Go Back

Ezekieli Chapter 41

• 1. Ningĩ akĩnginyia hekarũ-inĩ, agĩthima itingĩ ciakuo, igĩtuĩka ciaramĩte mĩkono ĩtandatũ mwena ũmwe, na mĩkono ĩtandatũ o ro ũguo mwena ũrĩa ũngĩ, naguo ũguo noguo wariĩ wa gĩikaro waiganaga.
• 2. O naguo wariĩ wa itonyero warĩ mĩkono ikũmi, nayo mĩena-inĩ ya itonyero rĩu mwena ũmwe-rĩ, warĩ mĩkono ĩtano, o naguo mwena ũrĩa ũngĩ warĩ mĩkono ĩtano o ro ũguo; ningĩ agĩthima ũraihu wayo, ũgĩtuĩka nĩ mĩkono mĩrongo ĩna, na kwarama mĩkono mĩrongo ĩĩrĩ.
• 3. Ningĩ agĩthiĩ arorete na thĩinĩ, agĩthima gĩtingĩ o gĩtingĩ gĩa icio cia itonyero-inĩ, ĩgĩtuĩka mĩkono ĩĩrĩ, narĩo itonyero rĩo rĩene rĩgĩtuĩka mĩkono ĩtandatũ; naguo wariĩ wa itonyero rĩu ũgĩtuĩka mĩkono mũgwanja.
• 4. Ningĩ hau mbere ya hekarũ akĩhathima ũraihu, naguo ũgĩtuĩka nĩ wa mĩkono mĩrongo ĩĩrĩ, O na wariĩ waguo mĩkono mĩrongo ĩĩrĩ, nake agĩkĩnjĩra atĩrĩ, Haha nĩho handũ harĩa hatheru mũno makĩria.
• 5. Ningĩ agĩthima rũthingo rũa nyũmba ĩo, rũgĩtuĩka mĩkono ĩtandatũ; naguo wariĩ wa kanyũmba o kanyũmba, tũu twa mĩena-inĩ, warĩ mĩkono ĩna, natuo nĩtuo twarigicĩirie nyũmba ĩo na ndwere ciothe.
• 6. Natuo tũnyũmba tũu twa mĩena-inĩ twaakĩrĩirũo mĩhari ĩngĩ ĩĩrĩ igũrũ rĩa mũhari wa mbere ta ngoroba, natuo twarĩ mĩrongo ĩtatũ mũhari o mũhari, natuo twaakĩtwo rũthingo-inĩ rũa nyũmba ĩo rũrĩa rũaakĩtwo nĩ ũndũ wa tũnyũmba tũu twa mĩena-inĩ twa kũmĩrigicĩria mĩena yothe nĩ getha tũikare thĩinĩ waruo, na tũtikanyitane na rũthingo rũa nyũmba ĩo ruo rũene.
• 7. Natuo tũnyũmba tũu twa mĩena tũgĩthiĩ tũkĩaraaramaga mbarĩ ya na igũrũ makĩria o makĩria, tondũ tũnyũmba tũu twarigicũkĩte nyũmba ĩo na ndwere ciothe, twakĩtwo tũgĩthiĩ na igũrũ o na igũrũ kũmĩthiũrũrũkĩria; tondũ ũcio, wariĩ wa nyũmba ĩo na igũrũ ũgĩkĩrĩrĩria kwarama; na ningĩ kwaambatagwo kuumĩtwo kanyũmba ka mũhuro o nginya kanyũmba kau ka igũrũ mũndũ agereire kanyũmba ka mũhari wa kerĩ.
• 8. Ngĩgĩcoka ngĩona atĩ mũthingi wa nyũmba ĩo nĩwokĩrĩirie na igũrũ na ndwere ciothe; nayo mĩthingi ya tũnyũmba tũu twa mĩena-inĩ ĩgĩtuĩka ya mũrangi mũgima wa mĩkono ĩtandatũ mĩraya.
• 9. Naruo rũthingo rũu rũaakĩtwo nĩ ũndũ wa tũnyũmba tũu twa mĩena-inĩ rũatunguhĩte mĩkono ĩtano mwena wa nja; naho harĩa haatigĩtwo ithenya gatagatĩ-inĩ haarĩ ha tũnyũmba twa mĩena-inĩ ya nyũmba ĩo
• 10. Narĩo ithenya rĩrĩa rĩatigĩtwo mbere ya tũnyũmba tũu, na rĩkarigicũka nyũmba ĩo na ndwere ciothe, rĩarĩ rĩa mĩkono mĩrongo ĩĩrĩ.
• 11. Nayo mĩrango ya tũnyũmba tũu twa mĩena-inĩ yang’ethanĩire na ithenya rĩu rĩatigĩtwo, naguo mĩrango ũmwe ũkarora gathigathini, o naguo mũrango ũrĩa ũngĩ ũkarora gũthini; naguo wariĩ wa ithenya rĩu rĩatigĩtwo warĩ mĩkono ĩtano.
• 12. Nayo nyũmba ĩrĩa yarĩ o mbere ya handũ harĩa haatigĩtwo mwanya mwena-inĩ ũrĩa warorete ithũĩro, wariĩ wayo warĩ mĩkono mĩrongo mũgwanja; naruo rũthingo rũayo rũatunguhĩte mĩkono ĩtano mĩena yothe, naguo ũraihu wayo warĩ mĩkono mĩrongo kenda.
