Go Back

Joeli Chapter 2

• 1. Atĩrĩrĩ, huhai karumbeta kũu Zayuni, na muugithie mbu kũu kĩrĩma-inĩ gĩakwa kĩrĩa kĩamũre; andũ othe arĩa matũũraga bũrũri ũyũ nĩmainaine, nĩ ũndũ mũthenya ũrĩa ũtuĩtwo nĩ Jehova nĩũroka, na nĩ ta mũkinyu o na rĩu,
• 2. na nĩ mũthenya wĩ nduma na mũthimbu, mũthenya wĩ matu o na nduma ndumanu, gũgaikara o ta ũrĩa gũikaraga kĩrĩma-inĩ igũrũ ruoro rũgĩtema; ningĩ nĩ mbũtũ nene mũno ĩroka, ĩĩ na hinya mũingĩ, na gũtirĩ kwagĩa ĩngĩ tayo o na rĩ, o na gũtigacoka kũgĩa ĩngĩ tayo thutha-inĩ, o na njiarũa na njiarũa.
• 3. Mwaki nĩ kũninana ũraninana mbere yacio, naruo rũrĩrĩmbĩ rũa mwaki rũgacina bũrũri na thutha wacio, rũrĩrĩmbũkĩte mũno; bũrũri ũrĩa wĩ mbere yacio-rĩ, ũhaana o ta mũgũnda wa Edeni, no thutha wacio nĩ baraganya mũtheri ũtariĩ ta werũ mwanangĩku; ĩĩ, ti-itherũ gũtirĩ kĩndũ o na kĩ kĩĩhonoketie harĩ cio.
• 4. Mũhianĩre wacio no ta wa mbarathi, naguo mũteng’erere wacio no ta wa mbarathi cia ita.
• 5. Mũrurumo wa mũrũũgĩre wacio ũtariĩ o ta wa ngari cia ita irĩ gacũmbĩrĩ-inĩ ga kĩrĩma, na ta wa nĩnĩmbĩ cia mwaki igĩcina itira cia ngano; ĩĩ, ti-itherũ ihaana ta makarau methagathagĩire ita.
• 6. Na rĩrĩ, hĩndĩ ĩrĩa ciakinya harĩ andũ-rĩ, nĩ gĩtuĩko kĩa nda gĩkinyagĩrĩra acio maakorũo nĩcio, magatuka ithiithi othe.
• 7. Iteng’eraga o ta njamba irĩ hinya; na ikahaica rũthingo igũrũ o ta njamba cia ita; o ĩmwe ĩmwe yacio ĩthiaga ĩrorete o kũrĩa yerekeire, na itihĩngĩcanie mĩhari,
• 8. o na kana o na ĩmwe yacio ĩikie ĩrĩa ĩngĩ; o ĩmwe ĩmwe yacio ĩgeraga njĩra yayo yo nyene, o na ingĩkora indo cia mbaara-rĩ, itingĩgurario nĩcio.
• 9. Nĩ kũrũũgĩrĩra ĩrũũgagĩrĩra itũũra, na igateng’erera thingo igũrũ, o na ikahaica itonye nyũmba, igatonyera ndirica-inĩ o ta mũici.
• 10. Thĩ nĩ gũthingitha ĩrathingitha mbere yacio, o na kũu igũrũ nakuo gũkenyenya; riũa na mweri nĩigĩĩte nduma, nacio njata igatiga kwara.
• 11. Jehova nĩ kuugĩrĩria aroigĩrĩria na mũgambo mũnene atongoretie mbũtũ ciake cia ita; nĩ ũndũ kĩraaro kĩa mbũtũ icio ciake cia ita nĩ kĩaramu mũno, nacio nyamũ icio hinganĩria cia kĩĩranĩro gĩake ii na hinya. Nĩ gũkorũo mũthenya ũrĩa ũtuĩtwo nĩ Jehova nĩ mũnene na wĩ itua-nda mũno. Nũ ũngĩkĩhota kũwĩtiiria?
• 12. No rĩrĩ, o na gwatuĩka nĩ ũguo-rĩ, Jehova o na rĩu aroiga atĩrĩ, Njokererai na ngoro cianyu ciothe, na mwĩhinge kũrĩa irio, mũkĩrĩraga maithori mũgwatĩtwo nĩ kĩeha.
• 13. Tembũrangai ngoro cianyu, na mũtigatembũrange o nguo cianyu ciiki, mũcokerere Jehova Ngai wanyu; nĩ ũndũ we nĩ mwega, na ningĩ nĩ wa tha, na ndahiũhaga kũrakara, no nĩaiyũirũo nĩ ũtugi, akericũkagwo agatiga gwĩka andũ ũũru.
• 14. Nũ ũũĩ kana nĩangĩgarũrũka ericũkwo, atige aatũrathima, atũhe indo cia kũrutagĩra Jehova Ngai wanyu magongona ma mũtu, o na ma indo iria irutagwo cia kũnyuwo?
• 15. Huhai karumbeta kũu Zayuni mũraarĩrie gĩathĩ kĩamũre gĩa kwĩhinga kũrĩa irio; ĩtanai mũraarĩrie gĩtũngano gĩkoniĩ andũ othe;
• 16. cokanĩrĩriai andũ, na mwamũre kĩrĩndĩ kĩanyu mũgĩtherie; mũcokanĩrĩrie athuri akũrũ, na ciana, o na tũkenge; mũhikania nĩoimagare oime kanyũmba gake ka na thĩinĩ, o nake mũhiki oime kĩrĩrĩ.
