Go Back

Zakaria Chapter 14

• 1. Atĩrĩrĩ, mũthenya wa Jehova ndũrĩ hingo ũtagoka, o hĩndĩ ĩrĩa andũ makegwatĩra indo ciaku iria ũtahĩtwo macigayanĩre o gũkũ thĩinĩ waku.
• 2. Nĩ ũndũ nĩngongania ndũrĩrĩ ciothe ciũkĩrĩre Jerusalemu ihũrane mbaara narĩo; narĩo itũũra rĩrĩ rĩĩgwatĩrũo nĩ thũ, o na nyũmba ciarĩo ihokorũo indo ciothe iria irĩ thĩinĩ wacio, o nao andũ-a-nja akuo magwatwo na hinya; nao andũ a itũũra rĩrĩ matahwo nuthu ĩmwe, no rĩrĩ, matigari ma andũ akuo matikaninũkĩrĩrio itũũra-inĩ.
• 3. Hĩndĩ ĩo Jehova nĩ kuuma akoimagara arũe mbaara na ndũrĩrĩ icio, o ta ũrĩa aarũire mbaara nacio tene hĩndĩ ya mbaara.
• 4. Naguo mũthenya ũcio-rĩ, nĩakehanda arũgamĩte Kĩrĩma-inĩ kĩa Mĩtamaiyũ, kĩrĩa kĩng’etheire Jerusalemu mwena wa irathĩro, nakĩo Kĩrĩma kĩu kĩa Mĩtamaiyũ gĩatũkane na gatagatĩ kuuma o mwena wa irathĩro nginya mwena wa ithũĩro, naho hau gatagatĩ-inĩ gakĩo hagĩe mũriko mũnene ma; naguo mwena ũmwe wa kĩrĩma kĩu ũmomoke ũrorete gathigathini, o naguo mwena ũrĩa ũngĩ wakĩo ũmomoke ũrorete gũthini.
• 5. Na inyuĩ nĩmũkorĩra mũriko-inĩ ũcio wa irĩma ciakwa; nĩ ũndũ-rĩ, mũriko ũcio wa irĩma ciakwa ũgakinya o Azeli; ĩĩ, ti-itherũ nĩ kũũra mũkora o ta ũrĩa mworire mũkĩeherera gĩthingithia gĩa thĩ matukũ ma Uzia, mũthamaki wa Juda; nake Jehova Ngai wakwa nĩagacoka oke, marehanĩte na andũ arĩa othe atheru.
• 6. Na nĩgũgakinya atĩrĩ, mũthenya ũcio, atĩ gũtikaara wega, no gũtinde gũthimbĩte;
• 7. naguo nĩũgekũũrana na mĩthenya ĩrĩa ĩngĩ, naguo ũmenyeke nĩ Jehova ũrĩa ũhaana, gũtuĩke atĩ gũtirĩ mũthenya kana ũtukũ; no gũgakinya atĩrĩ, atĩ hwaĩ-inĩ wakinya nĩgũkagĩa ũtheri.
• 8. O na ningĩ gũkinye atĩrĩ, mũthenya ũcio, atĩ maĩ ma muoyo matherere moimĩte Jerusalemu, mamwe mamo maikũrũke marorete iria-inĩ rĩa mwena wa irathĩro, o namo marĩa mangĩ matherere marorete iria-inĩ rĩa mwena wa ithũĩro; namo magakoragwo o ro kuo hĩndĩ ya ũrugarĩ o na hĩndĩ ya heho.
• 9. Nake Jehova nĩwe ũgatuĩka mũthamaki wa gũthamaka thĩ yothe, amu mũthenya ũcio-rĩ, Jehova we wiki nowe ũgatuĩka Ngai ũrĩa ũmwe, na athaithagwo akĩgwetagwo na rĩĩtwa rĩu rĩmwe rĩake.
• 10. Naguo bũrũri ũcio wothe ũkaaraganio o ta werũ wa kũu Araba, ũrutĩtio o Geba ũgakinyio o Rimoni mwena wa gũthini wa Jerusalemu; narĩo itũũra rĩu rĩtũũgĩrio mũno, rĩĩikarie handũ harĩo kĩũmbe kuuma o Kĩhingo-inĩ kĩa Benjamini o nginya Kĩhingo-inĩ Kĩrĩa gĩa Tene, o na nginya Kĩhingo gĩa Koine-inĩ, o na ningĩ kuuma mũthiringo-inĩ wa nyũmba ĩrĩa ndaya na igũrũ ya Hananeli, nginya o ihihĩro-inĩ cia ndibei iria cia mũthamaki.
