Go Back

Ndari Chapter 5

• 1. Nake Jehova akĩarĩria Musa, akĩmwĩra atĩrĩ,
• 2. Atha ciana cia Isiraeli, ũciĩre cieherie kĩraaro-inĩ gĩacio mũndũ o wothe ũrĩa ũrũarĩte mangũ, na mũndũ o wothe wĩ na handũ hekuura, o na mũndũ o wothe ũrĩa ũgwatĩtio thahu nĩ kĩimba;
• 3. acio othe mũmoimie na kũu nja ya kĩraaro, o na marĩ arũme kana andũ-a-nja, mũmaige handũ gĩthaka-inĩ na kũu mbarĩ ĩrĩa ĩngĩ ya kĩraaro kĩanyu; nĩguo matikagwatie kĩraaro kĩao thahu, o kũu ndũũranagia na inyuĩ.
• 4. Nacio ciana cia Isiraeli igĩĩka o ta ũguo, ikĩmathengia ikĩmaiga handũ na kũu gĩthaka-inĩ mbarĩ ĩrĩa ĩngĩ ya kĩraaro gĩacio. O ta ũrĩa Jehova erire Musa gwĩkwo, ũguo noguo ciana cia Isiraeli ciekire.
• 5. Ningĩ Jehova akĩarĩria Musa, akĩmwĩra atĩrĩ,
• 6. Aria na ciana cia Isiraeli ũciĩre atĩrĩ, Hĩndĩ ĩrĩa mũndũ mũrũme, o na kana mũndũ-wa-nja, angĩĩhia wĩhia o na ũrĩkũ wa maũndũ moru marĩa mekagwo nĩ andũ makĩagarara watho wa Jehova, nake onwo atĩ ti-itherũ nĩ mũhĩtia-rĩ,
• 7. andũ acio nĩmakoimbũra rĩĩhia rĩrĩa mehĩtie; nake mũndũ ũrĩa wĩhĩtie arĩhe thirĩ wa wĩhia ũcio, ũthire biũ, na awongerere gĩcunjĩ kĩngĩ gĩa gatano anengere mũndũ ũcio ehĩtie.
• 8. No rĩrĩ, mũndũ ũcio wĩhĩtio angĩkorũo nĩakuĩte na hakaaga mũndũ wa nyũmba yao ũrĩa ũngĩnengerũo kĩndũ kĩu kĩa irĩhi rĩa ũũru ũcio ekĩtwo, kĩndũ kĩu kĩrutĩtwo nĩgĩtuĩke kĩa Jehova, kĩheo mũthĩnjĩri-Ngai, hamwe na ndũrũme ya horohio ĩrĩa ĩkũmũhoroheria ũũru ũcio ekĩte.
• 9. Ningĩ kĩndũ o gĩothe kĩa igongona rĩa kũiyũkio na igũrũ thĩinĩ wa indo iria nyamũre cia ciana cia Isiraeli kĩrĩa gĩtwarĩirũo mũthĩnjĩri-Ngai-rĩ, gĩgatuĩka gĩake.
• 10. Ningĩ indo ciothe iria mũndũ aamũraga cia kũruta, igatuĩka ciake; kĩrĩa gĩothe mũndũ o na ũrĩkũ angĩhe mũthĩnjĩri-Ngai, nĩ gĩake.
• 11. Ningĩ Jehova akĩarĩria Musa, akĩmwĩra atĩrĩ,
• 12. Aria na ciana cia Isiraeli, ũciĩre atĩrĩ, Mũka wa mũndũ o na ũrĩkũ angĩthiĩ wogomo, ahĩtie, eke mũthuriwe ũũru,
• 13. mũndũ ũngĩ akome nake marĩ ũtharia, naguo ũndũ ũcio ũhithwo mũthuriwe, ũndũ ũcio ũngĩikara ũtamenyekete, o na harĩa mũndũ-wa-nja ũcio agwatĩtio thahu nĩguo, na haage mũira wa kũmuumbũra, na akĩaga gũkorererũo agĩĩka ũndũ ũcio-rĩ,
• 14. mũthuriwe angĩgwatwo nĩ ũiru, aiguĩre mũtumia wake ũiru nake akorũo hihi nĩethahĩtie; kana mũthuriwe agwatwo nĩ ũiru, aiguĩre mũtumia wake ũiru na hihi akorũo atethahĩtie
• 15. mũndũ mũrũme ũcio nĩatware mũka harĩ mũthĩnjĩri-Ngai, na atware kĩndũ gĩake gĩa kũrutwo igongona, nakĩo nĩ gĩcunjĩ gĩa ĩkũmi kĩa eba ng’ima ya mũtu wa cairi; no rĩrĩ, ndakanaũitĩrĩrie maguta igũrũ, kana awĩkĩre ubani, nĩ ũndũ mũtu ũcio nĩguo ũrutĩtwo wa igongona rĩkoniĩ ũiru, ningĩ mũtu ũcio ũrutĩtwo nĩguo kĩririkania kĩa rĩĩhia, na nĩ wa gũtũma ũndũ ũcio mũũru ũririkanwo.
• 16. Mũthĩnjĩri-Ngai agĩtwaratware mũndũ-wa-nja ũcio amũrũgamie mbere ya Jehova;
• 17. ningĩ atahe maĩ marĩa maamũrĩirũo wĩra wa Ngai na nyũngũ ya rĩũmba, acoke ahakũre rũkũngũ rũrĩa rũrĩ hau thĩ gĩikaro-inĩ, arũĩkĩre maĩ-inĩ macio:
