrĩria ya mũndũ ũcio ĩgagĩthũka gũkĩra ĩrĩa ya mbere.
• 27. Na gũgĩkinya atĩrĩ, hĩndĩ ĩrĩa aaragia maũndũ macio, mũtumia ũmwe warĩ kĩrĩndĩ-inĩ akĩanĩrĩra na mũgambo mũnene akĩmwĩra atĩrĩ, Gũkena-rĩ, nĩ nda ĩrĩa yagũciarire o na nyondo iria wongire.
• 28. Nowe akiuga atĩrĩ, No makĩria, gũkena-rĩ, nĩ andũ arĩa maiguaga Ũhoro wa Ngai, makaũrũmagia.
• 29. Na rĩrĩa kĩrĩndĩ kĩamũũnganagĩra, akĩrika kuuga atĩrĩ, Rũciaro rũrũ nĩ rũciaro rũthũku; naruo rũendaga kuonio kĩmenyithia; na rĩrĩ, rũtingĩheo, tiga o kĩmenyithia kĩrĩa kĩa Jona.
• 30. Nĩ gũkorũo o ta ũrĩa Jona aatuĩkire kĩmenyithia kũrĩ andũ a Nineve, ũguo no taguo Mũrũ wa Mũndũ nake nĩagatuĩka kĩmenyithia kũrĩ rũciaro rũrũ.
• 31. Mũtumia mũthamaki ũrĩa wa mwena wa gũthini nĩakarũgama cira-inĩ hamwe na andũ a rũciaro rũrũ, na amatue ehia: nĩ gũkorũo nĩoimire ituri cia thĩ, nĩ getha akeiguĩre ũũgĩ wa Solomoni; na rĩrĩ, haha nĩharĩ mũnene kũrĩ Solomoni.
• 32. Andũ a Nineve nĩmakarũgama cira-inĩ hamwe na andũ a rũciaro rũrũ, na mamatue ehia; nĩ ũndũ o nĩmaaherire, maahunjĩrio ũhoro nĩ Jona; na rĩrĩ, haha nĩharĩ mũnene kũrĩ Jona.
• 33. Gũtirĩ mũndũ ũgwatagia tawa akaũhitha ruungu harĩa ũtangĩoneka, kana akaũkunĩkĩria na irebe, no aũigaga handũ haguo, nĩ getha andũ arĩa matonyaga nyũmba monage ũtheri waguo.
• 34. Tawa wa mwĩrĩ waku nĩguo riitho rĩaku: narĩo riitho rĩaku rĩngĩkorũo nĩ rĩgima, mwĩrĩ waku wothe naguo nĩũiyũragwo nĩ ũtheri; narĩo rĩngĩtuĩka nĩ rĩthũku, mwĩrĩ waku naguo nĩũiyũragwo nĩ nduma.
• 35. Hakĩrĩ ũguo-rĩ, wĩmenyagĩrĩre atĩ ũtheri ũrĩa ũrĩ thĩinĩ waku ndũgatuĩke nduma.
• 36. Nĩ ũndũ ũcio, ongorũo mwĩrĩ waku wothe nĩũiyũrĩtwo nĩ ũtheri, na ndũrĩ na handũ harĩ nduma-rĩ, nĩũkaiyũrũo nĩ ũtheri o kũiyũrũo, o ta rĩrĩa tawa ũcio ũkũmũrĩkagĩra nĩ ũndũ wa ũrĩa wakanaga wega.
• 37. Na akĩaragia-rĩ, Mũfarisai ũmwe akĩmwĩta akegagũre gwake: nake agĩtonya nyũmba yake, agĩikara thĩ arĩe irio.
• 38. Nake Mũfarisai ũcio ona ũguo, akĩgega nĩ ũndũ ndaambire gwĩthamba moko atanegagũra.
• 39. Nake Mwathani akĩmwĩra atĩrĩ, Rĩu-rĩ, inyuĩ Afarisai mũtheragia gĩkombe o na thani na igũrũ; no rĩrĩ, thĩinĩ wanyu mũiyũritwo nĩ ũtunyani na waganu.
