Go Back

Jeremia Chapter 52

• 1. NA RĨRĨ, Zedekia aarĩ wa mĩaka mĩrongo ĩĩrĩ na ũmwe hĩndĩ ĩrĩa aambĩrĩirie gũthamaka, agĩthamaka mĩaka ikũmi na ũmwe Jerusalemu; nake nyina etagwo Hamutali, mwarĩ wa Jeremia wa kũu Libina.
• 2. Nake agĩĩka maũndũ marĩa monagwo marĩ moru nĩ Jehova, o ta ũrĩa maũndũ mothe maatariĩ marĩa Jehoiakimu ekaga.
• 3. Na rĩrĩ, tondũ wa ũrĩa Jehova aarakarĩte-rĩ, nĩkĩo maũndũ maya maakinyĩrĩire andũ a Jerusalemu na Juda, ma atĩ ameherie mbere yake, ta maikĩtio na kĩano; nake Zedekia agĩũkĩrĩra mũthamaki wa Babuloni, akĩmũrema.
• 4. Na gũgĩkinya atĩrĩ, atĩ mwaka wa kenda ĩrĩa Zedekia aakorirũo athamakĩte, o mweri wa ikũmi, mũthenya wa ikũmi wa mweri ũcio-rĩ, Nebukadirezaru, mũthamaki wa Babuloni, agĩũka, we mwene, o na mbũtũ yake yothe ya ita, agatharĩke Jerusalemu, nake agĩkĩamba hema ciake arĩakĩrĩre; ningĩ andũ ake magĩaka inyamũ ndaya na igũrũ cia mũtharĩko mbarĩ ciothe cia rũirigo rũarĩo.
• 5. Itũũra rĩu rĩgĩkĩrigicĩrio nĩ getha rĩtunyanwo o nginya mwaka wa ikũmi na ũmwe ĩrĩa Zedekia aakorirũo athamakĩte.
• 6. Na rĩrĩ, mũthenya wa kenda wa mweri wa ĩna-rĩ, ng’aragu ĩgĩkorũo ĩĩhĩte mũno mũno itũũra-inĩ rĩu, o nginya gũkĩaga irio cia kũrĩo nĩ andũ a bũrũri ũcio.
• 7. Hĩndĩ ĩo rũthingo rũa itũũra rĩu rũgĩtuwo mwanya wa gũtonyerũo; nao mona ũguo andũ othe a ita magĩkĩũra ũtukũ, makĩgera mũromo-inĩ ũrĩa wakuhanĩrĩirie na mũgũnda wa mũthamaki, gatagatĩ ga thingo iria cierĩ; (nao Akalidei nĩ kũrigicĩria maarigicĩirie itũũra rĩu na mbarĩ ciothe) nao andũ a ita magĩĩthiĩra na njĩra ya gũthiĩ Araba.
• 8. No rĩrĩ, mbũtũ cia ita cia Akalidei igĩteng’eria mũthamaki Zedekia, ikĩmũkinyĩrĩra werũ ũrĩa mwaraganu wa Jeriko; nayo mbũtũ yake yothe ya ita ĩkĩharaganio ĩkĩmũtigĩrĩra.
• 9. Hĩndĩ ĩo Akalidei magĩkĩnyita mũthamaki, makĩmũtwara kwĩ mũthamaki wa Babuloni o kũu Ribila; nake akĩmũtuĩra cira wa ũrĩa ekũmwĩka.
• 10. Nake mũthamaki wa Babuloni akĩũragithĩria ariũ a Zedekia o hau mbere yake ameroreire o ro ũguo, o na akĩũragithĩria anene othe a Juda kũu Ribila;
• 11. nake Zedekia we mwene akĩmũkũũrithia maitho; ningĩ mũthamaki ũcio wa Babuloni agĩcoka akĩmuoha na bĩngũ akĩmũtwara Babuloni, nakuo kũu akĩmũikithia korokoro-inĩ, nake agĩgĩtũũra ho o nginya mũthenya ũrĩa aakuire.