• 18. ningĩ mũthĩnjĩri-Ngai arũgamie mũka ũcio mbere ya Jehova, amuohorithie njuĩrĩ ya mũtwe ĩikare ĩtohetwo, acoke amwĩkĩre mũtu ũcio ũrutĩtwo nĩ ũndũ wa kũririkania ũhoro wa rĩĩhia moko-inĩ make, naguo nĩ mũtu ũrĩa ũrutĩtwo wa igongona rĩa ũiru; na mũthĩnjĩri-Ngai akorũo anyitĩte na guoko maĩ macio ma ũrũrũ, o macio marehithagie kĩrumi;
• 19. nake mũthĩnjĩri-Ngai atũme ethũũrithie maĩ macio, akĩmwĩra ũũ: Kũngĩkorũo wee, ũtuĩkĩte wa gwathĩka nĩ mũthuriguo, ndũrĩ wakoma na mũndũ ũngĩ, kana ũgĩthiĩ wogomo ũgĩĩka maũndũ ma waganu-rĩ, maĩ maya ma ũrũrũ, o maya marehithagie kĩrumi, maroaga gũkũreherere ũũru.
• 20. No rĩrĩ, wee, ũtuĩkĩte wa gwathĩka nĩ mũthuriguo, ũngĩkorũo nĩũthiĩte wogomo, ũgeka maũndũ ma waganu, na ũgakoma na mũndũ ũngĩ ũtarĩ mũthuriguo-rĩ,
• 21. (hĩndĩ ĩo mũthĩnjĩri-Ngai atũme mũndũ-wa-nja ũcio ethũũrithie maĩ macio, ehĩte o kwĩhĩta, ningĩ mũthĩnjĩri-Ngai acoke ere mũndũ-wa-nja ũcio ũũ:) Atĩrĩrĩ, Jehova arotũma ũgwatwo nĩ kĩrumi kĩa ũguo wĩhĩtĩte, agĩtũme kĩero gĩaku kĩonje, o na nda yaku ĩimbe, ũkĩonagwo nĩ andũ anyu;
• 22. namo maĩ maya marehithagie kĩrumi nĩmegũtonya kũu mũkonyo-inĩ waku, matũme nda yaku ĩimbe na kĩero gĩaku kĩonje; nake mũndũ-wa-nja ũcio acoke oige atĩrĩ, Kũrotuĩka o ta ũguo, kũrotuĩka o ta ũguo.
• 23. Nake mũthĩnjĩri-Ngai aandĩke irumi icio ibuku-inĩ, acoke acitobokie maĩ-inĩ macio ma ũrũrũ ikundane namo:
• 24. ningĩ acoke atũme mũndũ-wa-nja ũcio anyue maĩ macio ma ũrũrũ marehithagie kĩrumi, namo maĩ macio marehithagie kĩrumi matonye nda yake, makarũrĩre kuo.
• 25. Nake mũthĩnjĩri-Ngai oe mũtu ũcio ũrutĩtwo wa igongona rĩa ũiru, aũrute moko-inĩ ma mũndũ-wa-nja ũcio, aũthũngũthĩrie mbere ya Jehova, aũtware kĩgongona-inĩ;
• 26. ningĩ mũthĩnjĩri-Ngai ũcio arũme rũhĩ rũgima rũa mũtu ũcio ũrutĩtwo igongona ũtuĩke kĩririkania kĩa rĩĩhia, aũcinĩre kĩgongona-inĩ igũrũ, acoke anyuithie mũndũ-wa-nja ũcio maĩ macio.
• 27. Na rĩrĩ, aarĩkia kũnyuithia mũndũ-wa-nja ũcio maĩ macio-rĩ, nĩgũgakinya atĩrĩ, atĩ mũndũ-wa-nja ũcio angĩkorũo nĩagwatĩtio thahu, na ageka mũthuriwe ũũru, maĩ macio marehithagie kĩrumi-rĩ, magatonya nda yake, makarũrĩre kuo, nayo nda yake ĩimbe, o nakĩo kĩero gĩake kĩonje; nake mũndũ-wa-nja ũcio agĩtũũre agwatĩtwo nĩ kĩrumi akĩonagwo nĩ andũ ao.
• 28. Na rĩrĩ, mũndũ-wa-nja ũcio angĩkorũo atagwatĩtio thahu, na akorũo nĩ mũthingu, ndakona ũũru o na ũrĩkũ, no nĩarĩgĩaga na ihu agaciara.
• 29. Ũcio nĩguo watho wa ũiru, hĩndĩ ĩrĩa mũndũ-wa-nja ũrĩa ũtuĩkĩte wa gwathĩka nĩ mũthuriwe angĩthiĩ wogomo, agwatio thahu;
• 30. kana hĩndĩ ĩrĩa mũndũ mũrũme angĩigua ũiru na ngoro yake, na aiguĩre mũka ũiru; hĩndĩ ĩo nĩyo agatwara mũka, akamũrũgamie mbere ya Jehova, nake mũthĩnjĩri-Ngai eke maũndũ mothe ma watho ũcio.
• 31. Nake mũndũ mũrũme ũcio aikare ta ehereirio ũũru ũcio wothe, nake mũndũ-wa-nja ũcio we mwene acokererũo nĩ ũũru wake.

Home