Go Back

Ndari Chapter 20

• 1. NA RĨRĨ, ciana cia Isiraeli, naguo ũguo nĩ ta kuuga kĩrĩndĩ kĩu gĩothe, igĩthiĩ igĩkinya werũ wa Zini mweri wa mbere; nao andũ acio magĩgĩikara Kadeshi; nake Miriamu agĩkuĩra kuo, na agĩthikwo o ro kuo.
• 2. Naho handũ hau hakĩagwo maĩ nĩ ũndũ wa kĩrĩndĩ kĩu; nakĩo gĩkĩrũrũngana, gĩgĩũkĩrĩra Musa na Haruni.
• 3. Nao andũ acio magĩtetia Musa, makĩaria nake makiuga atĩrĩ, Na arĩ korũo nĩ gũkua twakuanĩire hamwe na ariũ a ithe witũ arĩa maakuĩrĩire mbere ya Jehova!
• 4. Rĩu-rĩ, nĩ kĩ gĩtũmĩte mũrehe kĩrĩndĩ gĩkĩ kĩa Jehova werũ-inĩ ũyũ nĩ getha tũkuĩre kuo, ithuene, o na ũhiũ witũ?
• 5. Ningĩ-rĩ, nĩ kĩ gĩatũmire mũtũrute Misiri mũtũrehe kũndũ gũkũ kũũru? Gũkũ ti kũndũ irio ingĩhandĩka, kana kuoneke ngũyũ, kana thabibu, kana makomamanga; o namo maĩ ma kũnyua gũtirĩ.
• 6. Nao Musa na Haruni magĩthiĩ, makiuma hau kĩrĩndĩ kĩu kĩarĩ, magĩkinya mũromo-inĩ wa hema-ya-gũtũnganwo, makĩĩgũithia magĩturumithia mothiũ mao thĩ; naguo riri wa Jehova ũkĩmoimĩrĩra.
• 7. Nake Jehova akĩarĩria Musa, akĩmwĩra atĩrĩ,
• 8. Oya rũthanju rũaku, mũcokanĩrĩrie kĩrĩndĩ gĩothe mwĩ na Haruni mũrũ wa nyũkwa, mũcoke mwarĩrie rũaro rũrũ rũa ihiga kĩĩ ho gĩkĩĩiguagĩra, nĩ getha ruume maĩ; ũrute maĩ ihiga-inĩ rĩrĩ, ũkĩhe kĩrĩndĩ gĩkĩ maĩ kĩnyue, hamwe na ũhiũ wakĩo.
• 9. Musa agĩkĩoya rũthanju rũu, akĩrũruta hau rũaigĩtwo mbere ya Jehova, o ta ũrĩa aamwathĩte.
• 10. Musa na Haruni magĩgĩcokanĩrĩria kĩrĩndĩ kĩu gĩothe hamwe mbere ya ihiga rĩu, Musa agĩkĩĩra atĩrĩ, Rĩu ta gĩthikĩrĩriei, inyuĩ aremi aya, anga no mũhaka tũkĩmũrutĩre maĩ ihiga-inĩ rĩrĩ?
• 11. Musa agĩkĩoya guoko gwake na igũrũ, akĩgũtha ihiga rĩu na rũthanju kerĩ; hagĩkiuma maĩ maingĩ mũno, nakĩo kĩrĩndĩ kĩu gĩkĩnyua hamwe na ũhiũ wakĩo.
• 12. Nake Jehova akĩĩra Musa na Haruni atĩrĩ, Tondũ mũtinanjĩtĩkia nĩguo muonanie atĩ ndĩ mũtheru, mũndĩithie harĩ ciana cia Isiraeli-rĩ, mũtigakinyia kĩrĩndĩ gĩkĩ bũrũri ũrĩa ndĩkĩheete.
• 13. Namo maĩ macio magĩtuwo Meriba; nĩ gũkorũo ciana cia Isiraeli nĩciatetanirie na Jehova, nake akĩĩonania harĩ cio atĩ nĩwe wa gũtĩwo atuwo mũtheru.
• 14. Ningĩ Musa akĩrekia andũ moimĩte hau Kadeshi makinye kwĩ mũthamaki wa Edomu, mamwĩre ũũ: Atĩrĩrĩ, mũrũ wa nyũkwa Isiraeli oiga ũũ: Wee nĩũũĩ mathĩna mothe marĩa tuonete,
• 15. ũrĩa maithe maitũ maaikũrũkire magĩthiĩ Misiri, na ithuĩ tũgĩtũũra kũu Misiri mĩaka mĩingĩ, na ũrĩa maatwĩkire maũndũ moru, ithuene o na maithe maitũ;
