Go Back

Mathayo Chapter 5

• 1. NAKE ona mĩrũrũngano ya andũ akĩambata kĩrĩma-inĩ; na aarĩkia gũikara thĩ, arutwo ake magĩũka kũrĩ we;
• 2. agĩtumũra kanua akĩmaruta, akiuga atĩrĩ,
• 3. Gũkena-rĩ, nĩ arĩa matarĩ na mwĩgatho, nĩ gũkorũo ũthamaki wa Igũrũ nĩ wao.
• 4. Gũkena-rĩ, nĩ arĩa marĩ na kĩeha, nĩ gũkorũo nĩmakaninĩrũo kĩeha.
• 5. Gũkena-rĩ, nĩ arĩa ahoreri, nĩ gũkorũo nĩmakagaya thĩ.
• 6. Gũkena-rĩ, nĩ arĩa mahũtagĩra maũndũ marĩa ma ũthingu, na makamanyotera, nĩ gũkorũo nĩmakahũnio.
• 7. Gũkena-rĩ, nĩ arĩa maiguagĩra andũ tha, nĩ gũkorũo nĩmakaiguĩrũo tha.
• 8. Gũkena-rĩ, nĩ arĩa mateciragia ũũru ngoro, nĩ gũkorũo nĩmakona Ngai.
• 9. Gũkena-rĩ, nĩ ateithũrani, nĩ ũndũ nĩmagetagwo ariũ a Ngai.
• 10. Gũkena-rĩ, nĩ arĩa manyarirĩtwo nĩ ũndũ wa maũndũ marĩa ma ũthingu, nĩ gũkorũo ũthamaki wa Igũrũ nĩ wao.
• 11. Gũkena-rĩ, nĩ inyuĩ hĩndĩ ĩrĩa andũ makamũruma, na mamũnyarire, na mamũigĩrĩre maũndũ moru ma mĩthemba yothe nĩ ũndũ wakwa.
• 12. Kenai na mũcanjamũke, tondũ igai rĩanyu nĩ rĩnene kũrĩa Igũrũ; nĩ ũndũ ũguo no taguo anabii arĩa maarĩ mbere yanyu maanyariragwo.
• 13. Nĩ inyuĩ cumbĩ wa thĩ: no rĩrĩ, cumbĩ ũngĩkorũo ũthirĩte mũcamo waguo-rĩ, wacoka gũcamithio ta cumbĩ na kĩ? Ndũrĩ bata o na wa kĩ, no gũteo ũteo na ũrangwo nĩ andũ.
• 14. Nĩ inyuĩ ũtheri wa thĩ. Itũũra rĩrĩa rĩakĩtwo kĩrĩma igũrũ rĩtingĩhithĩka.
• 15. Ningĩ andũ matiakagia tawa, na macoke kũũkunĩkĩria na irebe, no kũiga maũigaga igũrũ handũ haguo, naguo ũgatherera andũ othe marĩ nyũmba.
• 16. O ũguo noguo na inyuĩ rekei ũtheri wanyu ũtheragĩre andũ, nĩguo mone ciĩko cianyu njega, na magoocage Ithe wanyu ũrĩa wĩ Igũrũ.
• 17. Tigagai kwĩgereria atĩ ndokire gũtharia watho kana mohoro ma anabii. Ndiokire kũmatharia, no kũmahingia.
• 18. Tondũ ũcio ngũmwĩra atĩrĩ na ma, atĩ nginya hĩndĩ ĩrĩa Igũrũ o na thĩ gũgathira, hatirĩ kairia ka i, kana gakururo ga t, gagathira watho-inĩ o na rĩ, kinya maũndũ mothe maguo makahingio.
