Go Back

Hosea Chapter 2

• 1. Nĩ ũndũ ũcio-rĩ, ĩranai na ariũ a ithe wanyu, Ammi; nao aarĩ a ithe wanyu mwĩrane nao, Ruhama.
• 2. Ta thaithai nyina wanyu, mũthaithei; amu-rĩ, we tiwe mũtumia wakwa o na niĩ ti niĩ mũthuriwe. Nĩate ũmaraya wake ũthengio mbere ya ũthiũ wake, o namo mohoro make ma ũtharania mathengio gatagatĩ-inĩ ka nyondo ciake;
• 3. nĩguo ndikanamũtunye nguo ciake, atigwo e njaga, na ndĩmũige aikare ta ũrĩa aatariĩ mũthenya ũrĩa aaciarirũo, kana ndũme atuĩke ta burugĩi na ta bũrũri mũũmũ, na ndĩmũũrage na nyota.
• 4. Ĩĩ, ti-itherũ, ndigakĩiguĩra ciana ciake tha, tondũ nĩ ciana cia ũmaraya;
• 5. amu nyina wacio nĩatũire ahũraga maraya; o we ũcio wagĩire mahu mao nĩekĩte maũndũ ma ũũra-thoni. Nĩ gũkorũo nĩoigire atĩrĩ, Ngũrũmĩrĩra anyanya arĩa ma’heaga irio ciakwa, na maĩ makwa, na guoya wakwa wa ng’ondu, na gatani, na maguta, o na kĩrĩa ’nyuaga.
• 6. Nĩ ũndũ ũcio ta iguai ũhoro, atĩrĩ, Nĩngamũhingĩrĩria njĩra na mĩigua, na njirige rũirigo mbere yake, nĩguo aremwo nĩ kuona njĩra ciake.
• 7. Nake no arũmĩrĩre anyanya ake, no ndakamakĩnyĩra; akamacaria, na ndamone. Na hĩndĩ ĩo nĩ gwĩciria ageciria oige atĩrĩ, Reke ’thiĩ njokerere mũthuri wakwa wa mbere, nĩ gũkorũo hĩndĩ ĩo nĩndagunagwo wega kũrĩ rĩu.
• 8. Amu-rĩ, ndaigana kũmenya atĩ nĩ niĩ ndamũheaga ngano ĩo, na ndibei, na maguta macio, o na ngamũingĩhĩria betha na thahabu iria maahũthĩire magĩthondeka ngai ĩrĩa ĩĩtagwo Baali.
• 9. Nĩ ũndũ ũcio-rĩ, nĩ kuoya ngoya ngano yakwa rĩngĩ ihinda rĩayo rĩakinya, o na ndibei yakwa kĩmera kĩayo nakĩo gĩakinya, na ndĩmũtunye guoya wakwa wa ng’ondu, na gatani yakwa, o indo iria angĩahumbĩra njaga yake.
• 10. Ningĩ-rĩ, nĩngaguũria maũndũ make ma waganu maitho-inĩ ma anyanya ake, na gũtirĩ o na ũmwe ũkamũhonokia guoko-inĩ gwakwa.
• 11. O na gĩkeno gĩake gĩothe nĩngatũma gĩthire biũ, hamwe na ciathĩ ciake, na magongona make ma karũgamo ka mweri, na thabatũ ciake, na ciũngano ciake ciothe iria ciathanĩtwo.
• 12. O nayo mĩtĩ yake yothe ya mĩthabibu na ya mĩkũyũ nĩngamĩthũkia, o ĩrĩa aaririe ũhoro wayo akiuga atĩrĩ, Mĩtĩ ĩno-rĩ, nĩyo mũcara wakwa ũrĩa ’heetwo nĩ anyanya akwa. Nayo nĩngatũma ĩtuĩke kĩrĩti, nacio nyamũ cia gĩthaka nĩcio ikamĩrĩa.
• 13. Ningĩ nĩ kũrĩhia ngamũrĩhia matukũ marĩa aamũrĩire ngai iria ciĩtagwo Baali, o iria aacinagĩra ũbumba, rĩrĩa egemagia na mindo cia matũ, na managĩ make, akĩrũmĩrĩra anyanya ake, na akĩya kũriganĩrũo nĩ niĩ; ũguo nĩguo Jehova ekuuga.
• 14. Nĩ ũndũ ũcio-rĩ, ngamũgucĩrĩria na wara, ndĩmũtware werũ-inĩ, ndĩmwarĩrie na ndeto cia kũmũthathaya.
• 15. Na oima kũu ningĩ, nĩ gũcokia ngamũcokeria mĩgũnda yake ya mĩthabibu, na ndĩmũhe gĩtuamba gĩa Akori gĩtuĩke ta mũromo wa kwĩrĩgĩrĩrũo ũndũ; o nake nĩagacokia icokia e kũu ta ũrĩa ekaga rĩrĩa aarĩ mũnyinyi, na ta mũthenya o ũrĩa oimire bũrũri wa Misiri.
• 16. Na mũthenya ũcio-rĩ, gũgatuĩka atĩ nĩũkanjĩtaga Ishi, na ndũgacoka kũnjĩta Baali rĩngĩ; ũguo nĩguo Jehova ekuuga.
• 17. Amu-rĩ, nĩngeheria marĩĩtwa ma ngai iria ciĩtagwo Baali mathenge kanua-inĩ gake, na itigacoka kũgwetwo na marĩĩtwa ma cio o na rĩ.
• 18. Naguo mũthenya ũcio-rĩ, nĩngamathondekera kĩrĩkanĩro na nyamũ cia gĩthaka-inĩ na nyoni cia rĩera-inĩ o na tũnyamũ tũrĩa tũkurumaga thĩ. Na nĩngoina ũta na rũhiũ rũa njora o na ita narĩo, ndĩcithengie bũrũri-inĩ; ningĩ-rĩ, nĩngatũma makomage me na thayũ.
• 19. Na nĩngakwĩũrĩria tũrĩkanĩre, ũtuĩke mũtumia wakwa tene na tene; ĩĩ-ni, nĩngakwĩũrĩria ũtuĩke wakwa ũhoro-inĩ wa ũthingu, o na wa kĩhooto, o na wa gũtugana, o na wa kũiguanĩra tha.
• 20. O na ningĩ ngwĩũrĩrie ũtuĩke wakwa ndĩ o wa kwĩhokeka; nawe nĩũkamenya Jehova.
• 21. Ningĩ mũthenya ũcio-rĩ, gũgatuĩka atĩrĩ, atĩ niĩ nĩngacokia ũhoro, ũguo nĩguo Jehova ekuuga; nĩngacokeria igũrũ ũhoro, narĩo igũrũ rĩcokerie thĩ,
• 22. thĩ nayo no ĩcokerie ngano, o na ndibei, o na maguta ũhoro; nacio icio ciothe icokerie Jezireeli ũhoro.
• 23. Na nĩngamwĩhandĩra bũrũri-inĩ, na ngamũiguĩra tha, o ũcio ũtaraiguĩrĩirũo tha; na nĩngera andũ acio matararĩ akwa atĩrĩ, Inyuĩ mũrĩ andũ akwa; nao mũndũ o mũndũ oige, Wee nĩwe Ngai wakwa.

Home