Go Back

Ndari Chapter 6

• 1. Nake Jehova akĩarĩria Musa, akĩmwĩra atĩrĩ,
• 2. Arĩria ciana cia Isiraeli, ũciĩre ũũ: Hĩndĩ ĩrĩa mũndũ mũrũme, o na kana mũndũ-wa-nja, ekwĩhĩta mwĩhĩtwa wa kwĩamũra, o mwĩhĩtwa wa gwĩtua Mũnaziri, eamũrĩre Jehova,
• 3. mũndũ ũcio nĩehinge kũnyua ndibei, na kĩrĩa gĩothe gĩtũmaga mũndũ arĩwo; ndakananyue thiki ya ndibei, kana thiki ya kĩndũ kĩngĩ kĩrĩa gĩtũmaga mũndũ arĩwo, kana anyue kĩndũ o na kĩrĩkũ gĩthondeketwo na thabibu, kana arĩe thabibu njĩthĩ, kana ciũmithĩtio.
• 4. Matukũ mothe marĩa agaikara eamũrĩte-rĩ, ndakarĩaga kĩndũ o na kĩ kĩa mũthabibu, kwarũma hĩndĩ iria irĩ thĩinĩ wacio, o nginya gĩkoni kĩrĩa kĩa igũrũ.
• 5. Matukũ mothe marĩa eamũrĩte nĩ ũndũ wa mwĩhĩtwa ũcio wake, ndakahutio na rũenji mũtwe; agaikara e mwamũre, na njuĩrĩ cia mũtwe wake irekwo iraihe, o nginya hĩndĩ ĩrĩa matukũ ma mwĩhĩtwa ũcio makahinga, o marĩa eamũrĩire Jehova.
• 6. Na ningĩ matukũ mothe marĩa agaikara e mwamũrĩre Jehova ndakanathengerere kĩimba.
• 7. Ndakanegwatie thahu na ithe, kana nyina, kana mũrũ wa nyina, kana mwarĩ wa nyina, mangĩkua; nĩ ũndũ kwĩamũra kũu eamũrĩire Ngai nĩekuonwo nakuo mũtwe.
• 8. Matukũ mothe marĩa eamũrĩte arĩikaraga e mwamũrĩre Jehova.
• 9. Na rĩrĩ, mũndũ o na ũrĩkũ angĩkuĩra harĩ we na mbũkĩrĩra, nake egwatie thahu mũtwe wake o ũkĩonanagia atĩ nĩ mwamũre-rĩ, no mũhaka akenjwo mũtwe aahingia matukũ mũgwanja, nĩ ũndũ nĩguo mũthenya wake wa gwĩtheria.
• 10. Naguo mũthenya wa ĩnana atware ndirahũgĩ igĩrĩ, kana tũtutura twĩrĩ tũtarĩ tũkũrũ harĩ mũthĩnjĩri-Ngai o hau mũromo-inĩ wa hema-ya-gũtũnganwo;
• 11. nake mũthĩnjĩri-Ngai arute ĩmwe, ĩtuĩke ya igongona rĩa mehia, nayo ĩrĩa ĩngĩ ĩtuĩke ya ihaki rĩa njino, akĩmũhoroherie nĩ ũndũ wa rĩĩhia rĩu ehĩtie akĩhutia kĩimba; nake mũndũ ũcio mũthenya o ro ũcio acoke aamũrĩre Jehova mũtwe wake rĩngĩ.
• 12. Acoke eamũrĩre Jehova matukũ o ro macio maarĩ ma kwĩamũra na arute gatũrũme gatakĩrĩtie mwaka ũmwe, ka igongona rĩa ihĩtia; no rĩrĩ, matukũ marĩa ma mbere nĩmagateo, nĩ ũndũ kwĩamũra gwake kwa mbere nĩkwagwatirio thahu.
• 13. Naguo watho wa Mũnaziri, hĩndĩ ĩrĩa matukũ make ma kwĩamũra maahinga, nĩ ũyũ; nĩ gũtwarũo agatwarũo mũromo-inĩ wa hema-ya-gũtũnganwo,
