Go Back

Ndari Chapter 16

• 1. NA RIRI, Kora wa Iziharu, mũrũ wa Kohathu, ũrĩa warĩ mũrũ wa Lawii, marĩ hamwe na ariũ amwe a Reubeni, nao nĩo Dathinĩ na Abiramu, ariũ a Eliabu, na Oni wa Pelethu, makĩoya andũ
• 2. magĩgĩũkĩra magĩthiĩ harĩ Musa, marĩ na andũ amwe angĩ a ciana cia Isiraeli, nao maarĩ andũ magana merĩ ma mĩrongo ĩtano anene a kĩrĩndĩ kĩu, arĩa maatuĩtwo athuri a kĩama, nao maarĩ andũ me igweta;
• 3. magĩĩcokanĩrĩria hamwe mokĩrĩre Musa na Haruni, magĩkĩmera atĩrĩ, Inyuĩ nĩmwĩĩkĩrĩire mũno, kuona atĩ kĩrĩndĩ gĩkĩ gĩothe nĩ kĩamũre, mũndũ o mũndũ, nake Jehova arĩ hamwe nakĩo nĩ kĩ gĩgĩtũmaga mwĩtũũgĩrie mũgetua anene a ũũngano ũyũ wa Jehova?
• 4. Nake Musa, aaigua maũndũ macio, akĩĩgũithia, agĩturumithia ũthiũ thĩ;
• 5. agĩkĩarĩria Kora, na gĩkundi kĩu gĩothe kĩarĩ hamwe nake, akĩmera atĩrĩ, Rũciũ rũcinĩ nĩguo Jehova ekũroka kuonania andũ ake kũna, na onanie ũrĩa mwamũre, atũme amũkuhĩhĩrie; o mũndũ ũrĩa agathura-rĩ, ũcio nĩwe agatũma amũkuhĩhĩrie.
• 6. Atĩrĩrĩ, wee Kora, na inyuĩ a gĩkundi gĩake gĩothe, ĩkai ũũ: wĩoerei ngĩo cia gũcina ũbumba,
• 7. mũciĩkĩre mwaki, mũroke gũciĩkĩra ũbumba igũrũ rĩacio mwĩ mbere ya Jehova; na nĩgũgatuĩka atĩrĩ, atĩ mũndũ ũrĩa Jehova agathura nĩwe ũgatuĩka mwamũre. Nĩmwĩĩkĩrĩire mũno, inyuĩ ariũ aya a Lawii.
• 8. Ningĩ Musa akĩĩra Kora atĩrĩ, Ta iguai rĩu, inyuĩ ariũ a Lawii,
• 9. anga muonete ta arĩ ũndũ mũnyinyi mũno, ũguo Ngai aamwamũrire akĩmũthengia thĩinĩ wa kĩrĩndĩ kĩu gĩa Isiraeli, nĩguo amũreharehe harĩ we we mwene, mũrutage wĩra wa gĩikaro kĩu kĩa Jehova, o na mũrũgamage mbere ya kĩrĩndĩ gĩkĩ, mũgĩgĩtungatĩra;
• 10. na atĩ nĩamũreharehete harĩ we, mũrĩ hamwe na ariũ arĩa angĩ othe a ithe wanyu Lawii? Anga o naguo ũhoro wa gũtuĩka athĩnjĩri-Ngai no mũkũũcaria?
• 11. Tondũ ũcio wee mwene, na gĩkundi gĩaku gĩothe, mũũnganĩte nĩguo mũũkĩrĩre Jehova; no Haruni nĩwe ũ, atĩ nĩkĩo mũkũmũtetera mũkĩmũũkĩrĩra?
• 12. Nake Musa agĩkĩrekania atĩ Dathani na Abiramu, ariũ a Eliabu, magetwo nao makiuga atĩrĩ, Tũtiũka;
• 13. anga ũkuona ta arĩ ũndũ mũnyinyi mũno wekire ũgĩtũruta bũrũri warĩ bũthi wa iria na ũũkĩ, nĩguo ũtũũragĩre gũkũ werũ-inĩ ũyũ, na rĩu ningĩ makĩria ũkwenda gwĩtũũgĩria wĩtue mũnene witũ?
• 14. Ningĩ-rĩ, ndũkĩrĩ gũtwara wagĩtũtwarire bũrũri ũrĩa wĩ bũthi wa iria na ũũkĩ, kana ũgĩtũhe mĩgũnda ya irio, na ya mĩthabibu, ĩtuĩke iitũ kaĩ ũkwenda gũkũũra andũ aya maitho, ũkĩmahenia? Tũtigĩũka.
• 15. Musa agĩgĩtũkũyana mũno, akĩĩra Jehova atĩrĩ, Ndagũthaitha ndũgetĩkĩre kĩrĩa marĩruta; niĩ ndirĩ ndamatunya ndigiri o na ĩmwe yao, kana ngĩĩka mũndũ o na ũmwe wao ũũru.
