Go Back

Ndari Chapter 23

• 1. Nake Balaamu agĩkĩĩra Balaki atĩrĩ, Njakĩra igongona mũgwanja haha, na ũndehithĩrie ndegwa mũgwanja, na ndũrũme mũgwanja.
• 2. Nake Balaki agĩĩka o ta ũrĩa Balaamu oigĩte gwĩkwo; nao Balaki na Balaamu makĩrutĩra igongona-inĩ icio ciothe, o kĩgongona ndegwa ĩmwe, na ndũrũme ĩmwe.
• 3. Balaamu agĩkĩĩra Balaki atĩrĩ, Wee-rĩ, ikara ũrũgamĩte ihaki-inĩ rĩaku rĩa njino, niĩ na niĩ ’thiĩ na harĩa, na hihi no gũkorũo Jehova nĩegũũka tũcemanie; naguo ũndũ ũrĩa wothe arĩ’menyithia nĩngũkwĩra. Agĩgĩthiĩ kĩrĩma-inĩ, handũ hatheri.
• 4. Nake Ngai agĩgĩcemania na Balaamu ho, Balaamu agĩkĩmwĩra atĩrĩ, Nĩ’thondekete igongona mũgwanja, na nĩndutithĩtie ndegwa ĩmwe, o na ndũrũme ĩmwe, ithĩnjĩrio igongona-inĩ icio o kĩgongona.
• 5. Jehova agĩgĩtaara Balaamu, akĩmũhe ũhoro ũrĩa ariuga, akĩmwĩra atĩrĩ, Hũndũka ũkinye he Balaki, ũmwĩre ũna na ũna.
• 6. Agĩgĩcoka harĩ we, agĩkĩmũkora arũgamĩte ihaki-inĩ rĩake rĩa njino, we mwene, o na anene othe a Amoabi.
• 7. Agĩgĩitĩka kwaria na thimo, akiuga atĩrĩ, Balaki andehithĩtie andutĩte o Aramu, Mũthamaki wa Amoabi akanduta o irĩma-inĩ cia mwena wa irathĩro. Akanjĩra atĩrĩ, Ũka ũ’numĩre Jakubu, Nao Aisiraeli ũũke ũmehĩre.
• 8. Hĩ! Ũrĩa ũtarumĩtwo nĩ Ngai-rĩ, niĩ ngũkĩmũruma atĩa? O nake ũrĩa ũtehĩirũo nĩ Jehova-rĩ, niĩ ngũkĩmwĩhĩra atĩa?
• 9. Nĩ gũkorũo ngũmona ndĩ o haha gacũmbĩrĩ-inĩ ka ndwaro ici cia mahiga; Ndĩ o gũkũ irĩma igũrũ-rĩ, no ngũmona. Atĩrĩrĩ, aya nĩo andũ arĩa matũũraga me ngũũrani mũno na andũ arĩa angĩ, Na matingĩtaranĩrio na andũ a ndũrĩrĩ.
• 10. Nũ ũngĩkĩhota gũtara rũkũngũ rũa Jakubu? Kana ahote gũtara gĩcunjĩ gĩa kana kĩa andũ a Isiraeli? Hĩ! ndĩrorekwo ngue gĩkuũ ta kĩa andũ aya athingu, O naguo ũhoro wakwa wa kũrigĩrĩria-rĩ, ũrotuĩka o ta wao!
• 11. Balaki agĩkĩĩra Balaamu atĩrĩ, Ĩ rĩu, ũndũ ũrĩa wakĩnjĩka nĩ ũrĩkũ? Ngũrehire gũkũ, nĩguo ũrume thũ ciakwa, nawe rĩu nĩ kũrathima wagĩcirathima biũ.
• 12. Nake agĩgĩcokia akiuga atĩrĩ, Hĩ, githĩ ndiagĩrĩirũo nĩ kũbarĩrĩra mũno, nĩguo njuge o ũndũ ũrĩa Jehova ekũndaara njarie?
• 13. Nake Balaki akĩmwĩra atĩrĩ, Ta gĩũke, ndagũthaitha, tũthiĩ handũ hangĩ ũmone wĩ ho; nawe wĩ hau, ũmone mĩthia-inĩ yao iiki ya hau monganĩte, no ndũmona othe, ũkĩ’numĩre andũ acio wĩ ho.
• 14. Agĩkĩmuoya magĩthiĩ nake kawerũ-inĩ ga Zofimu, o gacũmbĩrĩ ga kĩrĩma kĩa Pisiga, agĩgĩaka igongona mũgwanja ho, nacio igongona-inĩ icio, o kĩgongona, agĩthĩnjĩra ndegwa ĩmwe o na ndũrũme ĩmwe ho.