• 12. Na rĩrĩ, mweri wa ĩtano, o mũthenya wa ikũmi wa mweri o ro ũcio, naguo nĩguo warĩ mwaka wa ikũmi na kenda ĩrĩa mũthamaki Nebukadirezaru, ũcio mũthamaki wa Babuloni, aakorirũo athamakĩte-rĩ, Nebuzaradani, mũnene wa arangĩri ake, ndungata ya mũthamalu, agĩkinya Jerusalemu;
• 13. nake agĩgĩcina nyũmba ya Jehova, o na nyũmba ya mũthamaki, o na nyũmba ciothe cia Jerusalemu, o iria ciothe ciarĩ nene, agĩcicina na mwaki.
• 14. Nayo mbũtũ yothe ya ita ya Akalidei ĩrĩa yarĩ na mũnene ũcio wa arangĩri ĩgĩtharia thingo cia Jerusalemu mbarĩ ciothe.
• 15. Nake Nebuzaradani, mũnene wa arangĩri, agĩtaha andũ amwe akĩa mũno, o na matigari ma andũ arĩa maatigarĩte kũu itũũra-inĩ, o na andũ arĩa metwarĩte o ro ũguo o ene kwĩ mũthamaki wa Babuloni, o na matigari ma kĩrĩndĩ kĩrĩa kĩngĩ, agĩthiĩ nao.
• 16. No rĩrĩ, mũnene ũcio wa arangĩri agĩtiga andũ amwe athĩni mũno a bũrũri ũcio kuo matuĩke acehi mĩthabibu, o na arĩmi.
• 17. Na rĩrĩ, itugĩ cia gĩcango iria ciarĩ o kũu nyũmba ya Jehova thĩinĩ, o na inyamũ iria ciahaanaga ngari, o na itangi rĩrĩa rĩetagwo karia ga gĩcango, iria ciarĩ o kũu nyũmba ya Jehova thĩinĩ-rĩ, Akalidei magĩcitinangia tũcunjĩ, nakĩo gĩcango gĩacio magĩgĩtwara kũu Babuloni.
• 18. O nacio nyũngũ, na ihakũri, na tũmĩĩhato twa mũrarĩ wa ndambĩ, na mbakũri, na iciko, o na indo ciothe cia icango iria ciarutagwo wĩra nacio, magĩcioya, magĩthiĩ nacio.
• 19. Ningĩ thĩinĩ wa ikombe, na ngĩo cia makara, na mbakũri iria nene, na nyũngũ, na mĩtĩ ya matawa, na iciko, na mbakũri iria nyinyi-rĩ, mũnene ũcio wa arangĩri agĩĩthiĩra na iria ciarĩ cia thahabu theri, kana o betha theri, we mwene.
• 20. Na rĩri, itugĩ icio cierĩ, o na karia kau, o na ndegwa iria ikũmi na igĩrĩ cia gĩcango cia gĩtina gĩako, o na inyamũ iria ciahaanaga ngari, iria Suleimani aathondekete cia kũigwo nyũmba ya Jehova, gĩcango kĩa indo icio ciothe-rĩ, gĩtingĩathimĩkire.
• 21. Naguo ũraihu wa gĩtugĩ o gĩtugĩ warĩ mĩkono ikũmi na ĩnana, nakĩo gĩgĩthimwo-rĩ, kĩarigicĩirio rũrigi rũa mĩkono ikũmi na ĩĩrĩ, naguo ũtungu wakĩo warĩ wa ciara inya, na kĩarĩ na irima gatagatĩ.
• 22. Ningĩ kĩarĩ kĩongo kĩrĩ mũnduru gĩa gĩcango igũrũ rĩakĩo, naguo ũraihu wa kĩongo kĩu warĩ mĩkono ĩtano; ningĩ nĩkwarĩ kĩnyamũ gĩtumĩtwo ta rũgara, o na makomamanga, kĩongo-inĩ kĩu igũrũ, nacio indo icio ciothe ciarĩ cia gĩcango. O nakĩo gĩtugĩ kĩrĩa kĩngĩ gĩa kerĩ gĩathondeketwo o ro ũguo ta kĩu kĩngĩ, na gĩkagĩa na makomamanga.
