Go Back

Mariko Chapter 8

• 1. MATUKŨ o macio, gwakorũo rĩngĩ kwĩ na kĩrĩndĩ kĩingĩ, na kĩaaga kĩndũ gĩa kũrĩa, agĩĩta arutwo ake, akĩmera atĩrĩrĩ,
• 2. Nĩngũiguĩra kĩrĩndĩ tha, nĩ ũndũ rĩu matindĩte na niĩ mĩthĩ ĩtatũ, na matirĩ na kĩndũ gĩa kũrĩa:
• 3. na ingĩmera mainũke mahũtiĩ, megũthiĩ kũgũa njĩra; na amwe moimĩte kũraya.
• 4. Nao arutwo ake makĩmũcokeria atĩrĩ, Mũndũ akĩrute mĩgate kũ gũkũ werũ-inĩ ya kũhũnia andũ aya?
• 5. Nake akĩmoria, Mwĩ na mĩgate ĩigana? Makiuga, Twĩ na mũgwanja.
• 6. Nake akĩĩra kĩrĩndĩ gĩikare thĩ: agĩcoka akĩoya mĩgate ĩo mũgwanja, na aarĩkia gũcokeria Ngai ngatho, akĩmĩenyũranga, akĩnengera arutwo ake matwarĩre andũ; nao makĩmĩtwarĩra kĩrĩndĩ kĩu.
• 7. Na ningĩ maarĩ na tũũngũyũ tũtarĩ tũingĩ: nake aarĩkia gũtũrathima, akiuga tũu natuo tũtwarĩrũo kĩrĩndĩ.
• 8. Andũ magĩkĩrĩa, makĩhũna: magĩcoka makĩoya cienyũ iria ciatigarire, ikĩiyũra mbawa mũgwanja.
• 9. Na andũ acio maarĩ ta ngiri inya: akĩmera mathiĩ.
• 10. Na ihinda o rĩu agĩtonya marikabu me na arutwo ake, magĩthiĩ bũrũri wa Dalumanutha.
• 11. Nao Afarisai makiumagara magĩũka, makĩrika kũmũcirithia makĩmwĩraga aringe kĩama kiume Igũrũ matu-inĩ, na nĩ kũmũgeria maamũgeragia.
• 12. Nake agĩthũmũka ithũmũka inene na roho wake, akiuga atĩrĩrĩ, Nĩ kĩ gĩgũtũma rũciaro rũrũ rũĩtie kĩama? Ngũmwĩra atĩrĩ na ma, Gũtirĩ kĩama rũciaro rũrũ rũkaringĩrũo.
• 13. Agĩtigana nao, agĩtonya marikabu rĩngĩ akĩringa mũrĩmo ũrĩa ũngĩ.
• 14. Na nĩmaariganĩirũo nĩ gũthiĩ na mĩgate; mũgate no ũmwe maarĩ naguo marikabu-inĩ, matiarĩ na ĩngĩ.
• 15. Nake akĩmataara akĩmera atĩrĩrĩ, Wĩmenyagĩrĩrei ndawa ya kũimbia mũgate, ĩrĩa ya Afarisai na ĩrĩa ya Herode.
• 16. Nao magĩtarania o ene makĩĩrana atĩrĩ, Nĩ ũndũ tũtirĩ na mĩgate.
• 17. Nake Jesu, tondũ nĩaamenyire, akĩmoria atĩrĩ, Mũratarania nĩ ũndũ mũtirĩ na mĩgate nĩkĩ? Kaĩ mũtarĩ mũrakĩmenya ũhoro, o na kana mũkahubũka? Nĩ kũũma mũũmĩte ngoro?
• 18. Anga mwĩ na maitho na mũtionaga? na mwĩ na matũ na mũtiiguaga? O na kũririkana githĩ mũtiririkanaga?
• 19. Rĩrĩa ndagayanirie andũ arĩa ngiri ithano mĩgate ĩrĩa ĩtano, ciondo nĩ ciigana mwacokire gũkuua ciiyũire cienyũ? Makĩmwĩra, Nĩ ikũmi na igĩrĩ.
• 20. Na rĩrĩa ndĩragayanirie andũ arĩa ngiri inya mĩgate ĩrĩa mũgwanja-rĩ, mũrakuuire mbawa ciigana cia cienyũ?