• 17. Athĩnjĩri-Ngai, o acio atungatĩri Jehova, nĩmarĩre marũngiĩ gatagatĩ ka gĩthaku na kĩgongona, moige atĩrĩ, Caĩra andũ aku, wee Jehova; menya ũreke ũgai waku ũmenwo, nĩguo atĩ andũ aku moinwo thimo nĩ ndũrĩrĩ iria ingĩ. Nĩ kĩ gĩgũgĩtũma andũ acio a ndũrĩrĩ moranie ũũ: Kaĩ Ngai wao akĩrĩ ha?
• 18. Hĩndĩ ĩo Jehova agĩkĩĩrutanĩria nĩ ũndũ wa bũrũri wake, na akĩiguĩra andũ ake tha.
• 19. Nake Jehova agĩgĩcokeria andũ acio ake ũhoro, akĩmera ũũ: Atĩrĩrĩ, nĩngũmũrehithĩrie ngano, na ndibei, o na maguta, mũiganio nĩcio, na ndigũcoka kũreka mũmeneke thĩinĩ wa ndũrĩrĩ iria ingĩ.
• 20. Nĩngamwehereria mbũtũ ĩo ya ita ya mwena wa gathigathini, ndĩmĩtwarithie bũrũri mũhĩnju na mwanangĩku, ũtangĩciara irio, ngerewani yayo ĩtwarũo ĩroretio iria-inĩ rĩa mwena wa irathĩro, naguo mũrima wayo ũrorio iria-inĩ rĩa mwena wa ithũĩro; nakĩo kĩheera kĩayo gĩtogororoke, naguo mũnungo wayo mũũru ũiguwo, nĩ ũndũ nĩĩĩkĩte maũndũ manene.
• 21. Atĩrĩrĩ, inyuĩ andũ a bũrũri ũyũ, tigai guoya; Canjamũkai na mũkene, nĩ gũkorũo Jehova nĩekĩte maũndũ manene.
• 22. O na inyuĩ nyamũ cia gĩthaka-rĩ, tigai gwĩtigĩra, amu ũrĩithio wa werũ-inĩ nĩũramera ria, nayo mĩtĩ ĩgaciara maciaro mayo, nayo mĩkũyũ o na mĩthabibu ĩgathundũra.
• 23. Tondũ ũcio gĩkenei, inyuĩ ciana cia Zayuni, mũkũngũĩre Jehova Ngai wanyu; nĩ ũndũ nĩamũheete mbura njiganu ya kũmeria hĩĩra, o na ĩrĩa ya gũkũria irio. Nĩamuurĩirie mbura ya mbere, o na ĩrĩa ya thutha o ta tene.
• 24. Nacio ihuhĩro cia ngano nĩikaiyũra ngano, o nacio ndua ciiyũre ndibei na maguta o nginya ciitĩkage thĩ.
• 25. Na nĩngamũrĩha imera icio irio cianyu ciarĩirũo nĩ itono, na ndaahi, na ciana cia ciĩhuruta, o na ngigĩ, o mbũtũ ya ita ĩo yakwa nene ndamũrehithĩirie.
• 26. Na nĩmũkagĩa na irio nyingĩ cia kũrĩa, o nginya mũhũnage, na mũgathage rĩĩtwa rĩa Jehova Ngai wanyu, ũcio ũmwĩkĩte maũndũ manene ma kũgegania; nao andũ akwa matigacoka gũconorithio o na rĩ.
• 27. Na nĩmũkamenya atĩ ndĩ thĩinĩ wa Isiraeli, o na atĩ niĩ nĩ niĩ Jehova Ngai wanyu, na atĩ gũtirĩ ũngĩ, o na ũrĩkũ; nao andũ akwa matigacoka gũconorithio o na rĩ.
• 28. Na nĩũgakinya atĩrĩ, atĩ thutha wa maũndũ macio, nĩngaitĩrĩria andũ othe roho wakwa; nao ariũ anyu, na airĩtu anyu, nĩmakarathaga mohoro, nao athuri anyu marotage iroto, o nao aanake anyu monage cioneki;
• 29. o na ningĩ matukũ-inĩ o ro macio nĩngaitĩrĩria ndungata cia arũme o na cia airĩtu roho wakwa o nacio.
• 30. Na nĩngonania morirũ igũrũ matu-inĩ, o na thĩ ĩno, namo nĩ ma thakame, na ma mwaki, o na ma ndogo ĩkĩambata.
• 31. Riũa nĩrĩkagarũrũo rĩgĩe nduma, o naguo mweri ũtuĩke ta thakame, mbere ya mũthenya ũrĩa ũtuĩtwo nĩ Jehova ũtanakinya, o ũrĩa mũnene na wa kũmakania.
• 32. Na nĩgũgakinya atĩrĩ, atĩ mũndũ o wothe ũrĩa ũgakaĩra rĩĩtwa rĩa Jehova nĩakahonoka; nĩ ũndũ gũtikaaga arĩa makahonoka kĩrĩma-inĩ gĩa Zayuni, o na Jerusalemu, o ta ũrĩa Jehova oigĩte, o na arĩa Jehova eĩtĩire moneke thĩinĩ wa arĩa magakorũo matigarĩte.

Home