Go Back

Ndari Chapter 11

• 1. Nao andũ acio a Isiraeli magĩikara ta megũteta, makaaragia maũndũ moru makĩiguagwo nĩ Jehova; na rĩrĩa Jehova aaiguire maũndũ macio agĩakanwo nĩ marakara; naguo mwaki wa Jehova ũgĩcinĩra andũ o hau maarĩ, ũgĩitĩka kũninana ndere-inĩ cia kĩraaro.
• 2. Nao andũ acio magĩgĩkaĩra Musa, nake Musa agĩkĩhoya Jehova, naguo mwaki ũcio ũgĩtuĩkatuĩka.
• 3. Naho handũ hau hagĩtuwo Tabera; nĩ ũndũ mwaki wa Jehova nĩwaakanire kũu thĩinĩ wao.
• 4. Nakĩo kĩrĩndĩ kĩrĩa kĩarũmanĩrĩire nao gĩkĩgwatwo nĩ thuti ya nyama; o nacio ciana cia Isiraeli igĩcoka kũrĩra, ikiuga atĩrĩ, Tũkũheo nyama nũ tũrĩe?
• 5. Nĩtũkũririkana ciũngũyũ iria twarĩaga o ro ũguo tũhũ kũu Misiri; na marenge ma mĩthemba mĩthemba, na itũngũrũ cia ndũire, na itũngũrũ iria ndungu, o na itũngũrũ thumu;
• 6. no rĩrĩ, rĩu ngoro ciitũ nĩikũigua ta ciũrĩtwo nĩ hinya na gũkũ gũtirĩ kĩndũ o na kĩ; na gũtirĩ kĩndũ kĩngĩ tũcũthĩrĩirie tiga o mana maya moiki.
• 7. Na rĩrĩ, mana macio maatariĩ ta mbeũ cia mũtĩ ũrĩa wĩtagwo korianda, na mũhianĩre wamo watariĩ ta bedola.
• 8. Nao andũ magacangacangaga, makamongania makamathĩa na ithĩi, kana makamahũrĩra ndĩrĩ-inĩ na mĩũthĩ; magacoka kũmaruga na nyũngũ, makamathondeka mĩgate; na mũcamo wamo watariĩ ta wa maguta ma mũthondekano.
• 9. Na rĩrĩ, hĩndĩ ĩrĩa kwagĩa ireera ũtukũ kũndũ kũrĩa ciana cia Isiraeli ciambĩte hema ciacio-rĩ, mana o namo makarehane narĩo.
• 10. Nake Musa akĩigua andũ makĩrĩra, o mũndũ akĩrĩrĩra mũromo-inĩ wa hema yake, o ta ũrĩa nyũmba ciao ciatariĩ; nake Jehova agĩakanwo nĩ marakara mũno; nake Musa akĩona ũhoro ũcio wĩ mũũru.
• 11. Musa agĩkĩĩra Jehova atĩrĩ, Nĩ kĩ gĩtũmĩte ũnjĩke ũũru niĩ, ndungata yaku? Ningĩ nĩ kĩ gĩtũmĩte njage gwĩtĩkĩrĩka nĩwe, kuona atĩ nĩũnjigĩrĩire mũrigo ũyũ mũnene ũũ wa kũrora andũ aya othe?
• 12. Kaĩ arĩ niĩ ndagĩtũmire andũ aya othe magĩwo mahu nĩ manyina mao? Kana hihi nĩ niĩ ndakĩmaciarire, atĩ nĩkĩo ũnjĩrĩte ũũ: Kuua andũ aya ũmekĩrĩte gĩthũri-inĩ gĩaku, o ta ũrĩa mũreri wa kaana akuuaga rũkenge, nĩguo ndĩmakinyie bũrũri ũrĩa werĩire maithe mao na mwĩhĩtwa atĩ nĩũkamahe?
