Go Back

Ezekieli Chapter 5

• 1. Nawe, wee mũrũ wa mũndũ, wĩyoere rũhiũ rũa njora rũũgĩ, ũrũĩke o ta ũrĩa rũenji rũa mwenjani rũĩkagwo, wĩenje mũtwe naruo o na nderu; ningĩ ũcoke wĩyoere ratiri ya gũthima nayo, ũgayanie njuĩrĩ ĩo.
• 2. Nakĩo gĩcunjĩ gĩa gatatũ kĩayo ũgĩcinĩre na mwaki kũu itũũra-inĩ thĩinĩ, matukũ ma mũtharĩko maahinga; ningĩ woe gĩcunjĩ kĩngĩ gĩa gatatũ, ũkĩgũthe na rũhiũ ndwere ciothe ciakuo; nakĩo gĩcunjĩ kĩrĩa kĩngĩ gĩa gatatũ kiũmbũrũo nĩ rũhuho, niĩ na niĩ njomore rũhiũ rũa njora rũkĩrũmĩrĩre.
• 3. Ningĩ woe tũcuĩrĩ tũtarĩ tũingĩ njuĩrĩ-inĩ ĩo, na ũgĩtuoherere gĩcoora-inĩ kĩa nguo yaku.
• 4. O na ningĩ ũcoke woe tũmwe twatuo ũtũikie mwaki-inĩ thĩinĩ, ũtũcinĩre mwaki-inĩ; naho hau nĩho mwaki ũkoima ũtonye nyũmba yothe ya Isiraeli.
• 5. Ningĩ Mwathani Jehova oigĩte ũũ: Ha ũhoro wa Jerusalemu-rĩ, nĩ kũiga ndĩrĩigĩte o gatagatĩ ka ndũrĩrĩ, o na ngatũma rĩrigicĩrio nĩ mabũrũri.
• 6. Nĩ kũrema rĩremete rĩkarega matuĩro makwa ma cira, na rĩgeka maũndũ ma waganu gũkĩra ndũrĩrĩ icio ingĩ, o na rĩkarega irĩra cia watho wakwa wa kũrũmĩrĩrũo gũkĩra mabũrũri marĩa marĩrigicĩirie; nĩ gũkorũo andũ arĩo nĩmaregete matuĩro makwa ma cira, o naho ha ũhoro wa irĩra cia watho wakwa wa kũrũmĩrĩrũo-rĩ, matirũmagĩrĩra ũhoro wacio o na hanini.
• 7. Tondũ ũcio Mwathani Jehova oigĩte ũũ: Kuona atĩ nĩmũgĩĩte na ngũĩ gũkĩra ndũrĩrĩ iria imũrigicĩirie, na mũkaaga kũrũmĩrĩra irĩra cia watho wakwa wa kũrũmĩrĩrũo, o na kana mũrũmie matuĩro makwa ma cira, na ningĩ mũtiĩkĩte maũndũ maringaine na mawatho ma ndũrĩrĩ iria imũrigicĩirie-rĩ,
• 8. tondũ ũcio Mwathani Jehova oigĩte ũũ: Atĩrĩrĩ! Niĩ, o niĩ mwene-rĩ, ndĩ wa kũhũrana nawe, na nĩngakũhingĩria matuĩro makwa ma cira o kũu thĩinĩ waku ũkĩonagwo nĩ ndũrĩrĩ.
• 9. Na thĩinĩ waku nĩngeka maũndũ marĩa itarĩ ndeka, na marĩa itagacoka gwĩka mangĩ tamo o na rĩ, nĩ ũndũ wa maũndũ maku mothe marĩa waneka me thahu.
• 10. Tondũ ũcio maithe ma ciana makarĩĩra ciana ciao o kũu thĩinĩ waku, o nacio ciana irĩe maithe ma cio; na nĩngakũhingĩria matuĩro makwa ma cira o kũu thĩinĩ waku, namo matigari ma andũ aku ndĩmaharaganĩrie huho-inĩ ciothe.
• 11. Tondũ ũcio Mwathani Jehova oigĩte atĩrĩ, O ta ũrĩa niĩ ndũũraga muoyo-rĩ, tiitherũ nĩngakũnyihia, kuona atĩ nĩũthahĩtie handũ hakwa harĩa haamũre na maũndũ maku mothe mathũũre na marĩa me thahu, na tondũ ũcio riitho rĩakwa rĩtigacayanĩra, na ndikaiguanĩra tha.
• 12. Gĩcunjĩ gĩa gatatũ kĩa andũ aku-rĩ, gĩkaninũkio nĩ mũthiro, o na gĩthirĩrĩkĩre nĩ ng’aragu o kũu thĩinĩ waku; o nakĩo gĩcunjĩ kĩngĩ gĩa gatatũ kĩa andũ aku kĩgũe kĩũragĩirũo na rũhiũ rũa njora kũu ndwere-inĩ ciaku ciothe; o nakĩo gĩcunjĩ kĩrĩa kĩngĩ gĩa gatatũ ndĩkĩharaganĩrie mĩena yothe ĩrĩa yumaga rũhuho, njoke njomorithie rũhiũ rũa njora rũkĩrũmĩrĩre.
• 13. Ũguo nĩguo marakara makwa makahingio, namo mathũgũta makwa ngamehũnĩrĩria nao, na niĩ njikare ’horeire; na rĩrĩ, rĩrĩa ngakorũo ndĩmahingĩirie ũhoro wa atĩ makinyĩrũo nĩ mathũgũta macio makwa-rĩ, nĩrĩo andũ acio makamenya atĩ niĩ Jehova njarĩtie ũhoro ũcio nĩ ũndũ wa ũrĩa ndĩĩrutanĩirie.
• 14. O na ningĩ atĩrĩ, nĩngatũma ũtuĩke o ta kũndũ kwanangĩkĩte, na ũmeneke nĩ ndũrĩrĩ iria igũikaire na ndwere ciothe, o na ũmeneke nĩ andũ othe arĩa makuonaga makĩhĩtũka.
• 15. Naguo ũndũ ũcio wa kũmenwo na kũnyararũo nĩũgatuĩka wa gũtaarana, o na ũndũ wa kũgegania, harĩ ndũrĩrĩ iria igũikaire na ndwere ciothe, hĩndĩ ĩrĩa ngakũhingĩria matuĩro macio ma cira, ndakarĩte o na ndĩ mũthũgũtu, na ngũrũithie na mathũgũta manene mũno. Niĩ Jehova, nĩ niĩ njarĩtie ũhoro ũcio;
• 16. na hĩndĩ ĩo nĩguo ngamũtwarithĩria ng’aragu nene, ta arĩ mĩguĩ mĩũru ya kũninũkania ndehithĩtie ya kũmũnina biũ; na nĩngamũingĩhĩria ng’aragu, na ’nine mwĩhoko wanyu wothe wa irio.
• 17. Na nĩngamũrehithĩrie ng’aragu o na nyamũ njũru, nacio imũninĩre andũ anyu, na nĩmũkehĩrũo nĩ mũthiro, na mũtangĩke nĩ ũndũ wa gũitwo thakame; na nĩngagũcomorithĩria rũhiũ rũa njora rũgũkore. Nĩ niĩ Jehova njarĩtie ũhoro ũcio.

Home