Go Back

Ndari Chapter 21

• 1. Na rĩrĩ, Mũkanaani ũrĩa warĩ mũthamaki wa Aradi, o ũcio watũũrĩte Mwena-wa-Gũthini, akĩigua atĩ Aisiraeli mokĩire njĩra ya Atharimu; agĩgĩthiĩ ita akarũe na Aisiraeli, na agĩtaha andũ amwe ao.
• 2. Nao Aisiraeli makĩĩra Jehova na mwĩhĩtwa atĩrĩ, Ti-itherũ ũngĩrekereria andũ aya ũmaneane moko-inĩ maitũ-rĩ, nĩtũkwananga matũũra mao, tũmaamũre ma kũninwo biũ.
• 3. Nake Jehova agĩkĩigua mũgambo wa andũ a Isiraeli, agĩĩtĩkĩra ũhoro ũcio, agĩkĩrekereria Akanaani acio, nao andũ a Isiraeli magĩkĩmanina biũ hamwe na matũũra mao; naho handũ hau hagĩtuwo Horoma.
• 4. Nao makĩgwata rũgendo, moimĩte kĩrĩma-inĩ kĩu kĩa Horu, magĩgĩthiĩ na njĩra ĩrĩa yarorete Iria Itune, nĩguo mathiũrũrũke bũrũri wa Edomu; nacio ngoro cia andũ acio igĩthethũka mũno nĩ ũndũ wa njĩra ĩo.
• 5. Nao magĩkĩaria maũndũ ma gũcambia Ngai, o na Musa, makiuga atĩrĩ, Mwatũrutire Misiri tũũke tũkuĩre gũkũ werũ-inĩ nĩkĩ? Nĩ ũndũ-rĩ, gũkũ gũtikĩrĩ irio, na gũtirĩ maĩ, na rĩu ngoro ciitũ nĩinyikĩte mũgate ũyũ ũtarĩ kĩene.
• 6. Nake Jehova akĩrehithĩrie andũ acio nyamũ-cia-thĩ ikũhenia o ta mwaki, nacio ikĩmarũma; nao andũ aingĩ a Isiraeli magĩkua.
• 7. Andũ acio magĩgĩthiĩ kwĩ Musa, makĩmwĩra atĩrĩ, Nĩtwĩhĩtie nĩ ũndũ nĩtũcambĩtie Jehova, o nawe tũgagũcambia; hoya Jehova, nĩ getha atũthengerie nyamũ-ici-cia-thĩ. Nake Musa agĩkĩmahoera.
• 8. Nake Jehova agĩkĩĩra Musa atĩrĩ, Wĩthondekere nyamũ-ya-thĩ ĩkũhenia ta mwaki, ũmĩĩkĩre igũrũ rĩa mũtĩ wa kĩbebero; na gũgĩkinye atĩrĩ, atĩ mũndũ o wothe ũrĩa ũrũmĩtwo, aamĩrora, akahonoka.
• 9. Musa agĩgĩthondeka nyamũ-ya-thĩ ya gĩcango, akĩmĩĩkĩra mũtĩ-inĩ wa kĩbebero igũrũ; na gũgĩkinya atĩrĩ, atĩ rĩrĩa nyamũ-ya-thĩ yarũma mũndũ o na ũrĩkũ, aarora nyamũ-ĩo-ya-thĩ ya gĩcango-rĩ, akahonoka.
• 10. Ningĩ ciana cia Isiraeli ikĩgwata rũgendo, ikĩamba hema ciacio Obothu.
• 11. Ningĩ igĩthiĩ ciumĩte Obothu, igĩciamba Iye-abarimu, werũ-inĩ wa njĩra ya gũkinya Moabi, ũrĩa ũrorete mwena wa irathĩro.
• 12. Ningĩ cioima hau igĩthiĩ rũgendo, ikĩamba hema ciacio kĩanda-inĩ gĩa Zeredu.
• 13. Ningĩ cioima hau igĩthiĩ rũgendo, ĩkĩamba hema ciacio mũrĩmo ũrĩa wa Arinoni, kũu werũ-inĩ ũrĩa ũgucũkĩte wambĩrĩirie mũhaka-inĩ wa Aamori; nĩ gũkorũo Arinoni nĩruo rũarĩ mũhaka wa Amoabi, naruo nĩruo rũahakanĩtie Amoabi na Aamori.
• 14. Tondũ ũcio kwĩragwo ibuku-inĩ rĩa ita cia Jehova atĩrĩ, Vahebu gĩtuamba gĩa Sufa, O na kũu cianda-inĩ cia Arinoni,
• 15. O na kĩgaragaro-inĩ gĩa cianda, Kĩrĩa kĩambatĩrĩire itũũra rĩa Ari, O na gĩgatheca mĩhaka-inĩ ya Amoabi.
• 16. Ningĩ cioima hau, igĩthiĩ rũgendo, igĩkinya Biri; naho nĩho gĩthima-inĩ kĩrĩa Jehova aaheire Musa ũhoro wakĩo, ũũ: Cokanĩrĩria andũ othe hamwe, na nĩngũmahe maĩ manyue.
• 17. Hĩndĩ ĩo Aisiraeli magĩkĩina rũĩmbo rũrũ: Therũka maĩ, wee gĩthima gĩkĩ; inyuĩ na inyuĩ kĩinĩrei;
• 18. O gĩthima kĩrĩa anene menjete, Gĩgathikũrio nĩ andũ arĩa me igweta, Magagĩthikũria na mĩthĩgi yao ya ũnene, o na mĩtirima yao. Ningĩ ciana cia Isiraeli cioima werũ-inĩ ũcio, ikĩgwata rũgendo, igĩkinya Matana;
