Go Back

Amosi Chapter 8

• 1. Mwathani Jehova nĩ ũũ ningĩ aanyonirie: nĩ atĩrĩrĩ, nĩ gĩtiti kĩĩ na matunda marĩkĩtie kwĩrua.
• 2. Nake akĩnjũria atĩrĩ, Amosi, nĩ kĩ kĩu ũkuona? Na niĩ ngiuga, Nĩ gĩtiti kĩĩ na matunda marĩkĩtie kwĩrua. Hĩndĩ ĩo Jehova agĩkĩnjĩra atĩrĩ, Irĩkĩrĩrio nĩrĩkinyĩrĩire kĩrĩndĩ gĩakwa gĩa Isiraeli ndigũcoka gũkĩagararĩra rĩngĩ.
• 3. Na mũthenya ũcio nyĩmbo iria ciinagĩrũo hekarũ-inĩ igatuĩka o mũkayo; ũguo nĩguo Mwathani Jehova ekuuga: ciimba nĩ kũingĩha ikaingĩha; kũndũ guothe igateagwo o ũguo gũkirĩtwo ki.
• 4. Ta iguai ũhoro ũyũ, inyuĩ mwendaga kũmerũkia arĩa akĩa, mũkenda gũtũma athĩni a bũrũri magĩthire,
• 5. mũkiugaga atĩrĩ, Ĩ karũgamo ka mweri karĩhĩtũka rĩ, nĩguo tũgakĩendagie irio? na thabatũ ĩrĩthira rĩ, tũkabangage ngano? o tũkĩnyihagia eba ya gũthimaga irio, na tũkaritũhia cekeri ya gũthima mbia, na tũthũkie ratiri nĩguo tũhenanagie;
• 6. nĩ getha twĩgũrĩre arĩa ahũthũ na mbia, nao arĩa akĩa tũkĩmegũrire na nyamũga igĩrĩ, na gwata o muura wa ngano tũkawendagie.
• 7. Jehova nĩehĩtĩte akagweta mwĩraho ũrĩa wa Jakubu, akoiga atĩrĩ, Ndirĩ hingo ngariganĩrũo nĩ ciĩko icio ciao o na kĩmwe.
• 8. Nĩ ũndũ wa ũguo-rĩ, githĩ bũrũri ndũngĩthingitha, na andũ othe macakae, arĩa maũtũire? Ĩĩ-ni, nĩ kũiyũra ũkaiyũra ũrĩ wothe o ta Rũũi rũrĩa; na ũthogondane na ũcoke ũhũcũke, o ta Rũũĩ rũu rũa Misiri.
• 9. Ningĩ mũthenya ũcio gũgatuĩka atĩrĩ, nĩguo Mwathani Jehova ekuuga, atĩ nĩngatũma riũa rĩthũe mĩaraho, njĩkĩre thĩ nduma mũthenya o kũrĩ o kwaru.
• 10. Nacio ciathĩ iria mũthiaga ngacigarũra ituĩke cia kĩgirĩko, na nyĩmbo cianyu ciothe ituĩke cia mũcakaĩko; o na ndũme inyuothe mwĩohe makũnia njohero, na inyuothe, mũndũ o mũndũ, enjwo kĩongo; nĩngatũma gũtuĩke ta ũrĩa mũriũ wa mũndũ, wa mũmwe, acakayagĩrũo akuĩte, na marigĩrĩrio-inĩ ma ũhoro ũcio gũtuĩke ta mũthenya wa gana.
• 11. Mwathani Jehova ekuuga ũũ: Atĩrĩrĩi, matukũ nĩmaroka rĩrĩa ngatũmĩra bũrũri ũyũ ng’aragu, na ti ng’aragu ya irio, kana nyota wa maĩ, nĩ ng’aragu ya kũigua mohoro ma Jehova.
• 12. Andũ nĩ gũthiĩ magathiĩ magĩtũgũgaga kuuma iria-inĩ kinya rĩrĩa rĩngĩ, na kuuma mwena wa gathigathini o kinya wa irathĩro-inĩ; nĩ gũthiũrũrũka magathiũrũrũkaga makĩmatha ũhoro wa Jehova, na matiwone.
• 13. Hingo ĩo thaka cia airĩtu, na ningĩ aanake, nĩmakaringĩka nĩ nyota.
• 14. Acio megirithagia makĩgwetaga Ngero io ya Samaria, na makoiga, Na tondũ ngai yaku, wee Dani, nĩĩtũire! na ningĩ makoiga, Na tondũ njĩra ya gũthiĩ Biri-shiba nĩĩtũire-rĩ! acio nĩ kũgũa makagũa, na maticoke gũũkĩra rĩngĩ.

Home