• 16. na rĩrĩa twakaĩire Jehova, akĩigua mũgambo witũ, akĩrekia mũraika, agĩtũruta bũrũri ũcio wa Misiri; na rĩu tũkĩrĩ o gũkũ Kadeshi, itũũra rĩrĩa rĩrĩ o mũthia-inĩ wa mũhaka wa bũrũri waku.
• 17. Ndagũthaitha ũtwĩtĩkĩrie tũtuĩkanĩrie bũrũri waku; na tũtigera mĩgũnda-inĩ ya irio, kana mĩgũnda-inĩ ya mĩthabibu, kana tũnyue maĩ ma ithima iria irĩ kuo; no tũkũgera njĩra ĩrĩa nene ya gĩtwari, na tũtikerũra na mwena wa ũrĩo, o na kana wa ũmotho, o nginya rĩrĩa tũgakorũo tũhĩtũkĩte mũhaka wa bũrũri waku.
• 18. Nake mũthamaki ũcio wa Edomu akĩmũcokeria atĩrĩ, Ndũngĩtuĩkanĩria bũrũri wakwa, ndikoimagarithie hiũ cia mbaara ngũũkĩrĩre.
• 19. Nacio ciana cia Isiraeli ikĩmwĩra atĩrĩ, Tũkũgera o njĩra ĩrĩa nene ya gĩtwari; na rĩrĩ, tũngĩnyua maĩ makuo, niĩ mwene, o na ng’ombe ciakwa, nĩngaruta kĩrĩa mangiuma; ĩtĩkĩra ’hĩtũke, ndagũthaitha, ndĩĩhĩtũkĩre o ro ũguo na magũrũ itegwĩka kaũndũ kangĩ o na karĩkũ.
• 20. Nowe akiuga atĩrĩ, Aca, ndũngĩhĩtũka. Nao Aedomu magĩkiumagara nĩguo makahũrane mbaara nao marĩ andũ aingĩ mũno, o na me na hinya mũnene mũno.
• 21. Ũguo nĩguo Aedomu maaregire gwĩtĩkĩria Aisiraeli matuĩkanĩrie bũrũri wao; tondũ ũcio Aisiraeli makĩgarũrũka, magĩtigana nao.
• 22. Nao magĩkĩgwata rũgendo moimĩte hau Kadeshi; nacio ciana cia Isiraeli, naguo ũguo nĩ ta kuuga kĩrĩndĩ kĩu gĩothe, igĩgĩkinya kĩrĩma-inĩ kĩa Horu.
• 23. Nake Jehova akĩarĩria Musa na Haruni kĩrĩma-inĩ kĩu kĩa Horu, mũhaka-inĩ wa bũrũri ũcio wa Edomu, akiuga atĩrĩ,
• 24. Rĩu nĩ hĩndĩ Haruni egũturanĩrũo na andũ ao arĩa maanakua; nĩ ũndũ ndagatonya bũrũri ũcio ’heete ciana cia Isiraeli, nĩ gũkorũo nĩmwanemire mũkĩrega kũigua ũhoro wakwa o kũu maĩ-inĩ ma Meriba.
• 25. Ta kĩoe Haruni na Eleazaru mũrũwe, ũmatware kĩrĩma-inĩ kĩa Horu igũrũ;
• 26. ũcoke ũcume Haruni nguo ciake, ũcihumbe Eleazaru, mũrũwe; tondũ Haruni nĩegũturanĩrũo na andũ ao arĩa maanakua, agĩkuĩre o ro kuo.
• 27. Nake Musa agĩĩka o ta ũrĩa Jehova aamwathire, magĩkĩambata kĩrĩma-inĩ kĩu kĩa Horu, makĩonagwo nĩ kĩrĩndĩ kĩu gĩothe.
• 28. Musa agĩgĩcuma Haruni nguo ciake, agĩcihumba Eleazaru mũrũwe, nake Haruni agĩgĩkuĩra kũu kĩrĩma igũrũ; nao Musa na Eleazaru magĩikũrũka makiuma kũu kĩrĩma-inĩ.
• 29. Na rĩrĩ, rĩrĩa kĩrĩndĩ kĩu gĩothe, naguo ũguo nĩ ta kuuga nyũmba yothe ya Isiraeli, kĩonire atĩ Haruni nĩakuĩte, gĩkĩmũrĩrĩra matukũ mĩrongo ĩtatũ.

Home