• 40. Inyuĩ irimũ ici! Githĩ ũrĩa wombire mwena wa na igũrũ, tiwe wombire o na mwena wa na thĩinĩ o naguo?
• 41. No rĩrĩ, heanagai na ũtugi o iria irĩ ho thĩinĩ, na hĩndĩ ĩo ciothe no ituĩke theru harĩ inyuĩ.
• 42. Kaĩ mũrĩ na haaro-ĩ, inyuĩ Afarisai! Nĩ gũkorũo nĩmũhothaga gĩcunjĩ gĩa ikũmi gĩa terere na togotia na nyeni cia mĩthemba yothe; no rĩrĩ, nĩmwagararagĩra cira wa kĩhooto o na wendani wa Ngai. No macio-rĩ, nĩmo mwaagĩrĩirũo nĩ gwĩkaga, ningĩ mũtikaage gwĩkaga macio mangĩ ma mbere.
• 43. Kaĩ mũrĩ na haaro-ĩ, inyuĩ Afarisai! Nĩ gũkorũo nĩmwendaga gũikarĩra itĩ iria cia mbere thunagogi-inĩ, na mũgeithagio ing’ang’a-inĩ.
• 44. Kaĩ mũrĩ na haaro-ĩ! Nĩ gũkorũo mũhaanaine na mbĩrĩra iria itonagwo, na andũ arĩa mageraga igũrũ rĩacio matiũĩ atĩ irĩ ho.
• 45. Na mũrutani ũmwe wa watho akĩmũcokeria akĩmwĩra atĩrĩ, Mũrutani, nĩũgũtũrumaga o na ithuĩ ũkĩaria ũguo.
• 46. Nake akiuga atĩrĩ, O na inyuĩ arutani a watho, kaĩ mũrĩ na haaro-ĩ! Nĩ gũkorũo mũtitikithagia andũ mĩrigo mĩritũ mũno, na inyuĩ ene mũtihutagia mĩrigo ĩo, o na kĩara kĩmwe kĩanyu.
• 47. Kaĩ mũrĩ na haaro-ĩ! Nĩ gũkorũo nĩmwakaga mbĩrĩra cia anabii na mahiga, nao maithe manyu nĩo maamoragire.
• 48. Nĩ ũndũ ũcio nĩmũtuĩkĩte aira a maũndũ marĩa maithe manyu mekaga, o na mũkametĩkĩra, nĩ gũkorũo nĩo maamoragire, na inyuĩ mũgaaka mbĩrĩra ciao na mahiga.
• 49. Ũndũ ũcio nĩguo watũmire ũũgĩ wa Ngai uuge atĩrĩ, Nĩngamarekagĩria anabii o na atũmwo; na amwe ao nĩmakoraga na mamanyarire;
• 50. nĩ getha rũciaro rũrũ rũgetio thakame ya anabii othe, ĩrĩa yanaitwo o gwata rĩrĩa thĩ yombirũo;
• 51. o kuuma thakame ya Habili, nginya thakame ya Zakaria ũrĩa woragĩirũo gatagatĩ-inĩ ga kĩgongona na nyũmba ĩrĩa theru. Ngũmwĩra atĩrĩ na ma, Nĩ rũciaro rũrũ rũgetio thakame ĩo
• 52. Inyuĩ arutani a watho, kaĩ mũrĩ na haaro ĩ! Nĩ gũkorũo nĩmweheretie kĩhingũro kĩa ũmenyo; mũtiigana gũtonya inyuĩ ene, nao arĩa maatonyaga mũkĩmagiria.
• 53. Nake oima hau, aandĩki-marũa na Afarisai magĩitĩka kũmũhatĩrĩria mũno, makĩmũũgitaga nĩguo aarie maũndũ maingĩ;
• 54. nao nĩmaamwĩhithĩire nĩguo mamũgwatie na kiugo kiumĩte kanua gake.

Home