Go Back

Mathayo Chapter 24

• 1. NAKE Jesu akiuma hekarũ akĩgwata gwĩthiĩra; na arutwo ake magĩũka kũrĩ we mamuonie mĩako ya hekarũ.
• 2. Nowe agĩcokia ũhoro akĩmoria atĩrĩ, Githĩ mũtikuona indo ici ciothe? Ngũmwĩra atĩrĩ na ma, Haha-rĩ, hatigatigario ihiga o na rĩmwe rĩikarĩte igũrũ rĩa rĩrĩa rĩngĩ rĩtagũithĩtio.
• 3. Na rĩrĩa aaikarĩte thĩ kĩrĩma-inĩ kĩa Mĩtamaiyũ, arutwo magĩũka kũrĩ we hatarĩ andũ angĩ makĩmũũria atĩrĩ, Rĩu-rĩ, twĩre, rĩrĩa maũndũ macio magakinya nĩ rĩ? O na kĩmenyithia kĩa rĩrĩa ũgoka, o na gĩa ithirĩro rĩa mahinda maya, nĩ kĩrĩkũ?
• 4. Nake Jesu akĩmacokeria akĩmera atĩrĩ, Wĩmenyagĩrĩrei atĩ mũtikanahĩtithio nĩ mũndũ o na ũrĩkũ.
• 5. Nĩ gũkorũo andũ aingĩ nĩmagoka magĩĩtuaga rĩĩtwa rĩakwa, makiugaga atĩrĩ, Niĩ nĩ niĩ Kristo; na mahĩtithie andũ aingĩ.
• 6. Na nĩmũkaigua ũhoro wa mbaara, na mbugĩrĩrio ciacio: menyai mũkamaka: nĩ gũkorũo maũndũ macio matirĩ hingo matagakinya; no rĩrĩ, ithirĩro ti ikinyu.
• 7. Tondũ rĩrĩ, rũrĩrĩ o rũrĩrĩ rũgokĩrĩra rũrĩa rũngĩ, na o ũthamaki ũũkĩrĩre ũrĩa ũngĩ: na gũkagĩa na ng’aragu na ithingithia cia thĩ kũndũ kũingĩ.
• 8. Namo maũndũ macio mothe no kĩambĩrĩria kĩa ruo ta rũa kũrũmwo.
• 9. Hĩndĩ ĩo nĩyo andũ makamũneana mũnyarirũo, na mamũũrage: na nĩmũkamenwo nĩ ndũrĩrĩ ciothe nĩ ũndũ wa rĩĩtwa rĩakwa.
• 10. Na hĩndĩ ĩo andũ aingĩ nĩmakahĩngithio, o na mũndũ aneane ũrĩa ũngĩ, o na mamenane.
• 11. Na anabii aingĩ a mathaara nĩmagokĩra, na mahĩtithie andũ aingĩ.
• 12. Na tondũ waganu nĩũgakorũo ũingĩhĩtio, wendani wa andũ aingĩ nĩũkanyihio.
• 13. No ũrĩa ũgũkirĩrĩria nginya o ithirĩro, ũcio nĩakahonokio.
• 14. Naguo Ũhoro-ũyũ-Mwega wa ũthamaki nĩũkahunjio thĩ yothe, ũtuĩke ũira kũrĩ ndũrĩrĩ ciothe; na hĩndĩ ĩo nĩrĩo ithirĩro rĩgakinya.
• 15. Nĩ ũndũ ũcio, rĩrĩa mũkona kĩrĩa kĩrĩ thahu na gĩa gũkiria ihooru o kĩrĩa kĩaaririo ũhoro wakĩo nĩ mũnabii ũrĩa wetagwo Danieli, kĩrũngiĩ handũ harĩa hatheru, (ũrĩa ũrathoma nĩamenye ũhoro ũcio),
• 16. hĩndĩ ĩo-rĩ, andũ arĩa matũire Judea nĩmorĩre irĩma-inĩ:
• 17. nake ũrĩa wĩ nyũmba igũrũ nĩatige gũikũrũka akarute indo ii nyũmba yake thĩinĩ:
• 18. na ũrĩa wĩ mũgũnda nĩatige gũcoka na thutha akoe nguo yake.
• 19. Na arĩa magakorũo marĩ na mahu, o na arĩa magakorũo makĩongithia twana matukũ macio kaĩ nĩmakagĩa na haaro-ĩ!
• 20. Na mũhoyage atĩ muunĩko wanyu ndũkagĩe hingo ya heho, kana mũthenya wa thabatũ:
• 21. nĩ ũndũ hĩndĩ ĩo nĩgũkagĩa thĩna mũnene ũtarĩ wonwo taguo gwata kĩambĩrĩria gĩa thĩ nginya rĩu, o na ũtakonwo ũngĩ taguo o na rĩ.
• 22. Na tiga matukũ macio maakuhĩhirio, gũtirĩ mũndũ ũngĩkahonoka: no rĩrĩ, tondũ wa arĩa aamũre, matukũ macio nĩmagakuhĩhio.
• 23. Hĩndĩ ĩo, mũndũ angĩkamwĩra, Atĩrĩ, Kristo arĩ na gũkũ, kana amwĩre, Arĩ na kũu, mũtikanetĩkie.
• 24. Nĩ ũndũ nĩgũgokĩra makristo ma maheni o na anabii a maheni, nao monanie ciama nene o na morirũ, nĩguo mahĩtithagie o na arĩa aamũre, ũngĩkorũo ũguo wahoteka.
• 25. Atĩrĩrĩ, nĩndamwĩra o mbere.
• 26. Nĩ ũndũ ũcio mũngĩkerũo, Atĩrĩrĩ, arĩ werũ-inĩ, mũtikanathiĩ: o na kana mũngĩkerũo, Atĩrĩrĩ, arĩ nyũmba thĩinĩ, mũtikanetĩkie.