• 19. Hakĩrĩ ũguo-rĩ, o mũndũ ũrĩa wa kwagarara rĩathani rĩmwe rĩa maathani macio, o na rĩĩ inyinyi mũno, na arutage andũ gwĩka ũguo, mũndũ ũcio nĩagatuo mũnyinyi kũrĩ arĩa angĩ ũthamaki-inĩ wa Igũrũ. No rĩrĩ, ũrĩa ũrĩmaiguaga, na amarutanage, mũndũ ũcio nĩagatuo mũnene ũthamaki-inĩ wa Igũrũ.
• 20. Nĩ ũndũ ũcio, ngũmwĩra atĩrĩ, ũthingu wanyu waaga gũkĩra ũrĩa wa aandĩki-marũa, o na wa Afarisai, mũtigatonya ũthamaki-inĩ wa Igũrũ, o na atĩa.
• 21. Nĩmũiguĩte atĩ andũ arĩa a tene nĩmerirũo ũũ: Ndũkanoragane; na mũndũ ũrĩa ũkoragana, no kinya atuĩke wa gũcirithio:
• 22. no niĩ ngũmwĩra atĩ mũndũ o wothe ũrĩa ũkarakarĩra mũrũ wa ithe, no kinya atuĩke wa gũcirithio; ningĩ o mũndũ ũrĩa ũngĩĩra mũrũ wa ithe, Wee ndũrĩ bata, nĩagatuĩka wa gũcirithio nĩ kĩama; nake ũrĩa ũngiuga, Wee wĩ mũkĩgu, nĩagatuĩka wa gũikio mwaki-inĩ wa Jehanumu.
• 23. Tondũ ũcio-rĩ, akorũo nĩũgũtwara kĩheo gĩaku kĩgongona-inĩ kĩrutĩrũo Ngai, na hĩndĩ ĩo wĩ ho ũririkane atĩ mũrũ wa thoguo arĩ na ũndũ nawe,
• 24. ta tiga kĩheo kĩu gĩaku o hau kĩgongona-inĩ, ũthiĩ, wambe ũkaiguane na mũrũ wa thoguo, na thutha wa ũguo ũcoke ũkarutĩre Ngai kĩheo gĩaku.
• 25. Hiũha kũiguana na mũgwĩtia hĩndĩ ĩrĩa mũrĩ nake njĩra, nĩ getha mũgwĩtia ũcio ndagagũtware kũrĩ mũtuanĩri-cira, nake akũneane kwĩ mũnene wa athigari, ũgaikio korokoro-inĩ.
• 26. Ngũkwĩra atĩrĩ na ma, ndũrĩ hingo ũkoima ho o na atĩa ũtarĩhĩte thirĩ ũcio, hatarĩ gathendi gatigarĩte.
• 27. Nĩmũiguĩte atĩ nĩkweranirũo ũũ: Ndũkanatharanie;
• 28. no niĩ ngũmwĩra atĩ, o mũndũ o wothe ũngĩrora mũndũ-wa-nja na amwĩrirĩrie, nĩarĩkĩtie gũtharia nake ngoro-inĩ yake.
• 29. Na rĩrĩ, kũngĩtuĩka atĩ riitho rĩaku rĩa ũrĩo nĩ rĩa gũkũhĩngithia, rĩkũũre, ũrĩte; nĩ gũkorũo nĩ kaba kĩĩga kĩmwe kĩa mwĩrĩ waku kĩũre, kwĩ mwĩrĩ waku wothe ũikio Jehanumu-inĩ.
• 30. Na kũngĩtuĩka atĩ guoko gwaku kwa ũrĩo nĩ gwa gũkũhĩngithia, gũtinie, ũgũte, nĩ gũkorũo nĩ kaba kĩĩga kĩmwe gĩaku kĩũre, kwĩ mwĩrĩ waku wothe ũtwarũo Jehanumu-inĩ.