• 14. arute indo ciake iria ekũrutĩra Jehova, nacio nĩ gatũrũme gatakĩrĩtie mwaka ũmwe, gatarĩ na kaũũgũ, gatuĩke ka ihaki rĩa njino, o kamwatĩ gatakĩrĩtie mwaka ũmwe, gatarĩ na kaũũgũ, gatuĩke ka igongona rĩa mehia, o na ndũrũme ĩmwe ĩtarĩ na kaũũgũ, ĩtuĩke ya igongona rĩa ũiguano,
• 15. hamwe na gĩkabu kĩgima kĩa mĩgate ĩtarĩ mĩimbie, o na tũmĩgate twa mũtu mwega mũhinyu ũkimanĩtio na maguta, na tũmĩgate tũngĩ tũhũthũ tũtarĩ tũimbie tũhake maguta, hamwe na ihaki rĩa mũtu, o na indo iria irutagwo cia kũnyuwo.
• 16. Nake mũthĩnjĩri-Ngai agĩciige mbere ya Jehova, acoke arute igongona rĩa mũndũ ũcio rĩa mehia, o na ihaki rĩake rĩa njino;
• 17. ningĩ arute ndũrũme ĩo, hamwe na gĩkabu kĩu kĩa mĩgate ĩtarĩ mĩimbie, ituĩke magongona ma Jehova ma ũiguano; ningĩ mũthĩnjĩri-Ngai acoke arute ihaki rĩu rĩa mũtu, o na indo iria irutagwo cia kũnyuwo.
• 18. Nake Mũnaziri ũcio enjerũo mũtwe ũcio wonanagia atĩ nĩeamũrĩte hau mũromo-inĩ wa hema-ya-gũtũnganwo, acoke oe njuĩrĩ cia mũtwe wake ũcio wonanagia atĩ nĩeamũrĩte, aciikie mwaki-inĩ ũrĩa ũrĩ ruungu rũa indo icio cia magongona ma ũiguano.
• 19. Ningĩ mũthĩnjĩri-Ngai oe guoko kwa ndũrũme ĩo gwĩ kũruge, na mũgate ũtarĩ mũimbie ũrutĩtwo gĩkabu-inĩ kĩu, na kamũgate kangĩ kahũthũ, aciĩkĩre guoko-inĩ kwa Mũnaziri ũcio aarĩkia kwenjwo mũtwe ũcio wonanagia atĩ nĩeamũrĩte.
• 20. Nake mũthĩnjĩri-Ngai acithũngũthie ituĩke igongona rĩa gũthũngũthĩrio mbere ya Jehova; indo icio nĩciamũrĩirũo mũthĩnjĩri-Ngai, irĩ hamwe na gĩthũri kĩrĩa gĩthũngũthagio, o na kĩero kĩrĩa kĩiyũkagio na igũrũ. Thutha wa ũguo Mũnaziri ũcio aahota gũcoka kũnyua ndibei.
• 21. Ũcio nĩguo watho ũrĩa ũkoniĩ Mũnaziri ũcio ũkwĩhĩta mwĩhĩtwa, o na ũkoniĩ kĩndũ kĩrĩa ekũrutĩra Jehova nĩ ũndũ wa ũrĩa eamũrĩte, hamwe na indo iria ingĩ angĩhota kuona cia kũruta. O ta ũrĩa mwĩhĩtwa wake ũrĩa ehĩtĩte ũtariĩ-rĩ, ũguo noguo aagĩrĩirũo nĩ gwĩka o ta ũrĩa watho wa kwĩamũra kũu gwake ũtariĩ.
• 22. Ningĩ Jehova akĩarĩria Musa, akĩmwĩra atĩrĩ,
• 23. Arĩria Haruni na ariũ ake, ũmere ũũ: Ciugo iria mũkoigaga hĩndĩ ĩrĩa mũkũrathima ciana cia Isiraeli nĩ ici,
• 24. Jehova arokũrathima, na akũmenyagĩrĩre;
• 25. Jehova arotũma ũthiũ wake ũkwarĩre, na agũkinyagĩrie wega wake;
• 26. Jehova arogũtiirĩra gĩthiithi gĩake, na atũme ũgĩage na thayũ.
• 27. Ũguo nĩguo marĩgwetagĩra ciana cia Isiraeli rĩĩtwa rĩakwa, na niĩ nĩndĩrĩcirathimaga.

Home