Go Back

Zakaria Chapter 3

• 1. Ningĩ aracoka aranyonia Joshua, mũthĩnjĩri-Ngai ũrĩa mũnene, arũngiĩ mbere ya mũraika wa Jehova, nake Mũcukani akarũgama hau guoko-inĩ gwake kwa ũrĩo nĩ getha amũgendere.
• 2. Nake Jehova arera Mũcukani atĩrĩ, Ũrokũmwo nĩ Jehova, wee Mũcukani ũyũ; ĩĩ, ti-itherũ Jehova ũrĩa wethũrĩire Jerusalemu arogũkũma! Githĩ mũndũ ũyũ tiwe gĩcinga gĩkũũrĩtwo mwaki-inĩ?
• 3. Na rĩrĩ, Joshua ũcio arehumbĩte nguo irĩ magigi, agakĩrũgama hau mbere ya mũraika.
• 4. Nake mũraika ũcio arakĩarĩria andũ arĩa marũngiĩ mbere yake, aramera atĩrĩ, Mwaũrei nguo icio ii magigi; ningĩ aracoka arera Joshua atĩrĩ, One, nĩndũmĩte ũthirũo nĩ waganu waku, na nĩngũkũhumba nguo horo, o iria igemetio mũno.
• 5. Ningĩ aroiga atĩrĩ, Rekei mamwĩkĩre kĩremba kĩega mũtwe, nao marakĩmwĩkĩra kĩremba kĩega mũtwe na maramũhumba nguo mwĩrĩ; nake mũraika ũcio wa Jehova areroragĩra ũhoro ũcio wothe arũngiĩ ho.
• 6. Nake mũraika ũcio wa Jehova arakĩgwata gũtaara Joshua, aramwĩra atĩrĩ,
• 7. Jehova Mũnene wa Ita ekuuga ũũ: Atĩrĩrĩ, wee-rĩ, ũngĩĩtĩkĩra gũthiaga ũrũmĩrĩire kĩrĩra gĩakwa, na ũmenyagĩrĩre maathani makwa, ndũrĩ hingo ũtagaathana nyũmba-inĩ yakwa, na ũmenyagĩrĩre nja cia nyũmba yakwa, na niĩ ngwĩtĩkĩrie mũtwaranage na andũ aya marũngiĩ haha.
• 8. Ta thikĩrĩria wega rĩu, wee Joshua mũthĩnjĩri-Ngai ũrĩa mũnene, wee mwene o na andũ a thiritũ yaku arĩa mũikaranagia hamwe nao, tondũ nĩo matariĩ ta imenyithania cia ũrĩa gũgatuĩka; tondũ-rĩ, nĩngarehithie mũtungati wakwa, na nĩwe ũgetagwo Thuuna.
• 9. Ningĩ rorai mũbare wega ihiga rĩrĩa rĩigĩtwo mbere ya Joshua, tondũ ihiga rĩu rĩmwe rĩkũhenia ta rĩgĩĩte na maitho mũgwanja; na nĩ niĩ ngarĩacũhia o ta ũrĩa rĩagĩrĩire gwacũhio, o naguo waganu wa bũrũri ũyũ ndĩũthengie mũthenya o ro ũmwe; ũguo nĩguo Jehova Mũnene wa Ita ekuuga.
• 10. Atĩrĩrĩ, mũthenya ũcio wakinya-rĩ, nĩmukagwatana ũgeni, o mũndũ na mũndũ ũrĩa ũngĩ, na mũikaranie hamwe mũthabibu-inĩ o na mũkũyũ-inĩ. Ũguo nĩguo Jehova Mũnene wa Ita ekuuga.

Home