Go Back

Ndari Chapter 32

• 1. NA RĨRĨ, ciana cia Reubeni, o na cia Gadi, ciarĩ na ũhiũ mũingĩ mũno; nacio ciona bũrũri wa Jazeri, o na bũrũri wa Gileadi atĩ nĩ kũndũ kwa ũhiũ-rĩ,
• 2. ciana icio cia Gadi o na cia Reubeni igĩthiĩ kũrĩ Musa, o na Eleazaru mũthĩnjĩri-Ngai, o na atongoria a kĩrĩndĩ gĩa ciana cia Isiraeli, ikĩaria nao, ikiuga atĩrĩ,
• 3. Matũũra maya ma Atarothu, na Diboni, na Jazeri, na Nimura, na Heshiboni, na Eleale, na Sebamu, na Nebo, o na Beoni,
• 4. o gũkũ bũrũri ũyũ Jehova ahũrithĩtie harĩ kĩrĩndĩ gĩa Isiraeli-rĩ, nĩ bũrũri wa ũhiũ mũno, na ithuĩ ndungata ciaku tũrĩ na ũhiũ.
• 5. Igĩkiuga atĩrĩ, Tũngĩkorũo nĩtũgwĩtĩkĩrĩka nĩwe-rĩ, reke ithuĩ ndungata ciaku tũheo bũrũri ũyũ ũtuĩke witũ, ũtige gũtũringia Jorodani.
• 6. Nake Musa agĩkĩĩra ciana icio cia Gadi o na cia Reubeni atĩrĩ, Hĩ, kaĩ mũkwenda ariũ a ithe wanyu mathiĩ ita-inĩ, na inyuĩ mũtigwo mũikarĩte gũkũ?
• 7. Ningĩ-rĩ, mũgũtũma ciana cia Isiraeli igĩe na mũhũthia itige kwenda kũringa mũrĩmo ikinye bũrũri ũrĩa Jehova aaciheire nĩkĩ?
• 8. Ũguo nĩguo maithe manyu mekire, hĩndĩ ĩrĩa ndamarekirie moime Kadeshi-barinea, magathigane bũrũri ũcio.
• 9. Nĩ gũkorũo hĩndĩ ĩrĩa maambatire magĩkinya kĩanda gĩa Eshikoli, na makĩona bũrũri ũcio, nĩmaacokire gũtũma ciana cia Isiraeli igĩe na mũhũthia, nĩguo itigakinye bũrũri ũcio Jehova aaciheete.
• 10. Nake Jehova agĩgĩcinwo nĩ marakara, agĩkĩĩhĩta, akiuga atĩrĩ,
• 11. Ti-itherũ hatirĩ mũndũ o na ũmwe wa andũ arĩa maambatire makiuma bũrũri wa Misiri, o arĩa makinyĩtie mĩaka mĩrongo ĩĩrĩ o na magakĩria hau, ũkona bũrũri ũrĩa ndehĩtire, ngiuga atĩ nĩngaũhe Iburahimu na Isaaka o na Jakubu, nĩ ũndũ matinũmĩrĩire kũna na ngoro ciao;
• 12. tiga o Kalebu wa Jefune, ũrĩa Mũkenizi, na Joshua wa Nuni, nĩ ũndũ acio erĩ nĩmarũmĩrĩire Jehova na ngoro ciao kũna.
• 13. Jehova agĩgĩcinwo nĩ marakara nĩ ũndũ wa Isiraeli, o nginya hĩndĩ ĩrĩa rũciaro ruothe rũa andũ arĩa mehirie Jehova rũathirire.
• 14. Na rĩrĩ, rĩu inyuĩ na inyuĩ mwarahũkĩte mũgacoka ithenya rĩa maithe manyu nĩguo hongerereke ehia angĩ a gũtũma marakara manene ma Jehova meorerere harĩ Isiraeli.
