Go Back

Danieli Chapter 9

• 1. Na rĩrĩ, mwaka wa mbere ũrĩa Dario, mũrũ wa Ahasuerusu, wa rũciaro rũa Amedia, aakorirũo athamakĩte, o we ũcio watuĩtwo mũthamaki wa Akalidei,
• 2. o mwaka wa mbere wa gũthamaka kũu gwake-rĩ, nĩguo niĩ Danieli ndonire mabuku-inĩ ũhoro ũrĩa Jehova aamenyithirie Jeremia ũrĩa mũnabii ũhoro waguo, wa ũrĩa mĩaka ĩigana ĩrĩa Jerusalemu rĩgaikara rĩrĩ rĩanange, na nĩ mĩaka mĩrongo mũgwanja.
• 3. Na niĩ ngĩcoka ngĩĩhũgũra na kũrĩ Mwathani Ngai, ngĩmũhoya ndĩĩhingĩte kũrĩa irio na ngehumba tama wa ikũnia, na ngebuyaga mũhu mũtwe, o ngĩmũthaithaga.
• 4. Ngĩgĩkaĩra Jehova Ngai wakwa ngĩmuumbũragĩra mehia maitũ, ngiuga ũũ: Ĩ Mwathani, wee Ngai ũrĩa mũnene na mwĩtigĩre mũno, o wee ũhingagia kĩrĩkanĩro gĩaku na ũgatuga arĩa mũtĩaine nao, o arĩa maiguaga maathani maku;
• 5. nĩ kwĩhia twĩhĩtie, tũkamaramara o na tũkaagana; ningĩ nĩtũkũremete, na tũkarega kũigua ũtaarani waku o na matuĩro maku;
• 6. o na ningĩ tũtiigana kũigua anabii aku arĩa maagũtungatagĩra, o acio maaragia makĩgwetaga rĩĩtwa rĩaku, makĩarĩria athamaki aitũ, na anene aitũ, na maithe maitũ, o na andũ othe a bũrũri witũ.
• 7. Ũthingu nĩ waku, wee Mwathani, no ithuĩ tũrĩ agarũrũku ithiithi nĩ gũconoka; ũguo noguo tũtariĩ o na ũmũthĩ twĩ mbere yaku, o ithuĩ andũ a Juda, na andũ arĩa matũire Jerusalemu, o na Aisiraeli othe, arĩa matũire gũkuhĩ, o na arĩa matũire kũraya, mabũrũri-inĩ mothe kũrĩa wamatwarithirie nĩ ũndũ wa ũrĩa maagararire watho waku.
• 8. Ti-itherũ, Mwathani, tũrĩ agarũrũku ithiithi nĩ gũconoka, ithuĩ na athamaki aitũ, na anene aitũ, o na maithe maitũ; tondũ nĩtũkwĩhĩtie ithuothe.
• 9. Tha na kwoherũo ciumaga kwĩ Mwathani Ngai witũ, o na harĩa ithuĩ tũmũremete,
• 10. na tũkarega kũigua mũgambo wa Jehova Ngai witũ, o na kana kũrũmia mawatho make, marĩa aatuonereirie na tũnua twa anabii ake arĩa maamũtungatagĩra.
• 11. Ti-itherũ Aisiraeli othe nĩmaagararĩte watho waku, na makehũka na mwena nĩ getha matikaigue mũgambo ũcio waku. Na rĩu, tondũ wa maũndũ macio mothe, nĩtũkinyĩrĩirũo nĩ kĩrumi, na tũgacokererũo nĩ mwĩhĩtwa ũrĩa wandĩkĩtwo kĩrĩra-inĩ kĩa Musa, ndungata ya Ngai, tondũ nĩtũmwĩhĩtie.
• 12. Na rĩu nĩahingĩtie ciugo ciake iria aaririe ũhoro witũ, ithuĩ na aciri aitũ arĩa matũciragĩrĩra, agagĩtũrehithĩrie ũũnũhi mũũru mũno. Amu gũkũ thĩ guothe gũtirĩ kwoneka ũndũ ũngĩ wĩkĩtwo ta ũyũ wĩkĩtwo Jerusalemu.