• 13. Kaĩ ngũkĩruta nyama kũ cia kũhe andũ aya othe? Nĩ ũndũ marandĩrĩra makiugaga atĩrĩ, Tũhe nyama tũrĩe.
• 14. Ndingĩhota gũkirĩrĩria ũhoro wa andũ aya othe ndĩ nyiki, nĩ ũndũ mahaana ta mũrigo nditikĩte ũkangĩra.
• 15. Na kũngĩkorũo ũguo nĩguo ũkũnjĩka-rĩ, kiumanie na kũnjũraga njehere, ndagũthaitha, ingĩkorũo nĩnjĩtĩkĩrĩkĩte nĩwe; nĩ getha ndige kuona ngĩrĩa thĩna ũyũ ndĩ naguo.
• 16. Nake Jehova agĩkĩĩra Musa atĩrĩ, Cokanĩrĩria athuri mĩrongo mũgwanja a Isiraeli moke harĩ niĩ, o arĩa ũkũmenya wega atĩ nĩo athuri thĩinĩ wao, na ningĩ no-o anene ao, ũmatware hema-inĩ-ya-gũtũnganwo, makarũgame ho mwĩ nao.
• 17. Niĩ na niĩ njikũrũke njũke njarĩrie nawe ho; na njoke ngae hinya ũmwe wa roho ũrĩa ũrĩ naguo, ndĩmahe; nao matuĩke akuui a mũrigo ũcio mũritũ wa kũrora andũ aya mwĩ hamwe nao, nĩ getha ũtige kũũkuua wĩ wiki.
• 18. Ningĩ ĩra andũ atĩrĩ, Wĩtheriei mũkehaarĩria mũthenya wa rũciũ, mũheo nyama; nĩ ũndũ mũrĩrĩte mũkĩiguagwo nĩ Jehova mũkoiga atĩrĩ, Tũkũheo nyama nũ, tũrĩe? Nĩ ũndũ-rĩ, maũndũ maitũ maarĩ mega hĩndĩ ĩrĩa twarĩ Misiri. Tondũ ũcio Jehova nĩekũmũhe nyama, na nĩmũkũrĩa.
• 19. Na rĩrĩ, mũtigũcirĩa mũthenya ũmwe, kana ĩĩrĩ, kana ĩtano, kana ikũmi, kana mĩrongo ĩĩrĩ;
• 20. no mũgũcirĩa mweri mũgima, o nginya imuume na maniũrũ, imũnyikie; na gũgũtuĩka ũguo nĩ ũndũ nĩmũregete Jehova ũrĩa wĩ hamwe na inyuĩ mũkamũmena, mũkarĩra mũkĩiguagwo nĩwe, mũkoiga atĩrĩ, Twakiumire bũrũri wa Misiri nĩkĩ?
• 21. Musa agĩgĩcokia atĩrĩ, Andũ aya twĩ nao nĩ ngiri magana matandatũ mekũhota gwĩtwara na magũrũ; nawe uugĩte atĩrĩ, Ngũmahe nyama macirĩe mweri mũgima.
• 22. Hĩ! Rĩu-rĩ, nĩ ndũru cia mbũri, na cia ng’ombe megũgĩthĩnjĩrũo hihi, nĩguo imaiganie? Kana nĩ ciũngũyũ ciothe cia iria rĩrĩa inene mekũũnganĩrio nĩguo imaiganie?
• 23. Nake Jehova agĩkĩũria Musa atĩrĩ, Anga hinya wa guoko kwa Jehova nĩũkĩnyihĩte? Rĩu nĩũgũkĩona kana kiugo kĩrĩa ngwĩrĩte nĩgĩkahingio, kana gĩtikahingio.
• 24. Nake Musa agĩkiuma nja, akĩhe andũ ũhoro ũrĩa warĩtio nĩ Jehova; agĩgĩthura athuri mĩrongo mũgwanja thĩinĩ wa andũ acio, mongane harĩ we, agĩkĩmarũgamia marigicĩirie Hema ĩo.
