Go Back

Mariko Chapter 12

• 1. AGĨITĨKA kũmahe ũhoro na ngerekano. Atĩ mũndũ mũna nĩaahandire mũgũnda wa mĩthabibu, akĩũiriga, akĩenja irima rĩa ihihĩro rĩa thabibu, na agĩaka rũtara, akĩũkomborithia arĩmi, agĩthiĩ bũrũri ũngĩ.
• 2. Na kĩmera gĩakinya akĩrekeria arĩmi acio ngombo ĩkaneo maciaro mamwe na mũgũnda nĩ arĩmi acio.
• 3. Nao makĩmĩnyita, makĩmĩhũra, makĩmĩhũndũra ĩtarĩ na kĩndũ.
• 4. Agĩcoka akĩmarekeria ngombo ĩngĩ; nayo makĩmĩtihia mũtwe, na makĩmĩconora.
• 5. Agĩcoka akĩrekia ĩngĩ; nayo makĩmĩũraga: o na akĩrekia ingĩ nyingĩ, makĩhũraga imwe, na imwe makĩũragaga.
• 6. Agĩtigwo na ũngĩ ũmwe, nĩwe mũriũ ũrĩa endete mũno: akĩrekia ũcio kũrĩ o thutha wa acio angĩ, eĩrĩte atĩrĩ, Nĩmagaconokera mũrũ wakwa.
• 7. Nao arĩmi acio makĩĩrana atĩrĩ, Ũyũ nĩwe ũkegaĩrũo mũgũnda; rekei tũmũũrage, igai rĩake rĩtuĩke riitũ.
• 8. Magĩkĩmũnyita, makĩmũũraga, makĩmwagararia rũgiri rũa mũgũnda.
• 9. Rĩu-rĩ, mwathani wa mũgũnda ũcio agagĩĩka atĩa nĩ ũndũ wa ũhoro ũcio? Nĩagoka anine arĩmi acio, acoke ahe andũ angĩ mũgũnda ũcio.
• 10. Anga ũhoro ũyũ mwandĩke o naguo mũtirĩ mwaũthoma: Ihiga rĩrĩa rĩaregirũo nĩ aaki Nĩrĩo rĩtuĩkĩte o rĩrĩa inene rĩa koine:
• 11. Ũndũ ũcio woimire kwĩ Mwathani, Na nĩũtũgegagia tũkĩwona?
• 12. Nao magĩgĩcaria ũrĩa mangĩmũnyitithia; magĩĩtigĩra kĩrĩndĩ; amu-rĩ, nĩmonire atĩ ngerekano ĩo aagerekanirie nĩ ũndũ wao: magĩgĩtigana nake magĩĩthiĩra.
• 13. Ningĩ makĩmũrekeria Afarisai amwe na Aherodia amwe, mamũtege akĩaria nao.
• 14. Nao moka, makĩmwĩra atĩrĩ, Mũrutani ũyũ nĩtũũĩ atĩ ũrĩ wa ma, na ndũũragia irũngo rĩa mũndũ o na ũrĩkũ: amu ndũroraga ũrĩa andũ matariĩ, no nĩũrutanaga ũhoro wa njĩra ya Ngai na ma: Rĩu-rĩ, nĩ wega kũrutagĩra Kaisari mbia cia igoti, kana ti wega?
• 15. Tũrutage, kana tũtigage kũruta? Nake, tondũ nĩaamenyaga ũhinga wao, akĩmera atĩrĩ, Mũkũngeria nĩkĩ? Ta ndeherei ciringi ndĩmĩone.
• 16. Nao makĩmĩrehe. Nake akĩmoria, Nĩ cia ũ, mũhianano ũyũ na rĩĩtwa rĩrĩ? Makĩmwĩra, Nĩ cia Kaisari.
• 17. Nake Jesu akĩmera atĩrĩ, Nengagĩrai Kaisari indo cia Kaisari, o nake Ngai mũmũnengagĩre indo cia Ngai. Nao magĩkĩgega nĩwe mũno.
• 18. Ningĩ agĩkorũo nĩ Asadukai, nĩo arĩa moigaga atĩ arĩa akuũ matikariũka; na makĩmũũria ũndũ, makiuga atĩrĩ,
• 19. Mũrutani ũyũ, Musa aatwandĩkĩire ũhoro, atĩ mũrũ wa nyina na mũndũ angĩkua, na atige mũtumia, na ndatige mwana, mũrũ wa nyina nĩathambie mũtumia ũcio, acokerie mũrũ wa nyina mbeũ.
• 20. Rĩu-rĩ, kwarĩ andũ a nyina ũmwe mũgwanja: nake ũrĩa mũkũrũ wao akĩhikania, agĩkua na ndatige mbeũ;
• 21. ningĩ ũrĩa wa kerĩ agĩthambia mũtumia ũcio, o nake agĩkua, na ndatige mbeũ; o na ũrĩa wa gatatũ nake agĩĩka o ũguo:
• 22. nao othe mũgwanja gũtirĩ watigire mbeũ. Thutha wao othe mũtumia ũcio nake agĩkua.
• 23. Rĩu-rĩ, rĩrĩa arĩa akuũ makariũka, agagĩtuĩka mũtumia wa ũ, andũ acio? amu aarĩ mũtumia wao othe mũgwanja.
• 24. Nake Jesu akĩmera atĩrĩ, Gĩtũmi kĩrĩa gĩtũmĩte mũhĩtie githĩ to gĩkĩ, atĩ mũtiũĩ Maandĩko, o na kana hinya wa Ngai?
