Go Back

Danieli Chapter 8

• 1. Na rĩrĩ, rĩrĩa Belishazaru aakorirũo agĩthamaka-rĩ, o mwaka wa gatatũ wa gũthamaka kũu gwake, ngĩkĩona kĩoneki kĩngĩ, o niĩ Danieli, nakĩo kĩarũmanĩrĩire na kĩu kĩngĩ ndonete mbere.
• 2. Naguo ũndũ ũrĩa ndonire na kĩoneki kĩu nĩ ũyũ: Nĩ kuona ndonire ta ndĩ itũũra-inĩ rĩa Shushani, o bũrũri wa Elamu, na nĩrĩo mũciĩ wa mũthamaki; ningĩ o ngĩrota-rĩ, ngĩona ta ndĩ hũgũrũrũ-inĩ cia rũũĩ rũa Ulai.
• 3. Ningĩ ngĩgĩtiira maitho, ngĩcũthĩrĩria, ngĩona ndũrũme ĩrũngiĩ hũgũrũrũ-inĩ cia rũũĩ rũu, nayo yarĩ na hĩa igĩrĩ; nacio hĩa icio ciarĩ ndaya, na rũmwe rũacio rũkaraiha kũrĩ rũrĩa rũngĩ, naruo rũu rũrayaraya rũamerete thutha wa rũu rũngĩ.
• 4. Ngĩgĩcoka ngĩona ndũrũme ĩo ĩgĩkimana ĩrorete mwena wa ithũĩro, na wa gathigathini, o na wa gũthini, na gũtiarĩ nyamũ o na ĩmwe yahotaga kũmĩĩtiiria; ningĩ gũtiarĩ na wa kũhonokania harĩ yo. No gwĩka yekaga o ta ũrĩa ĩyendeire, na ĩgetũũgĩria.
• 5. Na rĩrĩa ndecũranagia ũhoro wayo, ngĩkĩona kĩrũhĩ gĩgĩũka, kiumĩte na mwena wa ithũĩro gĩgĩtuĩkania thĩ yothe, nakĩo gĩtiahutagia thĩ gĩgĩthiĩ; nakĩo kĩrũhĩ kĩu kĩarĩ na rũhĩa rũmwe rũnene mũno thiithi.
• 6. Nakĩo gĩgĩkinya he ndũrũme ĩo yarĩ na hĩa igĩrĩ, o ĩo ndonete ĩrũngiĩ hũgũrũrũ-inĩ, nakĩo gĩkĩmĩrũũgĩrĩra na hinya wakĩo wothe gĩthũgũtĩte.
• 7. Ningĩ ngĩcoka ngĩona gĩakuhĩhĩria ndũrũme ĩo, kĩhĩĩte nĩ marakara nĩ ũndũ wayo, gĩkĩmĩgũtha, gĩkĩmiuna hĩa icio ciayo cierĩ; na tondũ wa ũrĩa ndũrũme ĩo ĩtaarĩ na hinya wa gũgĩĩtiiria-rĩ, gĩkĩmĩikania, gĩkĩmĩgũithia thĩ, gĩkĩmĩrangĩrĩria na thĩ na gũtirĩ mũndũ wahotaga kũhonokia ndũrũme harĩ kĩo.
• 8. Nakĩo kĩrũhĩ kĩu gĩgĩĩtũũgĩria makĩria; no rĩrĩa kĩagĩire na hinya-rĩ, rũhĩa rũu rũakĩo rũnene rũkiunĩka, na ithenya rĩaruo hagĩkĩmera hĩa ingĩ nene inya, irorete mĩena-inĩ ĩrĩa huho iria inya cia matu-inĩ ihurutanagĩra.
• 9. Na rĩrĩ, rũmwe rũacio rũgĩcoka rũkĩgĩa na njiarĩrĩra ya kahĩa kanini, naruo rũhĩa rũu rũa njiarĩrĩra rũgĩcoka kũneneha mũno, rũrorete na mwena wa gũthini, na wa irathĩro, o na bũrũri ũrĩa mũthaka;
• 10. naruo rũkĩraiha, rũgĩkinya o mbũtũ-inĩ ya matu-inĩ, na rũgĩikania andũ amwe a mbũtũ ĩo, nao makĩgũa thĩ, naruo rũkĩmarangĩrĩria thĩ, o nacio njata imwe rũgĩciikia na thĩ, rũgĩcirangĩrĩria o nacio.
• 11. Ningĩ rũgĩcoka rũgĩĩtĩĩra mũtongoria wa mbũtũ ĩo ya matu-inĩ, rũkĩmũtunya mahaki make ma njino marĩa matũire macinagwo mũthenya o mũthenya, nakĩo gĩikaro gĩake kĩrĩa kĩamũre gĩkĩng’aũrũo.
• 12. Ningĩ mbũtũ ĩo ĩkĩneanwo harĩ ruo, hamwe na mahaki macio macinagwo mũthenya o mũthenya, nĩ ũndũ wa mehia, naruo rũkĩgũithia ũhoro-wa-ma na thĩ, rũgĩcoka gwĩka o ũrĩa rũĩendeire, na rũkĩgaacĩra.
• 13. Ningĩ ngĩcoka ngĩigua mũraika akĩaria; na mũraika ũngĩ agĩcoka akĩarĩria ũcio waaragia, akĩmũũria atĩrĩ, Rĩu-rĩ, maũndũ ma kĩoneki kĩu megũtũũra nginya hĩndĩ ĩ? Atĩ mahaki ma njino marĩa mahũthĩire gũcinwo mũthenya o mũthenya maagage gũcinwo, naguo waganu ũrĩa wa gũkiria ihooru ũtũũre o ho, nakĩo gĩikaro kĩrĩa kĩamũre gĩtũũre kĩrĩ o kĩrangĩrĩrie thĩ, o hamwe na mbũtũ ĩrĩa ya igũrũ?