• 13. Ti-itherũ tũreheirũo ũũnũhi ũringaine na maũndũ marĩa maandĩkĩtwo kĩrĩra-inĩ kĩu kĩa Musa. No rĩrĩ, o na rĩu tũtirĩ tũrathaitha Jehova Ngai witũ nĩguo twĩtĩkĩrĩke nĩwe, na tũtigane na mahĩtia maitũ, na twĩcũranie ũhoro waku wa ma.
• 14. Tondũ ũcio Jehova nĩatũigĩire mũtino ũcio, na agatũma tũcokererũo nĩguo; amu Jehova Ngai witũ arutaga mawĩra make mothe na kĩhooto, no ithuĩ tũkarega kũigua mũgambo wake.
• 15. Na rĩu, wee Mwathani Ngai witũ, o wee warutire andũ aku bũrũri wa Misiri, na ũkĩmatongoria na guoko gwaku kwa hinya, ũkĩĩgĩĩra igweta inene mũno, o ta ũũ gũtariĩ ũmũthĩ; tũkuumbũra atĩ ithuĩ nĩ ithuĩ twĩhĩtie, tũkaagana.
• 16. Mwathani, ndagũthaitha wĩtĩkĩre kũhoreria marakara maku nĩ ũndũ wa ũthingu waku wothe, ũtige kũng’ũrĩkĩra itũũra rĩaku rĩa Jerusalemu rĩrĩa rĩakĩtwo kĩrĩma-inĩ gĩaku kĩamũre, amu itũũra rĩu rĩa Jerusalemu nĩrĩconorithĩtio rĩkĩonwo nĩ andũ othe arĩa matũthiũrũrũkĩirie, rĩo rĩene o na andũ aku othe, nĩ ũndũ wa mehia maitũ o na mawaganu ma maithe maitũ.
• 17. Tondũ ũcio-rĩ, wĩtĩkĩre gũthikĩrĩria ihoya rĩa ndungata ĩno yaku, wee Ngai witũ, na ũigue mathaithana mayo; nĩ getha ũcoke gũtũma ũthiũ waku ũtherere gĩikaro gĩaku kĩamũre, o kĩu gĩtũire gĩkirĩte ihooru; ndagũthaitha wĩtĩkĩre gwĩka ũguo nĩ ũndũ waku kĩũmbe, wee Mwathani.
• 18. Ningĩ Ngai wakwa, ndagũthaitha ũtege gũtũ gwaku, ũ’thikĩrĩrie; na ũracũrie maitho maku, wĩrorere ũrĩa gwitũ gũkirĩte ihooru, o na itũũra rĩu rĩĩtanĩtio na rĩĩtwa rĩaku. Tondũ tũtingĩeta gũkũrehere mathaithana macio nĩ ũndũ wa ũrĩa maũndũ maitũ ithuene maagĩrĩire; no twakũhoya ũguo nĩ ũndũ wa ũrĩa tha ciaku ciingĩhĩte.
• 19. Wee Mwathani, tũthikĩrĩrie! Wee Mwathani, tuohere! Wee Mwathani, tũtegere matũ maku ũtũtangĩre! Ndũkagonderere, wee Ngai wakwa. Ndagũthaitha ũguo nĩ ũndũ wa rĩĩtwa rĩaku wee mwene, tondũ itũũra rĩu rĩaku rĩĩtanĩtio na rĩĩtwa rĩaku, o na andũ aku magetanio narĩo.
• 20. Na rĩrĩ, rĩrĩa ndaaragia ũguo, ngĩhoyaga, na ngiumbũraga mehia makwa o na ma andũ aitũ Aisiraeli, o na ngĩthaithaga Jehova Ngai wakwa nĩ ũndũ wa kĩrĩma kĩrĩa kĩamũre kĩa Ngai wakwa-rĩ,
• 21. o hĩndĩ ĩo ndahoyaga ngĩoyoyagia mĩromo yakwa, nĩguo ndonire mũndũ ũcio ti Jibiraeli agĩũka harĩ niĩ ombũkĩte na ihenya; na nowe ndonete rĩngĩ na kĩoneki. Nake agĩgĩũka, agĩthengerera harĩ niĩ, o ta ihinda rĩrĩa ihaki rĩa hwaĩ-inĩ rĩrutagwo.
