Go Back

Amosi Chapter 7

• 1. MWATHANI Jehova nĩ ũũ aanyonirie: nĩ atĩrĩrĩ, nĩ kũũmba ombaga itono hingo ĩrĩa nyeki ciambagĩrĩria gũthethũka rĩa kerĩ; na rĩrĩ, nĩ gũthethũka kũu gwa kerĩ mũthamaki aarĩkia gũtuĩrũo.
• 2. Gũgĩtuĩka atĩrĩ, atĩ itono icio ciarĩkia kũrĩa tũhuti tuothe twa bũrũri, ngĩkiuga atĩrĩ, Ĩ Mwathani Jehova, ndagũthaitha, kĩohanĩre: Jakubu agagĩĩtiira atĩa? nĩ amu nĩ mũnyihĩrĩru.
• 3. Jehova agĩkĩĩricũkwo nĩ ũndũ wa ũhoro ũcio; we Jehova akiuga atĩrĩ, Ũndũ ũcio ndũgũgĩtuĩka guo.
• 4. Mwathani Jehova nĩ ũũ ningĩ aanyonirie: nĩ atĩrĩrĩ, Mwathani Jehova nĩ hĩndĩ etire mwaki acirithie kĩrĩndĩ naguo; naguo ũkĩrambia maĩ ma kũrĩa kũriku mũno, ũkĩenda kũrĩanĩria o gwata bũrũri.
• 5. Ngĩkiuga atĩrĩ, Ĩ Mwathani Jehova, ndagũthaitha, gĩtige: Jakubu agagĩĩtiira atĩa? nĩ amu nĩ mũnyihĩrĩru.
• 6. Jehova agĩkĩĩricũkwo nĩ ũndũ wa ũhoro ũcio: we Jehova akiuga atĩrĩ, Ũndũ ũcio o naguo ndũgũgĩtuĩka guo.
• 7. Ningĩ akĩnyonia ũũ: nĩ atĩrĩrĩ, Mwathani agĩkorũo arũngiĩ rũthingo-inĩ rũa mahiga rũakithĩtio na kabirũ ga kũrũngaria, o agwete rũrigi rũu rũa kabirũ.
• 8. Nake Jehova akĩnjũria atĩrĩ, Amosi, nĩ kĩ kĩu ũkuona? Na niĩ ngiuga, Nĩ kabirũ ga kũrũnga. Nake Mwathani agĩcoka akiuga ũũ: Atĩrĩrĩ, nĩ kabirũ ndĩracunjuria kĩrĩndĩ-inĩ gĩakwa gĩa Isiraeli gatagatĩ; ndigũcoka kũmaagararĩra rĩngĩ:
• 9. namo matĩri ma Isaaka marĩa ma kũndũ gũtũũgĩru nĩ gũkira magakira ihooru, na nyũmba iria nyamũre cia Isiraeli igatuwo o maganjo; na nĩngokĩrĩra mbarĩ ya Jeroboamu na njomo.
• 10. Hĩndĩ ĩo Amazia, mũthĩnjĩri-Ngai ũrĩa watũire Beth-eli, akĩrekania kũrĩ Jeroboamu, mũthamaki wa Isiraeli, akiuga atĩrĩ, Amosi-rĩ, nĩagũcirĩire arĩ o gũkũ gatagatĩ ka mbarĩ ya Isiraeli: naguo bũrũri ndũngĩhota gwĩtiirĩrĩria ndeto ciothe iria e nacio.
• 11. Tondũ Amosi oigaga atĩrĩ, Jeroboamu nĩakoragwo na njomo, na Aisiraeli no mũhaka magatahwo marutwo bũrũri-inĩ ũyũ wao.
• 12. Ningĩ Amazia agĩcoka akĩĩra Amosi atĩrĩ, Wee muoni ũyũ wa maũndũ, wĩthiĩre ũũrĩre bũrũri wa Juda, ũkarĩage irio kuo, na ũrathagĩre ũhoro kuo:
• 13. no gũkũ Beth-eli-rĩ, ndũkanarathe ũndũ rĩngĩ: amu nĩ handũ haamũre haikairio nĩ mũthamaki, nĩ nyũmba nyamũre ya rũrĩrĩ rũrũ.
• 14. Hĩndĩ ĩo Amosi agĩcokeria Amazia ũhoro, akiuga atĩrĩ, Niĩ-rĩ, ndirĩ mũnabii, o na ndirĩ wa thiritũ ĩo ya anabii; niĩ ndĩ mũndũ wa ũhiũ-inĩ na mwĩthondekeri mĩkũyũ:
• 15. nake Jehova agĩkĩnduta rũũru-inĩ rũrĩa ndarũmagĩrĩra, we Jehova agĩkĩnjĩra atĩrĩ, Thiĩ, ũkarathĩre kĩrĩndĩ gĩakwa gĩa Isiraeli ũhoro.
• 16. Tondũ ũcio-rĩ, kĩigue ũrĩa Jehova ekuuga, atĩrĩ: Wee nĩwoiga ũũ, Ndũkarathĩre Aisiraeli ũndũ, kana ũrekie kiugo kĩa ũũru nĩ ũndũ wa mbarĩ ya Isaaka;
• 17. tondũ ũcio-rĩ, Jehova ekuuga ũũ: Mũtumia waku nĩagatuĩka mũmaraya o itũũra thĩinĩ, na ariũ aku na airĩtu aku makoragwo na njomo, na gĩthaka gĩaku gĩatũranio thanju na mũkanda; nawe, wee mwene, niũgakuĩra bũrũri ũrĩ thahu, na Aisiraeli no mũhaka magatahwo marutwo bũrũri-inĩ ũyũ wao.

Home