• 14. Nake agĩcokia akiuga atĩrĩ, No mũhaka gũtũũre o ta ũguo gũtariĩ nginya hathire marũcinĩ o na mahwaĩ-inĩ ngiri igĩrĩ cia magana matatũ; na rĩrĩ, ihinda rĩu rĩathira-rĩ, nĩguo gĩikaro kĩu kĩamũre gĩgacoka gũtherio.
• 15. Na gũgĩkinya atĩrĩ, atĩ niĩ Danieli ndarĩkia kuona kĩoneki kĩu-rĩ, ngĩitĩka gũtuĩria gĩtũmi gĩakĩo. Na atĩrĩrĩ, ngĩkĩona mũhianĩre ta wa mũndũ arũngiĩ mbere yakwa,
• 16. ngĩcoka ngĩigua mũgambo wa mũndũ uumĩte o kũu gatagatĩ ka mũrĩmo ũyũ na ũrĩa ũngĩ, hũgũrũrũ-inĩ cia rũũĩ rũa Ulai, nake akĩanĩrĩra, akiuga atĩrĩ, Wee Jibiraili, ta taũrĩra mũndũ ũyũ gĩtũmi gĩa kĩoneki kĩu onete.
• 17. Tondũ ũcio agĩgĩthengerera harĩ niĩ, o hau ndarũngiĩ; na rĩrĩa okire, ngĩtuĩka nda nĩ guoya, ngĩgũa, ngĩturumithia ũthiũ thĩ; nowe akĩnjĩra ũũ: Atĩrĩrĩ, wee mũrũ wa mũndũ, ta thikĩrĩria ũhoro ũũmenye. Maũndũ ma kĩoneki kĩu-rĩ, makoniĩ ithirĩro-inĩ rĩa mahinda maya.
• 18. Na rĩrĩa aanjaragĩria, ngĩgwatwo nĩ toro mũnene, ngĩkoma ndurumithĩtie ũthiũ thĩ; nowe agĩcoka akĩ’hutia, akĩnjũkĩria na igũrũ,
• 19. akĩnjĩra ũũ: Atĩrĩrĩ, nĩngũkũmenyithia ũrĩa gũgatuĩka rĩrĩa mathũgũta marĩa marũrũ makonanio, o marĩa makonanio ithirĩro-inĩ; tondũ ũhoro ũyũ ũkoniĩ gĩathĩ kĩrĩa gĩtuĩtwo kĩa ihinda rĩa ithirĩro.
• 20. Ndũrũme ĩo wonire ĩĩ na hĩa igĩrĩ-rĩ, hĩa icio nĩcio athamaki a Media na Perisia.
• 21. Nakĩo kĩrũhĩ kĩu kĩarĩ na maguanyĩrĩ-rĩ, nĩkĩo mũthamaki wa Ũyunani. Naruo rũhĩa rũu kĩarĩ naruo thiithi rũnene nĩruo mũthamaki wakuo wa mbere.
• 22. Naho ha ũhoro wa rũhĩa rũu rũoinĩkire, o rũu rũacokire kũmera hĩa ingĩ inya ithenya rĩaruo-rĩ, hĩa icio inya nĩcio mothamaki mana marĩa makoima ũthamaki-inĩ ũcio; no matikagĩa na hinya taguo.
• 23. Ningĩ thutha-inĩ-rĩ, rĩrĩa wathani wamo ũgaitĩka gũthira, o rĩrĩa andũ magakorũo makĩrĩrĩirie kwagarara watho-rĩ, nĩgũkaarahũka mũthamaki ũngĩ, nake agakoragwo akĩheta ũthiũ nĩ wĩĩ, na akorũo amenyete maũndũ maingĩ ma hitho.
• 24. Ũcio-rĩ, nĩakagĩa na wathani wa hinya mũno, no ti ta hinya wa ũcio wa mbere; nĩakaninana o kũninana, na aikare agaacĩire, na ekage o ta ũrĩa eyendeire, namo makarau nĩakamaninũkia biũ, me hamwe na arĩa matĩaine na Ngai.
• 25. Ningĩ wara wake nĩguo ũgatũma maũndũ ma ũrĩa-ma maingĩhio maũndũ-inĩ marĩa agekaga, na nĩakenenehia na ngoro yake, ningĩ oragithie andũ aingĩ materĩgĩrĩire atĩ nĩmegũũka kũũragwo. O na ningĩ nĩagokĩrĩra Mũnene-wa-Anene; no rĩrĩ, nĩakaninwo o ro ũguo, atarĩ mũhutie na guoko kwa mũndũ.
• 26. Na atĩrĩrĩ, kĩoneki kĩu kĩa marũcinĩ na mahwaĩ-inĩ nĩ kĩa ma; no nĩ kaba ũhingĩre ũhoro wa kĩoneki kĩu ngoro, tondũ nĩgĩkũnina matukũ maingĩ gĩgĩkahingio.
• 27. Ningĩ niĩ Danieli ndaigua ũguo, ngĩkĩringĩka, na ngĩikara matukũ manyinyi ndĩ mũrũaru. No thutha ngĩcoka ngĩarahũka, ngĩcoka kũrutĩra mũthamaki wĩra. No ngĩgĩikara ndĩ o mũmaku nĩ kĩoneki kĩu, na ndionire wa kũndaũrĩra ũhoro wakĩo.

Home