Go Back

Danieli Chapter 10

• 1. Atĩrĩrĩ, mwaka wa ĩtatũ ĩrĩa Kurusu, mũthamaki wa Aperisia, aakorirũo athamakĩte-rĩ, Danieli, ũcio wetagwo Beliteshazaru, akĩguũrĩrio maũndũ, namo maũndũ macio maarĩ ma ma, namo maakoniĩ kũgiana kũnene. Nake Danieli akĩigua maũndũ macio, na akĩheo hinya wa kũmenya gĩtũmi gĩa kĩoneki kĩu.
• 2. Atĩrĩ, matukũ-inĩ macio-rĩ, niĩ Danieli ndaikarĩte ciumia ithatũ ndĩĩthikĩire ngwatĩtwo nĩ kĩeha,
• 3. na ngehinga kũrĩa irio irĩ mũrĩo, o nayo nyama ndiamĩcamaga o na kana ndibei; ningĩ ndiehakaga maguta o na hanini, o nginya rĩrĩa ciumia icio ithatũ ciathirire.
• 4. Na rĩrĩ, mũthenya wa mĩrongo ĩĩrĩ na ĩna wa mweri wa mbere wa mwaka ũcio, ndakorirũo ndũgamĩte hũgũrũrũ-inĩ cia rũũĩ rũrĩa rũnene rũĩtagwo Hidekeli.
• 5. Ngĩtiira maitho, ngĩcũthĩrĩria, ngĩona mũndũ wĩhumbĩte nguo ya gatani, na akehotora mũcibi wa thahabu ĩrĩa theru ya Ufazu;
• 6. naguo mwĩrĩ wake watariĩ ta inagĩ rĩrĩa rĩĩtagwo thumarati, naguo ũthiũ wake ũkonagwo ũkĩhenia ta rũheni, namo maitho make makahaana ta imũrĩ cia mwaki, namo moko na magũrũ make magacangarara magathera o ta gĩcango kĩrĩa gĩthũĩtwo mũno; nako kayũ ka mũgambo wake gaatariĩ ta mũgambo wa kĩrĩndĩ kĩingĩ kĩa andũ.
• 7. Na niĩ Danieli nĩ niĩ nyiki ndonire kĩoneki kĩu, nĩ gũkorũo andũ arĩa twarĩ nao matiakĩonire; no nĩmaagwatirũo nĩ kĩinaino, magĩkĩũra nĩguo makehithe;
• 8. niĩ na niĩ ngĩgĩtigwo nyiki, ngĩona kĩoneki kĩu kĩnene. Hĩndĩ io ngĩthirũo nĩ hinya wakwa wothe, naguo ũthaka wakwa ũkĩgarũrũka ũgĩtuĩka ta ũtũti, na ngĩikara o ro ũguo itarĩ na hinya.
• 9. Ngĩcoka ngĩigua mũgambo wa ciugo ciake akĩaria, no ndaigua mũgambo wa ciugo icio ciake, ngĩgwatwo nĩ toro mũnene, ngĩgũa nyiniĩ, ngĩturumithia ũthiũ thĩ.
• 10. Na rĩrĩ, ngĩkĩhutio na guoko kwa mũndũ, nakuo guoko kũu gũkĩnjũkĩria na igũrũ, gũkĩndurithia ndu, o ’nyitĩte thĩ na hĩ ciakwa.
• 11. Nake mũndũ ũcio akĩnjarĩria akĩnjĩra ũũ: Atĩrĩrĩ, wee Danieli, mũndũ mwendeku makĩria, ta tega gũtũ ũigue ũrĩa ngũkwĩra, o na ũrũgame na igũrũ; tondũ ndũmĩtwo harĩ wee. Nake aanjĩra ũguo, ngĩkĩrũgama na igũrũ o ngĩinainaga.
• 12. Hĩndĩ ĩo agĩkĩnjĩra atĩrĩ, Danieli, tiga gwĩtigĩra, tondũ kwaria gwaku gũtũire kũiguagwo kuuma o mũthenya wa mbere ũrĩa waitĩkire gũtuĩria ũhoro ũyũ na ngoro yaku, na ũkĩĩnyihĩria Ngai waku; niĩ na niĩ njũkĩte rĩu nĩ ũndũ wa ciugo icio ciaku kĩũmbe.
• 13. No mũtongoria wa bũrũri wa Perisia nĩeyũmirie harĩ niĩ matukũ mĩrongo ĩĩrĩ na ũmwe, o nginya Mikaeli agĩũka akĩndeithia, na nĩwe ũmwe wa atongoria arĩa anene. Ningĩ rĩu arekanĩrĩirio na athamaki acio a Perisia.
• 14. Na rĩu ndĩgĩũkĩte harĩ wee, ngũmenyithie maũndũ marĩa magakora andũ anyu matukũ ma ithirĩro maakinya; ĩndĩ kĩoneki gĩkĩ gĩkahingio hathirĩte matukũ maingĩ.
• 15. Na atĩrĩrĩ, aarĩkia kũ’he ũhoro wa maũndũ macio ngĩkĩinamĩrĩra, ngĩroria ũthiũ thĩ, ngĩkĩremwo nĩ kwaria.
• 16. No rĩrĩ, mũndũ wĩ na mũhianĩre wa mũrũ wa mũndũ akĩ’hutia mĩromo, ngĩgĩcoka ngĩtumũra kanua, ngĩitĩka kwaria, ngĩĩra ũcio warũngiĩ mbere yakwa atĩrĩ, Mwathi wakwa, tondũ wa kĩoneki gĩkĩ nĩnjokereirũo nĩ maruo marĩa ndĩrarĩ namo, na nĩ’thirĩtwo nĩ hinya wakwa wothe.
• 17. Ningĩ wee mwathi wakwa, niĩ ndungata yaku, ndakĩhota atĩa kwaria nawe, wee mwathi wakwa? Tondũ nĩndathirĩtwo nĩ hinya wakwa o na mĩhũmũ yakwa.
• 18. Ningĩ ngĩcoka ngĩigua ndahutio rĩngĩ nĩ ũcio warĩ na mũhianĩre ta wa mũndũ, akĩnjĩkĩra hinya,
• 19. nake akĩnjĩra ũũ: Atĩrĩrĩ, wee mũndũ ũyũ mwendeku makĩria, tiga gwĩtigĩra. Ũrogĩa na thayũ! Wĩũmĩrĩrie, na wĩĩkĩre hinya! Na aarĩkia kũnjarĩria ũguo, ngĩcoka ngĩgĩa na hinya, ngiuga atĩrĩ, Rĩu mwathi wakwa ta nĩakĩarie, tondũ nĩũkĩnjĩkĩrĩte hinya.
• 20. Hĩndĩ ĩo agĩcoka akĩnjũria atĩrĩ, Anga nĩũmenyete kĩrĩa gĩtũmĩte njũke harĩ wee? Rĩu nĩngũcoka gũthiĩ, ngarũe na mũtongoria ũcio wa bũrũri wa Perisia; na ndarĩkia kuumagara-rĩ, mũtongoria wa bũrũri wa Ayunani nĩagoka o nake.
• 21. Na rĩu nĩngũkwĩra ũrĩa kwandĩkĩtwo maandĩko-inĩ marĩa ma ma. Na rĩrĩ, ndirĩ na ũngĩ wa kũndeithia maũndũ-inĩ macio tiga o mũtongoria ũcio wanyu wĩtagwo Mikaeli.

Home