• 15. Balaamu agĩkĩĩra Balaki atĩrĩ, Wee rũgama haha ihaki-inĩ rĩrĩ rĩaku rĩa njino, mũira wa ’thiĩ ngacemanie na Jehova harĩa.
• 16. Nake Jehova agĩgĩcemania na Balaamu, akĩmũtaara ũrĩa arĩaria, akĩmwĩra atĩrĩ, Hũndũka ũkinye he Balaki, ũmwĩre ũna na ũna.
• 17. Nake agĩcoka harĩ we, akĩmũkora arũgamĩte ihaki-inĩ rĩake rĩa njino, marĩ na anene a Amoabi. Balaki agĩkĩmũũria atĩrĩ, Jehova aakwĩra atĩa?
• 18. Agĩgĩitĩka kwaria na thimo, akiuga atĩrĩ, Ta arahũka, wee Balaki, wĩiguĩre ũhoro; Tega gũtũ ũnjigue, wee mũrũ wa Ziporu;
• 19. Ngai ti mũndũ, atĩ ahenanie; Ningĩ ti mũrũ wa Adamu, atĩ nĩguo ericũkwo; Hĩ, githĩ aakiuga ũndũ na aage kũwĩka? O na kana aarie ũhoro, na ndawĩkĩre hinya?
• 20. Atĩrĩrĩ, niĩ-rĩ, njathĩtwo ndathimane; Nake arathimanĩte-rĩ, niĩ ndingĩhota kũgarũra ũhoro ũcio.
• 21. Ha ũhoro wa Jakubu-rĩ, Ngai ndarĩ ona ũũru, Kana akĩona ũremi thĩinĩ wa Isiraeli; Jehova Ngai wake arĩ hamwe nake, Naguo mũgambo mũnene ũiguagwo kũrĩ o, Magĩkũngũĩra mũthamaki wao.
• 22. Ngai nĩwe ũmarehage amarutĩte Misiri; Hinya wake ũrĩa arĩ naguo ũtariĩ o ta wa mbogo.
• 23. Naho ha ũhoro wa Jakubu, ti-itherũ hatirĩ ũhoro ta wa nyoni ya mũndũ, Ningĩ ha ũhoro wa Isiraeli, hatirĩ ũhoro ta wa kũragũria; Rĩu ũhoro wa Jakubu, o na wa Isiraeli, ũtũire waragio ũũ: Atĩrĩrĩ, kaĩ Ngai agĩĩkĩte atĩa!
• 24. Atĩrĩrĩ, andũ ao maarahũkaga o ta mũrũthi wa mũgoma, Na Isiraeli agokĩra o ta mũrũthi wa njamba; Ndagakoma thĩ ataambĩte kũrĩa kĩrĩa atahĩte, Na ataambĩte kũnyua thakame ya kĩrĩa oragĩte.
• 25. Nake Balaki agĩkĩĩra Balaamu atĩrĩ, Nĩ kaba ũgĩtige kũna kũmarathima, kana kũmaruma.
• 26. No Balaamu agĩcokia akĩĩra Balaki atĩrĩ, Githĩ rĩrĩa ndaaririe nawe, ndiakwĩrire ũũ: Maũndũ marĩa mothe Jehova akanjĩra njĩke, nomo ngeka.
• 27. Nake Balaki agĩkĩĩra Balaamu atĩrĩ, Ũka tũthiĩ ngũtware o handũ hangĩ; hihi no gũkorũo Ngai nĩegũgwĩtĩkĩria kũnumĩra andũ aya wĩ ho.
• 28. Balaki agĩkĩoya Balaamu, akĩmũtwara kĩrĩma-inĩ kĩa Peoru, kĩrĩa kĩrorete na kũu mũhuro werũ-inĩ.
• 29. Nake Balaamu akĩĩra Balaki atĩrĩ, Rĩu kĩnjakĩre igongona mũgwanja haha, na ũ’thĩnjithĩrie ndegwa mũgwanja, na ndũrũme mũgwanja.
• 30. Nake Balaki agĩĩka o ta ũguo Balaamu oigire gwĩkwo, agĩgĩthĩnjĩra igongona-inĩ icio o kĩgongona ndegwa ĩmwe, o na ndũrũme ĩmwe.

Home