• 22. Nake agĩkĩnjarĩria, akĩ’menyithia ũhoro, akiuga ũũ: Atĩrĩrĩ, Danieli, ndakuumĩrĩra rĩu nĩ getha ngũũhĩgie ũkuũkĩrũo nĩ maũndũ.
• 23. O hĩndĩ ĩrĩa wambĩrĩirie gũthaithana-rĩ, nĩguo watho ũtuirũo, niĩ na niĩ ndatũmwo njũke harĩ wee, ngũhe ũhoro waguo tondũ wĩ mũndũ mwendeku makĩria. Rĩu-rĩ, ta gĩĩcũranie ũhoro ũyũ ngũkwĩra, na wĩrute gĩtũmi gĩa kĩoneki kĩu.
• 24. Atĩrĩrĩ, itũũra rĩanyu nĩrĩtuĩrĩirũo ituĩro rĩa ciumia mĩrongo mũgwanja, o itũũra rĩu rĩamũre rĩo rĩene, rĩĩ hamwe na andũ anyu o nao, Nĩ getha hagĩe na ihinda rĩa kũnina ũmaramari, Na rĩa gũtigana na mehia, Na rĩa kũhorohia waganu, Ningĩ nĩ getha ũhoro wa Ũthingu-ũrĩa-ũtagathira ũrehwo na ũtũũre ũrũmĩtio, Namo maũndũ marĩa maanoneka na cioneki mahingio, o na marĩa maanarathwo nĩ anabii; Ningi ũrĩa mwamũre mũno aitĩrĩrio maguta.
• 25. Atĩrĩrĩ, igua na ũmenye wega atĩ nĩgũkagĩa na ihinda rĩa ciumia mũgwanja kuuma rĩrĩa watho ũkaheanwo wa gũcoka gwaka Jerusalemu nginya rĩrĩa mũtongoria akoneka, ũrĩa mũitĩrĩrie maguta. Ningĩ ciumia mĩrongo ĩtandatũ na igĩrĩ ciathira-rĩ, Jerusalemu nĩrĩgakorũo rĩakĩkĩte wega, itũũra rĩo rĩene, na njĩra ciarĩo, o na mũtaro warĩo wa maĩ ũrĩa ũrĩthiũrũrũkĩirie; narĩo rĩgĩgaakwo-rĩ, nĩgũkagĩa na mahinda ma thĩna.
• 26. Nacio ciumia icio mĩrongo ĩtandatũ na igĩrĩ ciathira-rĩ, ũcio mũitĩrĩrie maguta nĩakoragwo, atigwo atarĩ kĩndũ. Ningĩ andũ a mũtongoria ũrĩa ũgoka thutha wake nĩmakonũha itũũra rĩu o rĩngĩ, na monũhe gĩikaro kĩrĩa kĩamũre. No mũtongoria ũcio nĩakaninwo nĩ nditi. Ningĩ nĩgũkagĩa mbaara o nginya ithirĩro-inĩ, na gũtuĩtwo atĩ no gũcoke gũkire ihooru.
• 27. Ningĩ arĩkanĩre kĩrĩkanĩro kĩrũmu na andũ aingĩ ihinda rĩa kiumia kĩmwe; nakĩo kiumia kĩu kĩaigananĩria-rĩ, atũme magongona matige kũrutwo, o namo mahaki ma njino. Nake ũrĩa wa gũkiria ihooru nĩagoka arehete maũndũ ma magigi, ta arĩ mo mathagu ombũkĩte namo; ningĩ o nginya ithirĩro rĩgakinya, o rĩrĩa rĩtuĩtwo-rĩ, ũrĩa wa gũkiria ihooru no atũũre aitagĩrĩrio matũkũya.

Home