Go Back

Ndari Chapter 25

• 1. NA RĨRĨ, hĩndĩ ĩrĩa Aisiraeli maaikarire Shitimu, andũ acio magĩitĩka gũtharania na airĩtu a Amoabi;
• 2. nao magagĩĩtaga Aisiraeli mathiĩ igongona-inĩ cia ngai ciao; na Aisiraeli magĩkĩrĩanĩra nao, na makainamĩrĩra ngai icio ciao.
• 3. Aisiraeli magĩkĩĩgwatania na Baali-peori; nake Jehova agĩcinwo nĩ marakara nĩ ũndũ wa Aisiraeli.
• 4. Jehova agĩkĩĩra Musa atĩrĩ, Nyita anene othe a andũ ũmacuurie mũtĩ igũrũ mbere ya Jehova mũthenya barigici, nĩ getha marakara marĩa mahiũ ma Jehova magarũrũo, matigakinyĩre Aisiraeli.
• 5. Nake Musa agĩkĩĩra aciri a Isiraeli atĩrĩ, Inyuothe, mũndũ o mũndũ, nĩorage andũ a gĩkundi gĩake arĩa mathiĩte kwĩgwatania na ũhoro wa Baali-peori.
• 6. Na atĩrĩrĩ, mũndũ ũmwe wa ciana cia Isiraeli agĩthiĩ harĩ ariũ a ithe na mũndũ-wa-nja Mũmidiani, akĩonagwo nĩ Musa, o na kĩrĩndĩ kĩu gĩothe gĩa ciana cia Isiraeli, o ihinda rĩrĩa maarĩragĩra mũromo-inĩ wa hema-ya-gũtũnganwo.
• 7. Na rĩrĩ, hĩndĩ ĩrĩa Finehasi wa Eleazaru, ũcio mũrũ wa Haruni mũthĩnjĩri-Ngai, onire ũguo, agĩũkĩra, akiuma hau kĩrĩndĩ-inĩ kĩu, akĩnyita itimũ,
• 8. akĩrũmĩrĩra mũndũ ũcio wa Isiraeli, agĩtonya hema yake amuumĩte thutha, agĩgĩthecanĩria mũndũ mũrũme ũcio wa Isiraeli na mũndũ-wa-nja ũcio, narĩo itimũ rĩgĩtheca mũndũ-wa-nja nda, rĩkiumĩrana. Na tondũ ũcio mũthiro ũrĩa wakorete ciana cia Isiraeli ũgĩcieherera.
• 9. Nao arĩa moragirũo nĩ mũthiro ũcio maarĩ ngiri mĩrongo ĩĩrĩ na inya.
• 10. Ningĩ Jehova akĩarĩria Musa, akĩmwĩra atĩrĩ,
• 11. Finehasi wa Eleazaru wa Haruni, mũthĩnjĩri-Ngai, nĩagarũrĩte marakara makwa nĩguo matigakinyĩre ciana cia Isiraeli, nĩ ũndũ wa ũrĩa aahĩahĩire ngoro, akĩgwatwo nĩ ũiru arĩ thĩinĩ wao, na tondũ ũcio ndiigana kũnina ciana cia Isiraeli nĩ ũndũ wa ũiru ũcio ndaiguĩte.
• 12. Tondũ ũcio uga ũũ: Atĩrĩrĩ, rĩu nĩndarĩkanĩra nake kĩrĩkanĩro gĩakwa kĩa ũiguano;
• 13. nakĩo kĩrĩkanĩro kĩu gĩgatuĩka gĩa kuonania atĩ we mwene, o na andũ a rũciaro rũake, arĩa magoka thutha wake, magatũũra matuĩkaga athĩnjĩri-Ngai tene na tene; nĩ ũndũ wa ũrĩa aahĩahĩire ngoro, akĩigua ũiru nĩ ũndũ wa Ngai wake, agĩkĩhoroheria ciana cia Isiraeli.
• 14. Na rĩrĩ, Mũisiraeli ũcio woragirũo, o ũcio woraganĩirio na mũndũ-wa-nja Mũmidiani, etagwo Zimuri wa Salu, nake aarĩ mũtongoria wa andũ a nyũmba ya ithe wao, mũhĩrĩga-inĩ wa Asimeoni.
• 15. O nake mũndũ-wa-nja ũcio Mũmidiani woragirũo etagwo Kozibi, mwarĩ wa Zuru, mũtongoria wa andũ a nyũmba ya ithe wao kũu Midiani.
• 16. Ningĩ Jehova akĩarĩria Musa, akĩmwĩra atĩrĩ,
• 17. Arahũkĩra Amidiani, ũmahũre;
• 18. nĩ ũndũ nĩmamũnyariraga na maũndũ marĩa mekaga ma kũmũhenereria o marĩa maatũmire mũhenio, mũkĩgucĩrĩrio ũhoro-inĩ wa Peori, o na ũhoro-inĩ wa Kozibi, mwarĩ wa mũtongoria wa Midiani, mwarĩ wao, ũrĩa woragirũo mũthenya ũrĩa mũthiro warehetwo nĩ ũndũ wa ũhoro ũcio wa Peori.

Home