Go Back

Ndari Chapter 30

• 1. Ningĩ Musa akĩarĩria atongoria a mĩhĩrĩga ya ciana cia Isiraeli, akĩmera atĩrĩ, Ũyũ nĩguo ũndũ ũrĩa Jehova aathanĩte.
• 2. Hĩndĩ ĩrĩa mũndũ mũrũme ekwĩhĩta mwĩhĩtwa ũkoniĩ Jehova, kana akehĩta mwĩhĩtwa wa kwĩhinga mũhingo, ndagacoka kuugũkwo ũguo oigĩte, no ageka o ta ũrĩa ũhoro ũrĩa woimire kanua gake watariĩ.
• 3. O nake mũndũ-wa-nja angĩĩhĩta mwĩhĩtwa ũkoniĩ Jehova, kana ehinge mũhingo e gwa ithe e mũirĩtu-rĩ,
• 4. ithe angĩkorũo nĩaiguĩte ũhoro wa mwĩhĩtwa ũcio wake, akamenya atĩ nĩehingĩte mũhingo, no akamũkirĩra akamũrekereria o ro ũguo-rĩ, mĩĩhĩtwa ĩo yake yothe nĩĩgaikara o ro ũguo ĩrũmĩtio, o naguo ũhoro ũcio wothe wa ũguo ehingĩte mũhingo nĩũkarĩĩra.
• 5. No rĩrĩ, ithe angĩkorũo nĩaamũkaanirie mũthenya o ro ũcio aamũiguire akĩaria-rĩ, hatirĩ ũndũ o na ũmwe wa mĩĩhĩtwa ĩo yake ũkarĩĩra, o naguo ũhoro wake wa ũguo ehingĩte mũhingo, ndũgaikara ũrũmĩtio; nake Jehova nĩakamuohera, nĩ ũndũ ithe nĩaamũgiririe eke ũndũ ũcio.
• 6. Na rĩrĩ, angĩhikio nĩ mũrũme arĩ o na mĩĩhĩtwa ĩo yake kana akorũo ehingĩte mũhingo wa mbũkĩrĩra akĩaria atecirĩtie wega,
• 7. nake mũrũme akorũo nĩaiguĩte ũhoro ũcio, na akamũkirĩra akamũrekereria o ro ũguo mũthenya ũrĩa aamenyire ũhoro ũcio wake, hĩndĩ ĩo mĩĩhĩtwa yake nĩĩgaikara irũmĩtio, o namo mohoro macio ma ũguo ehingire mũhingo nĩmakarĩĩra.
• 8. No rĩrĩ, mũrũme angĩkorũo nĩaamũkaanirie mũthenya o ro ũcio aamenyire ũhoro ũcio-rĩ, nĩ gũthahia aathahia mwĩhĩtwa wake ũrĩa ararĩ naguo, o na aathahia ciugo ciake icio aaririe atecirĩtie, o icio cia kwĩhinga mũhingo; nake Jehova nĩakamuohera.
• 9. No rĩrĩ, mwĩhĩtwa wa mũka wa ndigwa, kana wa mũka ũrĩa ũtiganĩte na mũrũme biũ-rĩ, maũndũ mothe marĩa egũkorũo ehingĩte mũhingo wamo-rĩ, nĩmagaikara marũmĩtio.
• 10. Ningĩ mũndũ-wa-nja angĩĩhĩta arĩ o kwa mũrũme, kana ehinge mũhingo,
• 11. nake mũrũme akorũo nĩaaiguire ũhoro ũcio, na agĩkira akĩmũrekereria o ro ũguo, akĩaga kũmũkaania, hĩndĩ ĩo mĩĩhĩtwa yake yothe nĩĩgaikara ĩrũmĩtio, o naguo ũhoro wothe wa ũguo ehingĩte mũhingo nĩũkarĩĩra.
• 12. No rĩrĩ, mũthuriwe angĩkorũo nĩaathahirie ũhoro ũcio wothe o kũũthahia o mũthenya ũrĩa aaũiguire, hĩndĩ ĩo ũndũ ũrĩa wothe aakorirũo oigĩte akĩaria, ũkoniĩ mĩĩhĩtwa ĩo yake, kana ũkoniĩ mĩhingo ĩo ehingĩte, mũthuriwe nĩaathahirie ũhoro ũcio, na tondũ ũcio Jehova nĩakamuohera.
• 13. Na rĩrĩ, mwĩhĩtwa o wothe ũrĩa ehĩtĩte kana mũhingo o wothe ũrĩa ehingĩte-rĩ, mũrũme aahota gũtua ũhoro wa atĩ maũndũ macio nĩmekũrĩĩra kana nĩmegũthaha.
• 14. No rĩrĩ, mũrũme angĩtũũra amũkiragĩra mĩthenya yothe-rĩ, nĩ ta gũtũma atũmaga mĩĩhĩtwa ĩo yothe ya mũka ĩrĩĩre, hamwe na maũndũ mothe marĩa ehingĩte mĩhingo yamo; mũthuriwe nĩwe ũtũmĩte maũndũ macio maikare marũmĩtio, nĩ ũndũ mũthenya ũrĩa aamaiguire, nĩaakirire na ndaarie.
• 15. No rĩrĩ, angĩcoka kũmathahia thutha wa mũthenya ũcio aamaiguire, nĩwe ũgacokererũo nĩ ũũru wa mũka.
• 16. Icio nĩcio irĩra cia watho ũrĩa Jehova aathire Musa akĩmwĩra ũrũmagĩrĩrũo ũhoro-inĩ wa mũndũ na mũka, o na ũhoro-inĩ wa ithe wa mũirĩtu na mwarĩ rĩrĩa arĩ mũnyinyi e gwake mũciĩ.

Home