• 11. Narĩo rĩgaikara rĩtũũrĩtwo nĩ andũ, na gũtigacoka kũgĩa kĩrumi o na atĩa; no rĩrĩ, Jerusalemu rĩgaikara rĩgaacĩire.
• 12. Namo matũhũhũ marĩa Jehova akahũra ndũrĩrĩ ciothe iria cianahũrana ita na Jerusalemu namo-rĩ, nĩmo maya; nĩ kũrĩĩka makarĩĩka mĩĩrĩ ĩthire, marũngiĩ na magũrũ mao o ro ũguo, o namo maitho mao mahingare more, mabuthĩire o marima-inĩ mamo, o nacio nĩmĩ ciao cionje irĩĩke, ithirĩre o tũnua-inĩ twao.
• 13. Na nĩgũgakinya atĩrĩ, mũthenya ũcio, atĩ Jehova nĩagacinyarira inyarira inene mũno, arĩtwarithĩtie o kũu gatagatĩ-inĩ gacio; nao andũ a cio mokanĩrĩre, mũndũ o mũndũ anyite mũndũ ũrĩa ũngĩ guoko, na aambararie guoko kũrĩa kũngĩ kũgũthe guoko kwa mũndũ ũrĩa ũngĩ.
• 14. Nao andũ a Juda makarũĩra mbaara kũu Jerusalemu; naguo ũtonga wa ndũrĩrĩ ciothe iria irĩrigicĩirie nĩũgacokanĩrĩrio hamwe, naguo nĩ wa thahabu, na betha, o na nguo nyingĩ mũno mũno.
• 15. O na ningĩ matũhũhũ o ta macio magakorerera mbarathi, o na nyũmbũ, o na ngamĩra, o na ndigiri, o na nyamũ ciothe iria igakorũo irĩ kũndũ kũu iraaro-inĩ ciao.
• 16. Na nĩgũgakinya atĩrĩ, atĩ mũndũ o mũndũ ũrĩa ũgatigara wa ndũrĩrĩ icio ciokĩte gũtharĩkĩra Jerusalemu akaambataga mwaka o mwaka athathaiye Mũthamaki, o we Jehova Mũnene wa Ita, o na arĩage gĩathĩ gĩa gwaka ithũnũ.
• 17. Na nĩgũgatuĩka atĩrĩ, atĩ mũndũ o wothe wa mbarĩ ciothe cia gũkũ thĩ ũrĩa ũtakaambata athiĩ Jerusalemu athathaiye Mũthamaki ũcio, Jehova Mũnene wa Ita-rĩ, kwao gũtikoira mbura.
• 18. Na rĩrĩ, kũngĩkorũo mũhĩrĩga wa andũ a Misiri ndũkaambata kuo, na wage gũkinya kuo-rĩ, o naguo nĩũgakorererũo nĩ matũhũhũ marĩa Jehova akahũra ndũrĩrĩ namo iria itakaambata ikarĩe gĩathĩ kĩu gĩa gwaka ithũnũ.
• 19. Ihũra rĩu nĩrĩo Amisiri makahũrũo narĩo, na norĩo rĩkahũra ndũrĩrĩ ciothe iria itakaambataga ikarĩe gĩathĩ gĩa gwaka ithũnũ.
• 20. Mũthenya ũci-rĩ, njingiri iria cia mĩkwa ya mbarathi ikaandĩkwo ũũ: ICI NĨCIAMŨRĨIRŨO JEHOVA; o nacio nyũngũ cia nyũmba ya Jehova igatuĩka o ta mbakũri iria ciigagwo mbere ya kĩgongona.
• 21. Ĩĩ, ti-itherũ nyũngũ o yothe ĩrĩa ĩrĩ kũu Jerusalemu o na Juda ĩkonagwo ta yamũrĩirũo Jehova Mũnene wa Ita, nao andũ othe arĩa mekũruta igongona nĩmagathiaga gũcioya, maruge nacio; na ningĩ matukũ-inĩ macio gũtigacoka kuoneka mwonjoria ũtonyete nyũmba ya Jehova Mũnene wa Ita.

Home