Go Back

Mathayo Chapter 2

• 1. NA rĩrĩ, hĩndĩ ĩrĩa Jesu aaciarĩirũo Bethi-lehemu, itũũra rĩa Judea, matukũ ma mũthamaki wetagwo Herode, gũgĩũka andũ ogĩ a njata Jerusalemu, moimĩte kũrĩa irathĩro-inĩ, makĩũria atĩrĩ,
• 2. Ũrĩa ũciarĩtwo e Mũthamaki wa Ayahudi, arĩ ha? Tondũ nĩtwonire njata yake kũrĩa irathĩro-inĩ, na nĩtũũkĩte tũmũturĩrie ndu tũmũgooce.
• 3. Na rĩrĩa Herode, ũcio mũthamaki, aaiguire ũhoro ũcio akĩigua ũũru, we mwene o na Jerusalemu guothe hamwe nake.
• 4. Agĩkĩũngania athĩnjĩri-Ngai arĩa anene othe na aandĩki-marũa a kĩrĩndĩ, akĩmoria harĩa Kristo agaciarĩrũo.
• 5. Nao makĩmwĩra, Nĩ Bethi-lehemu, itũũra rĩa Judea, tondũ nĩkwandĩkĩtwo nĩ mũnabii ũũ:
• 6. Nawe Bethi-lehemu, o kũu bũrũri wa Juda, Tiwe ũrĩa mũnyinyi mũno wa aathani a Juda: Tondũ-rĩ, nĩ kũrĩ wee gũkoima ũrĩa ũgaathanaga, O ũrĩa ũkarĩithagia andũ akwa Aisiraeli.
• 7. Hĩndĩ ĩo Herode agĩĩta andũ acio ogĩ a njata na hitho, agĩtuĩria wega kũrĩ o hĩndĩ ĩrĩa njata yonekire.
• 8. Akĩmatũma Bethi-lehemu, akĩmera, Thiĩi, mũgatuĩrie wega ũhoro wa gakenge kau, na mwakona, cokai mũ’he ũhoro, nĩ getha na niĩ ’thiĩ ngagaturĩrie ndu ndĩkagooce.
• 9. Nao maaigua ũrĩa mũthamaki ũcio aamerire, magĩĩthiĩra; na rĩrĩ, njata ĩrĩa monire o kũrĩa irathĩro-inĩ ĩkĩmathiĩ mbere, o nginya ĩkĩrũgama igũrũ rĩa harĩa gakenge kau kaarĩ.
• 10. Nao mona njata ĩo, magĩkena gĩkeno kĩnene mũno.
• 11. Magĩtonya nyũmba, makĩona gakenge karĩ na nyina Mariamu, makĩĩgũithia thĩ, magĩkagooca. Makĩohora indo ciao cia goro, magĩkarutĩra iheo, nacio ciarĩ thahabu, na ũbumba na manemane.
• 12. Na tondũ wa gũkaanio nĩ Ngai na kĩroto, atĩ matigacokere kũrĩ Herode, magĩcoka bũrũri wao na njĩra ĩngĩ.
• 13. Nao maainũka-rĩ, mũraika wa Ngai akiumĩrĩra Jusufu kĩroto-inĩ, akĩmwĩra, Ũkĩra, woe gakenge gaka na nyina, mũũrĩre Misiri, mũgaikare kũu kinya hĩndĩ ĩrĩa ngakwĩra mũcoke; nĩ ũndũ Herode nĩarĩcaria gakenge gaka akoragithie.
• 14. Nake agĩgĩũkĩra, akĩoya gakenge na nyina ũtukũ, magĩthiĩ Misiri;
• 15. magĩtũũra kuo nginya hĩndĩ ĩrĩa Herode aakuire, nĩ getha kiugo kĩrĩa kĩoigirũo nĩ Mwathani na kanua ka mũnabii kĩhingio, rĩrĩa oigire ũũ, Nĩndetire Mũrũ wakwa oime Misiri.
• 16. Nake Herode, ona atĩ nĩaahenirio nĩ andũ acio ogĩ a njata, akĩrakara mũno, agĩtũma andũ, akĩũragithia tũhĩĩ tuothe twa kũu Bethi-lehemu na ndwere ciothe ciakuo, tũrĩa twakinyĩtie mĩaka ĩĩrĩ, o na tũrĩa twarĩ tũnini kũrĩ tuo, kũringana na ihinda rĩrĩa orĩrĩirie wega kũrĩ andũ acio ogĩ a njata.
• 17. Hĩndĩ ĩo ciugo iria cia Jeremia ũrĩa mũnabii ikĩhingio, rĩrĩa oigire atĩrĩ,
• 18. He mũgambo waiguirũo Rama, Wa kũrĩra na gũcakaya na kĩgi, Rakeli akĩrĩrĩra ciana ciake; Akĩrega gũkirio tondũ itirĩ ho.
• 19. Na atĩrĩrĩ, Herode aakua, mũraika wa Mwathani akiumĩrĩra Jusufu kĩroto-inĩ o kũu Misiri,
• 20. akĩmwĩra, Ũkĩra, woe mwana na nyina mũthiĩ bũrũri wa Isiraeli, nĩ ũndũ andũ arĩa mendaga kũũraga mwana nĩmakuĩte.
• 21. Nake agĩũkĩra, akĩoya mwana na nyina agĩthiĩ bũrũri wa Isiraeli.
• 22. Na rĩrĩa aaiguire atĩ Arikelau nĩwe ũrathamaka Judea ithenya rĩa ithe Herode, agĩĩtigĩra gũthiĩ kuo; na aarĩkia gũkaanio nĩ Ngai na kĩroto, agĩthiĩ ndwere cia Galili,
• 23. agĩkinya itũũra rĩĩtagwo Nazarethi, agĩtũũra kuo; nĩ getha ũhoro ũhingio ũrĩa waaririo nĩ anabii, atĩ nĩagetagwo Mũnazari.

Home