• 27. Tondũ o ta ũrĩa rũheni ruumaga o kũrĩa irathĩro, na rũkonwo o kinya ithũĩro, ũguo noguo gũũka kwa Mũrũ wa Mũndũ gũkahaana.
• 28. O kũrĩa kũrĩ kĩimba-rĩ, nĩkuo nderi ikonganagĩra.
• 29. Na rĩrĩ, o rĩmwe thutha wa thĩna ũrĩa wa matukũ macio, riũa nĩrĩgekĩrũo nduma, naguo mweri ũtige kwara, nacio njata igũe ciume igũrũ, namo mahinya ma kũu igũrũ menyenyio:
• 30. na hĩndĩ ĩo kĩmenyithia kĩa Mũrũ wa Mũndũ nĩgĩkoneka kũrĩa igũrũ: ningĩ hĩndĩ ĩo iruka ciothe cia thĩ nĩikagĩa na kĩeha, na nĩikona Mũrũ wa Mũndũ agĩũka arĩ igũrũ rĩa matu ma igũrũ, na arĩ na hinya na riri mũingĩ.
• 31. Nake nĩagatũma araika ake kwĩ na mũgambo mũnene wa coro; nao monganie arĩa ake aamũre moime mĩena ĩrĩa ĩna yumaga rũhuho, kuuma gĩturi kĩmwe kĩa igũrũ nginya kĩrĩa kĩngĩ.
• 32. Naguo mũkũyũ-rĩ, mwĩrute ngerekano yaguo. Honge ciaguo ciarĩkia kũgĩa thundo, na ciaruta mathangũ, nĩmũmenyaga atĩ hingo ya riũa ĩrĩ hakuhĩ;
• 33. noguo na inyuĩ, mwona maũndũ macio mothe, mũmenye atĩ arĩ hakuhĩ, o ta mũromo-inĩ.
• 34. Ngũmwĩra atĩrĩ na ma, Rũciaro rũrũ rũtigathira, maũndũ macio mothe matahingĩtio.
• 35. Igũrũ na thĩ nĩgũgathira, no Ũhoro wakwa ndũgathira.
• 36. Naguo ũhoro wa mũthenya ũcio, kana wa ihinda rĩu, gũtirĩ mũndũ ũũĩ, o na araika arĩa marĩ Igũrũ, o na kana Mũriũ, no Ithe witũ wiki.
• 37. Na ta ũrĩa gwatariĩ matukũ ma Nuhu, no taguo gũũka kwa Mũrũ wa Mũndũ gũkahaana.
• 38. Nĩ gũkorũo, o ta ũrĩa gwatariĩ matukũ marĩa maarĩ mbere ya kĩguũ kĩrĩa kĩnene, o rĩrĩa andũ maarĩaga, na maanyuaga, na maagũranaga, na mendagia airĩtu ao, o nginya mũthenya ũrĩa Nuhu aatonyire thabina,
• 39. nao matiamenyire kinya rĩrĩa kĩguũ kĩu kĩnene gĩokire gĩkĩmatwara othe-rĩ; o ũguo noguo gũũka kwa Mũrũ wa Mũndũ gũkahaana.
• 40. Hĩndĩ ĩo arũme erĩ magakorũo mũgũnda; ũmwe nĩagatwarũo, na ũrĩa ũngĩ atigwo:
• 41. atumia erĩ magakorũo magĩthĩa gĩthĩi-inĩ; ũmwe nĩagatwarũo, na ũrĩa ũngĩ atigwo.
• 42. Nĩ ũndũ ũcio wĩhũgagei, nĩ gũkorũo mũtiũĩ mũthenya ũrĩa Mwathani wanyu agoka.
• 43. Ĩndĩ menyai ũũ, atĩ mwene mũciĩ angĩamenyete thaa ĩrĩa mũici egũũka, nĩangĩakorirũo eiguĩte, na ndangĩarekire nyũmba yake yenjwo.
• 44. Nĩ ũndũ ũcio o na inyuĩ ikaragai mwĩhaarĩirie: nĩ gũkorũo Mũrũ wa Mũndũ nĩagoka thaa ĩrĩa mũtegereirie.
• 45. Rĩu-rĩ, ngombo ĩrĩa ĩĩhokekete na njũgĩ nĩ ĩrĩkũ, o ĩrĩa yatuirũo nĩ mwathani wayo mũramati wa nyũmba yake, ĩheage andũ a mũciĩ irio hĩndĩ ĩrĩa yagĩrĩire yakinya?
• 46. Gũkena-rĩ, nĩ ngombo ĩo rĩrĩa mwathani wayo agoka amĩkore ĩgĩĩkaga o ũguo!
• 47. Ngũmwĩra atĩrĩ na ma, atĩ nĩakamĩtua mũramati wa indo ciake ciothe.
• 48. No rĩrĩ, ngombo ĩrĩa njũru ĩngĩkorũo yeĩra na ngoro atĩrĩ, Mwathani wakwa ndehiũha gũũka,
• 49. nayo ĩitĩke kũhũra ngombo iria ingĩ, na kũrĩa na kũnyua hamwe na arĩa arĩu-rĩ;
• 50. mwathani wa ngombo ĩo nĩagoka mũthenya ũrĩa ĩtegereirie, o na thaa ĩrĩa ĩtoĩ,
• 51. nake nĩakamĩhũra mũno, na amĩtuanĩrie ituĩro hamwe na hinga: kũu nĩkuo gũkagĩa kĩrĩro na kũhagarania magego.

Home