• 13. Ũguo nĩguo aagĩthimire ũraihu wa nyũmba ĩo, ũgĩtuĩka nĩ wa mĩkono igana rĩmwe; narĩo ithenya rĩrĩa rĩaatigĩtwo mwanya, hamwe na nyũmba o na thingo ciayo-rĩ, ciarĩ o mĩkono igana rĩmwe;
• 14. o naguo mwena wa na mbere wa nyũmba ĩo, o na wa handũ hau haatigĩtwo mwanya mwena ũrĩa warorete irathĩro warĩ mĩkono igana rĩmwe o naguo.
• 15. O na ningĩ agĩthima ũraihu wa nyũmba ĩo yaakĩtwo handũ hau haatigĩtwo mwanya mwena wa na thutha, o hamwe na gĩthaku kĩayo kĩa mwena ũyũ, o na kĩa mwena ũrĩa ũngĩ, naguo ũgĩtuĩka nĩ mĩkono igana; ningĩ agĩthima hekarũ ya na thĩinĩ, o na ithaku iria ciakĩtwo rũri-inĩ rũa nja ĩo,
• 16. o na hingĩro, o na tũtirica tũrĩa tũceke, o na gĩthaku kĩrĩa kĩarigicĩirie kũu ngoroba-inĩ icio ithatũ, o kũu kũringaine na hingĩro, nakuo guothe kwarĩ kũhũrĩre mbaũ na thĩinĩ ndwere ciothe irutĩtio o thĩ ikaambatio o nginya tũtirica-inĩ, o tũtirica tũu twarĩ tũceke,
• 17. igakinyio o handũ-inĩ harĩa haarĩ igũrũ rĩa mũrango, o na ikahũrĩrũo nyũmba ya na thĩinĩ, o na ikahũrĩrũo na nja, o na ikahũrĩrũo mĩena yerĩ ya thingo iria ciarigicĩirie ndwere ciothe; nakuo kũu guothe gwathimĩtwo na gĩthimi.
• 18. Na rĩrĩ, mbaũ icio ciakururĩtwo mbica cia akerubi, o na mĩkĩndũ; naguo mũkĩndũ o wothe wakururĩtwo gatagatĩ-inĩ ka mũkerubi na mũkerubi ũrĩa ũngĩ, nake mũkerubi o mũkerubi aarĩ na mothiũ merĩ;
• 19. ũguo nĩguo gwakĩgĩire ũthiũ wa mũndũ ũrorete mũkĩndũ-inĩ mwena ũmwe, o na ũthiũ wa nyanake ya mũrũthi ũrorete mũkĩndũ-inĩ mwena ũrĩa ũngĩ; ũguo nĩguo nyũmba ĩo yathondeketwo kũndũ guothe kũrigicĩria ndwere ciothe.
• 20. O na ningĩ kuuma o thĩ o nginya igũrũ rĩa mũrango, gwakururĩtwo akerubi o na mĩkĩndũ; ũguo nĩguo rũthingo rũa hekarũ rũatariĩ.
• 21. Naho ha ũhoro wa hekarũ-rĩ, hingĩro cia mũrango ciaacũhĩtio na mĩena ĩna; o nacio thingo cia handũ harĩa hatheru haamũrĩtwo-rĩ, ciagemetio o ũndũ ũmwe na cia hekarũ yo nyene.
• 22. Nakĩo kĩgongona kĩarĩ kĩa mbaũ, na kĩarĩ kĩa mĩkono ĩtatũ kũraiha na igũrũ, o naguo ũraihu wakĩo wa mũkĩgiĩ warĩ mĩkono ĩĩrĩ; nayo mĩthia yakĩo, o na gĩtina gĩakĩo, o na mĩena yakĩo, ciathondeketwo na mbaũ ciothe; nake akĩnjĩra atĩrĩ, Ĩno nĩyo metha ĩrĩa ĩtũũraga ĩigĩtwo mbere ya Jehova.
• 23. Nakuo kũu hekarũ, o na handũ harĩa hatheru haamũrĩtwo, kwarĩ mĩrango ĩĩrĩ;
• 24. Nayo mĩrango ĩo o mũrango warĩ na mbaũ igĩrĩ, nacio cierĩ nĩciahingũranagĩrũo, igethuna cierĩ; o mũrango ũmwe ũkagĩa na mbaũ igĩrĩ, o naguo ũrĩa ũngĩ ũkagĩa na mbaũ igĩrĩ o ro ũguo.
• 25. O na ningĩ mbaũ-inĩ icio cia mĩrango ĩo ya hekarũ nĩgwakururĩtwo akerubi o na mĩkĩndũ, nayo yatariĩ o ta ĩrĩa yakururĩtwo thingo-inĩ; o na hau rũri-inĩ haahũrĩirũo mĩtĩ mĩraya mĩtungu mĩena yothe ya na nja.
• 26. O na mĩena-inĩ ĩo ya rũri-inĩ kwarĩ tũtirica tũceke, o na mĩhianĩre ya mĩkĩndũ, nacio ikagĩa mwena ũyũ o na mwena ũrĩa ũngĩ; ũguo nĩguo tũnyũmba twa mĩena-inĩ twa nyũmba ĩo twathondeketwo, o na mĩtĩ ĩrĩa mĩraya mĩtungu.

Home