Go Back

Ezekieli Chapter 2

• 1. Nake mũndũ ũcio akĩnjĩra atĩrĩ, Wee mũrũ wa mũndũ, wĩrũgamie na magũrũ maku, twaranĩrie nawe.
• 2. Na hĩndĩ ĩo aanjaragĩria, Roho wa Ngai agĩtonya thĩinĩ wakwa, akĩndũgamia na magũrũ makwa, na niĩ ngĩkĩigua ũcio ũraaria na niĩ.
• 3. Nake agĩkĩnjĩra atĩrĩ, Mũrũ wa mũndũ, nĩ kũrekia ngũkũrekia harĩ ciana cia Isiraeli, ũthiĩ kũrĩ ndũrĩrĩ icio nemu, nacio nĩcio ciagararĩte watho wakwa na ikanema, cio nyene o na maithe ma cio, o nginya mũthenya ũyũ tũrĩ;
• 4. nacio ciana icio nĩciĩĩndĩĩire na ikoma ngoro; nacio nĩcio ndakũrekia harĩ cio, nawe ũciĩre atĩrĩ, Mwathani Jehova oigĩte ũna na ũna.
• 5. Nacio nĩikamenya atĩ hoima mũnabii thĩinĩ wacio, o na ingĩkũigua kana irege gũkũigua, nĩ ũndũ kĩruka kĩu nĩ kĩremu.
• 6. No rĩrĩ, wee mũrũ wa mũndũ, menya ũkanaciĩtigĩra, o na kana wĩtigĩre ciugo ciacio, o na ingĩgatuĩka ta mahiũ ma nyeki-inĩ o na kana mĩigua harĩ wee, nawe ũigue ta ũikarĩte harĩ ing’aurũ. Menya wĩtigĩre ciugo ciacio, o na kana ũirio ngoro nĩ mĩrorere yacio, o na kũngĩtuĩka atĩ kĩruka kĩu nĩ kĩremu o na rĩu.
• 7. Wee nĩ kũhe ũgacihe ũhoro wakwa, o na ingĩkorũo nĩikaũigua, o na kana irege kũũigua; nĩ ũndũ nĩ nemu mũno mũno.
• 8. No rĩrĩ, wee mũrũ wa mũndũ, igua ũrĩa ngũkwĩra; wee-rĩ, menya ũreme ta ũrĩa kĩruka kĩu kĩremete. Ta athamia kanua gaku wĩrĩĩre kĩrĩa ngũkũhe.
• 9. Na niĩ ndacũthĩrĩria-rĩ, ngĩkĩona ndambũrũkĩirio guoko; nakuo gũgĩkorũo kũnyitĩte ibuku rĩa gĩkũnjo;
• 10. nake akĩrĩkũnjũra akĩrĩiga mbere yakwa, narĩo rĩgĩkorũo rĩrĩ rĩandĩke thĩinĩ o na igũrũ. Na rĩrĩ, ibuku rĩu rĩaandĩkĩtwo ũhoro wa macakaya, na kĩrĩro, o na kĩeha.

Home