• 16. Musa agĩkĩĩra Kora atĩrĩ, Roka gũkorũo mbere ya Jehova, wee mwene, mwĩ na kĩrĩndĩ gĩaku gĩothe; ũũke wee mwene, na kĩrĩndĩ kĩu gĩũke, o na Haruni nake oke;
• 17. na rĩrĩ, mũndũ o mũndũ nĩakoya rũgĩo rũake, na arũĩkĩre ũbumba igũrũ rĩaruo, mũcoke mũrehe mũndũ o mũndũ rũgĩo rũu rũake mbere ya Jehova, naguo ũguo nĩ ta kuuga ngĩo magana merĩ ma mĩrongo ĩtano; na ningĩ wee mwene na Haruni o mũndũ akorũo na rũgĩo rũake.
• 18. Nao mũndũ o mũndũ agĩkĩoya rũgĩo rũake, magĩciĩkĩra mwaki, magĩcoka makĩigĩrĩra ũbumba igũrũ, magĩthi makĩrũgama mũromo-inĩ wa hema-ya-gũtũnganwo, marĩ hamwe na Musa, o na Haruni.
• 19. Ningĩ Kora agĩgĩcokanĩrĩria kĩrĩndĩ gĩothe o hau mũromo-inĩ wa hema-ya-gũtũnganwo nĩguo kĩmokĩrĩre; naguo riri wa Jehova ũkiumĩrĩra kĩrĩndĩ kĩu gĩothe.
• 20. Nake Jehova agĩkĩarĩria Musa na Haruni, akĩmera atĩrĩ,
• 21. Eherai kĩrĩndĩ-inĩ gĩkĩ nĩ getha ndĩkĩnine o kahinda kanini.
• 22. Nao makĩĩgũithia magĩturumithia mothiũ mao thĩ, makiuga atĩrĩ, Wee Ngai, o Ngai wa maroho ma andũ othe, githĩ mũndũ ũmwe angĩkĩĩhia wakĩrakarĩra kĩrĩndĩ gĩothe?
• 23. Jehova agĩkĩĩra Musa atĩrĩ,
• 24. Aria na kĩrĩndĩ gĩkĩ gĩothe ũkĩĩre ũũ: Ũkĩrai mwehere hau gĩikaro-inĩ gĩa Kora, na Dathani, o na Abiramu.
• 25. Nake Musa agĩũkĩra agĩthiĩ he Dathani na Abiramu nao athuri a Isiraeli makĩmũrũmĩrĩra.
• 26. Agĩkĩaria na kĩrĩndĩ kĩu gĩothe, agĩkĩĩra atĩrĩ, Ndamũthaitha mũthiĩ mwehere haha hema-inĩ cia andũ aya aaganu, na mũtikanahutie kĩndũ o na kĩmwe kĩao, nĩ getha mũtikaninanĩrio nao nĩ ũndũ wa mehia mao mothe.
• 27. Tondũ ũcio magĩkĩehera makiuma mĩena-inĩ yothe ya gĩikaro kĩu gĩa Kora, na Dathani, na Abiramu nao Dathani na Abiramu makiuma nja, makĩrũgama mũromo-inĩ wa hema ciao, marĩ na atumia ao, na ariũ ao, o na twana twao.
• 28. Nake Musa akiuga atĩrĩ, Ũndũ ũyũ nĩguo ũkũmũmenyithia atĩ Jehova nĩwe wandekirie ndute mawĩra maya mothe; nĩ gũkorũo ndimarutĩte na mwĩĩro wa ngoro yakwa niĩ mwene.
• 29. Andũ aya mangĩkorũo megũkua gĩkuũ o ta kĩrĩa kĩa ndũire gĩkoniĩ andũ othe, kana makorũo megũkinyĩrio maũndũ o ta marĩa ma ndũire makinyagĩra andũ othe-rĩ, menyai atĩ Jehova ndandekirie.
• 30. No rĩrĩ, Jehova angĩkorũo nĩ gwĩka egwĩka ũndũ ũngĩ mwerũ ũtarĩ wa ndũire, na kuonwo thĩ yathamĩtie kanua kayo, nayo ĩmamerie morĩre, marĩ hamwe na indo ciothe iria me nacio, marike irima marĩ muoyo o ro ũguo-rĩ, nĩguo mũrĩmenya atĩ andũ aya nĩ Jehova mamenete.
• 31. Na gũgĩkinya atĩrĩ, atĩ aarĩkia kwaria ũhoro ũcio wothe, thĩ ĩgĩgĩatũka o hau maakinyĩte,
• 32. nayo thĩ kahinda o kau ĩgĩgĩathamia kanua kayo, ĩkĩmameria, makĩũrĩra, marĩ hamwe na andũ ao othe, o na arĩa othe a nyũmba ya Kora, na indo ciao ciothe iria maarĩ nacio.
• 33. Andũ acio me na arĩa angĩ othe a nyũmba ciao, magĩkĩrika irima marĩ muoyo o ro ũguo nayo thĩ ĩkĩmathika, magĩkĩninwo, magĩthengio kĩrĩndĩ-inĩ kĩu.
