Go Back

Ndari Chapter 12

• 1. Nao Miriamu na Haruni magĩtetera Musa, nĩ ũndũ wa mũka ũrĩa aahikĩtie Mũkushi; nĩ gũkorũo mũka ũcio aahikĩtie aarĩ Mũkushi.
• 2. Magĩkiuga atĩrĩ, Anga ti-itherũ Jehova akĩaragia o na Musa wiki? Githĩ o na ithuĩ ndaatwarĩirie? Nake Jehova akĩigua ndeto icio.
• 3. Na rĩrĩ, mũndũ ũcio ti Musa aarĩ mũhoreri mũno gũkĩra andũ othe arĩa marĩ gũkũ thĩ guothe.
• 4. Jehova agĩkĩarĩria Musa na ihenya, me na Haruni o na Miriamu, materĩgĩrĩire, akĩmera atĩrĩ, Inyuĩ atatũ umai mũũke haha hema-inĩ-ya-gũtũnganwo. Magĩgĩthiĩ ho.
• 5. Nake Jehova agĩikũrũka arĩ gĩtugĩ-inĩ gĩa itu akĩrũgama mũromo-inĩ wa Hema ĩo, agĩĩta Haruni na Miriamu; nao erĩ magĩthiathia harĩ we.
• 6. Agĩkĩmera atĩrĩ, Rĩu ta iguai ũhoro wakwa ũrĩa ngũmwĩra. Hangĩkorũo nĩharĩ mũnabii thĩinĩ wanyu-rĩ, niĩ Jehova, niĩ mwene, nĩ niĩ ngemenyithagia harĩ we na ũndũ wa kũmuonia maũndũ arĩ toro, na ndĩmwarĩrie na kĩroto.
• 7. No rĩrĩ, ũhoro wa Musa ndungata yakwa ndũtariĩ ũguo; ũcio nĩ mwĩhokeku mũno thĩinĩ wa nyũmba ya andũ akwa othe;
• 8. ũcio-rĩ, njaragia nake tũgĩcokanagĩria na tũnua mohoro mataũku, na ndimwaragĩria na thimo; na nĩwe wonaga ũrĩa Jehova atariĩ: kuona nĩ ũguo-rĩ, nĩ kĩ gĩakĩgiririe mwĩtigĩre gũteta nĩ ũndũ wa ndungata ĩno yakwa ti Musa?
• 9. Jehova agĩgĩakanwo nĩ marakara nĩ ũndũ wao; nake agĩgĩĩthiĩra.
• 10. Narĩo ĩtu rĩkĩĩyoya na igũrũ rĩkĩehera Hema-inĩ ĩo; na atĩrĩrĩ, Miriamu agĩkĩonwo oimirĩirũo nĩ mangũ, akerũha o ta ira; nake Haruni agĩkĩrora Miriamu akĩona atĩ nĩagwatĩtwo nĩ mangũ.
• 11. Haruni agĩkĩĩra Musa atĩrĩ, He! mwathi wakwa, ndagũthaitha ndũgatũme tũgwatwo nĩ wĩhia ũcio nĩ ũndũ wa ũguo twĩkĩte ũndũ wa ũkĩgu, o na tondũ wa ũguo twĩhĩtie.
• 12. Ndagũthaitha ndũkareke atuĩke ta kĩimba, kana ta mũndũ kĩũgũ woimire nda ya nyina e kĩũgũ.
• 13. Nake Musa agĩkaĩra Jehova, akiuga atĩrĩ, Ngai, ndagũthaitha ũmũhonie.
• 14. Nake Jehova akĩĩra Musa atĩrĩ, Korũo ithe nĩaamũtuĩrĩire mata ũthiũ arakarĩte-rĩ, githĩ ndangĩaikarire e mũconoku matukũ mũgwanja? Rekei ahingĩrũo na kũu gĩthaka-inĩ mbarĩ ĩrĩa ĩngĩ ya kĩraaro matukũ mũgwanja, na thutha wa ũguo agacoka ainũkio.
• 15. Miriamu agĩkĩhingĩrũo na kũu gĩthaka-inĩ mbarĩ ĩrĩa ĩngĩ ya kĩraaro mĩthenya mũgwanja; nao andũ acio angĩ matiigana kũgwata rũgendo o nginya rĩrĩa Miriamu aainũkirio.
• 16. Thutha wa ũguo andũ makĩgwata rũgendo rũao moimĩte Hazerothu, magĩthiĩ makĩamba hema ciao o werũ-inĩ wa Parani.

Home