Go Back

Mariko Chapter 16

1. NAYO thabatũ yathira, Mariamu Mũmagidali na Mariamu ũrĩa nyina wa Jakubu, o nake Salome, makĩgũra mĩnyamũ mĩnungi wega, nĩguo magathiĩ mamũhake.
2. Ningĩ mũthenya wa kwambĩrĩria kiumia, o rũcinĩ tene, magĩthiĩ mbĩrĩra-inĩ riũa rĩaratha.
3. Na nĩmoranagia atĩrĩ, Nũ ũgũtũgaragarĩria ihiga rĩthenge mũromo-inĩ wa muungu?
4. Na maatiira maitho, makĩona atĩ ihiga nĩ rĩgaragarie rĩgathengio: amu rĩarĩ inene mũno.
5. Na maatonya mbĩrĩra thĩinĩ, makĩona mũndũ mwanake aikaire thĩ mwena wa ũrĩo, ehumbĩte nguo njerũ; magĩkĩgega.
6. Nake akĩmera atĩrĩ, Tigai kũgega: ti Jesu mũracaria, ũrĩa wa Nazarethi, ũrĩa ũraambirũo mũtĩ igũrũ? Nĩariũkĩte; ndarĩ haha: onei handũ harĩa maramũigĩte.
7. No gĩthiĩni mũkere arutwo ake o na Petero atĩrĩ, Nĩegũthiĩ mbere yanyu Galili; nĩkuo mũkamuona, o ũrĩa aamwĩrire.
8. Nao makiuma mbĩrĩra-inĩ, makĩũra; tondũ nĩmaagwatĩtwo nĩ kũinaina o na kũmaka; na matiigana kwarĩria mũndũ, tondũ nĩmetigĩrĩte.
9. [Na rĩrĩ, aarĩkia kũriũka rũcinĩ tene mũthenya wa kwambĩrĩria kiumia, aambire kuumĩrĩra Mariamu Mũmagidali, ũrĩa aarutĩte ndaimono mũgwanja.
10. Ũcio agĩthiĩ akĩĩra arĩa maatũire na Jesu, akĩmakora me na kĩeha makĩrĩraga.
11. Nao maaigua atĩ e muoyo, na nĩonetwo nĩwe, makĩrega gwĩtĩkia.
12. Na thutha wa maũndũ macio, akĩĩonithia andũ erĩ ao ahiana ũndũ ũngĩ, rĩrĩa maathiaga merekeire mĩgũnda-inĩ.
13. Nao acio magĩthiĩ makĩĩra arĩa angĩ; o nao magĩkĩrega kũmetĩkia.
14. Na thutha ũcio akĩĩonithia arĩa ikũmi na ũmwe o ene, hingo maaikaire makĩrĩa irio; akĩmatetia nĩ ũrĩa maaregete gwĩtĩkia na tondũ wa kũũma kwa ngoro ciao, nĩ ũndũ matietĩkirie arĩa maamuonete arĩkĩtie kũriũka.
15. Nake akĩmera atĩrĩrĩ, Thiĩi thĩ yothe mũkahunjĩrie andũ othe Ũhoro-ũrĩa-Mwega.
16. Ũrĩa wa gwĩtĩkia na abatithio nĩakahonoka; nake ũrĩa wa kũrega gwĩtĩkia nĩakahootwo nĩ cira.
17. Nacio ciama ici nĩcio irĩtwaranaga na arĩa metĩkĩtie: nĩ ũndũ wa rĩĩtwa rĩakwa nĩmarĩtũmaga ndaimono ciume andũ; na nĩmarĩaragia thiomi njerũ;
18. ningĩ nĩmarĩoyaga nyamũ-cia-thĩ, o na mangĩkananyua kĩndũ kĩngĩrĩa mũndũ gĩtingĩmehia o na atĩa; na nĩmarĩigagĩrĩra andũ arĩa arũaru moko, nao mahone.
19. Hĩndĩ ĩo, aarĩkia kũmahe ũhoro, Mwathani Jesu agĩgĩtwarũo Igũrũ, agĩikara thĩ guoko-inĩ kwa ũrĩo kwa Ngai.
20. Nao magĩthiĩ, makĩhunjia Ũhoro kũndũ guothe, Mwathani akĩrutaga wĩra hamwe nao, na agĩĩkagĩra Ũhoro hinya na ciama iria ciatwaranaga naguo. Amen].

Home