• 23. Na rĩrĩ, makomamanga marĩa maacuhĩte mĩena-inĩ, maarĩ mĩrongo kenda na matandatũ, no makomamanga mothe inyamũ-inĩ o kĩmwe kĩmwe gĩa icio itumĩtwo ta rũgara, maarĩ igana rĩmwe.
• 24. Nake mũnene ũcio wa arangĩri akĩnyita Seraia, mũthĩnjĩri-Ngai ũrĩa mũnene, o na Zefania, mũthĩnjĩri-Ngai ũrĩa wa kerĩ, o na andũ arĩa atatũ maaikaragia mũrango;
• 25. nakuo kũu itũũra-inĩ thĩinĩ akĩnyita mũrori ũmwe wa maũndũ ma nyũmba ya mũthamaki, ũrĩa waigĩtwo arorage andũ a ita, o na andũ mũgwanja thĩinĩ wa arĩa maaikaranagia na mũthamaki, arĩa aakorire itũũra-inĩ rĩu, o na karani wa mũnene wa mbũtũ cia ita ũrĩa waandĩkaga andũ a bũrũri a gũthiĩ ita; o na andũ angĩ mĩrongo ĩtandatũ a bũrũri ũcio, arĩa monekire itũũra-inĩ rĩu.
• 26. Nake Nebuzaradani, mũnene ũcio wa arangĩri, agĩkĩmanyita, akĩmatwarĩra mũthamaki wa Babuloni o kũu Ribila.
• 27. Nake mũthamaki wa Babuloni akĩmahũra, akĩmoragithĩria o kũu Ribila, bũrũri wa Hamathu. Ũguo nĩguo andũ a Juda maatahirũo makĩrutwo bũrũri wao.
• 28. Aya nĩo andũ arĩa Nebukadirezaru aatahire agĩthiĩ nao; mwaka wa mũgwanja-rĩ, aanyitire Ayahudi ngiri ithatũ na mĩrongo ĩĩrĩ na atatũ;
• 29. naguo mwaka wa ikũmi na ĩnana ĩrĩa Nebukadirezaru aakorirũo athamakĩte, agĩcoka agĩtaha andũ magana manana ma mĩrongo ĩtatũ na erĩ amarutĩte Jerusalemu;
• 30. o naguo mwaka wa mĩrongo iĩrĩ na ĩtatũ ĩrĩa Nebukadirezaru aakorirũo athamakĩte-rĩ, Nebuzaradani, mũnene wa arangĩri, agĩtaha Ayahudi angĩ magana mũgwanja ma mĩrongo ĩna na atano; nao andũ acio othe maarĩ ngiri inya cia magana matandatũ.
• 31. Na gũgĩkinya atĩrĩ, atĩ mwaka wa mĩrongo ĩtatũ na mũgwanja kuuma hĩndĩ ĩrĩa Jehoiakini, mũthamaki wa Juda, aatahirũo, o mweri wa ikũmi na ĩĩrĩ, o na mũthenya wa mĩrongo ĩĩrĩ na ĩtano wa mweri ũcio-rĩ, Evilimerodaku, mũthamaki wa Babuloni, agĩtũũgĩria Jehoiakini, mũthamaki wa Juda, akĩmũruta korokoro-inĩ o mwaka ũrĩa aambĩrĩirie gũthamaka,
• 32. nake akĩmwarĩria na ũhoreri, akĩmũtũũgĩria na ũndũ wa kũmũigĩra gĩtĩ gĩa ũthamaki mbere ya itĩ cia athamaki arĩa angĩ maarĩ hamwe nake kũu Babuloni.
• 33. Nake akĩmũkũũranĩria nguo ciake cia korokoro-inĩ, nake Jehoiakini agĩtũũra arĩanagĩra irio nake matukũ mothe marĩa aatũũrire muoyo.
• 34. Naho ha ũhoro wa indo cia kũmũtũũria-rĩ, aaheagwo hĩndĩ ciothe nĩ mũthamaki wa Babuloni, o mũthenya indo ciaguo, matukũ mothe marĩa aatũũrire muoyo, o nginya hĩndĩ ĩrĩa aakuire.

Home