• 34. Nao Aisiraeli othe arĩa maamarigicĩirie na mĩena yothe, makĩũra maaigua kĩrĩro kĩao; tondũ moigire atĩrĩ, Tũtikae kũmerio nĩ thĩ o na ithuĩ.
• 35. Naguo mwaki ũgĩkiuma he Jehova, ũgĩcina andũ acio magana merĩ ma mĩrongo ĩtano maacinĩte ũbumba wa igongona.
• 36. Ningĩ Jehova agĩkĩarĩria Musa, akĩmwĩra atĩrĩ,
• 37. Aria na Eleazaru wa Haruni, mũthĩnjĩri-Ngai, ũmwĩre oe ngĩo icio cia gũcinĩrũo ũbumba acirute hau hacinanĩirũo, nawe ũcoke ũhurunje mwaki wacio haraya, nĩ gũkorũo ngĩo icio nĩ nyamũre,
• 38. o ngĩo icio cia ehia acio monũhĩte mĩoyo yao o ene; nacio iturũo ithondekwo ithuma cia kũhumbaga kĩgongona; nĩ ũndũ nĩmaacitwarĩte mbere ya Jehova, na tondũ ũcio nĩ nyamũre; nacio igũtuĩka kĩmenyithia harĩ ciana cia Isiraeli.
• 39. Nake Eleazaru ũcio mũthĩnjĩri-Ngai agĩkĩoya ngĩo icio cia gĩcango, o icio cia gũcinĩrũo ũbumba, iria andũ acio maacinirũo maatwarĩte mbere ya Jehova; igĩgĩturũo igĩthondekwo ithuma cia kũhumbaga kĩgongona;
• 40. nĩ getha iririkanagie ciana cia Isiraeli atĩ mũndũ o na ũrĩkũ wa nyũmba ĩngĩ, ũtarĩ wa rũciaro rũa Haruni, ndakanathengerere hau mbere ya Jehova amũcinĩre ũbumba; ndagaikare ta Kora na gĩkundi gĩake. Eleazaru agĩgĩĩka o ta ũguo Jehova erire Musa gwĩkwo.
• 41. No rĩrĩ, kĩrĩndĩ gĩothe gĩa ciana cia Isiraeli gĩkĩroka gũtetera Musa, na Haruni, gĩkĩmera atĩrĩ, Nĩ inyuĩ mũũragĩte andũ a Jehova.
• 42. Na gũgĩkinya atĩrĩ, atĩ rĩrĩa kĩrĩndĩ kĩu gĩothe kĩagomanĩte gĩũkĩrĩre Musa na Haruni, gĩkĩrora na kũrĩa hema-ya-gũtũnganwo yaakĩtwo; na atĩrĩrĩ, gũkĩonwo atĩ nĩĩhumbĩtwo nĩ itu, naguo riri wa Jehova ũkĩonwo ho.
• 43. Nao Musa na Haruni magĩgĩthiĩ magĩkinya o hau mbere ya hema-ya-gũtũnganwo.
• 44. Nake Jehova agĩkĩarĩria Musa, akĩmwĩra atĩrĩ,
• 45. Ũkĩrai mwehere kĩrĩndĩ-inĩ gĩkĩ nĩ getha ndĩkĩnine o kahinda kanini. Magĩkĩĩgũithia, magĩturumithia mothiũ mao thĩ.
• 46. Nake Musa agĩkĩĩra Haruni atĩrĩ, Oya rũgĩo rũaku rũa gũcinĩra ũbumba, ũrute mwaki wa kĩgongona ũwĩkĩre igũrũ rĩaruo, na wĩkĩre ũbumba igũrũ rĩaguo, ũcoke ũkuue rũgĩo rũu ũthiĩ narua kĩrĩndĩ-inĩ kĩu, ũkĩhoroherie; nĩ gũkorũo nĩharĩ marakara moimĩte kwĩ Jehova, na nĩhaitĩkĩte kũgĩa mũthiro mũnene.
• 47. Nake Haruni akĩoya rũgĩo rũu rũake o ta ũguo Musa oigĩte, agĩteng’era, agĩtonya kĩrĩndĩ-inĩ kĩu agĩgĩkora atĩ ti-itherũ mũthiro nĩwambĩrĩirie kũnina andũ; agĩgĩĩkĩra ũbumba igũrũ rĩa mwaki, akĩhoroheria andũ acio.
• 48. Nake agĩkĩrũgama gatagatĩ-inĩ ka andũ arĩa makuĩte na arĩa me muoyo; naguo mũthiro ũcio ũkĩninwo.
• 49. Nao andũ arĩa maakuire nĩ ũndũ wa mũthiro ũcio maarĩ ngiri ikũmi na inya, na magana mũgwanja, thengia arĩa maakuire nĩ ũndũ wa ũndũ ũcio wekĩtwo nĩ Kora.
• 50. Nake Haruni agĩgĩcoka he Musa mũromo-inĩ wa hema-ĩo-ya-gũtũnganwo; naguo mũthiro ũcio ũgĩkĩninwo.

Home