• 15. Nĩ gũkorũo mũngĩgarũrũka mũtige kũmũrũmĩrĩra, nĩekũmatiga o rĩngĩ gũkũ werũ-inĩ, na nĩmũkũninithia andũ aya othe.
• 16. Ciana icio cia Gadi na cia Reubeni igĩgĩkuhĩhĩria Musa, ikĩmwĩra atĩrĩ, Ithuĩ nĩ gwaka tũgwaka ciugũ cia ũhiũ witũ gũkũ, o na twake matũũra nĩ ũndũ wa ciana ciitũ,
• 17. no rĩrĩ, ithuĩ ithuene nĩtũgwĩthagathaga, twĩohe indo ciitũ cia ita, tũtuĩke ngerewani ya ciana cia Isiraeli o nginya hĩndĩ ĩrĩa tũgacikinyia kũndũ kũu gwacio, nacio ciana ciitũ ciikare matũũra mairigĩtwo nĩ ũndũ wa andũ arĩa matũũraga bũrũri ũyũ.
• 18. Tũtikahũndũka atĩ nĩguo tũinũke mĩciĩ iitũ tiga o nginya hĩndĩ ĩrĩa ciana cia Isiraeli, mũndũ o mũndũ, agakorũo agwatĩte igai rĩake.
• 19. Tondũ ithuĩ tũtikagwata igai hamwe nao mũrĩmo ũcio ũngĩ wa Jorodani, o na na kũu mbere; nĩ gũkorũo ithuĩ nĩtũgũĩrĩirũo nĩ igai riitũ mũrĩmo ũyũ wa Jorodani mwena wa irathĩro.
• 20. Nake Musa agĩciĩra atĩrĩ, Mũngĩĩka ũndũ ũcio, na mwĩohe indo cianyu cia ita mũthiĩ ita-inĩ mũkĩonagwo nĩ Jehova,
• 21. na mũndũ o mũndũ wanyu ũrĩa wĩohete indo cia ita aringe mũrĩmo ũcio ũngĩ wa Jorodani akĩonagwo nĩ Jehova, o nginya hĩndĩ ĩrĩa Jehova akaingata thũ ciake ciume mbere yake,
• 22. o naguo bũrũri wonwo nĩwe ũtoretio kũna-rĩ, thutha ũcio nĩguo mũkahũndũka, na mũtikonwo mwĩ na ũũru o na ũrĩkũ nĩ Jehova, o na kana nĩ Isiraeli; naguo bũrũri ũyũ mũrĩ nĩũgatuĩka wanyu, mũkĩonagwo nĩ Jehova.
• 23. No rĩrĩ, mũngĩkaaga gwĩka ũndũ ũcio, nĩ kwĩhia mũkehia Jehova; na menyai mũno atĩ rĩĩhia rĩu rĩanyu nĩrĩkamũkora rĩmũcokerere.
• 24. Gĩakei matũũra ma gũtũũrũo nĩ ciana cianyu, o na ciugũ cia gũikaragwo nĩ mbũri cianyu; na mwĩke o ta ũguo muugĩte na tũnua twanyu.
• 25. Nacio ciana cia Gadi o na cia Reubeni ikĩarĩria Musa, ikĩmwĩra atĩrĩ, Ithuĩ ndungata ciaku nĩtũgwĩka o ta ũguo wee mwathi witũ wathanĩte gwĩkwo.
• 26. Ciana ciitũ, o na atumia aitũ, na ndũru cia mbũri ciitũ, o na ng’ombe ciitũ, igũikara matũũra-inĩ o gũkũ Gileadi;
• 27. no rĩrĩ, ithuĩ ithuothe, ndungata ciaku, mũndũ o mũndũ witũ ũrĩa wĩohaga indo ciake cia ita, nĩtũkũringa mũrĩmo ũcio ũngĩ tũthiĩ tũkarũe, tũkĩonagwo nĩ Jehova, o ta ũrĩa wee mwathi witũ uugĩte.
