Go Back

Mika Chapter 5

• 1. O na ningĩ rĩu nĩ hĩndĩ ya kwĩyũngania ũtuĩke mbũtũ cia ita, wee mwarĩ wa mbũtũ cia ita; nĩatũrigicĩirie atũhũre; nĩ kũringa mekũringa mũciri wa Isiraeli rũthĩa na rũthanju.
• 2. No rĩrĩ, wee Bethi-lehemu Efiratha-rĩ, o na harĩa wĩ mũnyinyi mũno thĩinĩ wa mĩhĩrĩga ya Juda, gwaku nĩkuo gũkoima mũndũ igũrũ rĩakwa, na nĩwe ũgatuĩka mwathani o kũu Isiraeli; nake kĩhumo gĩake aarĩ o ho o tene na tene, o na mĩndĩ na mĩndĩ.
• 3. Tondũ ũcio kũrekereria akamarekereria, o nginya hĩndĩ ĩrĩa nyina akaamba kũrũmwo na acoke ohoke; hĩndĩ ĩo nĩguo matigari ma ariũ a ithe magacokerera ciana cia Isiraeli.
• 4. Nake nĩ kũrũgama akarũgama, arĩithie andũ ake na ũndũ wa hinya ũrĩa aheetwo nĩ Jehova ta marĩ rũũru rũa mbũri, amarĩithie na ũndũ wa mwago wa ũnene wa rĩĩtwa rĩa Jehova Ngai wake; ũguo nĩguo magatũũra megangarĩte, nĩ ũndũ hĩndĩ ĩo agakorũo atuĩtwo mũnene o nginya ituri ciothe cia thĩ.
• 5. Nake mũndũ ũcio nĩwe tũkehokera ũhoro witũ wa kũgĩa na thayũ. Na rĩrĩ, hĩndĩ ĩrĩa Mũashuri agatonya bũrũri witũ, o na hĩndĩ ĩrĩa akarangaranga nyũmba ciitũ cia ũnene thĩinĩ, nĩtũkamwarahũrĩra arĩithi mũgwanja, o na anene anana.
• 6. Nao nĩo magatũma bũrũri wa Ashuri ũkire ihooru na ũndũ wa kũwananga na rũhiũ rũa njora, o na maanange bũrũri wa Nimurodi o nginya itonyero-inĩ rĩaguo nao nĩo magatũhonokia harĩ Mũashuri, hĩndĩ ĩrĩa agoka bũrũri witũ, o na agakorũo akinyĩte mũhaka-inĩ waguo.
• 7. Nao arĩa magatigara a Jakubu magatuĩka o ta ireera riumĩte he Jehova marĩ ndũrĩrĩ-inĩ nyingĩ, o na ta mbura ya maguna-ng’ombe yurĩire nyeki, o ĩrĩa ĩtarehithagio nĩ mũndũ, o na kana ĩkoirio nĩ ariũ a andũ.
• 8. Ningĩ ũrĩa andũ acio magatigara a Jakubu magakorũo mahaana harĩ ndũrĩrĩ iria ingĩ, o ndũrĩrĩ nyingĩ mũno, nĩ ta ũrĩa mũrũthi ũhaanaga wĩ gatagatĩ-inĩ ka nyamũ cia mũtitũ-inĩ, kana ta ngatia nyanake ĩrĩ ndũru-inĩ cia ng’ondu; tondũ ĩngĩtuĩkanĩria harĩa irĩ yacirangĩrĩria thĩ na magũrũ, o na ĩcitamburange icunjĩ, nacio ciage wa gũcihonokia.
• 9. Guoko gwaku kũrohoota thũ ciaku, o nao amuku aku othe mang’ũrio mehere biũ.
• 10. Ningĩ Jehova ekuuga atĩrĩ, Mũthenya ũcio nĩgũgakinya atĩrĩ, atĩ mbarathi ciaku nĩngacinina ciehere thĩinĩ waku, o nacio ngari ciaku cia ita ndĩcitharie ndĩcinine;
• 11. o namo matũũra ma bũrũri waku ndĩmamomore mathire biũ, nacio ihingo ciaku ciothe cia hinya ndĩcitharie igũe thĩ.
• 12. Ningĩ nĩnganina ũrogi ndĩũrute guoko-inĩ gwaku, na gwaku gũticoke kũgĩa aragũri o na rĩ;
• 13. o na ningĩ mĩhianano yaku ya gwacũhio ndĩmĩnine yehere, o nacio itugĩ cia kũhoyũo cieherio thĩinĩ waku, nawe ndũgacoka kũinamĩrĩra atĩ nĩguo ũhoe indo iria ũthondekete na moko maku;
• 14. o namo Maashera maku ndĩmamunye mehere thĩinĩ waku, namo matũũra maku ndĩmaninithie biũ.
• 15. Na nĩngerĩhĩria na marakara o na mathũgũta harĩ ndũrĩrĩ iria itarĩ mbuguĩro.

Home