• 21. Makĩmwĩra, Nĩ mũgwanja. Nake akĩmoria, Mũtirĩ mũrahubũka o na rĩu?
• 22. Magĩkinya Bethisaida. Na andũ makĩmũrehere mũndũ mũtumumu makĩmũthaitha amũhutie.
• 23. Nake akĩnyita ũcio mũtumumu guoko, akĩmuumagaria thome; na aarĩkia kũmũtuĩra mata maitho na kũmũigĩrĩra moko, akĩmũũria atĩrĩ, Wĩ kĩndũ ũkuona?
• 24. Nake agĩtiira maitho, akiuga Nĩnguona andũ; no ngũmona matariĩ ta mĩtĩ, magĩthiĩ.
• 25. Agĩkĩmũigĩrĩra moko rĩngĩ maitho; nake akĩrora mũno, akĩhonio, akĩona indo ciothe wega.
• 26. Akĩmwĩra ainũke kwao, akiuga, O na mũciĩ ũyũ, ndũkaũtonye.
• 27. Nake Jesu akiuma kũu, o na arutwo ake, magĩthiĩ mĩciĩ ya Kaisarea-kwa-Filipu: na me njĩra, akĩũria arutwo ake atĩrĩ, Andũ manduaga-ũ?
• 28. Makĩmwĩra atĩrĩ, Kũrĩ moigaga nĩwe Johana Mũbatithania: na kũrĩ moigaga nĩwe Elija; na ningĩ kũrĩ moigaga nĩwe ũmwe wa anabii.
• 29. Agĩcoka akĩmoria, Ĩ inyuĩ mũnduaga-ũ? Nake Petero agĩcokia ũhoro akĩmwĩra atĩrĩ, Wee nĩwe Kristo.
• 30. Nake akĩmakaania matikere mũndũ ũhoro wake.
• 31. Agĩitĩka kũmaruta atĩ Mũrũ wa Mũndũ ndarĩ hingo atakona mathĩna maingĩ, na aregwo nĩ athuri, na athĩnjĩri-Ngai arĩa anene, na aandĩki-marũa, na ningĩ oragwo, na thutha wa mĩthenya ĩtatũ acoke ariũke.
• 32. Naguo ũhoro ũcio akĩwaria atekũhitha. Nake Petero akĩmũtwara ndundu agĩitĩka kũmũkaania.
• 33. Nake akĩĩhũgũra, na ona arutwo ake, agĩkaania Petero akiuga atĩrĩ, Coka na thutha wakwa, Shaitani: tondũ ndwĩciragia maũndũ ma Ngai, tiga o marĩa ma andũ.
• 34. Agĩcoka agĩĩta kĩrĩndĩ kĩrĩa kĩarĩ ho, o na arutwo ake akĩmera atĩrĩrĩ, Mũndũ ũkwenda kũnũmĩrĩra, nĩerege, na oe mũtĩ wake wa kwambĩrũo, anyume thutha.
• 35. Amu-rĩ, mũndũ o wothe wendaga gũtũũria muoyo wake, ũcio nĩ kũũrũo akorũo nĩguo; na mũndũ o wothe ũkorũo nĩ muoyo wake nĩ ũndũ wakwa na wa Ũhoro-ũrĩa-Mwega, ũcio nĩ kũũtũũria akaũtũũria.
• 36. Amu-rĩ, mũndũ eguna na kĩ, o na angĩĩgwatĩra thĩ yothe, na orũo nĩ muoyo wake?
• 37. Amu-rĩ, nĩ kĩ mũndũ angĩruta akũũre muoyo wake nakĩo?
• 38. Amu-rĩ, mũndũ o wothe ũgaconoka nĩ niĩ, na aconokere ciugo ciakwa hingo ya rũciaro rũrũ rũa ũtharia na rũa mehia, nĩwe ũgaconokerũo nĩ Mũrũ wa Mũndũ, rĩrĩa agoka e na riri wa Ithe na me na araika arĩa atheru.

Home