Go Back

Mika Chapter 3

• 1. Niĩ na niĩ ngiuga atĩrĩ, Ta iguai, ndamũthaitha, inyuĩ ciongo cia nyũmba ya Jakubu, o na inyuĩ aathani a nyũmba ya Isiraeli; githĩ ti ũhoro wanyu kũmenya gũtuanĩra cira na kĩhooto?
• 2. No inyuĩ mũthũũraga maũndũ marĩa mega, mũkenda marĩa moru; ningĩ mũũnũraga andũ njũa, na mũkarembũrana nyama, mũgacitigithania na mahĩndĩ mao.
• 3. Mũrĩaga mĩĩrĩ ya andũ akwa, mũkamaciũra njũa cia mĩĩrĩ yao, o na mũkamamemenda mahĩndĩ; ĩĩ, ti-itherũ mũmatinangagia irung’u, ta mekũhagĩrũo na nyũngũ, o na ta nyama irĩ gĩteng’ũ-inĩ kĩa nyũngũ.
• 4. Na hĩndĩ ĩo nĩmagakaĩra Jehova, no ndarĩ ũndũ o na ũrĩkũ akamacokeria; ĩĩ, ti-itherũ nĩ kũhitha akamahitha ũthiũ hĩndĩ ĩo, o kũringana na ũũru wa ciĩko ciao iria maaneka.
• 5. Ningĩ Jehova ekuuga ũũ: Ha ũhoro wa anabii arĩa mahĩtithagia andũ akwa, o acio marũmaga kĩndũ na magego mao magacoka kwanĩrĩra makiugaga Gwĩ thayũ; na mũndũ o wothe ũrĩa ũtamatwaragĩrĩra kĩndũ kanua makamwĩthagathagĩra mbaara nĩguo mahũrane nake-rĩ;
• 6. atĩrĩrĩ, tondũ wa maũndũ macio nĩmũgatumanĩrũo nĩ nduma, mwage kuona kĩoneki; mũgaikara ta mũtukĩrĩirũo, na mũtikahote kũragũranĩra; nao anabii nĩmagathũĩrũo nĩ riũa, na matindage nduma-inĩ o mũthenya.
• 7. Andũ arĩa oni maũndũ nĩmagaconoka, o nao arĩa maragũranagĩra maconorithio; ĩĩ, ti-itherũ othe nĩ kwĩhumba makehumba kanua, nĩ ũndũ gũtirĩ ũhoro o na ũmwe magakorũo macokeirio nĩ Ngai.
• 8. No ha ũhoro wakwa-rĩ, niĩ nĩnjiyũrĩtwo nĩ hinya nĩ ũndũ wa Roho wa Jehova, na ngaiyũrũo nĩ ũmenyi wa matuĩro ma cira wa kĩhooto, o na ngaiyũrũo nĩ ũhoti, nĩ getha nyumbũrĩre Jakubu maũndũ marĩa aaneka ma kwagarara watho, o na nyumbũrĩre Isiraeli mehia make.
• 9. Ta iguai ũhoro ũyũ, ndamũthaitha, inyuĩ ciongo cia nyũmba ya Jakubu, o na inyuĩ aathani a nyũmba ya Isiraeli, o inyuĩ mũthũũrĩte matuĩro ma cira wa kĩhooto, na mũgatuĩka ahotomia a maũndũ mothe marĩa merekereire.
• 10. Acio nĩo macokete gwaka Zayuni magĩitithagia thakame, o na magaaka Jerusalemu o magĩĩkanaga ũũru.
• 11. Anene akuo matuanagĩra cira nĩ getha mahakwo, o nao athĩnjĩri-Ngai akuo marutanaga maũndũ nĩ getha maheo mũcara, o nao anabii akuo makarathanĩra maũndũ nĩ getha maheo mbia; no o na gwatuĩka nĩ ũguo-rĩ, no meyegemanagia na Jehova, makiugaga atĩrĩ, Githĩ Jehova ndakĩrĩ thĩinĩ witũ? Hatikĩrĩ ũũru ũngĩtũkora.
• 12. Tondũ ũcio Zayuni gũkarĩmwo o ta mũgũnda nĩ ũndũ wanyu, narĩo Jerusalemu rĩtuĩke o hĩba cia mahiga, o nakuo kũu kĩrĩma-inĩ kĩa nyũmba ya Jehova gũtuĩke o ta matĩri ma kũndũ gũtũũgĩru me mũtitũ-inĩ.

Home