Go Back

Danieli Chapter 12

• 1. Na atĩrĩrĩ, hĩndĩ ĩo nĩguo Mikaeli agokĩra, o we mũtongoria mũnene ũrĩa ũrũgamagĩrĩra ciana cia andũ anyu. Na nĩgũkagĩa ihinda rĩa mĩnyamaro mĩingĩ ĩtarĩ yonwo tayo mbere ĩo, kuuma o hĩndĩ ĩrĩa andũ anyu maambĩrĩirie gũtuĩka rũrĩrĩ rũgima o nginya hĩndĩ ĩo. No matukũ-inĩ macio andũ anyu nĩmakahonokio, o ũrĩa wothe ũgakorũo aandĩkĩtwo ibuku-inĩ.
• 2. Nao andũ aingĩ akuũ arĩa magakorũo makomete rũkũngũ-inĩ rũa thĩ nĩmakariũkio, amwe mariũkĩre muoyo-inĩ ũrĩa ũtagathira, nao arĩa angĩ mariũke nĩ getha maconorithio, na matũũre mamenekete mĩndĩ na mĩndĩ.
• 3. Nao arĩa marĩ ogĩ nĩmagacangarara ta ũtheri wa mũtambũrũko wa matu-mairũ, nao andũ arĩa macokagia andũ arĩa aingĩ njĩra-inĩ ya ũthingu matũũre makengete ta njata tene na tene.
• 4. Nowe Danieli-rĩ, ndeto iria nyandĩke ibuku-inĩ, ũcihingĩre ho na ũcicinĩrĩre mũhũri, o nginya hĩndĩ ĩrĩa ithirĩro rĩgakinya; amu andũ aingĩ makariũngaga ũũ na ũũ, naguo ũmenyi wongerereke ũingĩhe.
• 5. Thutha wa maũndũ macio, niĩ na niĩ Danieli ngĩgĩcoka ngĩcũthĩrĩria, ngĩona andũ angĩ erĩ marũngiĩ ho, ũmwe wao akarũgama hũgũrũrũ-inĩ cia mũrĩmo ũyũ wa rũũĩ rũu, nake ũcio ũngĩ akarũgama hũgũrũrũ-inĩ cia mũrĩmo ũrĩa ũngĩ.
• 6. Na ũmwe wao akĩarĩria mũndũ ũcio wehumbĩte nguo ya gatani, o ũcio warũngiĩ maĩ-inĩ igũrũ, akĩmũũria atĩrĩ, Maũndũ macio ma kũgegania megũikara nginya hĩndĩ ĩ magĩgakinya?
• 7. Nake mũndũ ũcio wehumbĩte nguo ya gatani, o we ũcio warũngiĩ maĩ-inĩ igũrũ, akĩambararia guoko gwake kwa ũrĩo, o na kwa ũmotho, na igũrũ, ngĩcoka ngĩigua ehĩta akĩgwetaga Ũrĩa-Ũtũire-Tene-na-Tene, akoiga atĩrĩ, Maũndũ macio megũikara o nginya ihinda rĩmwe rĩambe rĩthire, o na mahinda merĩ, o na nuthu ya ihinda; naguo ũhoro ũcio wa kũnina hinya wa andũ arĩa matĩaine na Ngai wathira-rĩ, maũndũ macio mothe nĩguo magathira.
• 8. Na niĩ ngĩkĩigua maũndũ macio, no ndiigana kũmenya gĩtũmi kĩamo, ngĩgĩcoka ngĩũria ũũ: Atĩrĩrĩ, Mwathi wakwa, kĩrĩkĩrĩro-inĩ kĩa maũndũ macio gũgakinya atĩa?
• 9. Nake agĩkiuga atĩrĩ, Wega waku no wĩthiĩre, wee Danieli, amu ndeto icio nĩ hingĩre na igacinĩrĩrũo mũhũri, nĩ getha ciikare o nginya hĩndĩ ĩrĩa ithirĩro rĩgakinya.
• 10. Andũ aingĩ nĩmagetheria mathirũo nĩ gĩko, na meyerũhie, na maikare ta makumuthĩtwo magathera; no rĩrĩ, andũ arĩa aaganu magakĩrĩrĩria o kwagana, na hatirĩ o na ũmwe wao ũkamenya gĩtũmi kĩa maũndũ macio; no andũ arĩa ogĩ nĩo makamamenya.
• 11. Na rĩrĩ, nĩgũkagĩa ihinda rĩa matukũ ngiri ĩmwe na magana merĩ ma mĩrongo kenda kuuma hĩndĩ ĩrĩa mahaki ma njino magathengio matige gũcoka gũcinwo, na ithenya rĩamo harehwo kĩndũ kĩa thahu kĩrĩa kĩngĩtũma bũrũri ũkire ihooru.
• 12. Gũkena-rĩ, nĩ ũrĩa ũgeterera nginya rĩrĩa matukũ magathira ngiri ĩmwe na magana matatũ ma mĩrongo ĩtatũ na matano.
• 13. No wee-rĩ, wĩthiĩre nginya o hĩndĩ ĩrĩa ithirĩro rĩgakinya; amu nĩũkahurũka, na rĩrĩa matukũ macio magathira ũkorũo ũrũngiĩ harĩa ũtuĩrĩirũo hatuĩke igai rĩaku.

Home