• 31. Ningĩ nĩkweranirũo ũũ: atĩ, O mũndũ ũrĩa ũngĩte mũtumia wake, nĩamũhe marũa ma gũtigana nake;
• 32. no niĩ ngũmwĩra atĩrĩ, atĩ o mũndũ ũrĩa ũngĩte mũtumia wake, tiga o ũndũ wa ũtharia, nĩegũtũma atuĩke mũtharia: na ningĩ o mũndũ ũrĩa ũkamũhikia hĩndĩ ĩo ateetwo, ũcio no atuĩke nĩatharĩtie.
• 33. Ningĩ nĩmũiguĩte atĩ andũ arĩa a tene nĩmerirũo ũũ: Ndũkanehĩte na mathara, ĩndĩ no mũhaka ũhingagĩrie Mwathani mĩĩhĩtwa ĩrĩa wĩhĩtĩte:
• 34. no niĩ ngũmwĩra atĩ, Mũtikanehĩte o na atĩa; mũtikanehĩte na Igũrũ, nĩ ũndũ nĩkuo gĩtĩ gĩa ũthamaki kĩa Ngai;
• 35. o na kana wĩhĩte na thĩ, nĩ ũndũ nĩkuo gĩturũa kĩa makinya make; o na kana na Jerusalemu, nĩ ũndũ nĩrĩo itũũra rĩa Mũthamaki ũrĩa mũnene.
• 36. Ningĩ ndũkanehĩte na mũtwe waku, nĩ ũndũ ndũngĩhota gũtũma rũcuĩrĩ rũmwe rũerũhe kana rũire.
• 37. No mũkĩaria-rĩ, ugagai ũũ, Ĩĩ-ni, ĩĩ-ni; Aca, aca: na ũrĩa ũkĩrĩte ciugo icio uumĩte kũrĩ ũrĩa mũũru.
• 38. Nĩmũiguĩte atĩ nĩkweranirũo ũũ: Riitho riumage riitho, o na igego riumage igego;
• 39. no niĩ ngũmwĩra atĩ, mũtikagiane na mũndũ ũrĩa mũũru; no rĩrĩ, mũndũ wa gũkũgũtha rũthĩa rũa ũrĩo, mũhũgũkĩrie rũu rũngĩ naruo.
• 40. Na mũndũ wa kwenda gũcira nawe, agũtunye nguo yaku ya thĩinĩ, mũnengere o na ya igũrũ nayo.
• 41. Na ũrĩa ũngĩgũtwara na hinya ũthiĩ nake itĩna rĩmwe, thiĩ nake merĩ.
• 42. O mũndũ ũgũkũhoya kĩndũ, mũhe; o na ũrĩa ũngĩenda kuohora kĩndũ kũrĩ wee, ndũkanamũhutatĩre ũrege.
• 43. Nĩmũiguĩte atĩ nĩkweranirũo ũũ: Endaga mũndũ wa itũũra rĩanyu, na ũthũũrage mũndũ wĩ muku nawe;
• 44. no niĩ ngũmwĩra atĩrĩ, Endagai andũ arĩa marĩ muku na inyuĩ, na mũhoyagĩre arĩa mamũnyariraga;
• 45. nĩ getha mũtuĩke ariũ a Ithe wanyu ũrĩa wĩ Igũrũ: tondũ nĩatũmaga riũa rĩake rĩrathĩre andũ arĩa oru, o na arĩa ega; ningĩ nĩoiragĩria mbura arĩa athingu, o na arĩa aaganu.
• 46. Nĩ ũndũ akorũo mwendaga o arĩa mamwendaga inyuĩ-rĩ, nĩ ngatho ĩrĩkũ muonaga? Githĩ etia mbia cia igoti matiĩkaga ũguo o nao?
• 47. Na ningĩ akorũo mũgeithagia o andũ anyu, mũkĩrĩte andũ arĩa angĩ na kĩ? Githĩ andũ a Ndũrĩrĩ matiĩkaga ũguo o nao?
• 48. Tondũ ũcio na inyuĩ no mwagĩrĩre kũna ta ũrĩa Ithe wanyu wĩ Igũrũ agĩrĩire kũna.

Home