• 28. Tondũ ũcio Musa agĩathana, akĩĩra Eleazaru, mũthĩnjĩri-Ngai, o na Joshua wa Nuni, o na anene a nyũmba cia maithe ma andũ a mĩhĩrĩga ya ciana cia Isiraeli, maũndũ maya,
• 29. akiuga atĩrĩ, Kũngĩkorũo ciana cia Gadi o na cia Reubeni nĩigetĩkĩra gũtwarana na inyuĩ, mũndũ o mũndũ wacio ũrĩa wĩohaga indo ciake cia ita, iringe mũrĩmo ũcio ũngĩ wa Jorodani ikĩonagwo nĩ Jehova, o naguo bũrũri ũcio wonwo nĩ inyuĩ ũtoretio kũna-rĩ, nĩmũgacihe bũrũri wa Gileadi ũtuĩke wacio;
• 30. no rĩrĩ, ingĩkaaga kũringa mũrĩmo ũcio ũngĩ hamwe na inyuĩ, ciĩohete indo ciacio cia ita, ikaheanĩrio kũndũ gwacio hamwe na inyuĩ bũrũri ũcio wa Kanaani.
• 31. Nacio ciana cia Gadi, o na cia Reubeni, igĩcokia ikiuga atĩrĩ, O ta ũrĩa Jehova atwĩrĩte twĩke, ithuĩ ndungata ciaku, o ũguo noguo tũgeka.
• 32. Nĩtũkũringa mũrĩmo ũcio twĩohete indo ciitũ cia ita, tũkĩonagwo nĩ Jehova, tũkinye bũrũri wa Kanaani, nakuo kũndũ gũkũ tũrĩ, mbarĩ ĩno ya Jorodani, gũtigwo gwĩ gwitũ.
• 33. Nake Musa agĩkĩhe andũ acio, o ciana icio cia Gadi, o na cia Reubeni, o na nuthu ya mũhĩrĩga wa Manase, mũrũ wa Jusufu, kũndũ kũrĩa gwathamakagwo nĩ Sihoni mũthamaki wa Aamori, o na kũndũ kũrĩa gwathamakagwo nĩ Ogu mũthamaki wa Bashani, naguo ũguo nĩ ta kuuga bũrũri ũcio wothe, o ta ũrĩa matũũra maguo na ng’ongo ciamo ciatariĩ, o matũũra mothe marĩa maarigicĩirio nĩ mĩhaka yaguo.
• 34. Nacio ciana cia Gadi igĩaka Diboni, na Atarothu, na Aroeri,
• 35. na Atarothu-shofani, na Jazeri, na Jogabeha,
• 36. na Bethi-nimira, na Bethi-harani; namo matũũra macio mothe ciaakire me mairige, o na igĩaka ciugũ cia ng’ondu kuo.
• 37. Nacio ciana cia Reubeni igĩaka Heshiboni, na Eleale, na Kiriathaimu,
• 38. o na Nebo, na Baali-meoni (namo marĩĩtwa ma matũũra macio merĩ maarĩ magarũrĩre), o na igĩaka Sibima; namo matũũra macio ciaakire ikĩmatua marĩĩtwa mangĩ.
• 39. Nacio ciana cia Makiru wa Manase igĩthiĩ Gileadi, igĩgũtunyana, igĩkwĩgwatĩra, igĩtunya Aamori arĩa maarĩ kuo.
• 40. Nake Musa agĩkĩhe Makiru wa Manase itũũra rĩu rĩa Gileadi; nake agĩgĩtũũra kuo.
• 41. Nake Jairu, mũrũ wa Manase, agĩthiĩ akĩĩgwatĩra tũtũũra twarĩo agĩtũtua Havothu-jairu.
• 42. Nake Noba agĩthiĩ akĩĩgwatĩra Kenathu, o na mĩciĩ yakuo, agĩgũtua Noba, agwĩtanĩtie na rĩĩtwa rĩake we mwene.

Home