Go Back

Hosea Chapter 12

• 1. Efiraimu akĩrĩa, arĩaga o rũhuho, na akarũmĩrĩra rũhuho rũrĩa ruumaga irathĩro-inĩ; hĩndĩ ciothe no kũingĩhia aingĩhagia maheni na mwanangĩko; na nĩmarĩkanagĩra kĩrĩkanĩro hamwe na Ashuri; maguta namo magatwaragwo Misiri.
• 2. Ningĩ-rĩ, Jehova e na ngarari na Juda o nake, na nĩakaherithia Jakubu kũringana na mĩthiĩre yake, o kũiganana na ciĩko ciake noguo akamũthukĩra.
• 3. Rĩrĩa maarĩ nda ya nyina wao-rĩ, akĩnyita mũrũ wa nyina ndiira; o na aatuĩka mũndũ mũgima-rĩ, aarĩ na hinya harĩ Ngai.
• 4. Ĩĩ, ti-itherũ, aarĩ na hinya gũkĩra mũraika ũcio, akĩhootana; ningĩ nĩ kũrĩra aarĩrire, na akĩmũthaitha. Aamũkorire kũu Beth-eli, na agĩtwarĩria o na ithuĩ kuo,
• 5. o we Jehova, Ngai mwene mbũtũ cia ita; Jehova nĩrĩo rĩĩtwa rĩake rĩa kĩririkano.
• 6. Nĩ ũndũ ũcio-rĩ, kĩgarũrũke wĩerekerie harĩ Ngai waku; ikaria ũtugi na ũikarie cira wa kĩhooto, na wetagĩrĩre Ngai waku hingo ciothe.
• 7. We nĩ muonjorithia, na nĩ gĩthimi gĩa kũhenania kĩrĩ guoko gwake; nĩ kwenda endaga kũhinyanĩrĩria;
• 8. o we Efiraimu nĩoigĩte atĩrĩ, Ti-itherũ ndĩ mũtongu, nĩndĩyoneire ũtonga, na gũtikĩrĩ ũndũ mũũru mangĩona thĩinĩ wakwa mawĩra-inĩ makwa mothe ũrĩa ũngĩtuwo wĩhia.
• 9. No rĩrĩ, niĩ nĩ niĩ Jehova Ngai waku o kuuma bũrũri wa Misiri; na no ngatũma ũtũũre hema-inĩ rĩngĩ, o ta ũrĩa mwekaga matukũ-inĩ ma gĩathĩ kĩrĩa kĩamũre.
• 10. Ningĩ-rĩ, nĩnjarĩirie anabii, na ngaingĩhia cioneki; o na ngagerekanĩria ngerekano na njĩra ya ũtungati wa anabii.
• 11. Githĩ Gileadi nĩ kwa waganu? Ĩĩ-ni, andũ akuo nĩ a tũhũ mũtheri. Kũu Giligali mathĩnjagĩra magongona ma ndegwa; ĩĩ, marutĩro mao ma igongona matariĩ ta hĩba cia mahiga mĩkũmũkũmũ-inĩ ya mĩgũnda.
• 12. Nake Jakubu nĩ kũũra orire agĩthiĩ bũrũri wa Aramu; o we Isiraeli-rĩ, agĩtũũra atungataga nĩ getha akona mũtumia; o na getha agĩe na mũhiki agĩtũũra o arĩithagia ng’ondu.
• 13. Nake Jehova-rĩ, nĩ kũruta aarutire Isiraeli Misiri na guoko kwa mũnabii, o na akĩmenyererũo na guoko kwa mũnabii.
• 14. Ũcio Efiraimu nĩarakaranĩtie irakarania irũrũ mũno; nĩkĩo thakame yake ĩkamũcokerera, naruo rũmena rũake Mwathani wake akamũcokereria.

Home