• 25. Jehova agĩgĩikũrũka arĩ thĩinĩ wa itu, akĩaria nake, akĩgaya hinya ũmwe wa roho ũrĩa aarĩ naguo akĩũhe athuri acio mĩrongo mũgwanja; na gũgĩkinya atĩrĩ, atĩ hinya ũcio wa roho wake wagĩa hamwe nao, makĩratha mohoro, no matiacokire gwĩka ũguo hĩndĩ ĩngĩ.
• 26. No rĩrĩ, nĩhaatigarire andũ erĩ maaikarĩte kĩraaro-inĩ, nao ũmwe etagwo Elidadi, na ũrĩa ũngĩ Medadi, naguo hinya ũcio wa roho wa Musa ũkĩgĩa nao, nao maarĩ a gĩkundi-inĩ gĩa acio maandĩkĩtwo, no rĩrĩ, matiathiĩte Hema-inĩ ĩo; nao andũ acio makĩratha mohoro maikarĩte o ro kũu kĩraaro-inĩ.
• 27. Hagĩgĩteng’era mwanake ũmwe, akĩĩra Musa atĩrĩ, Elidadi na Medadi nĩmararatha mohoro marĩ o kũu kĩraaro-inĩ.
• 28. Nake Joshua wa Nuni, ũrĩa watungatagĩra Musa gwata o rĩrĩa aarĩ mũnyinyi, agĩcokia ũhoro akiuga atĩrĩ, Mwathani wakwa Musa, makaanie.
• 29. Nake Musa agĩkĩmwĩra atĩrĩ, Kaĩ ũkũmaiguĩra ũiru nĩ ũndũ wakwa? Niĩ-rĩ, ndenda makĩria korũo andũ othe a Jehova nĩ anabii na amahe hinya wa roho wake!
• 30. Nake Musa, marĩ na athuri acio a Isiraeli, magĩcoka kĩraaro-inĩ.
• 31. Naruo rũhuho rũrehetwo nĩ Jehova rũkĩhurutana kuo; rũkĩrehe tũmakia-arũme tuumĩte iria-inĩ, rũgĩtũgũithia tũkĩũmba handũ ta ha rũgendo rũa mũthenya mũgima mbarĩ ĩno ya kĩraaro, o na ta ha rũgendo rũa mũthenya mũgima mbarĩ ĩrĩa ĩngĩ yakĩo, tũgĩkĩrigicĩria mbarĩ ciothe; na harĩa twakinyĩte na igũrũ nĩ ta mĩkono ĩĩrĩ kuuma thĩ.
• 32. Nao andũ magĩgĩũkĩra, magĩthiĩ, magĩtinda mũthenya mũgima, na makĩraara ũtukũ wothe wa mũthenya ũcio, na magĩtinda mũthenya ũyũ ũngĩ wothe, makĩũngania tũmakia-arũme tũu; na rĩrĩ, mũndũ ũrĩa wonganĩtie akanyihia kũrĩ arĩa angĩ othe-rĩ, onganirie ta marebe magana merĩ; nao magĩtwĩanĩkĩra, magĩtũtandaiya tuothe mbarĩ ciothe cia kĩraaro.
• 33. Na rĩrĩ, hĩndĩ ĩrĩa maakorirũo me na nyama ciatuo kanua magego-inĩ, itanatanukwo-rĩ, hĩndĩ o ĩo Jehova agĩakanwo nĩ marakara nĩ ũndũ wa andũ acio, agĩkĩmahũra na ũndũ wa kũmarehithĩrie mũthiro.
• 34. Narĩo rĩĩtwa rĩa handũ hau rĩgĩtuwo Kibirothu-hataava; nĩ ũndũ nĩho haathĩkirũo arĩa maaiguĩte thuti ya nyama.
• 35. Nao andũ acio makiuma Kibirothu-hataava magĩthiĩ rũgendo, magĩkinya Hazerothu; magĩgĩikara kũu Hazerothu.

Home