• 25. Amu rĩrĩa andũ makariũka moime kũrĩ arĩa akuũ, matikahikanagia kana makahikio; magatuĩka ta araika arĩa me Igũrũ.
• 26. Naguo ũhoro wa arĩa akuũ, atĩ nĩmariũkagio-rĩ; mũtirĩ mwathoma mbuku-inĩ ya Musa, harĩa haandĩkĩtwo ũhoro wa Kĩhinga, ũrĩa Ngai aamwarĩirie, akiuga atĩrĩ, Nĩ niĩ Ngai wa Iburahimu, Ngai wa Isaaka, o na Ngai wa Jakubu?
• 27. Ngai-rĩ, ti Ngai wa arĩa akuũ, nĩ wa arĩa me muoyo: mũhĩtĩtie mũno.
• 28. Na mwandĩki-marũa ũmwe nĩokire ho, akĩigua magĩcira, na aamenya atĩ nĩamacokeirie ũhoro wega, akĩmũũria atĩrĩ, Nĩ rĩathani rĩrĩkũ rĩĩ mbere ya marĩa mangĩ mothe?
• 29. Nake Jesu agĩcokia atĩrĩrĩ, Rĩrĩa rĩa mbere nĩ rĩrĩ, Igua, Isiraeli; Mwathani Ngai witũ-rĩ, Mwathani nĩ ũmwe:
• 30. nawe enda Mwathani Ngai waku na ngoro yaku yothe, na muoyo waku wothe, na gwĩciria gwaku guothe, o na hinya waku wothe.
• 31. Narĩo rĩa kerĩ nĩ rĩrĩ, Enda mũndũ ũrĩa ũngĩ o ta ũrĩa wĩendete wee mwene. Gũtirĩ rĩathani rĩngĩ inene kwĩ macio.
• 32. Nake mwandĩki-marũa ũcio akĩmwĩra atĩrĩ, Ti-itherũ, Mũrutani, nĩwoiga wega atĩ Ngai nĩ ũmwe, na gũtirĩ ũngĩ tiga we:
• 33. ningĩ kũmwenda na ngoro yothe, o na ũũgĩ wothe, o na hinya wothe, o na mũndũ ende mũndũ ũrĩa ũngĩ o ta ũrĩa eendete we mwene, ũguo nĩũkĩrĩte mũno mahaki mothe ma gũcinwo me magima, o na magongona mothe.
• 34. Nake Jesu ona atĩ nĩaacokia ũhoro ta mũndũ mũũgĩ, akĩmwĩra atĩrĩ, Wee-rĩ, ndũrĩ haraya na ũthamaki wa Ngai. Na thutha ũcio gũtirĩ mũndũ wacokire gweta kũmũũria ũndũ.
• 35. Nake Jesu agĩcokia ũhoro rĩrĩa aarutanaga hekarũ-inĩ, akĩũria atĩrĩ, Aandĩki-marũa moigaga atĩ Kristo nĩ mũrũ wa Daudi nĩ ũndũ kĩ?
• 36. Daudi we mwene nĩoigire atĩrĩ, e na Roho Mũtheru, Mwathani nĩerire Mwathani wakwa atĩrĩ, Ikara thĩ guoko-inĩ gwakwa kwa ũrĩo, Mũira wa ngatũma thũ ciaku ituĩke gaturũa ka makinya maku.
• 37. Daudi we mwene nĩamũtuĩte Mwathani: angĩkĩhota atĩa gũtuĩka mũrũwe? Nakĩo kĩrĩndĩ nĩgĩathikagĩrĩria ũhoro wake gĩkenete.
• 38. Ningĩ akiuga atĩrĩrĩ, akĩrutana, Wĩmenyagĩrĩrei aandĩki-marũa, arĩa mendaga gũceera mehumbĩte nguo ndaya, na makenda kũgeithagio ing’ang’a-inĩ,
• 39. na gũikaragĩra itĩ cia mbere me thunagogi, na kũgĩaga harĩa ha gũtĩo maruga-inĩ:
• 40. na no-o manyamaragia nyũmba cia atumia a ndigwa, o makĩhoyaga mahoya maraya nĩ ũndũ wa ũhinga; acio nĩo magatuĩrũo ituĩro rĩũru makĩria.
• 41. Ningĩ agĩikara thĩ ang’etheire harĩa hekagĩrũo kĩgĩĩna, akĩĩrorera ũrĩa kĩrĩndĩ gĩekagĩra mbia kĩgĩĩna-inĩ kĩu: na andũ aingĩ arĩa maarĩ itonga magĩĩkĩra mbia nyingĩ.
• 42. Na gũgĩũka mũtumia wa ndigwa mũthĩni, nake agĩĩkĩra tũthendi twĩrĩ, tũrĩa tũiganaga mbeca ĩmwe.
• 43. Nake agĩĩta arutwo ake, akĩmera atĩrĩ, Ngũmwĩra atĩrĩrĩ na ma, Mũtumia ũyũ wa ndigwa mũthĩni nĩekĩra nyingĩ kũrĩ andũ othe arĩa marekĩra mbia kĩgĩĩna-inĩ:
• 44. tondũ acio othe nĩmekĩra mbia nĩ ũrĩa maingĩhĩtie; nake nĩekĩra indo ciake iria oima nacio ciothe, nĩ ũrĩa akĩarĩte, na nĩcio mũthithũ wake wothe.

Home