• 19. ningĩ cioima Matana, igĩkinya Nahalieli; ningĩ cioima Nahalieli, igĩkinya Bamothu;
• 20. ningĩ cioima Bamothu, igĩkinya kĩanda kĩrĩa kĩrĩ werũ-inĩ wa Amoabi, igĩgĩkinya o kĩrĩma-inĩ kĩa Pisiga igũrũ, kĩrĩa kĩrorete na hau mũhuro werũ-inĩ.
• 21. Nao Aisiraeli makĩrekia andũ gwĩ Sihoni, mũthamaki wa Aamori, makamwĩre atĩrĩ,
• 22. Reka nduĩkanĩrie bũrũri waku; na tũtikerũra mĩgũnda-inĩ ya irio, kana ya mĩthabibu; na tũtinyua maĩ ma ithima; no tũkũgera njĩra ĩrĩa nene ya gĩtwari, o nginya tũhĩtũke mũhaka wa bũrũri waku.
• 23. No Sihoni ndaigana gwĩtĩkĩria Aisiraeli mahĩtũkĩre mũhaka-inĩ wa bũrũri wake; no rĩrĩ, nĩ kũũngania onganirie andũ ake othe hamwe, akiumagara o nginya werũ-inĩ, agokĩrĩre Aisiraeli, agĩgĩkinya Jahazu; agĩkĩrũa na Aisiraeli.
• 24. Nao Aisiraeli makĩmũhũra na hiũ cia njora makĩmũnina, makĩmũtunya bũrũri wake kuuma rũũĩ rũa Arinoni nginya rũũĩ rũa Jaboku; naguo ũguo nĩ ta kuuga o nginya bũrũri wa ciana cia Amoni; nĩ gũkorũo mũhaka wa ciana icio cia Amoni warĩ hinya mũno ũkĩhĩtũkwo.
• 25. Nao Aisiraeli magĩtunyana matũũra mothe marĩa maarĩ kuo, magĩgĩtũũra kũu matũũra-inĩ macio mothe ma Aamori, namo nĩmo Heshiboni, o na tũtũũra twakuo tuothe.
• 26. Tondũ Heshiboni nĩrĩo itũũra rĩa Sihoni ũcio mũthamaki wa Aamori, na nĩwe ũrĩa wahũranĩte na mũthamaki wa Moabi wa mbere ya hĩndĩ ĩo, akamũtunya bũrũri wake wothe o nginya Arinoni.
• 27. Tondũ ũcio arĩa maaragia ũhoro na thimo makĩrũhia moigaga atĩrĩ, Ũkĩrai mũthiĩ Heshiboni, Itũũra rĩu rĩa Sihoni rĩakwo, o na rĩĩkĩrũo hinya;
• 28. Nĩ gũkorũo mwaki nĩuumĩte Heshiboni, Naruo rũrĩrĩmbĩ rũkoima itũũra rĩu rĩa Sihoni, Rũkarĩa itũũra rĩa Ari rĩa Moabi, rũkarĩnina biũ, Hamwe na anene a ng’ongo iria ndũũgĩru cia Arinoni.
• 29. Hĩ! Kaĩ ũrĩ na haaro, wee Moabi-ĩ! Atĩrĩrĩ, inyuĩ andũ a Kemoshu, hĩ, kaĩ nĩmũũrĩte o kũũra biũ-ĩ! Nĩaarekereirie ariũ ake matũũre ihenya-inĩ, O na airĩtu ake akamarekereria matũũre matahĩtwo, Akamaneana harĩ Sihoni mũthamaki wa Aamori.
• 30. Nĩtũmarathĩte; Heshiboni nĩrĩninĩtwo biũ, rĩgakinyio o Diboni, Nakuo kũndũ kũu guothe tũkwanangĩte tũgagũkinyia o Nofa, Itũũra rĩrĩa rĩkuhanĩrĩirie na Medeba.
• 31. Ũguo nĩguo Aisiraeli maatũũrire bũrũri wa Aamori.
• 32. Nake Musa akĩrekia andũ magathigane Jazeri, nao Aisiraeli magĩtunyana mĩciĩ ya itũũra rĩu, makĩingata Aamori arĩa maarĩ kuo.
• 33. Ningĩ magĩkĩgarũrũka makĩambata na njĩra ĩrĩa ĩrorete Bashani; nake Ogu, mũthamaki wa Bashani, arĩ hamwe na andũ ake othe, akiumagara akahũranĩre nao Edirei.
• 34. Nake Jehova agĩkĩĩra Musa atĩrĩ, Menya ũmwĩtigĩre; nĩ ũndũ nĩndĩkĩtie kũmũneana moko-inĩ maku, we mwene, na andũ ake othe, o na bũrũri wake wothe; nawe nĩũkũmwĩka o ta ũrĩa ũrekire Sihoni, mũthamaki wa Aamori, ũrĩa ũratũire Heshiboni.
• 35. Tondũ ũcio makĩmũhũra we mwene o na ariũ ake, o na andũ ake othe, o nginya gũkĩaga mũndũ o na ũmwe ũtigarĩtio; nao makĩĩgwatĩra bũrũri wake.

Home