Go Back

Ezekieli Chapter 10

• 1. Hĩndĩ ĩo ngĩcũthĩrĩria, na atĩrĩrĩ, o rĩera-inĩ, igũrũ rĩa mĩtwe ya Akerubi, hagĩkĩoneka kĩndũ gĩtariĩ ta ihiga rĩa yakuti rĩigĩtwo ho, naguo mũhianĩre warĩo watariĩ ta wa gĩtĩ-kĩa-ũnene.
• 2. Nake akĩarĩria mũndũ ũcio wehumbĩte nguo cia gatani, akĩmwĩra atĩrĩ, Thiĩ ũtonye gatagatĩ-inĩ ka magũrũ macio marathiũrũrũka, o hau ruungu rũa harĩa Akerubi marĩ, ũiyũrie hĩ ciaku cierĩ makara ma mwaki ũmarutĩte gatagatĩ-inĩ ga Akerubi, ũcoke ũmahurunje kũu itũũra-inĩ. Nake agĩgĩthiĩ agĩtonya kuo ngĩĩonagĩra na maitho makwa.
• 3. Na rĩrĩ, hĩndĩ ĩo mũndũ ũcio aatonyire thĩinĩ-rĩ, Akerubi acio magĩkorũo marũgamĩte mwena wa ũrĩo wa nyũmba ĩo, narĩo itu rĩkaiyũra nja ĩrĩa ya na thĩinĩ.
• 4. Naguo riri wa Jehova ũkĩambata na igũrũ uumĩte harĩ Akerubi, ũkĩrũgama igũrũ rĩa hingĩro-inĩ ya nyũmba ĩo; nayo nyũmba ĩo ikĩiyũrũo nĩ itu rĩu, nayo nja ĩkĩiyũrũo nĩ ũkengi wa riri wa Jehova.
• 5. Naguo mũrurumo wa mathagu ma Akerubi ũkĩiguwo na kũu nja ĩrĩa ya nyumĩrĩra, o ta arĩ mũgambo wa Mũrungu Mwene-Hinya-Wothe rĩrĩa ekwaria.
• 6. Na gũgĩkinya atĩrĩ, atĩ hĩndĩ ĩrĩa aathire mũndũ ũcio wehumbĩte nguo cia gatani, akĩmwĩra ũũ: Oya mwaki, ũũrute gatagatĩ-inĩ ka magũrũ marĩa megũthiũrũrũka, o hau gatagatĩ-inĩ ga Akerubi-rĩ, agĩgĩtonya, akĩrũgama mwena-inĩ wa kũgũrũ kũmwe kwamo.
• 7. Nake Mũkerubi ũmwe agĩtambũrũkĩria guoko gwake gatagatĩ-inĩ ka Akerubi, agĩgũkinyia o hau mwaki ũcio warĩ gatagatĩ ka Akerubi, akĩruta ũmwe waguo, akĩwĩkĩra moko-inĩ ma mũndũ ũcio wehumbĩte nguo cia gatani, nake akĩwoya agĩcoka akiuma.
• 8. Nao Akerubi acio makĩonwo ta me na moko o ta ma mũndũ hau ruungu rũa mathagu mao.
• 9. Na niĩ ngĩcũthĩrĩria, na atĩrĩrĩ, ngĩona magũrũ ta ma ngari mana me mwena-inĩ wa Akerubi, o ũmwe ũmwe akagĩa na kũgũrũ kũmwe mwena-inĩ wake; namo magũrũ macio makĩonwo, makonagwo mahaana ta rangi wa inagĩ rĩrĩa rĩĩtagwo thumarati.
• 10. Naho ha ũhoro wa ũrĩa monagwo mahaana-rĩ, mothe mana maarĩ na mũhianĩre o ũmwe, na magaikara o ta kũgũrũ kũmwe gũtonyetio thĩinĩ wa kũrĩa kũngĩ.
• 11. Ningĩ rĩrĩa megũthiĩ, magatwarana hamwe na mĩena ĩo yothe ĩna, na matingĩgarũrũka magĩthiĩ; no rĩrĩ, o kũndũ kũrĩa kĩongo kĩaroraga-rĩ, nokuo merekagĩra; na matingĩgarũrũka magĩthiĩ.
• 12. Naguo mwĩrĩ wao wothe, o na mĩgongo yao, o na moko mao, o na mathagu mao, o na magũrũ mao, acio maarĩ namo ta ma ngari, kwaiyũire maitho mamarigicĩirie na mĩena yothe.
• 13. Ngĩgĩcoka ngĩĩiguĩra magũrũ macio magĩĩtwo ũũ: magũrũ marĩa mathiũrũrũkaga.
• 14. Na rĩrĩ, kĩũmbe o gĩothe kĩarĩ na mothiũ mana; ũthiũ wakĩo wa mbere warĩ wa Mũkerubi, naguo ũthiũ wa kerĩ warĩ wa mũndũ, naguo ũthiũ wa gatatũ warĩ wa mũrũthi, naguo ũthiũ wa kana warĩ wa nderi.
• 15. Nao Akerubi acio makĩambata na igũrũ. Na rĩrĩ, kĩũmbe kĩu gĩothe kĩrĩ muoyo nokĩo kĩrĩa ndonete o kũu gũkuhĩ na rũũĩ rũa Kebari.
• 16. Na rĩrĩ, hĩndĩ ĩrĩa Akerubi acio megũthiĩ-rĩ, o namo magũrũ magathiĩ mĩena-inĩ yao; ningĩ hĩndĩ ĩrĩa Akerubi maambararia mathagu mao moime thĩ, o namo magũrũ matiatigagwo, kana makoima mĩena-inĩ yao.
• 17. Na hĩndĩ ĩrĩa maarũgama, magũrũ o namo makarũgama; na rĩrĩa maambata na igũrũ, o namo magũrũ makaambatania namo; nĩ gũkorũo roho wa muoyo warĩ thĩinĩ wamo.
• 18. Naguo riri wa Jehova ũgĩcoka ũkiuma igũrũ rĩa hingĩro ya mũromo wa nyũmba ĩo, ũkĩrũgama igũrũ rĩa Akerubi.
• 19. Nao Akerubi makĩambararia mathagu mao na igũrũ, makĩambata na igũrũ moime thĩ; ngĩmeonagĩra na maitho makwa rĩrĩa moimagarire, namo magũrũ maatwaranaga nao me mĩena-inĩ yao; nao makĩrũgama mũromo-inĩ wa kĩhingo kĩa mwena wa irathĩro wa nyũmba ya Jehova; naguo riri wa Ngai wa Isiraeli warĩ o kũu igũrũ rĩao.
• 20. Kĩu nokĩo kĩũmbe kĩrĩ muoyo kĩrĩa ndonete kĩĩ mũhuro wa Ngai wa Isiraeli, rĩrĩa ndarĩ o kũu gũkuhĩ na rũũĩ rũa Kebari na ngĩkĩmenya atĩ nĩo Akerubi.
• 21. Nao o ũmwe ũmwe aarĩ na mothiũ mana, o na ningĩ o ũmwe ũmwe aarĩ na mathagu mana; ningĩ maarĩ na moko o ta ma mũndũ o hau ruungu rũa mathagu macio mao.
• 22. Naho ha ũhoro wa mũhianĩre wa mothiũ mao-rĩ, nomo macio ndonete rĩrĩa ndarĩ o kũu gũkuhĩ na rũũĩ rũu rũa Kebari. Ũguo noguo mũhianĩre wao watariĩ, na noguo maahaanaga o ene. Nao othe, o ũmwe ũmwe, nĩaathiaga na mbere, marũngĩrĩirie.

Home